1. Jesusca ¿imamandata Jehová Diostaca paipa catijcunata cuidachun mañarca?

 NARA huañushpallatami Jesusca paipa Taitataca paipa catijcunata cuidachun mañarca (Juan 17:15, 20). Jehová Diosca siempremi paipa catijcunataca cuidajushca. Pero Jesusca paipa catijcunata Satanás ashtahuan llaquichinata yachaimandami Jehová Dios paicunata ashtahuan ayudachun mañarca.

 2. Salmo 33:18-20​pi nishcashnaca ¿imamandata problemacunata charishpaca na manllarina capanchi?

² Cai mundota Diablo mandajushcamandami Jehovata sirvijcunaca ashtaca llaquicunata charin. Shuj shuj problema ricurishcamandami fuerza illa sintiri ushanchi. Jehová Diosta sirvinatapash saqui ushanchiman. Pero cai temapimi problemacunata charishpapash imamanda na manllana cashcata yachajupashun. Jehová Diosca ñucanchicuna ima pasajushcataca alimi yachan. Chaimandami ñucanchita ayudangapaca listo can. Cunanga Taita Diosta ali sirvij ishcai ejemplocunamandami ricugripanchi. Chai ejemplocunamanda yachajushpami ‘Mandaj Diosca paipaj ñavihuanmi paita manllajcunatapash ricujujta’ cuenta japipashun (Salmo 33:18-20​ta liipangui).

 3. ¿Imamandata sololla sintirita ushanchiman?

³ Mundo enteropi ashtaca huauquipanicunata charishpapashmi huaquinbica sololla sintirita ushapanchi. Por ejemplo jovengunaca paicunapa crishcacunata compañerocunaman explicana tucushpa o huaquingunaca shuj congregacionman cambiarinajushpami sololla sintirita ushan. Cutin llaquilla o desanimarishca caimandami ñucataca nipipash na ayudaita ushangachu yashpa pensarinchiman. Y shina pasajushcamandaca shujcunacarin na intindihuangachu yashpami shujcunaman villangapaca na munapanchiman. Huaquinbicarin nipipash ñucamandaca  na preocuparinllu yashpami pensaita ushanchiman. Pero Jehová Diosca ñucanchicuna sololla y llaquilla sintirichunga na munanllu. ¿Imamandata shina nipanchi?

 4. Eliasca ¿imamandata “ñucallami puchushcani” nirca?

⁴ Profeta Eliaspa ejemplomanda yachajupashunchi. Eliasca Jezabel ama huañuchichunmi 40 punllacunata pacajushpa rijurca (1 Rey. 19:1-9). Eliasca shuj jatun utujupi pacajushca cashpami Jehová Diostaca: “Ñucallami puchushcani” nirca (1 Rey. 19:10). Paica Jehovapa profetacunamandaca pailla quidashcatami pensarca. Pero na shina carcachu. Porque Abdiasca, Jezabel ama huañuchichunmi 100 profetacunata salvashcarca (1 Rey. 18:7, 13). Shinapash ¿imamandata Eliasca sololla sintirijurca? Abdías runagu salvashca profetacunatapash tucuillata huañuchishcanga yashpami Eliasca pensajushcanga. O na cashpaca Carmelo shuti urcupi Baalpa profetacunahuan ima tucushcata ricushpapash ni pipash Jehovapa lado na tucushcata ricushpami sololla sintirishcanga. Shinallata paipa causai peligropi cajpipash, nipipash paimanda na preocuparijta pensashpami sololla sintirishcanga. Bibliapica Elías imamandapacha sololla sintirijushcataca na ninllu. Pero Elías imashna sintirishcata Jehová Dios ali intindishcata y Eliasta imashna ayudanatapash Jehová Dios ali yachashcatami villan.

 5. Elías ama sololla sintirichunga Jehová Diosca ¿imashinata ayudarca?

⁵ Jehová Diosca huaquin cosascunata rurashpami Eliastaca ayudarca. Por ejemplo Elías imashna sintirijushcata parlachunmi animarca. Chaimandami ishcai viajeta: “Elías, ¿imatata caipica rurajungui?” nishpa tapurca (1 Rey. 19:9, 13). Y chashna tapushca jipaca, Elías ima nijtaca Jehová Diosca ali alimi uyarca. Y chai jipaca Eliasta ayudangapaj listo cashcata y poderta charij Dios cashcatapashmi ricuchirca. Shinallata Israel llactapica ñucata sirvij gentecunaca tianrami nishpami villarca (1 Rey. 19:11, 12, 18). Pai imashna sintirijushcata Jehová Diosman villashpa y Jehová Dios imata nijta uyashca jipaca de seguromi tranquilo ali sintirishcanga. Chai jipaca Jehová Diosca Eliastaca: Hazael runataca Siria llactapa rey cachun y Jehú shuti runagutaca Israel llactapa rey cachun agllapai  nircami. Shinallata Eliseotaca profeta cachun agllagri nishpami mandarca (1 Rey. 19:15, 16). Caicunata mandashpami Jehová Diosca Elías ama llaquilla cashpa catichun ayudarca. Y paita ayudachunga Eliseotapashmi mingarca. Ñucanchicuna sololla sintirinajushpa y Jehová Diospa ayudata minishtijushpaca ¿imatata rurai ushapanchi?

 6. Sololla sintirinajushpaca ¿imata nishpata Jehová Diostaca mañai ushapanchi? (Salmo 62:8).

⁶ Jehová Diosca ñucanchicuna imashna sintirijushcataca paita mañashpa villachunmi munan. Paica ñucanchicuna imashna sintirijushcataca alimi yachan. Chaimandami imahora cashpapash paitaca con confianza mañaita ushapanchi (1 Tes. 5:17). Jehová Diosca paita sirvijcuna mañajpica cushijushpami uyan (Prov. 15:8). Sololla sintirinajushpaca ¿imata nishpata Jehová Diostaca mañai ushapanchi? Profeta Elías cuendami ñucanchicunapash imashna sintirijushcataca tucuita villai ushapanchi (Salmo 62:8​ta liipangui). Jehová Diosmanga imamanda preocupado cashcatami villai ushapanchi. Shinallata imata ruranata yachangapaj ayudahuai nishpami mañai ushapanchi. Por ejemplo joven cashpa sololla sintirijushpa y Jehovamanda escuelapi parlanata manllajushpaca ¿imatata rurai ushapangui? Jehová Diostaca na manllashpa ñuca crishcacunamanda respetohuan shujcunaman explicangapaj ayudahuai nishpami mañaita ushapangui (Luc. 21:14, 15). Y desanimado sintirijushpaca ¿imatata rurai ushapangui? Jehová Diostaca experienciata charij huauqui o panihuan parlangapaj ayudahuai nishpa mañapangui. Shinallata chai persona ñucanchi imashna sintirijushcatapash intindichun ayudapangui nishpami mañaita ushapangui. Shinaca ñucanchicuna imashna sintirijushcata Jehovaman villashpa pai imashna ñucanchi oraciongunata contestajta ricushpa y shujcunapa ayudata chasquishpaca na sololla sintirishpa catishunllu.

 7. Mauriciopa ejemplomandaca ¿imatata yachajuita ushapanchi?

⁷ Jehová Diosca ñucanchicuna congregacionbi, predicacionbi imata rurajta ricushpaca ninandami cushijun (Sal. 110:3). Jehová Diosta sirvishpa ocupado yalinami ama sololla sintirichun ayudanga. Por ejemplo Mauricio b shuti shuj jovenda ima pasashcata ricupashunchi. Mauricio bautizarishca asha tiempo jipallami paipa amigoca Jehovamanda asha asha caruyashpa rirca. Mauricioca ninmi: “Ñucapa amigo Jehovamanda caruyajta ricushpaca. Ñucapashmi Jehová Diostaca sirvishpa cati ushashacha yashpa pensarircani, solollami sintirijurcani. Ñucataca nipipash na intindihuangachu yarcanimi”. Ama desanimarishca quidachunga ¿imata ruranata huauquigutaca ayudarca? Paica ninmi: “Ashtahuan predicanami ama ñucapilla pensajuchun ama  desanimarishca cachun ayudahuarca. Predicajushpaca huauquipanicunahuanga cushillami sintirin carcani. Ñana sololla sintirin carcanichu”. En persona huauquipanicunahuan predicacionman na llujshi ushashpapashmi cartacunata rurashpa o telefonopi predicashpaca cushilla sintirinchi. Huauqui Mauriciotaca ¿imata ashtahuan ayudarca? Paica ninmi: “Congregacionbimi ashtahuan ayudangapaj esforzarircani. Shinallata ñucapa asignaciongunata ali pactachingapami esforzarircani. Chaicunata rurashpami Jehová Dios y huauquipanicunapash ñucata ninanda juyajta sintircani” ninmi.

 8. Shuj shuj problemacuna ricurijpica ¿imashinata sintiripanchiman?

⁸ Último punllacunapi tucuicunallata problemacunata charinataca alimi yachapanchi (2 Tim. 3:1). Pero na yashcapimi imapash problemacunaca ricurita ushan. Talvez na yashcapimi culqui illa quidai ushanchi. Talvez doctorcunaca imapash unguitami charingui nita ushan. Na cashpaca shuj familiarmi huañuita ushan. Shina pasajushpa y shuj shuj problemacuna ricurijpica desanimarishca, imatapash ruranata na atinashcami sintirita ushapanchi. Shinapash Jehová Dios ñucanchicunamanda pendiente cashcata y pai ayudajpica ima llaquicunata charishpapash aguantashpa cati ushashcatami yarina capanchi.

 9. Job runaguca ¿ima llaquicunatata charirca?

⁹ Cunanga Job runaguta ima pasashcata ricupashunchi. Jobca shuj shuj llaquicunatami charirca. Shuj punllapillami animalcuna, sirvientecuna illa quidarca. Paipa churicunapash chai punllallatami tucuilla huañurca (Job 1:13-19). Chai llaquicunata charishca jipallami paitapash shuj millai ungui japirca (Job 2:7). Chai tucui llaquicunata charimanda llaqui llaqui caimandami Jobca: “Ñuca causaitaca millanayanmi, napacha unaicaman causangapaj munanichu” nirca (Job 7:16).

10. Job runagu llaquicunata aguantachunga ¿imashinata Jehová Diosca ayudarca? (Callari paginapi fotota ricupangui).

¹⁰ Jehová Diosca Job runaguta ima pasajushcataca alimi yacharca. Jobta juyaimandami Jehová Diosca llaquicunata aguantachun, Jehovata sirvishpa catichun ayudarca. Chaimandami Jehová Diosca Job runagumanga pai ali yachaita charishcata y gentecunataca juyaihuan cuidan cashcatami cuenta japichirca. Shinallata shuj shuj animalcunata rurashcamandapashmi parlarca (Job 38:1, 2; 39:9, 13, 19, 27; 40:15; 41:1, 2). Shinallata Jehová Diosca Elihú runaguta utilizashpami Job runagutaca animarca y consolarcapash. Elihuca Taita Diosta tucui shunguhuan sirvijcunataca ninanda bendician cashcatami yarichirca. Pero Jehová Diosca Elihú runagu Jobta consejachunbashmi munarca. Chaimi Elihú runaguca Jobtaca ama paipilla pensarishpa ashtahuangarin Jehová Dios ninan poderta charimanda paita ayudai ushashcata cuenta japichun ayudarca (Job 37:14). Shinallata Jehová Diosca Jobtaca paipa quimsa amigocunamanda mañachunmi mandarca (Job 42:8-10). Cunan punllacunapi ñucanchicuna llaquicunata charijpica Jehová Diosca ¿imashinata ayudan?

11. Problemacunata charijpica ¿imashinata Bibliaca ayudaita ushan?

¹¹ Jehová Diosca na ñucanchicunahuan directamente parlanllu. Pero ñucanchihuan parlai ushangapaca paipa Shimi Bibliatami utilizan (Rom. 15:4). Jipa punllacunapi shuj cushilla causaigu tianata yachachishpami cushichin. Problemacunata charijpi Biblia imashna ayudai ushashcata ricupashunchi. Bibliapica ni problemacuna, ni llaquicuna Jehová Diospa “juyaimandaca na separaita  ushangachu” ninmi (Rom. 8:38, 39). Shinallata Jehová Diosca “paita mañajcunata ayudangapaca ladopimi” can ninmi (Sal. 145:18). Jehová Diosca ñucanchicuna paipi confiashpaca llaquicunata aguantai ushashcata y llaquicunahuan cashpapash cushilla paita sirvishpa cati ushashcatami ricuchin (1 Cor. 10:13; Sant. 1:2, 12). Para siempre causana bendicionhuan comparajpica cunanbi charishca llaquicunaca ashapalla cashcatami Bibliapica ricuchin (2 Cor. 4:16-18). Jehová Diosca Satanastapash y Satanás cuendallata nalicunata rurajcunataca ñallami tucuchinga (Sal. 37:10). Jipacunaman llaquicuna ricurijpi aguantashpa cati ushangapaca Bibliapa animachij huaquin textocunatami yachajuita ushapanchi.

12. Jehová Diosca ñucanchicuna ¿imata rurachunda munan?

¹² Jehová Diosca Bibliata estudiana costumbreta charichun y Bibliata liishcapi pensarichunbashmi munan. Shinami pai cushca ayudataca ali aprovechashun. Bibliapi yachajushcata pactachishpaca ñucanchi femi ashtahuan shinlliyanga y Jehovamanga ashtahuanmi quimirishun. Shina rurashpami llaquicunataca aguantai ushashun. Shinallata Bibliapa nishcacunapi confiajpica Jehová Diosca paipa espíritu santohuanmi ayudanga. Paipa espíritu santomi ima llaquicunata charishpapash aguantashpa catichun ‘fuerzata’ caranga (2 Cor. 4:7-10).

13. ‘Aliguta cazushpa, aliguta pensarishpa sirvij esclavoca’ ¿imashinata ayudan?

¹³ Jehová Diospa ayudahuanmi ‘aliguta cazushpa, aliguta pensarishpa sirvij esclavoca’ ñucanchicunamanga publicaciongunata, videocunata y canticocunatapash cushpa ayudashca. Shina ayudajushcamandami ñucanchi feca ashtahuan shinlliyashca. Jehovamandapash na caruyapashcanchichu (Mat. 24:45). Cai tucui ayudacunataca alimi aprovechana capanchi. Estados Unidosmanda shuj paniguca cai tucui ayudacunamanda ninanda agradicishca sintirishcatami nirca. Paniguca nircami: “Jehová Diostaca 40 huatacunatami sirvijushcani y cai huatacunapica shuj shuj llaquicunatami charishcani”. Panigupa abuelotaca shuj machashca runa paipa carrota chocashpami huañuchirca. Shinallata paipa taitacunaca shuj millai unguihuanmi huañurca. Y paniguca ishcai viajetami cáncer unguihuan carca. Cai llaquicunata aguantachunga panigutaca ¿imata ayudarca? Paica nin: “Jehová Diosca siempremi cuidahuashca. Aliguta cazushpa, aliguta pensarishpa sirvij esclavota Jehová Dios utilizashpa espiritualmente shinlli cachun ayudashcamandami cai llaquicunataca aguantai usharcani. Chaimandami Job runagushnallata:  ‘Huañungacamanmi, ñucaca ima pandatapash na rimasha’” nin (Job 27:5).

14. Llaquicunata charijpica ¿Jehová Diosca imashinata huauquipanicunataca utilizan? (1 Tesalonicenses 4:9).

¹⁴ Jehová Diosca paita sirvijcunataca llaquicunata charishpa randimanda juyarishpa ayudarichunmi yachachin (2 Cor. 1:3, 4; 1 Tesalonicenses 4:9​ta liipangui). Llaquicunata charijpica ñucanchi huauquipanicunaca Elihú runagushnallatami ayudangapaj munaita charin (Hech. 14:22). Cunanga panigu Dianepa ejemplota ricupashun. Panigupa cusaguca shuj millai unguihuanmi irquiyarca. Chaimi congregacionmanda huauquipanicunaca pai espiritualmente shinlli cashpa catichun animashpa ayudarca. Shinallata paica ninmi: “Chai quillacunaca yapa dificilmi carca. Pero chai tucui tiempocunapica Jehová Dios ninanda juyashpa ñucanchita ninanda cuidajushcatami cuenta japircanchi. Congregacionmanda turiñañagucunapashmi ñucanchita visitashpa, cayashpami ñucanchimanda ninanda preocuparishcata ricuchirca. Shinami aguantashpa ñaupaman catichun ayudarca. Shinallata tandanajuicunaman, predicacionmanbash carropi pushashpami ayudahuan carca”. Jehová Diospa organizacionbi ninanda juyaj huauquipanicunata charinaca ñucanchipaca shuj jatun bendicionmi can.

15. Llaquicunata aguantai ushanataca ¿imamandata seguro cai ushapanchi?

¹⁵ Tucuicunallatami llaquicunataca charipashun. Pero na sololla capanchichu. Shuj juyaj taitashnami Jehová Diosca ñucanchitaca ricuriajun. Paica ñucanchicuna paipa ayudata mañajpica ayudangapaj listomi can (Is. 43:2). Jehová Dios ayudajushcamandami llaquicunata charishpapash aguantai ushanataca seguro cai ushapanchi. Jehová Diosca ñucanchita ayudangapaca oracionda, paipa Shimi Bibliata, shuj publicaciongunata y ñucanchita ninanda juyaj huauquipanicunatapashmi cushca.

16. Jehová Dios ñucanchita cuidashpa catichunga ¿imatata rurana capanchi?

¹⁶ Jehová Dios shuj juyaj taitashna ñucanchita ayudangapaj listo cashcamandaca ninandami agradicipanchi. Paimi ‘ñucanchi shunguta cushichij’ can (Sal. 33:21). Jehová Dios ñucanchita juyaihuan cuidashcamandaca ¿imashinata paita agradicishcata ricuchi ushapanchi? Jehová Dios cushca ayudacunatami ali aprovechana capanchi. Pero Jehová Diospa ayudata chasquishpa catingapaca ñucanchicunaca paita cazushpa, paipa voluntadta rurangapami siempre esforzarina capanchi. Shina rurajpica paica ñucanchitaca siempremi cuidashpa catinga (1 Ped. 3:12).