1, 2. Cunanga ¿imatata yachajugripanchi?

SHUJ ladomanda imapash shuj paquete chayamunata shuyanajushcanchiman. Shinapash chai paquete na ucha chayamujpimi, ñucanchicunaca desesperari callarinchiman. Chaimandallatami Proverbios 13:12​pica, “imata shuyajushcapash na ucha pactajpica, shungupimi ninanda llaquirin” nin. Imapash problemacuna tiashcamanda chai paquete na ucha chayamujujta yachashpaca, seguromi chai paquete chayamungacamanga pacienciahuan shuyanchiman.

² Cunanga Bibliapa huaquin consejocuna ñucanchicuna pacienciahuan shuyachun ayudai ushashcatami ricugripanchi (Miq. 7:7). Shinallata ima ishcai casocunapi Jehová Dios arreglachun pacienciahuan shuyana cashcatapashmi yachajupashun. Tucuripica, pacienciahuan shuyajcuna ima bendiciongunatalla chasquinatami yachajugripanchi.

3. Santiago 5:7​pica ¿imatata yachachijun?

³ Santiago 5:7​pica, pacienciata charina minishtirishcapacha cashcata ricuchingapami cashna nin: “Huauquicuna, panicuna, Apunchi Jesús shamungacaman, na ñapash fiñarishpa shuyana canguichi. Tarpuj runata ricushpa yaringuichi: Paica, juyailla granoguta japingapaca, punda tamia, jipa tamia shamushpa fucuchingacamanmi, na ñapash fiñarishpa shuyajunlla” nin. Caipica pacienciahuan imagutapash shuyana cashcatami yachajupanchi.

4. Proverbios 4:18​pica ¿imatata yachachijun?

⁴ Proverbios 4:18​pica, alita ‘rurashpa causajcunapaj ñanga, yurajlla punllayamujuj michashnami. Ashtahuan ashtahuan punllayamushpa, alipacha punllayashcashnami can’ nijunmi. Cai shimicunaca Jehová Dios paipa sirvijcunata pai imata rurachun munashcata asha asha yachachishpa catijtami ricuchijun. Cai  textoca Jehová Diosta ashtahuan sirvingapaj shuj huauqui o shuj pani paipa causaipi imapash cambiocunata asha asha rurana cashcatami ricuchin. Shuj huauqui o shuj panica paipa causaipi cambiocunata ñapash ruraitaca na ushanllu. Chaipaca tiempomi minishtirin. Bibliata aliguta estudiashpa y Bibliapa consejocunata ñucanchi causaipi pactachishpaca asha ashami Jesús imashina cashcashnallata tucuita ushapashun. Shinallata Taita Diostapash ashtahuanmi rijsita ushapashun. Caita ashtahuan intindichingapami Jesusca shuj chimbapuraimanda parlarca. Chai chimbapuraimanda yachajupashunchi.

5. Shuj persona paipa causaipi cambiocunata asha asha rurashpa catijta intindichunga ¿Jesusca ima chimbapuraimandata parlarca?

⁵ Jesús parlashca chimbapuraipica, Jesusca Diospa Reinomanda o Gobiernomanda ali villaigucunataca shuj muyuhuanmi chimbapurarca. Imashinami shuj muyuca asha asha viñan, shina cuendami ali shunguta charij gentecunaca asha asha Diosmanda yachajushpa catin. Chaimandami Jesusca cashna nirca: ‘Tarpushca muyu llujshishpaca [tarpuj] runa na yachajtami, viñashpa viñashpa catin. Chai muyutaca, alpami viñachin. Pundaca, jihuashnallami llujshimun. Shina viñajpica, espigami llujshimun. Chai jipaca, caspagu tucushpa granogumi jundan’ nirca (Mar. 4:27, 28). Cai chimbapuraihuanga Jesusca, imashinami shuj plantagu asha asha viñan, shinallata Diospa Reinomanda uyaj gentecuna asha asha cambiocunata rurajta yachachingapami munarca. Chaitaca Bibliamanda yachajujcunapimi ashtahuanbachaca cuenta japita ushapanchi. Paicunaca Jehová Diosman ashtahuan quimiringapaca paicunapa causaipimi huaquin cambiocunata ashagu ashagu rurashpa catin (Efes. 4:22-24). Shinapash caitami yarina capanchi, gentecuna asha asha yachajushpa catichunga Jehová Diosllatami ayudajun (1 Cor. 3:7).

6, 7. Jehová Dios tucuita imashina rurashcamandaca ¿imatata yachajupanchi?

⁶ Jehová Diosca paipa shutita alipi quidachingapaj y gentecunapa bienba imagutapash rurashpapash na musparishpaca imatapash ruranllu. Por ejemplo, Jehová Dios cai alpata rurajushpaca, asha ashami imagutapash rurarca. Caimanda ashtahuan yachajupashunchi.

⁷ Taita Dios cai alpata imashina rurashcata parlashpami Bibliapica, Taita Diosmi cai alpa  “mashnata medinatapash” ricurca. Shinallata cai alpa ‘callaricuna ima jahuapi tiajujta, esquinapi churana rumitapash churarca’ ninmi (Job 38:5, 6). Jehová Diosca paipa creación o rurashcacuna imashina quidashcata ricushpa pensaringapapashmi tiempota llujchirca (Gén. 1:10, 12). Angelcunaca Jehová Dios tucuita asha asha rurajtami ricunajurca. Chaita ricushpaca ¿imashinashi sintirishcanga? Bibliapica ‘Taita Diospaj churicunaca tucuillami ninanda cushijunajurca’ nijunmi (Job 38:7). Caimandaca ¿imatata yachajupanchi? Jehová Diosca cai alpata, estrellacunata y gentecunata rurangapaca ashtaca millón huatacunata parashcatami yachajupanchi. Chai jipaca tucui imashina ‘aligupacha’ quidashcata ricungapami tiempoguta llujchirca (Gén. 1:31).

8. Cunanga ¿imatata yachajugripanchi?

⁸ Imashinami ricupashcanchi pacienciata charina minishtirishca cashcatami Bibliapica yachachin. Cunanga ima ishcai casocunapi Jehová Dios arreglachun pacienciahuan shuyana cashcata yachajupashunchi.

9. ¿Ima casopita Jehová Diostaca pacienciahuan shuyana capanchi?

⁹ Jehová Dios ñucapa mañashcacunata na ucha contestanllu yajushpa. Shuj problemata aguantangapaj ayudahuai nishpa o imapash nali munaicunata saquingapaj ayudahuai nishpa mañashca cashpapash, pero na arreglarijta ricushpaca talvezmi Jehová Diosca ñuca mañashcacunataca na uyahuanllu nishpa pensarinchipashchari. Jehová Diosca ¿imamandata ñucanchi mañashcandi imagutapash na ucha contestan?

10. Jehová Diosta mañashpaca ¿imamandata pacienciahuan shuyana capanchi?

¹⁰ Jehová Diosca ñucanchi mañaicunataca ali alimi uyan (Sal. 65:2). Paica ñucanchicuna paipi crishcamanda shina mañajtami ali yachan (Heb. 11:6). Shinallata ñucanchi mañashcashna causangapaj esforzarijujta y paipa munaita pactachingapaj munajujta ricungapami Taita Diosca munan (1 Juan 3:22). Chaimandami imapash nali munaicunata saquingapaj esforzarijushpaca, Jehová Diosta mañashcashna causangapaj y Jehová Dios ñucanchita ayudachun pacienciahuan shuyangapami esforzarina capanchi. Jesusca, Jehová Dios ñucanchi mañashcacunata huaquinbi na chai rato contestajtami yachachirca. Paica nircami: “Diosta mañaichi, paica carangallami. Mascaichi, taringuichimi. Punguta huactachishpa cayaichi, paica pascangallami. Diosta tucui mañajcunaca, japingami. Mascajcunapash taringami. Punguta huactachijcunapash, pascajpi yaicungami” (Mat. 7:7, 8). Cai consejota catijpi y Jehová Diosta cutin cutin mañajpica seguromi Jehová Diosca ñucanchi mañaicunata contestanga (Col. 4:2).

11. Hebreos 4:16​pi nishca shimicunaca ¿imapita ñucanchitaca ayudan?

¹¹ Huaquinbica Jehová Diosta imagutapash mañajpica na ucha contestanllu yanchimi. Shinapash Jehová Diosca ñucanchita juyaimandami “minishtijun tiempopipacha ñucanchitaca ayudanga” (Hebreos 4:16​ta liipangui). * Shinaca ñucanchi munashcashna imapash na ucha pactarimujpica Jehová Diosca unaitami parajun yashpaca na pensanachu capanchi. Ashtaca huauquipanicunaca Diospa Reino o Gobierno cai alpapi tucui llaquicunata tucuchichunmi cutin cutin mañanajushca. Jesusllatami Diospa Reino ucha shamuchun nishpa mañanguichi nishpapash yachachirca (Mat. 6:10). Shinapash ñucanchi munashca tiempopi Diospa Reino na shamushcamandallaca na Jehová Diospi crinataca saquinachu capanchi (Hab. 2:3; Mat. 24:44). Ñucanchicunaca Jehová Diosta tucui shunguhuan mañashpa, shinallata Jehová Dios agllashca punllapi pai imagutapash rurachunmi  shuyana capanchi. Jehová Diospa punllaca, pai agllashca tiempopi, pai agllashca horaspimi chayamunga. Chai punllaca tucuicunapallatami alipacha canga (Mat. 24:36; 2 Ped. 3:15, TNM).

12. ¿Ima casopita ashtahuanbachaca pacienciata ricuchinaca shinlli caita ushan?

¹² Yangamanda llaquichijpi. Cunan punllacunapica gentecunaca huarmicuna o jaricuna cashcamanda, shuj razamanda o shuj costumbrecunata charishcamanda o shuj llactamanda cashcamandami shujcunataca nali tratan. Gentecunaca discapacitadogucunatapashmi nali tratan. Jehová Diosta sirvijcunatapashmi Bibliapa mandashcacunata pactachijushcamandaca yangamanda llaquichishca. Ñucanchicunapash cashna llaqui apanajushpaca, Jesuspa shimicunatami yarina capanchi. Paica nircami: “Tucurimuicaman, llaquicunata apajcunallami quishpichi tucunga” nishpa (Mat. 24:13). Shinapash congregación ucupi pipash shuj jatun juchata rurashca cajta yachashpaca ¿ancianocuna Bibliapi ricushpa chai asuntota arreglachun pacienciahuan shuyajunchimanllu? Ancianocunaca ¿imatashi ruranga?

13. Pipash shuj jatun juchata rurashca cajpica ¿ancianocuna imata rurachunda Jehová Diosca munan?

¹³ Ancianocunaca congregacionbi shuj huauqui o shuj pani jatun juchata rurashcata yachai chayashpaca, paita ayudangapami ‘jahua pachamanda shamujuj ali yachaita’ Jehová Diostaca mañan (Sant. 3:17). Ancianocunaca, juchata rurador ‘Diospaman tigrarichun’, pai ama pandashpa causachunmi ayudangapaj munan (Sant. 5:19, 20). Ancianocunaca congregacionda cuidangapaj, shinallata llaquichi tucushcacunata ayudangapami ashtahuanbachaca munan (2 Cor. 1:3, 4). Pipash shuj jatun juchata rurashcata yachaj chayashpaca, ancianocunaca imapacha pasashcata yachangapami investigan. Chaita rurangapaca tiempomi minishtirin. Chai jipami ancianocunaca Jehová Diosta mañashpa Bibliahuan juchata ruradortaca consejan. Shinallata corrigina cashcatallami corrigin (Jer. 30:11). Ancianocunaca, juchata ruradorhuan ima pasanata dicidingapaca, na ñapash imatapash dicidinllachu o unaitapash na paranllu. Ancianocunaca Jehová Diospa ayudahuanmi congregacionbi tucuicunatallata ayudangapaj imagutapash dicidin. Shinapash ancianocuna imatapash ña dicidishcahuanga talvez congregacionbica pipash nalimi sintirita ushanga. Quiquinda shina pasajujpica ¿imatata ruraita ushapangui?

14. Shuj huauqui o shuj pani ñucanchita llaquichishca cajpica ¿pipa ejemplota ñucanchitaca ayudanga?

¹⁴ ¿Congregacionmanda pipashchu quiquinda ninanda llaquichishca? Shina cajpica Jehová Dios imashina chai asuntocunata  arreglashcatami Bibliapi ricuita ushapangui. Chaicunamanda yachajunami, ñucanchicunataca Jehová Dios chai cosascunata arreglangacaman pacienciahuan shuyachun ayudanga. Por ejemplo, Josetaca paipa propio huauquicunami ninanda llaquichirca. Paita yangamanda llaquichishca cajpipash, Joseca na yapata llaquirircachu. Chaipa randica, Jehová Diosta sirvishpami catirca. José pacienciahuan aguantashpa catishcamandami Jehová Diosca paitaca ninanda bendiciarca (Gén. 39:21). Tiempo yalijpica Joseca paipa huauquicuna paita yangamanda llaquichishca cajpipash paicunataca perdonarcami. Shinami Joseca, Jehová Dios paita imashna bendiciashcata paillata ricui usharca (Gén. 45:5). Ñucanchipash pipash ñucanchita llaquichijpica José runagushnami imapash asuntotaca Jehovapa maquipi saquina capanchi. Shinami tranquilo sintiripashun (Sal. 7:17; 73:28).

15. Shuj panigutaca ¿imata pacienciahuan aguantashpa catichun ayudarca?

¹⁵ Talvez ñucanchicunataca na Josetashnaca pipash llaquichishcangachu. Shinapashmi imamandapash ñucanchita yangamanda juchachijpica llaquilla sintiripanchi. Shinapash pihuanbash imapash problemacunata charishpaca aunque na testigo de Jehová cajpipash ñucanchica Jehovapa mandashcacunata pactachishpami catina capanchi (Filip. 2:3, 4). Cunanga, shuj paniguta ima pasashcata ricupashunchi. Paniguca trabajopi shuj compañera paimanda nalicunata parlajushcatami yachaj chayarca. Chaimi paniguca nanarishca sintirirca. Shinapash paniguca culiramandaca na imatapash rurarcachu. Chaipa randica Jesuspa ejemplopimi pensarca. Jesusca paita llaquichinajujpipash, ñucapashmi chashnallata llaquichisha nishpaca na nircachu (1 Ped. 2:21, 23). Jesuspa ejemplota catimandami chai paniguca trabajopi compañerahuan ima pasajushcamandaca na yapata preocuparijurca. Chai jipallami paniguca, trabajomanda compañera paipa saludhuan nali cashcata y yapata estresada cashcatapash yachaj chayarca. Chaita yachashpami paniguca, antsicarinmi na imatapash nircani yashpa ali sintirirca. Cai paniguca paipa compañera paipa saludhuan nali cashcamandami chaicunataca nijushcanga nishpami pensarirca. Chaimandami paipa compañerahuan pacienciata charishcamandaca paniguca tranquila, ali sintirirca.

16. Ñucanchicunata imamandapash yangamanda llaquichinajujpica ¿imata aguantashpa catichunga ayudanga? (1 Pedro 3:12).

¹⁶ Ñucanchicunata imacunamandapash yangamanda llaquichinajujpi o imapash problemacunata  aguantana tucushpaca, Jehová Dios “shungupi ninanda llaquirishpa” causajcunata quishpichijushcatami yarina capanchi (Sal. 34:18). Jehová Diosca ñucanchicuna pacienciata charishcamanda y ñucanchi llaquicunata paiman mingashcamandami ñucanchitaca ninanda juyan (Sal. 55:22). Tucui cai alpata ruraj Jehová Diosca tucui ima pasajushcatami ali ali ricujun (1 Pedro 3:12​ta liipangui). Shinaca imapash llaquicunahuan cashpa, chaicunata na arreglai ushajushpaca, Jehová Dios chai llaquicunata arreglachunmi pacienciahuan shuyana capanchi.

17. Isaías 30:18​pica Jehová Diosca ¿imatata nin?

¹⁷ Jehová Diosca ñallapachami paipa Gobiernopica ashtaca bendiciongunata cunga. Isaías 30:18​pica: “Mandaj Diosca, cangunata llaquingapaca shuyangarami. Shinamandami, cangunata llaquishcamandaca, jatumbi churai tucunga. Mandaj Diosca, imatapash cashcatapacha ruraj Taita Diosmi. Paita yariashpa causajcunaca, tucuicunami ninanda cushijun” nijunmi. Jehová Diosca pai ayudachun pacienciahuan shuyajcunamanga ashtaca bendiciongunatami cunan punllacunapillata y shamuj punllacunapipash caranga.

18. Paraíso alpagupica ¿ima bendiciongunatata chasquigripanchi?

¹⁸ Paraíso alpagupica ñana cunanbishnaca imapash llaquicunata o problemacunata aguantashpa causanajushunllu. Chaipica ñucanchitaca pipash ñana llaquichingachu. Ñana llaquilla sintirishunllu (Apoc. 21:4). Paraíso alpagupica ñucanchi minishtirishca cosasgucunamandaca ñana preocuparishpa causanajushunllu. Chaipica tucui ñucanchi ima munashcatami charipashun. Chaipica cushillapachami causapashun (Sal. 72:16; Is. 54:13).

19. Jehová Diosca ¿imapata ñamanda ñucanchitaca preparajun?

¹⁹ Chai punlla chayangacamanga Jehová Diosca nali costumbrecunata ladoman saquichun, shinallata pai munashcashna cachunmi ayudashpa catijun. Shinami Jehová Diosca ñucanchitaca ñamanda paipa Gobierno mandajujpi listo cachun preparajun. Chaimandami na desanimarishpa ñaupaman catina capanchi. Jipa punllacunapica cushillapachami causapashun. Chaimandami Jehová Dios paipa nishcacunata pactachingacamanga pacienciahuan aguantashpa catina capanchi.