Shina nijpica ninandami asircani. Ñuca amigo religión cosascunamanda parlanata gushtashcataca yaitapash na yarcanichu. “Bibliamandaca ¿canga imata yachanguiyari?” nishpa tapujpica upallami quidarca. Pero jipamanga, “ñuca mamaca testigo de Jehovami can” nishpami villahuarca. “Chaimi Bibliamanda huaquin cosascunata yachachihuarca” nircami. Shina nijpimi chai cosascunamanda ashtahuan parlahuai nircani.

Ñuca amigohuanga casi tuta enteromi parlarcanchi. Ñuca amigoca, “Bibliapica cai mundotaca Diablomi mandajun ninmi” nishpami parlahuarca (Juan 14:30). Chaita nunca na uyashca caimandami manllarishca quidarcani. Ñucaca cai mundotaca shuj ali Dios mandajushcatami uyashcarcani. Pero cai mundopi ashtaca nali cosascunata ricuimandami Taita Dios cai mundota mandajujta crinaca difícil carca. 26 huatacunatalla charishpapash ashtaca nali cosascunata ricuimandami ninanda preocuparishpa puñuitapash na ushan carcani.

Ñuca taitaca Estados Unidospi Fuerza Aérea nishcapimi piloto cashcarca. Chaimandami huahua cashca horasmandapacha shuj guerra nuclear talvez tianataca ali yacharcani. Chai guerra callarichunga shuj botonda llapinallami faltarca. Shinallata soldadocunapash listomi carca. California llactapi universidadman rijujpica Vietnam llactapica shuj guerrami tiarca. Chai punllacunaca llaqui llaquimi carca. Estudiantecunapa huelgacunapimi participai callarircani. Policiacunaca garrotecunahuanmi catirian carca. Shinallata gascunata shitajpimi respiraitapash na ushashpa llaquichi tucun carcanchi. Chai tiempocunapica ashtaca protestacunami tiarca. Shinallata politicocunatapashmi huañuchin carca. Chaimandami causaica shinlli carca. Gentecunaca shuj shuj yuyaicunatami charirca. Chaimandami imata ruraitapash na atinarcani.

1970 huatapica Alaska llactaman trabajangapaj rishpami ashtaca culquita ganarcani. Chai jipaca Londres llactamanmi rircani. Chaipi cashpaca shuj motota randishpami ñanda japishpa yangata rircani. Shina rijushpallatami huaquin quillacuna jipaca África llactaman chayarcani. Shina viajajushpaca ashtaca gentecunatami rijsircani. Paicunapashmi ashtaca problemacunamanda caruyashpa libre sintiringapaj munarca.

Bibliaca cai mundota Diablo mandajushcatami intindichin. Ñuca imata ricushcapi, imata uyashcapi pensarishpaca Biblia cabalta yachachishcatami cuenta japi  callarircani. Pero Taita Dios cai mundota na mandajushpaca, paica ¿imatata rurajurca? Chaitami yachangapaj munarcani.

Huaquin quillacuna jipaca ñuca yachangapaj munashca tapuicunapa respuestatami yachaj chayarcani. Huaquin huatacunahuanga ima pasajpipash Jehová Diosta ali sirvij jarihuarmicunatami rijsircani. Y paicunataca ninandami juyaparcani.

Londres llactaman tigrashpaca ñuca amigopa mamahuanmi parlarcani. Paica shuj Bibliatami carahuarca. Tiempo jipaca Ámsterdam llactamanmi rircani. Shuj punllaca callepi cashpami Bibliata liijurcani. Shina liijujpi chai pushtuta shuj Testigo yalijushpami, “¿Bibliapi ima nijujta ashtahuan yachachishachu?” nihuarca. Jipamangarin Dublín llactapi cashpami testigo de Jehovacunapa sucursalman rircani. Sucursalman yaicungapaj pungutami huactachircani. Chaipimi ashtaca experienciata charij Arthur Matthews huauquiguta rijsircani. Ñuca Bibliamanda yachajungapaj munani nijpica, paica Bibliamanda yachachishallami nihuarcami.

Bibliamanda yachajunataca ninandami gushtarcani. Shinallata testigo de Jehovacuna publicashca librocunata, revistacunataca liishpami catircani. Bibliatapashmi liin carcani. Reuniongunapi cai mundomanda estudiashca gentecuna na yachashca cosascunata huahuacuna contestajta ricushpami ninanda manllarircani. Por ejemplo, ¿imamandata nali gentecuna tian? Taita Diosca ¿pita can? Y huañushca jipaca ¿imata tucunchi? nishca tapuicunatami chai huahuacunaca contestarca. Testigocunahuanlla amigo canaca facilmi carca. Porque chai llactapica shuj amigocunataca na charircanichu. Paicunaca Jehová Diosta juyachun y Jehovapa voluntadta rurana munaita charichunmi ayudahuarca.

Ñucaca 1972 huatapimi bautizarircani. Shuj huata jipaca precursor tucushpami Irlanda del Norte llactamanda Newry pushtupi tiaj shuj uchilla congregacionbi sirvingapaj rircani. Chaipi cashpami urcupi shuj uchilla huasiguta arrendarcani. Chai ladollapi huagracuna tiashcamandami paicunapa ñaupapi discursocunata practican carcani. Chai huagracuna micunajushpaca ñucata ali ali uyahuanajunshnami carca. Chai huagracunahuan shina practicanami huauquipanicunata ricushpa discursocunata cuchun ayudahuarca. 1974 huatapimi precursor especial cachun nombrahuarca. Ñuca compañeroca Nigel Pitt shuti huauquigumi carca. Cunangamanmi paihuanga alipacha amigocuna capanchi.

Chai tiempopica, Irlanda del Norte llactapica ashtaca violento ruraicunami tiarca. Chaimandami huaquin gentecunaca chai llactataca “la tierra de las bombas y las balas” nishpami rijsin carca. Chai tiempocunapica gentecunaca siempremi callecunapi macanajun carca, disparai tucun carca, bombacunatapash tujyachin carca. Religionguna politicacunapi chapurishcamandami  chashna llaquicunaca tiarca. Shinapash protestante religionmanda, católico religionmanda gentecunaca Testigocuna politicapi na chapurin cashcatami yacharca. Chaimandami tranquilo, libre predicai usharcanchi. Ashtaca viajemi ñucanchi predicanajuj gentecunaca maipi, ima horas peligroso ruraicuna tianata yachan carca. Chaimandami chai pushtucunaman ama richun ñucanchitaca advirtin carca.

Shinapash huaquinbica peligroso situaciongunata chimbapurana tucurcanchillatami. Shuj punllaca, Dennis Carrigan precursor huauquihuanmi ladolla pueblopi predicangapaj rircanchi. Chai pueblopica Testigocunaca na tiarcachu. Chaimanga shuj viajetallami rishcarcanchi. Shuj huarmica,“cangunaca británico soldadocunami canguichi. Caiman espiangapami shamushcanguichi” nishpami juchachirca. Ñucanchicuna Irlanda llactamanda gentecunashna na parlashcamandami chai huarmica shina nishcanga. Chaipica ninandami manllarircanchi. Soldadocunata ali tratashcamandalla gentecuna ñucanchita talvez huañuchinata o cunguripi disparanataca alimi yacharcanchi. Dennis huauquihuanga ñucanchillami busta shuyanajurcanchi. Chiri chirimi carca. Ñucanchita juchachishca huarmica shuj cafeteriapimi carca. Chai cafeteriapimi shuj carroca shayarirca. Chai huarmi cafeteriamanda llujshishpami carropi caj ishcai jaricunahuan parlai callarirca. Ñucanchitaca culira culirami señalajurca. Chai jaricunaca alimandalla manejashpami ñucanchipaman quimirimurca. Shina rurashpaca “busca ¿ima horasta purin?” nishpami tapui callarirca. Bus chayamujpica cai jaricunaca busta manejaj jarihuanmi parlanajurca. Paicuna imata parlanajujtaca na uyai usharcanchichu. Chai buspica ñucanchillami carcanchi. Chaimandami cai llactamanda llujchishpami ñucanchitaca llaquichigrin yarcanchi. Pero na imapash pasarcachu. Busmanda ña uriajushpaca busta manejaj jaritaca, “chai jaricunaca ñucanchimanda ¿imatata yachangapaj munarca?” nishpami tapurcani. Paica, “ama preocuparichichu. Canguna picuna cashcatami paicunamanga villarcani. Na peligropichu canguichi” nishpami contestarca.

1976 huatapi Dublín llactapimi shuj asamblea de distritoca a tiarca. Chaipimi Pauline Lomax precursora especial paniguta rijsircani. Paica Inglaterra llactamandami shamushcarca. Paica shinlli feta charij, humilde, juyailla panigumi carca. Paipash y paipa turi Raypash huahuagumandapachami Jehová Diostaca rijsishcarca. Shuj huata jipaca, Paulinehuanmi cazararcani. Cazarashca jipaca Ballymena pushtupimi precursor especial shina sirvishpa catiparcanchi.

Shuj tiempotaca Belfast, Londonderry shuj peligroso pushtucunapipashmi ñuca huarmiguhuan superintendente de circuito shina sirvircani. Ñucanchi huauquipanicuna shinlli feta charishcata ricushpa y Jehová Diosta sirvi ushangapaj punda crishcacunata, shujcunata millanayachinata, ñavitalla ricushpa shujcunata nali tratanata saquishcata ricushpaca ninandami animarircanchi. Jehová Dios chai huauquipanicunata cuidajushcata, bendiciajushcataca ricunallami carca.

Irlanda llactapica 10 huatacunatami causarcani. Y 1981 huatapica clase número 72 de Galaadmanmi ñucanchitaca invitarca. Chai escuelamanda graduarishca jipaca África Occidental llactamanda Sierra Leona pushtumanmi ñucanchitaca cacharca.

11 alipacha misionerocunahuanmi shuj huasipi causarcanchi. Paicunahuanga shuj cocinata, quimsa bañocunata, ishcai duchacunata, shuj telefonota, shuj lavadorata y shuj secadoratami compartin carcanchi. Michapash cada ratomi na yashcapi rin carca. Techopipash rata jundami carca. Huasi ucu bodegamanbashmi venenoso culebracunaca yaicun carca.

Chaipi causana na fácil cajpipash, villachishpaca ninandami cushijun carcanchi. Chaipi gentecunaca ñucanchitaca alimi uyan carca. Shinallata Bibliapa yachachishcacunatapashmi  respetan carca. Ashtacacunami Bibliata estudiashpa Testigocuna tucurca. Chaipi causaj gentecunaca ñucataca “Señor Robert” y ñuca huarmigutaca “Señora Robert” nishpami rijsin carca. Pero tiempohuanga sucursalpa ashtahuan trabajai callarimandami predicacionmanga pundashnaca ñana llujshi usharcani. Chaimandami ñuca huarmigutaca “Señora Pauline” y ñucataca “Señor Pauline” nishpa rijsi callarirca. Gentecuna shina rijsi callarijpica ñuca huarmiguca ninandami cushijurca.

Chai llactapi ashtaca huauquipanigucunaca pobrellami carca. Pero Jehová Diosca na crinayai cosascunahuanmi paicuna imata minishtishcataca siempre caran carca (Mat. 6:33). Shuj viajeca shuj paniguca paipash micungapaj, paipa huahuacunapash micuchunga chai punllapallami culquiguta charirca. Shinapash chai paniguca jambicunata randichunmi pai charishca tucuilla culquiguta malaria unguita charij shuj huauquiguman cararca. Chai punllallatami panigupamanga shuj huarmiguca paita ñajchachishpa arreglachun pagarca. Jehová Diosca siempremi huauquipanicunataca ayudajurca.

Sierra Leona llactapica 9 huatatami causarcanchi. Pero jipamanga Nigeria llactapi jatun jatun sucursalmanmi cacharca. Cai sucursalpipash Sierra Leonapi rurashcatallatami rurashpa catircani. Pero ñuca huarmigupaca caipi yacharinaca dificilmi carca. Paica quillapi 130 horasta predicashpa, Bibliamanda yachajujcuna imata yachajushcata pactachichun ayudashpami yalin carca. Pero cunanga punlla enteromi ropata arreglashpa, sirashpa yalijurca. Tiempohuanga huauquipanicuna paipa rurashcagucunata ninanda agradicijta cuenta japishpami paica paipa tucui usharishcaguta rurashpa shuj betelitacunatapash animangapaj esforzarirca.

Nigeria llactapa costumbrecunataca ñucanchicunaca yachajunarami carcanchi. Shuj punllaca shuj huauquiguca Betelman chairalla chayamushca paniguta rijsichunmi ñuca oficinaman apamurca. Paita saludangapaj ñuca maquita cujpica ñapashmi ñuca ñaupapi cungurirca. Imata ruranata na atinashpami Hechos 10:25, 26 y Apocalipsis 19:10​pi imata nishcataca ñapash yarircani. Chaimi “cai panigutaca ¿imatapash ninacha cani?” nishpa pensarircani. Pero jipamanga “Bibliapi yachachishcacunata ali yachashcamandallatami Betelmanga invitarianga” yarcanimi.

Panigu chaita rurashcamanda nali sintirishpapash parlashpami catijurcani. Jipamanga panigu rurashcamanda informaciondami mascarcani. Shina investigashpami chai llactapa huaquin partecunapa costumbreta catijushcata yachaj chayarcani. Jaricunapash chai costumbretallata catishpami cungurin carca. Shina rurashpaca pitapash adorajushcataca na ricuchijurcachu. Sino que respetashcatami ricuchijurca.  Bibliapipashmi huaquin gentecuna shina rurashcata ricuchin (1 Sam. 24:8). Panigu imamanda shina rurashcata na intindishpapash antsicarin na imatapash nircani. Paitaca nali sintichimanmi carcani.

Nigeria llactapica tucui causaipi shinlli feta ricuchij ashtaca huauquipanicunatami rijsiparcanchi. Por ejemplo, Isaiah Adagbona b huauquiguca joven cashcamandallatami Bibliamanda yachajui callarirca. Pero jipaca lepra unguita charishcatami yachaj chayarca. Paitaca lepra unguita charijpurapi causachunmi shuj pushtuman cacharca. Chai pushtupica pai solomi Testigo carca. Jarcaicuna tiajpipash cai huauquiguca lepra unguita charij 30 gentecunatami Testigo tucuchun ayudarca. Shinallata chai pushtupi shuj congregación tiachunbashmi ayudarca.

1996 huatapica Kenia llactapa Betelman sirvichunmi ñucanchitaca cacharca. Callari parlashca viajemandapachami Kenia llactamanga na tigrashcarcani. Betelpica ashtaca monocunami tiarca. Chai monocunaca panigucuna charishca frutataca ñapashmi shuanlla carca. Shuj punllaca shuj paniguca paipa cuartopa ventanatami pascashpa saquishcarca. Panigu tigrangacamanga ashtaca monocunaca chaipi tiashca micunataca ninandami micunajushcarca. Paniguca caparishpami manllari cuartomandaca calpashpa llujshirca. Monocunapash manllarishpami ventanata saltashpa llujshirca.

Ñuca huarmiguhuanga suajili shimita parlaj congregaciondami apoyai callarircanchi. Asha tiempo jipaca Diospa Shimimanda yachajungapaj parteta ñaupaman pushachunmi mañahuarca. Ñucaca suajili shimitaca nara ali yacharcanichu. Chaimandami chai libropa tapuicunata ali liingapaca reunionba punlla nara chayajpillatami prepararin carcani. Pero pipash libropi escribishca respuestatapacha na nijpica na intindinllu carcani. Huauquipanicunata na ali ayudai ushashcamandami llaquilla sintirin carcani. Huauquipanicuna ñucata pacienciahuan, humildadhuan tratashcata ricushpaca shungumanmi chayahuarca.

Kenia llactapica shuj huatatallapash na causarcanchichu. 1997 huatapica Brooklyn llactapi Betelmanmi ñucanchitaca invitarca. Cai llactapi gentecunaca ashtaca cosascunatami charin. Pero cai cosascunallatami Jehová Diosta sirvichunga jarcaita ushan (Prov. 30:8, 9). Shina cajpipash cai llactapi huauquipanicunapash Jehová Diostaca tucui shungumi sirvishpa catin. Paicunaca paicunapa culquitaca ashtahuan charijyangapaca na utilizanllu. Ashtahuangarin, Jehová Diospa organizacionda apoyangapami utilizan.

Cai huatacunapica Irlanda llactapi violento ruraicuna tiajpipash, África llactapi pobrella cashpa, caru caru pushtucunapi causashpapash, shinallata Estados Unidos llactapi tucui minishtirishca cosascunahuan causashpapash, huauquipanigucuna shinlli feta ricuchishcatami ricupashcanchi. Jehová Diosta sirvijcuna ima pasajpipash paita juyashcata ricuchijpica Jehová Diosca ninandami cushijun.

Huatacunaca ñapashmi yalishca. O imashina Job 7:6​pica nin, huatacunaca ‘ahuaj runapaj lanzaderatapash ashtahuan yalimi calpashca’. Cunanbica Warwick llactapa jatun Betelpimi capanchi. Chaipica randimanda ciertopacha juyarij huauquipanicunahuanmi trabajapanchi. Ñucanchi Rey Jesusta apoyai ushashcamandami ninanda cushijupanchi. Paica Jehovata tucui shunguhuan sirvijcunataca ñallami ninanda bendicianga (Mat. 25:34).