▪ Huata 29​pi Jesús bautizarijujpimi Jehová Diosca Sumo Sacerdoteshna cachun Jesustaca agllarca. ¿Imamandata shina nipanchi? Imashinami israelitacunapa tiempopica templo huasipi Sumo Sacerdote altarpi animalcunata rupachishpa sacrificiocunata cun carca. Shinallatami Jesús huañushpaca shuj sacrificiota cujun cuenda carca. Chaipaca Jesusca bautizarinami carca. Shinami Jehovapa “munaita” pactachingapaj munashcata ricuchirca (Gál. 1:4; Heb. 10:5-10). Huata 29​pi Jesús bautizarijpimi Jehová Diosca paita adorachun shuj templo huasitashna callarichirca. Cai templo huasipishna Jehovata pai munashcashna ñucanchicuna adorai ushangapaca Jesusmi paipa causaita curca (Mat. 3:16, 17; Heb. 5:4-6).

Shuj templo huasitashna Jehová Dios callarichishcamandami shuj Sumo Sacerdote chaipi sirvichun minishtirirca. Paipa ayudahuanmi Jehovataca pai munashcashna adoraita usharin. Chaimi Jehová Diosca Jesús sumo sacerdote cachun ‘ushaita, paipa jucha illaj espiritutapash’ curca (Hech. 10:37, 38; Mar. 1:9-11). ¿Imamandata Jesús nara huañujpillatami Jehová Diosca Sumo Sacerdote cachun agllarca nipanchi? Chaipaca Aarón runagumanda, paipa familiapuramandallata agllashca sumo sacerdotecunamandapash yachajupashunchi.

Sumo Sacerdotellami Santísimo ucuman yaicuna can nishpami Moisesman Cushca Leypica mandajurca. Santísimo ucuman yaicungapaca shuj cortina telami jarcajurca. Sumo sacerdoteca Juchata Anchuchina Punllapillami chai cortina telata pascashpa Santísimo ucuman yalin carca (Heb. 9:1-3, 6, 7). Jehová Diosca Aaronbash, paipa familiapuramanda jaricunapash ‘quilpashca huarcuriajuj telata’ nara pascashpa yalijpillatami Sumo Sacerdotecuna cachun agllan carca. Shina cuendami Jesús nara huañujpillata Jehová Diosca sumo sacerdote cachun Jesustaca agllarca. Chai jipami Jesusca ‘quilpashca huarcuriajuj telata pascashpa’ yalijuj cuenda cieloman rirca. ‘Chai telaca’ Jesuspa ‘cuerpotami’ ricuchin (Heb. 10:20). Chaimi apóstol Pabloca Jesusca Sumo Sacerdoteshnami shamurca nirca. Jesús huañushca jipaca “jahua pachapi tiajuj Taita Diospaj ñaupajmanmi, ñucanchimanda cararingapaj yaicurca” (Heb. 9:11, 24).

▪ ¿Imahora, imashinata mushuj pactoca tiai callarirca? Jesús jahua cieloman rishpami ñucanchimanda paipa jucha illaj causaita cushcata Jehovapa ñaupajpi ricuchirca. Chai punllamandapachami cai mushuj pactoca tiai callarirca. Mushuj pacto tiai callarichunga cai quimsa yuyaicunami pactarina carca.

Primero, Jehovapa ñaupajpimi Jesusca presentarirca. Segundo, paipa jucha illaj causaitami gentecunamanda cushcata ricuchirca. Tercero, Jehová Diosca Jesuspa yahuar jichashcatami chasquirca. Shinami cai mushuj pactoca tiai callarirca.

Imahorapacha Jesús ñucanchi juchacunamanda huañushcata Jehová Dios chasquishcataca Bibliapica na nijunllu. Chaimi cai mushuj pacto imahorapacha tiai callarishcataca na ni ushapanchi. Shinapash Pentecostés punllapa chunga punllacuna faltajujpillatami Jesusca cieloman rirca (Hech. 1:3). Chai tiempopimi Jehová Diosca Jesús ñucanchicunamanda huañushcataca chasquishcanga (Heb. 9:12). Shinaca mushuj pactoca Pentecostés fiestapimi Jehová Dios Jesús ñucanchimanda huañushcata callarirca ricui ushapanchi (Hech. 2:1-4, 32, 33). Chai tiempopimi cai mushuj pacto tiai callarishcata ricupanchi.

Jesús ñucanchi juchacunamanda huañushcata Jehová Dios chasquijpimi cai mushuj pactoca tiai callarirca. Y chai pactopillatami ungidocunatapash chasquirca. Chaipimi Jesusca Sumo Sacerdoteshna mandai callarirca. Pai huañushcamandami ñucanchicunaca Jehovataca pai munashcashna adorai ushapanchi (Heb. 7:25; 8:1-3, 6; 9:13-15).