FETA charina o tucui shunguhuan crinaca minishtirishcapachami can. Por ejemplo, Diabloca ñucanchita Jehová Diosmanda caruyachingapami munan. Shinapash feta charimandami “nalicunata yarichij diablo flecha pundapi ninata japichishpa shitamushcataca huañuchi” ushapanchi (Efes. 6:16). Shinallata feta charishpallami urcucunashna jatun problemacunata charishpapash aguantai ushapanchi. Jesusca paipa catijcunamanga nircami: “Jamzi mostaza muyu valigutallapash crishpaca, cai urcuta: ‘Caimanda anchurishpa, shuj ladopi tiarigri’ nijpipash ringallami” nishpa (Mat. 17:20). Feta charishpami Jehová Diosmanga ashtahuan quimirishun. Chaimandami cashna tapurina capanchi: Crina nishpaca ¿imatata ningapaj munapanchi? ¿Imamandata tucui shunguhuan crina capanchi? Crishpa catingapaca ¿imatata rurana capanchi? ¿Jehovapi o Jesuspipashchu crina capanchi? (Rom. 4:3).

Feta charinaca, Biblia cabalguta yachachijta crinallaca na capanllu. Ayacunapashmi Taita Dios tiajtaca crishpa ninanda manllarin (Sant. 2:19). Shinaca feta charina o crina nishpaca ¿imatata ningapaj munapanchi?

Femanda parlashpaca Bibliapica ishcai yuyaicunatami intindichin. Primero, Bibliapica fe nishpaca “imata japigrinata crishcatapash, chaitaca japigrishapacha yashpami shuyanajunchi” ninmi. Caita nishpaca imapash pactarinapacha cashcapi crinatami shina nijupan (Heb. 11:1a). Feta charimandami Jehová Dios tucui imata rurasha nishcacuna pactarinapi cripanchi. Por ejemplo, Jehová Diosca israelitacunataca nircami: “Ñucaca, punlla canapica punlla cachun, tuta canapica tuta cachunmi mandashpa churarcani. Chaita canguna yangapi churashpa, tutapash, punllapash illachun ni ushanalla cajpica, ñucapash ñucata servij Davidman ari nishcataca, yangapi churaimanllami” nishpa (Jer. 33:20, 21). ¿Ima punllapash indica na llujshigrinllu yashpa punllapash, tutapash na tiagrinllu yarin nishpa pensapashcanchichu? Na, na shina pensapashcanchichu. Cayandi indi llujshinata seguro cashpaca, tucuita ruraj Taita Diospa nishcacuna pactarinatacarin ashtahuanmi seguro caita ushapanchi (Is. 55:10, 11; Mat. 5:18).

Segundo, Bibliapica feta charimanda o “crishcamandami, na ricushpapash japigrinataca aligutapacha yachanchi” ninmi. Feta charimandami imatapash na ricushpapash ciertopacha tiajta cripanchi (Heb. 11:1b). Cunanga cai ejemplopi yuyapashun. Huaira tiashcataca ¿imashinata yachanchi? nishpa shuj huahua tapushcanman. Chaimi huairata ima punllapash na ricushca cashpapash, huaira tiashcataca ñucanchicuna respirai ushashcamanda, yuracunapash cuyurijujta ricushcamandami huaira tiashcataca intindichipanchi. Chaicunata uyashpami huahuaca huairata na ricui ushashpapash tiashcataca paipash cri ushanga. Feta charishpaca ciertopacha imapash tiajpimi cri ushapanchi (Rom. 1:20).

Feta charingapaca imatapash ricuna, yachanami minishtirin. Chaimandami feta charingapaca ‘na llullashpa villajuj Shimitapash yachajuna’ capanchi (1 Tim. 2:4). Shinapash yachajushpallaca na chaipi quedanachu capanchi. Apóstol Pabloca feta charishcataca  ‘shungumanda crishpami’ ricuchina capanchi nircami (Rom. 10:10). Bibliamanda yachajushcahuanllaca na quedanachu capanchi, chai yachajushcataca pactachinami capanchi. Shinallami feta charishcataca ruraicunahuan, Taita Dios alicachishcatalla rurashpa ricuchipashun (Sant. 2:20). Pipash paipa nali munaicunata rurashpa catingapaj munaimanda imapash pretextocunata churashpa catijpica, Bibliapa yachachishcacunata na alicachishcatami ricuchin (2 Ped. 3:3, 4; Jud. 18). Diospa Shimipi yachachishcacunata na alicachimandami punda tiempopi causashca gentecunapash tauca milagrocunata ricushca jahuapash na crirca (Núm. 14:11; Juan 12:37). Diospa espiritu santoca, llullacunata nalicachishpa Diospa Shimita alicachijcunamanllami feta charichun ayudan (Gál. 5:22; 2 Tes. 2:10, 11).

Punda tiempocunapi Jehovata sirvijcunapuramandaca, rey Davidpashmi feta charishcata ricuchirca (Heb. 11:32, 33). Rey David feta charijpipash paipa familiapica na tucuicunachu feta charirca. Davidpa rucu huauqui Eliabca, Goliat imata nijushcata David ashtahuan yachangapaj munajpica, Davidtaca tacurishpami cacharca. Chaita rurashpaca Eliabca, Jehovapi feta na charishcatami ricuchirca (1 Sam. 17:26-28). Nipipash feta charishpaca na nacirinchichu. Shinallata taitapa o mamapa fetapash na chari ushapanchichu. Cada unomi feta charingapaca esforzarina capanchi. Rey Davidca Jehová Diosman ashtahuan quimirimandami feta chari usharca.

Salmo 27​pica, feta imashina rey David chari callarishcatami parlan (verso 1). Rey Davidca pundacunapi Jehová Dios paita imashina cuidashcata, paipa contracunata imashina Jehová llaquichishcatami yuyarin carca (verso 2 y 3). Jehová Diospa huasitapash ninandami alicachin carca (verso 4), chaipimi shuj israelitacunandi Jehovata alabangapaj rin carca (verso 6). Jehová Dios paita ayudachunbashmi ninanda mañan carca (verso 7 y 8). Shinallata, Jehová Diospa ñambi purinatapash yachachihuayari nishpami mañan carca (verso 11). Rey Davidpaca feta charinaca minishtirishcapachami carca. Chaimi feta na charishpaca huañuimanmi carcani nin (verso 13).

Salmo 27​pi yuyaicunata catishpaca ñucanchipashmi rey Davidshna feta chari ushapashun. Feta charingapaca Bibliata, publicaciongunatapashmi liina capanchi (Sal. 1:2, 3). Chai liishcacunapi pensaringapami tiempoguta llujchina capanchi. Shinami Jehová Diosta agradicishcata ricuchipashun. Shina ruraimandami paipi feta charishcataca tandanajuicunapi cashpa, shujcunamanbash ñucanchi crishcacunata parlangapaj munapashun (Heb. 10:23-25). Jehovata cada punlla mañashpapashmi paipi tucui shunguhuan crishcata ricuchipanchi (Luc. 18:1-8). Jehová Dios ñucanchi mañaicunata uyajta yachaimandami siempre mañajunalla capanchi (1 Tes. 5:17; 1 Ped. 5:7). Feta charimandami Jehovamandaca imagutapash ruranchilla, shinami ashtahuan crishpa cati ushapanchi (Sant. 2:22).

Jesusca pai huañungapaj shuj tuta faltajpimi paipa catijcunataca cashna nirca: ‘Taita Diospi cringuichi, ñucapipash cringuichi’ nishpa (Juan 14:1). Shinaca Jehovapi crishpaca, Jesuspipashmi crina capanchi. Chaipaca cai quimsa yuyaicunata yachajupashunchi.

Primero, tucuimanda Jesús huañushpa salvachunmi Jehová Diosca paipa Churita cachamurca. Chaitaca siempremi yarina capanchi. Chaimi apóstol Pabloca nirca: “Cunan cai causaipi causajushpapash, Taita Diospaj Churita crishpami causajuni. Paica, huañuchijcunaman japi tucushpami, ñucamanda huañurca” nishpa (Gál. 2:20). Shinaca Jesuspi crishpaca ñucanchimanda pai huañushcataca seguromi cana capanchi. Paimandami ñucanchi juchacunata Jehová Dios perdonashpa, para siempre causaigutapash chasquita ushapanchi. Shinami Jehová Diosca ñucanchicunata ninanda juyashcata ricuchin (Rom. 8:32, 38, 39; Efes. 1:7). Caicunata yachanami imapash nali pensamientocunata ama charichun ayudan (2 Tes. 2:16, 17).

Segundo, Jehovata mañajushpaca siempre Jesuspa shutipimi mañana capanchi. Jesusmandami ñucanchicunaca Jehová Diostaca tucui shunguhuan mañashpa quimiri ushapanchi. Bibliapica ninmi: “Ñucanchi ima llaquihuan cajpipash, ninanda llaquishpa juyashpa ayudachunmi, chashna quimirina canchi” nishpa (Heb. 4:15, 16; 10:19-22). Tucui shunguhuan Jehovata mañajpica imapash juchacunata ama rurachunmi ayudanga (Luc. 22:40).

Tercero, Jesusta cazupashunchi. Apóstol Juanga nircami: “Diospaj Churita maijambash crishpaca, causaita causagrinatami charin. Ashtahuangarin Diospaj Churita na cringapaj munajca, causaita causagrinataca napacha charingachu. Ashtahuangarin Taita Dios ninanda fiñashpa llaquichinallami, paitaca shuyajun” nishpa (Juan 3:36). Jesuspi crina nishpaca, apóstol Juanga Jesusta cazuna cashcatami intindichirca. Shinaca Jesuspi crishpaca paita cazunami capanchi. Chaipaca pai imata yachachishcata, pai ‘mandashcatami’ tucuita pactachina capanchi (Gál. 6:2). Shinallata “aliguta cazushpa, aliguta yarishpa servij” esclavopa yachachishcacunatapashmi cazushpa catina capanchi (Mat. 24:45). Cunanmandallata Jesuspa mandashcata cazushpaca, ima llaquicuna shamujpipash o imapash problemacunata charishpapash aguantashpami catita ushapashun (Mat. 7:24, 25).

Shuj jarica Jesustaca cashnami nirca: “Ari, crinipachami. Ashtahuan tucui shunguhuambacha cringapaj” ayudahuai nishpa (Mar. 9:24). Cai jariguca Jesuspi crishpapash ashtahuan cringapaj ayudahuai nishpaca, humilde cashcatami ricuchirca. Chai jarigu cuendami ñucanchicunapash ashtahuan crishpa catinata minishtipanchi. Ashtahuan feta charishpa catingapaca ¿imatata rurana capanchi? Chaipaca Bibliata liina, liishcapi pensarinami capanchi. Shinami Jehová Dios ñucanchimanda imata rurashcata yachajushpa, Jehovata agradicishcata ricuchipashun. Shinallata huauquipanicunahuan tandanajuna, shamuj punllacunapi juyailla causaigu tianamanda shuj gentecunaman parlashpapashmi ashtahuan feta charipashun. Shinallata Jehovata mañanataca nunca na saquinachu capanchi. Shinallami feta charishpa cati ushashun. Ashtahuanbachaca Taita Diosta juyashpa cati ushapashun (Jud. 20, 21).