1, 2. a) ¿Imamandata llaquicunata charishpaca nunca na sololla cashcataca seguro capanchi? b) Cai temapica ¿maijan chuscu yuyaicunatata yachajupashun?

 SHINLLI llaquicunata charishpaca imata ruranatapash na atinaimandami, shuj jatun bosquepi maitapash na ri ushanshna sintirinchi. Pero na solollachu capanchi. Jehová Diosca ñucanchicuna ima llaquicunata charijtaca alimi yachan. Chaimi cangunataca na saquishachu nishpa prometishca. Jehová Diosca juyaihuanmi paipa sirvijcunataca ñucami cangunataca “tucui causaipi ayudajushalla” nin (Is. 41:10).

² Cai temapica ñucanchicunata imashina Jehová Dios ayudajtami chuscu yuyaicunapi ricupashun. Jehová Diosca ñucanchicuna imata ruranata yachachishpa, minishtirishca cosasgucunata cushpa, ñucanchita cuidashpa y consolashpami ayudan. Jehová Diosca cangunataca llaquicuna japijpipash, cangunataca nunca na saquishachu, nunca na jichushachu nishpami prometishca. Shinaca nunca na sololla capanchichu.

JEHOVAMI IMATA RURANATA YACHACHIN

3, 4. Ñucanchi causaipi imata ruranata yachachunga ¿imatata Jehová Diosca cushca? (Salmo 48:14).

³ (Salmo 48:14​ta liipangui). Gentecunaca ñucanchi causaita ñaupaman pushaitaca na ushapanchichu. Chaimi ñucanchi causaipi imata ruranata yachachunga, Jehová Diosca Bibliata cushca (Sal. 119:105). Bibliahuanmi Jehová Diosca ñucanchicuna ali decisiongunata agllachun, ali personacuna caimanda cushilla causachun ayudan. Shinallata jipa punllacunapi para siempre causana oportunidadta charichunbashmi ayudan. a Bibliapica shujcunata perdonashpa ama risintirishca quidachun, tucuipi honradocuna cachun y caishuj chaishuj tucui shunguhuan ninanda juyarichunbashmi yachachin (Sal. 37:8; Heb. 13:18; 1 Ped. 1:22). Chaicunata Bibliapi yachajushpami ñucanchicunaca ashtahuan ali taitacuna,  ali cusacuna y ali amigocunapash caita ushapanchi.

⁴ Bibliapica, ñucanchishnallata sintirishca personacunamanda y ñucanchi charishca problemacunatallata charishca personacunamandami parlan (1 Cor. 10:13; Sant. 5:17). Paicunapa causaimanda Bibliapi liishpa, paicunamanda imata yachajushcata ñucanchi causaipi pactachishpaca, por lo menos ishcai beneficiocunatami charipanchi. Primer beneficioca, shujcunapash ñucanchishna sufrijushcata yachashpa, Jehová Dios paicunata imashina aguantachun ayudashcata cuenta japichunmi ayudan (1 Ped. 5:9). Segundo beneficioca, llaquicunata aguantangapaj imacunatalla rurai ushashcata yachajuchunmi ayudan (Rom. 15:4).

5. Ñucanchicuna imata ruranata yachachunga ¿Jehová Diosca picunatata utilizan?

⁵ Ñucanchicuna imata ruranata yachachunga Jehová Diosca huauquipanicunahuanbashmi ayudan. b Por ejemplo, superintendente huauquicunaca congregaciongunata visitashpami, ñucanchi feta shinlliyachingapaj, tucuicuna shujllashna cachun ayudangapaca alipacha discursocunata cun (Hech. 15:40–16:5). Congregacionbi ancianocunapash ñucanchicuna Jehová Diospa amigo cashpa catichun ayudangapami shinllita esforzarin (1 Ped. 5:​2, 3). Taitamamacunapash paicunapa huahuacunamanga Jehová Diosta juyachun, ali decisiongunata japichun, Bibliata liichun, tandanajuicunaman richun y predicacionmanbash seguido llujshichunmi yachachin (Prov. 22:6). Shinlli feta charij panigucunapashmi, paicunapa ali ejemplohuan joven panigucunataca ayudan, consejan y juyaihuan animan (Tito 2:​3-5).

6. Jehová Dios cushca ayudacunamanda beneficiaringapaca ¿imatata rurana capanchi?

⁶ Ali decisiongunata japichun y cushilla causachunga, Jehová Diosca tucui ñucanchi minishtishcacunatami cun. Jehová Dios cushca ayudacunamanda beneficiaringapaj y chai ayudacunamanda agradicingapaca ¿imatata rurana capanchi? Traducción del Nuevo Mundo Bibliapi Proverbios 3:​5, 6​pica ninmi: “Jehová Diospica cambaj tucui shunguhuan confiangui. Aligutapacha yarishpami purini yashpaca, ama jariyanguichu. Imata ruragrijushpapash, Diostami yuyarina cangui. Paimi, can purina ñandaca aliguta pushanga” ninmi. Jehová Dios ñucanchi purina ñanda aliguta pushajpimi, na ashtaca llaquicunapi urmashpa ashtahuan cushilla causapashun. Ñucanchita ninanda juyashcamanda y ñucanchi minishtinajushca consejocunata cushcamandaca Jehová Diostaca ninandami agradicipanchi (Sal. 32:8).

JEHOVAMI MINISHTIRISHCA COSASGUCUNATA CUN

7. Filipenses 4:19​pi nishcashnaca ¿imashinata Jehová Diosca ayudan?

⁷ (Filipenses 4:19​ta liipangui). Jehová Diosca ñucanchita yachachishca jahuapash, micunaguta, ropaguta, maipi causana pushtuguta charingapaj ñucanchicuna esforzarijpica bendicianmi (Mat. 6:33; 2 Tes. 3:12). Micunamanda, ropamanda, maipi causana pushtumanda preocuparinaca normalmi can. Shinapash Jehová Diosca chai cosascunamandaca na yapata pinarinachu canguichi ninmi (Mat. 6:25). Jehová Diosca paipa sirvijcunataca nunca na saquishachu nishpami prometishca. Chaimandami na yapata pinarina capanchi (Mat. 6:8; Heb. 13:5). Jehová Dios paipa promesata pactachinata y ñucanchi minishtishca cosascunata caranataca seguromi capanchi.

8. Jehová Diosca ¿imashinata Davidtaca ayudarca?

⁸ Davidta Jehová Dios imashina ayudashcapi pensaripashunchi. Davidca ashtaca huatacunatami rey Saulmanda pacajushpa causarca. Chaimandami Jehová Diosca Davidmanbash y paipa soldadocunamanbash minishtirishca cosasgucunata cushpa ayudarca. Chai huatacunata  yuyarishpami Davidca cashna nirca: ‘Ñucapash huambrami carcani, ñami rucuyani. Alita ruraj runa jichui tucushcataca, na ricushcanichu. Paipa huahuacuna micunata mañanajujtapash, na ricushcanichu’ nircami (Sal. 37:25). Llaqui tiempocunapi cashpaca quiquinman o huauquipanicunaman minishtirishca cosasgucunata Jehová Dios cushcataca de seguromi ricupariangui.

9. Llaqui apashca huauquipanicunataca ¿imashinata Jehová Diosca ayudan? (Fotocunata ricupangui).

⁹ Paipa sirvijcuna llaqui apajpica, minishtirishca cosasgucunata paicunaman cushpami Jehová Diosca ayudan. Por ejemplo, primer cristianocunapa punllacunapica ninan yarjai tiempomi Jerusalén llactapica tiarca. Chaimandami shuj ladocunamanda huauquipanicunaca Jerusalenmanda huauquipanicunamanga minishtirishca cosasgucunata cachashpa ayudarca (Hech. 11:​27-30; Rom. 15:​25, 26). Jehová Diosta sirvijcunaca cunan punllacunapipashmi llaqui apanajuj huauquipanicunataca ayudapanchi. Llaqui apanajuj huauquipanicunata juyaimandami Jehová Diosca paicunata ayudana munaita charichun ñucanchitaca ayudan. Chaimi llaqui apashca huauquipanicunamanga micunaguta, yacuguta, ropaguta y jambicunatapash cachashpa ayudapanchi. Shinallata, Salón del Reinocuna o huauquipanicunapa huasicuna dañarijpipashmi arreglashpa ayudapanchi. Shinallata huasita o familiata chingachishca huauquipanicunatapash uchallami Bibliahuan consolashpa, animashpa ayudapanchi. c

10, 11. Borispa ejemplomandaca ¿imatata yachajupanchi?

¹⁰ Jehová Diosca generoso caimandami paita nara sirvinajuj gentecunamanbash minishtirishca cosasgucunata cun. Ñucanchicunapash Jehovapa  ejemplota catishpami, Jehovata na sirvij gentecunatapash ayudapanchi (Gál. 6:10). Imagupipash ayudajpimi gentecunaca Jehová Diosmanda y testigo de Jehovacunamandapash yachajungapaj munan. Borispa ejemplota ricupashun. Paica Ucrania llacta colegiopi directormi can. Na testigo de Jehová cashpapashmi, testigo de Jehová alumnocunataca aliguman, respetohuan tratan carca. Chai llactapi guerra callarijpimi Borisca seguro pushtuman pacajungapaj rijpi huauquipanicunaca ayudarca. Jipamanmi Borisca Jesús Huañushcata Yarina tandanajuiman rirca. Huauquipanicuna ayudashcata yuyarishpami Borisca “testigo de Jehovacuna aliguman tratashpa cuidahuashcamandaca ninandami agradicipani” nirca.

¹¹ Na testigo de Jehovacuna ayudachun minishtinajujpica, Jehová Diospa ejemplota catishpami paicunatapash ayudapanchi (Luc. 6:​31, 36). Na Testigo gentecunata juyaihuan tratangapaj esforzarijpica, paicunapashmi talvez Jesuspa discipulocuna tucungapaj munanga (1 Ped. 2:12). Gentecuna Jehová Diosta sirvingapaj munajpi o na munajpipash cushillami sintiripanchi. Porque Bibliapi nishcashnaca, carajcunami carajpi japijcunatapash yalita cushijun (Hech. 20:35).

JEHOVAMI ÑUCANCHITA CUIDAN

12. Jehová Diosca ¿imatata paipa sirvijcunamanga prometishca? (Salmo 91:​1, 2, 14).

¹² (Salmo 91:​1, 2, 14​ta liipangui). Diabloca, gentecuna Jehová Dios munashcashna Jehovata adorachunga na munanllu. Shinapash Jehová Diosca, ñucapa sirvijcunataca ñucamanda imapash caruyachichunga na saquishachu nishpami prometishca. Chaimandami Jehová Diosca Diablo paipa munaita rurachunga na saquinga (Juan 17:15). Jehová Diosca “ninan manllanai llaqui tiempo” callarijpica, cuidashami, shinlli feta charichunbash ayudashami nishpami prometishca. Chaimi chai tiempocunapi Jehová Dios ayudanataca seguro capanchi (Apoc. 7:​9, 14).

13. ¿Imashinata Jehová Diosca cada unota cuidajun?

¹³ Shinallata Jehová Diosca paipa sirvijcunata como grupo cuidashpapash cada unotami cuidajun. Bibliata cushpami ayudan. Bibliami ñucanchitaca ima ali cajta, ima nali cajta yachachun ayudan (Heb. 5:14). Bibliapa consejocunata pactachishpami Jehová Diospa amigocuna caita ushapanchi y ali decisiongunata japitapash ushapanchi. Ali decisiongunata japimandami ashtahuan cushilla y sano caitapash ushapanchi (Sal. 91:4). Jehová Diosca congregacionhuanbashmi ñucanchitaca cuidajun (Is. 32:​1, 2). Congregacionbi huauquipanicunaca ninandami Jehová Diostaca juyan y tucui shungumi cazun. Tandanajuicunapi, predicacionbi o imagutapash rurashpa huauquipanicunahuan tiempota yalijpimi, paicunaca ñucanchita animan. Shinallata nali ruraicunapi ama urmachunbashmi ayudan (Prov. 13:20).

14. a) Jehová Diosca ¿imamandata huaquinbica llaquicunata charichun saquishca? b) Salmo 9:10​ta liishpaca ¿imatata seguro capanchi? (Notata ricupangui).

¹⁴ Punda tiempopica, paipa sirvijcuna ama imapash pasachunmi Jehová Diosca cuidan carca. Pero na siemprechu shina pasan carca. Bibliapi nishcashnaca ‘ima punlla ima tucunataca na yachaimandami’ huaquinbica imapash pasanchi (Ecl. 9:12). Shinallata Diablo llulla cashcata ricuchingapami Jehová Diosca punda tiempopipash y cunanbipash paipa sirvijcunataca catiriashpa llaquichichun y huañuchichunbash huaquinbica saquishca (Job 2:​4-6; Mat. 23:34). Aunque Jehová Dios ñucanchi llaquicunata na siempre anchuchijpipash, ñucanchicunata nunca na saquinataca seguromi capanchi (Sal. 9:10). d

JEHOVAMI ÑUCANCHITA CONSOLAN

15. ¿Imashinata Jehová Diosca oracionhuan, Bibliahuan y huauquipanicunahuan consolan? (2 Corintios 1:​3, 4).

¹⁵ (2 Corintios 1:​3, 4​ta liipangui). Tucuicunallatami huaquinbica llaquilla, preocupado,  estresado sintiripanchi. Talvez cai horasllatami imapash llaquicunamanda llaquilla o sololla sintirijupangui. Pipash na intindihuanllu yashpa pensarijujpipash, Jehová Diosca quiquin imashina sintirijushcataca alimi yachan. Ashtahuanbash paimi ‘ñucanchicuna ima llaquipi cajpipash cushichishpa’ consolan. Shinapash ¿imashinata consolan? Oracionda rurajpimi Jehová Diosca ‘gentecuna na intindi ushanalla tranquilo, ali canata carashpa’ ñucanchitaca consolan (Filip. 4:​6, 7). Shinallata Bibliahuanmi Jehová Diosca ñucanchitaca consolan. Bibliapimi Jehová Dios ñucanchita juyajta, alipacha consejocuna tiajta y shamuj punllacunapi ali causaigu tianatapash yachajupanchi. Huauquipanicunahuanbashmi Jehová Diosca ñucanchitaca consolan. Reuniongunapimi Bibliamanda yachajushpa animaripanchi y ñucanchita juyaj huauquipanicunahuanbash tandanajupanchi.

16. Nathan y Priscillapa ejemplomandaca ¿imatata yachajupanchi?

¹⁶ Jehová Dios Bibliahuan imashina consolajta, animajta yachangapaca Estados Unidosmanda Nathan y Priscillapa ejemplota ricupashun. Paicunaca publicadorcuna minishtirijuj pushtupi predicangapami rirca. Nathan huauquica “ñucanchita Jehová Dios bendicianataca seguromi carcanchi” ninmi. Shinapash mushuj congregacionman chayashpaca, paicunapa saludhuanmi problemacunata charirca y trabajotapash na tari usharcachu. Chaimi paicuna causanajushca llactaman tigrarca. Shinapash culqui faltajllami causanajurca. Nathan huauquica ninmi: “Taita Diosca, imashpashi ñucanchi pensashcashnaca na ayudarca, imapash nalitami rurashcani yarin nishpami pensarijurcani” ninmi. Shinapash jipamanga, Jehová Dios paicunata na jichushcatami cuenta japirca. Nathan huauquiguca ninmi: “Llaqui tiempocunapi cashpaca Bibliata liishpami shuj ali amigo animajujpishna, ali consejocunata cujujpishna sintirircanchi” ninmi. Shinallata “ñucanchi problemacunapi pensarijunapa randica, chai problemacunata aguantachun Jehová Dios imashina ayudajushcatami pensarircanchi. Shinami, shamuj punllacunapipash Jehová Dios ayudashpa catinataca seguro caparcanchi” nin.

17. Helga paniguca ¿imashinata Jehová Dios consolajushcata cuenta japirca? (Fotocunata ricupangui).

 ¹⁷ Huauquipanicunapashmi consolashpa ayudan. Hungría llactamanda Helga panigupa ejemplota ricupashun. Paica ashtaca huatacunatami estresada, imapapash na sirvinshna sintirishpa causarca. Chai tiempocunapi Jehová Dios huauquipanihuan paita consolashcatami cunanbica cuenta japishca. Panigu Helgaca ninmi: “Ñuca ungushca churiguta cuidaimanda na ushajujpi, trabajohuan na pactajujpi y shuj problemacunata charimanda fuerza illashna sintirijujpica siempremi Jehová Diosca ayudahuarca. Ña 30 huatacunatami Jehová Diosca siempre ñucataca consolahuajushca. Nunca na solalla sintiripashcanichu. Huauquipanicuna juyailla, ali shimigucunata nijpimi Jehová Dios ñucata consolajushcata sintipashcani. Minishtijushca horaspipachami huauquipanicunaca shuj mensajeguta cachamushpa o tarjetaguta cushpa animahuashca” ninmi.

18. ¿Imashinata shujcunataca consolaita ushapanchi?

¹⁸ Shujcunata pacienciahuan uyashpa, animashpa, imagupipash ayudashpami, Jehová Diospa ejemplota catishpa paicunata consolaita ushapanchi (Prov. 3:27). Sufrinajuj huauquipanicunata y shuj gentecunatapash consolangapami esforzaripanchi. Imapash situacionmanda llaqui apanajujpi, ungushca cajpi o shuj familia huañushca cajpica, paicunata visitashpa, aliguta uyashpa y Bibliamanda textocunata compartishpami animapanchi. ‘Tucuipi cushichij Taita Diospa’ ejemplota catishpaca na solo huauquipanicunatallachu llaquicunata aguantachunga ayudapashun, sino Jehovata na sirvij gentecunapash Jehovata rijsina munaita charichunmi talvez ayudaita ushapashun (Mat. 5:16).

JEHOVÁ DIOSCA SIEMPREMI ÑUCANCHI LADOPI CANGA

19. a) Jehová Diosca ¿imacunatallata ñucanchimandaca ruran? b) ¿Imashinata Jehová Diospa ejemplota catita ushapanchi?

¹⁹ Jehová Diosca ñucanchicunamandaca ninandami preocuparin. Llaqui apanajujpica nunca na sololla saquinllu. Jehová Diosca shuj juyaj taitashnami juyaihuan ñucanchitaca cuidan. Shinallata ñaupaman pushashpa, cuidashpa, consolashpa y ñucanchi minishtishca cosasgucunatapash cushpami ayudan. Ñucanchicunapash Jehová Diospa ejemplota catishpami llaqui apanajujcunataca ayudaita y animaitapash ushapanchi. Cai mundopi ashtaca llaquicunata, problemacunata charishpapash Jehová Dios siempre ñucanchi ladopi canataca seguromi capanchi. Bibliapica “na manllanachu canguichi, ñucami cangunahuan cani” nishpami Jehová Diosca prometijun (Is. 41:10). Jehová Dios nunca na ñucanchitalla saquinata yachashpaca ninandami cushijupanchi.