1. Huaquin Jehovata sirvijcunaca ¿imatata rey Davidshna tapurita ushanman?

 TUCUICUNALLATAMI problemacuna illaj, tranquilo causangapaj munapanchi. Pero, tucuicunallatami imapash llaquita charipanchi. Huaquin Jehová Diosta sirvijcunaca rey Davidshnami sintirishca. Paica Jehová Diostaca, ¿imahoracamanda cashna llaquilla, yapata preocuparishpa causana cani? nishpami tapurca (Sal. 13:2).

 2. Cunanga ¿imata yachajugripanchi?

² Cunanbica imamandapash llaquilla, yapata preocuparishpami causapanchi. Chaimi cunanga imacunalla ñucanchita llaquilla sintichi ushashcata yachajupashun. Jipaca ama yapata preocuparingapaj imata rurana cashcata yachangapami 6 consejocunata ricupashun.

 3. ¿Imacunamandata yapata preocuparishpa causapanchi?

³ Ashtaca cosascunamandami preocuparipanchi. Imapash problemacunata tucuchitaca ñucanchica na ushapanchichu. Por ejemplo, micunacunata, ropata o arriendocunata cada huata ama subichichunga na imatapash ruraita ushanchichu. Shinallata trabajopi, escuelapi o colegiopi cumbacuna ima horas ñucanchita imapash nalicunata rurachun ninataca na yachai ushapanchichu. Cunanbica shuhuacuna, violadorcuna, huañuchijcuna shuj shuj nali cosascunata tucuchitapash  na ushapanchichu. Chaicunaca gentecuna Jehová Diospa mandashcacunata na cazushpa causanajushcatami ricuchin. Cai mundota mandaj Diabloca gentecuna “cai causaipilla” yapata preocuparishpa Jehová Diosta na sirvi ushashcataca paica alimi yachan (Mat. 13:22; 1 Juan 5:19). Diablo cai alpata mandajuimandami tucuicunallata yapata preocuparishpa causapanchi.

 4. Yapata preocuparijushpaca ¿imacunapillata pensari ushapanchiman?

⁴ Yapata preocuparishca cashpaca imatapash ruraitaca na atinarinllu. Por ejemplo, familiata mantiningapaj culqui na pactanllu yashpa manllaimanda, irquilla caimanda, trabajomanda llujchinga yashpami yapata preocuparita ushapanchiman. Na cashpaca shuj tentación ricurijpi, Jehová Diosta na cazui ushashachu yashpami yapata preocuparita ushapanchiman. Shinallata Diablo ñalla gentecunata utilizashpa Jehová Diosta sirvijcunata llaquichijpi, chai punllacunapi imatashi rurasha nishpami yapata preocupari ushapanchiman. ¿Cashna preocuparijunaca normalchu can?

 5. “Na chaitalla yarishpa musparinachu canguichi” nishpaca ¿imatata Jesusca ningapaj munarca?

⁵ Jesusca paipa catijcunamanga: “Na chaitalla yarishpa musparinachu canguichi” nircami (Mat. 6:25). Jesús shina nishpaca ¿imamandapash preocuparina nali cashcatachu ningapaj munarca? Na, na chaita nijurcachu. Punda tiempopi Jehovata huaquin sirvijcuna yapata preocuparinajujpipash Jehová Diospa ñaupapica paicunaca alimi carca (1 Rey. 19:4; Sal. 6:3). b Jesuspa nishcacunaca cunanbi llaquicunata charishpapash Jehová Diosta sirvinata ama saquichunmi ayudan. Shinapash yapata preocuparinajushpaca ¿imatata rurana capanchi? (“ ¿Imatata rurai ushapanchi?” nishca recuadrotapash ricupangui).

 6. Filipenses 4:6, 7​pi nishca shinaca ¿imatata rurana capanchi?

⁶ 1) Cutin cutin Jehová Diosta mañapai. Yapata preocuparijushpaca Jehová Diosman tucuita villashpami tranquilo sintiripangui (1 Ped. 5:7). Shina mañajpica “casilla ali causaitaca, Taita Diosmi caramunga” (Filipenses 4:6, 7, liingui). Jehová Diosca paipa espiritu santota cushpami ama yapata preocuparichun ayudaita ushan (Gál. 5:22).

 7. Jehovata mañajushpaca ¿imatata rurana capangui?

⁷ Jehová Diosta mañajushpaca ima problemata charishcata, imashina sintirishcata, tucui tucuita villaita ushapangui. Shinallata imapash problemata arreglanalla cajpica ali yuyaita carahuai, aguantashpa cati ushangapaj ayudahuai nishpapash mañanallami capangui. Shinapash imapash problema na arreglaita ushanalla cajpica ama yapata preocuparingapaj ayudahuai nishpapashmi Jehovataca mañanalla capangui. Imashinapacha sintirishcata Jehovaman villajpica paillatami ñucanchitaca ayudanga. Ñucanchi mañaicunata Jehová Dios na uyanshnalla cajpipash mañashpami catina capangui. Imashina sintirishcata tucuita villachun, paita cutin cutin mañachunmi Jehová Diosca munan (Luc. 11:8-10).

 8. Mañajushpaca ¿imatata ashtahuan rurana capanchi?

⁸ Ima problemacunata charishcata Jehová Diosman villajushpaca, imaguta carashcamandapashmi agradicina capanchi. Huaquinbica Jehová Diosta mañajushpaca imata ninataca na atinanchichu. Pero shina  cashpapash Jehová Dios tucui mañaicunata contestajtaca na cunganachu capanchi. Masqui “ayudahuai” nishpalla tucui shunguhuan mañajpica Jehová Diosca contestanllami (2 Crón. 18:31; Rom. 8:26).

 9. Imatapash manllajushpaca ¿imatata rurana capanchi?

⁹ 2) Ama quiquinbilla confiashpa Jehová Diospi confiapai. Profeta Isaías causashca tiempopica judiocunaca asiriocuna paicunata atacashpa paicunata esclavocunashna apanga yashpami ninanda preocuparinajurca. Chaimandami judiocunaca Egipto llactata ayudahuai nishpa mañarca (Is. 30:1, 2). Jehová Diosca egipciocunapi confianaca llaquimanmi apanga nishpa advirtirca (Is. 30:7, 12, 13). Isaiasta utilizashpami Jehová Diosca imata rurana cashcata judiocunamanga villarca. Isaiasca Jehová Diosta “yariajlla causashpa casilla shuyashpami, shinlli tucunguichi” nircami (Is. 30:15b).

10. ¿Imacunapillata Jehová Diospi confiashcata ricuchi ushapanchi?

¹⁰ Jehová Diospilla confiashcataca ¿imacunapillata ricuchi ushapanchi? Pensaripashunchi, shuj alipacha pagaj trabajota pipash ofrecishcanman. Pero chai trabajota chasquishpaca villachingapaj, tandanajuicunaman ringapaj tiempota ñana charishcanchiman. O tal vez trabajopi shuj na testigo compañero o compañera quiquinda munai callarishcanman. Na cashpaca familiamanda pipash: “Canba Jehová Diostachu sirvishpa catigringui” nishcanman. Cai llaquicunata chimbapuranaca na facilchu can. Pero Jehová Diosca imata ruranatami ali ali ñucanchitaca yachachin (Mat. 6:33; 10:37; 1 Cor. 7:39). Shinapash ¿Jehová Diospi confiashpa, paipa mandashcacunata cazushpachu causagripanchi?

11. Jarcaicuna ricurijpica ¿imata ayudai ushan?

¹¹ 3) Punda Jehovata sirvijcunamanda yachajupai. Na yapata preocuparinamanda, Jehová Diospi confianamanda yachajungapaca Bibliapimi ali, nali ejemplocunatapash taripanchi. Caicunamanda yachajujushpaca jarcaicuna ricurijpipash Jehovata sirvijcuna ama yapata preocuparichun ima ayudashcatami yachajupashun. Por ejemplo, apostolcunaca judiocunata mandaj sacerdotecuna villachinata jarcajpipash villachishpami catirca. Paicunaca na manllashpami: “Taita Diostami, runacunatapash yali ashtahuan cazunapacha canchi” nircami (Hech. 5:29). Jehová Dios paicunata ayudajujtaca seguromi carca. Shinallata Jehovapa ñaupapi alita ruranajushcata yachaimandami macai tucushca jipapash na manllashpa ali villaigucunataca villachishpa catirca (Hech. 5:40-42). Estebanbashmi paita huañuchigrinajujpica tranquilo carca. Chaimi paipa ñavica, shuj angelpa ñavishna tranquilo ricurijurca (Hech. 6:12-15). Estebanga, Jehovapa ñaupapi alita rurajushcata seguro caimandami shina sintirirca.

12. Catiriashpa llaquichijpica ¿imashinata 1 Pedro 3:14 y 4:14​pi shimicunaca cushilla sintirichun ayudanga?

¹² Apostolcunaca Jehová Dios paicunata ayudajushcataca seguromi carca. Jehová Dios ayudajushcamandami paicunaca milagrocunata rurarca (Hech. 5:12-16; 6:8). Cunanbi milagrocunata rurachunga Jehová Diosca ñana ñucanchicunamanga poderta cunllu. Shinapash paipa ñaupapi alita rurajushcata yachachun, paipa espíritu santohuan ñucanchita ayudanata seguro cachunmi Bibliata utilizan (1 Pedro 3:14; 4:14, liingui). Shinaca, jipa punllacunapi catiriashpa llaquichijpi imatashi rurasha nishpa pensajunapa randica cunanmandallatami Jehová Dios ñucanchita ayudanapi ashtahuan confiangapaj esforzarina capanchi. Apostolcunashnami  ñucanchicunapash Jesús nishcata yarina capanchi. Jesusca: “Canguna imata rimanatapash, ali yachaitapash carasha. Chashna rimajpimi, cangunata fiñajcunaca na chashnachu nishpa upallayachitaca na ushanga” nircami. Shinallata caitapashmi nirca: ‘Chai llaquicunata ali shunguhuambacha apanajujpica, cangunapa [causaita]’ salvai ushanguichimi nishpa (Luc. 21:12-19). Huañungacaman paita sirvijcunataca Jehová Diosca nunca na cunganllu. Chaimi paica imashinapacha cashcata yarishpa paicunataca causachinga.

13. Asá shuti reyca ¿imatata rurarca?

¹³ Yapata preocuparishpa Jehová Diospi na confiashca gentecunamandapashmi yachajuita ushapanchi. Paicunamanda yachajunami ama paicunashna ñucanchicunapash pandarichun ayudanga. Por ejemplo, Judá llactamanda Asá shuti reyca callaripica Jehová Diospica tucui shungumi confiarca. Chaimi ashtaca ashtaca soldadocunahuan macanajungapaj rishpapash Jehová Dios ayudajpi misharca (2 Crón. 14:9-12). Tiempohuanga Asá jarica Israel llactata mandaj rey Baasá jaripa soldadocunahuanmi macanajuna tucurca. Baasá jarica ashalla soldadocunatami charirca. Shinapashmi Asá jarica Jehovapa ayudata pundashna mañanapa randica, siriocuna ayudachun paicunaman pagarca (2 Crón. 16:1-3). Irquiyashpa ña huañugrijushpapashmi Asá jarica Jehovapa ayudataca na mascarca (2 Crón. 16:12).

14. Rey Asá pandarishcamandaca ¿imatata yachajupanchi?

¹⁴ Asá shuti reyca mandai callarijushpaca llaquicunata o problemacunata charishpaca siempremi Jehová Diospa ayudata mascan carca. Tiempohuanga paipa munashcatami rurai callarirca. Israel llactata mandaj rey Baasá jarihuan macanajungapaj Jehovapa ayudata mascanapa randica siriocunapa ayudatarami mascarca. Paipa ñavipi alishnalla ricurijpipash chaita ruranaca nalimi carca. Chaimi Jehová Diosca shuj profetata cachashpa: “Siria llactata jatun mandajtarami ayudahuai nishpa mañashcangui. Chaimandami Siria llactata jatun mandajpaj soldadocunaca, cambaj maquimanda quishpirishpa rishca” nircami (2 Crón. 16:7). Ñucanchicunapashmi imatapash ruragrijushpaca na ñucanchipira confiarinachu capanchi. Chaipa randica siempremi Bibliapi Jehovapa ayudata mascana capanchi. Huaquinbica na yashcapimi imatapash decidina tucupanchi. Shinapash na yapata preocuparishpa Jehová Diospi confiashpami ali decisiongunata japi ushapashun.

15. Bibliata liijushpaca ¿imatata rurai ushapangui?

¹⁵ 4) Bibliamanda textocunata de memoria yachajupai. Ama yapata preocuparishpa Jehovapi confiangapaj ayudaj textocunata liijushpaca de memoria yachajungapaj esforzaripangui. Chaipaca Bibliata liijushpaca textocunata anotashpandi ripangui. Huaquinbi huaquinbica cutin repasapangui. Jehová Diosca Josué runagumanga Diospa shimita liichun, liishcacunapi siempre pensarichunmi mandarca. Shinami Josueca ali yuyashpa imatapash rurai ushana carca. Jehovapa mandashcacunata yarinami na manllashpa Jehovapi ashtahuan confiachun ayudagrijurca (Jos. 1:8, 9). Imatapash manllajujpica Bibliapi consejocunami ñucanchicuna ama yapata manllachun, tranquilo sintirichunbash ayudaita ushan (Sal. 27:1-3; Prov. 3:25, 26).

16. Jehová Diosca congregacionmanda huauquipanicunataca ¿imapata utilizai ushan?

¹⁶ 5) Huauquipanicunahuan tiempota yalipai. Jehová Diosca ñucanchicuna paipi  confiachun, ama yapata preocuparichunga huauquipanicunatapashmi utilizan. Tandanajuicunapimi huauquicuna yachachishcata, huauquipanicunapa comentariocunata uyashpa, huauquipanicunahuan parlashpapash ashtahuan animarinchi (Heb. 10:24, 25). Ñucanchipa amigoman ñucanchicuna imashina sintirijushcata villashpapashmi animari ushapanchi. Bibliapi nishcashnami shuj amigopa ‘alita rimashca shimicunaca’ ama yapata preocuparichun, cushilla sintirichun ayudan (Prov. 12:25).

17. Hebreos 6:19​pi shimicunaca ¿imashinata tranquilo cachun ayudan?

¹⁷ 6) Diospa Reino cushilla causaiguta apamunata yaria causapai. Paraíso alpagupi causanata shuyanaca ‘barcota jirru charijunshnami’ ñucanchitaca shinllichishpa ayudan. Chaimi llaquicunata o problemacunata charishpapash aguantashpa catita ushapanchi (Hebreos 6:19, liingui). Llaquicunamandaca jipa punllacunapica ñaña preocuparishunllu. Jehová Diosmi chai llaquicunata cungaitapacha cungachun ayudanga (Is. 65:17). Paraíso alpagupi llaquicuna illaj tranquilo causaiguta charinapi pensaripashunchi (Miq. 4:4). Paraíso alpagupi yaria causangapaca shuj gentecunamanbashmi villachishpa, Jesuspa catijcunata tucuchunbash ayudana capanchi. Shina rurashpaca ñucanchicuna ‘shuyanajushcataca Dios tucuita pactachingacamambachami’ shuyai ushapashun (Heb. 6:11).

18. a) Jipa punllacunapica ¿imata pasanga? b) Chai llaquicunata aguantachunga ¿imata ayudanga?

¹⁸ Cai tucurimui punllacunapi causanajuimandami problemacunata, llaquicunata ashtahuan charipashun. Chaimi yapata preocuparita ushapanchi. Cai 2021 huatapa textoca llaquicunahuan cashpapash, ama yapata preocuparingapaj Jehová Diospi confiana minishtirishca cashcatami yarichin. Jehová Diosca “ñucapi confiashpa, tranquilo cashpami shinlli tucuita ushanguichi” ninmi (Is. 30:15). Cai huataca ñucanchi ruraicunahuan Jehová Diospa nishcacunapi confiashcata ricuchipashunchi.