1. Nara catiriashpa llaquichijpillata ¿imatata yarina capanchi?

JESUSCA pai huañungapaj shuj tuta faltajpillatami cashna nirca, ñucapa catijcuna tucujcunataca gentecunaca na ricunayachingachu nishpa (Juan 17:14). Chai punllamandapachami Jehovapa contracunaca Jehovata tucui shunguhuan sirvijcunata llaquichingapaj catirianajushca (2 Tim. 3:12). Shinallata Jehovapa punlla chayamungacamanga ashtahuan ashtahuanmi nali gentecunaca ñucanchita llaquichingapaj catirianga (Mat. 24:9).

2, 3. a) Diabloca ¿imatata ali yachan? b) Cai temapica ¿imatata yachajupashun?

² Nara catiriashpa llaquichijpillata aguantashpa catingapaca ¿imatata rurana capanchi? Imashina llaquichinataca na pensarijunachu capanchi. Cunanmandallata ima pasanata yapata pensarijushpaca tal vez manllai mishajpi, yapata preocuparishpami Jehovata sirvinata saquishun (Prov. 12:25; 17:22). “Diabloca” ñucanchi manllajta ricushpami imashina llaquichinataca ali yachan (1 Ped. 5:8, 9). Shinaca aguantashpa catingapaca ¿imatata cunanmandallata rurana capanchi?

³ Cai temapimi Jehová Dioshuan alipacha amigo cashpa catingapaj imata ruranata, chaita rurana imashpa minishtirishca cashcata yachajupashun. Shinallata ama manllangapaj imata ruranata, nali gentecuna ñucanchita na ricunayachijpi imata ruranatapashmi yachajupashun.

4. a) Hebreos 13:5, 6​pi nishcashnaca ¿imatata seguro cana capanchi? b) Seguro canaca ¿imamandata minishtirishca can?

⁴ Jehová Dios ñucanchita juyajta, ñucanchicunata na saquinataca seguromi cana capanchi (Hebreos 13:5, 6, liingui). Ashtaca huatacuna huashamanga Villajun revistapica nircami: “Taita  Diosta ali rijsicunallami ima llaquicunata charishpapash paipi tucui shunguhuan confiashpa catinga” nishpa. Chaica ciertomi capan. Shinaca nara catiriashpa llaquichina punlla chayamujpi aguantachunga Jehovata juyana, paipi tucui shunguhuan confiana, pai ñucanchita ninanda juyajta seguro canami ayudanga (Mat. 22:36-38; Sant. 5:11).

5. Jehová Dios ñucanchita juyajta cuenta japingapaca ¿imatata rurana capanchi?

⁵ Jehovaman ashtahuan quimiringapaca Bibliatami cada punlla liina capanchi (Sant. 4:8). Bibliata liijushpaca Jehová Dios juyaj, ninanda llaquij, imagutapash caraj Dios cajtami pensari ushapanchi. Shinallata gentecunata juyaimanda imata nijta, imata rurajtapashmi ricuita ushapanchi (Éx. 34:6). Huaquin gentecunataca tal vez pipash na juyajpimi Taita Dios juyajtaca critapash na crin. Shinapash cada punlla Taita Dios imagutapash caraj, ninanda llaquij cajta cuenta japishpaca chaita yaringapaj shuj cuadernopi escribipangui (Sal. 78:38, 39; Rom. 8:32). Ñucanchi causaipi, Bibliapi imata liishcapi pensarishpaca Jehová Dios ñucanchimanda ashtaca cosascunata rurashcatami cuenta japishun. Shinaca Jehová Dios imata rurajta ashtahuan alicachijpica paipa alipacha amigocunami tucushun (Sal. 116:1, 2).

6. Salmo 94:18, 19​pi nishcashna Jehovata tucui shunguhuan mañanaca ¿imashinata ñucanchitaca ayudan?

⁶ Cutin cutin Jehovata mañapashunchi. Caipi pensaripashunchi, shuj taita paipa huahuaguta juyaihuan ugllajpica huahuaguca seguromi sintirin. Chaimi huahuaguca punlla entero tucui ima pasashcata paipa taitaman villan. Shina cuendami cada punlla Jehovata tucui shunguhuan mañashpaca paipa ali amigocuna tucushun (Salmo 94:18,19, liingui). Jehovata tucui shunguhuan mañashpaca ‘yacuta talinshna’ ñucanchi llaquicunata, manllaicunata paiman tucuita villapashunchi (Lam. 2:19). Shina rurajpica Bibliapi nishcashnami “casilla ali causaitaca, Taita Diosmi caramunga” (Filip. 4:6, 7). Cutin cutin Jehovata mañashpaca ashtahuanmi Jehovapaman quimirishun (Rom. 8:38, 39).

7. Jehovapa Gobierno carasha nishca pactarinataca ¿imashpa seguro cana capanchi?

⁷ Jehovapa Reino o Gobierno imata carasha nishcata pactarinataca seguromi cana capanchi (Núm. 23:19). Jehová Dios carasha nishcata pactarinata na tucui shunguhuan crijpica Diablopash, Diablopa munaita ruraj gentecunapash imacunatapash rurashpami fácil ñucanchicunataca manllachita ushanga (Prov. 24:10; Heb. 2:15). Shinaca Jehovapa Gobierno imata carasha nishcata pactarinata tucui shunguhuan cringapaca ¿imatata rurana capanchi? Chaipaca, Jehovapa Gobierno carasha nishcacunamanda Bibliapi yachajungapami tiempota llujchina capanchi. Shinallata Dios carasha nishcacuna pactarinatapash imamanda seguro cana cashcatapashmi Bibliapi ricuna capanchi. Caimanda ashtahuan aliguta intindingapaca Stanley Jones huauquimanda yachajupashunchi. Paica 7 huatacunatami paipa crishcacunamanda carcelpi carca. * Jehovata tucui shunguhuan sirvinata ima  ayudashcata parlashpami cashna nirca: “Jehovapa Gobierno imata ruragrijujta yachajushcapi tucui shunguhuan crinami chai llaquicunata aguantachun ayudahuarca. Jehovata sirvinataca na saquircanichu” nishpa. Jehová Dios carasha nishca pactarinata tucui shunguhuan crishpaca ashtahuanmi Jehovaman quimirishun. Shinallata manllai ñucanchita mishachunga na saquishunllu (Prov. 3:25, 26).

8. Tandanajuicunamandaca ¿imatata yuyapangui? Intindichipai.

⁸ Tandanajuicunamanga na faltanachu capanchi. Tandanajuicunaman rishpami Jehová Diosman ashtahuan quimirishun. Cunanbi tandanajuicunaman rinami jipa punllacunapi catiriashpa llaquichijpipash aguantashpa catita ushashun (Heb. 10:24, 25). ¿Imamandata shina nipanchi? Cunanbillata yanga cosascunamanda tandanajuicunaman na rishpaca, jipa punllacunapi tandanajunata jarcajpicarin ¿imatata rurashun? Tandanajuiman cunanmandallata na faltashpa rijushpaca contracuna catiriashpa llaquichijujpica tandanajunataca na saquishunllu. Shinaca tandanajuicunamanga na faltanachu capanchi. Shina rurashpaca gobiernocuna villachinata jarcajpipash paicunata cazunapa randica Jehovatami cazushpa catishun (Hech. 5:29).

9. Cunanmandallata textocunata de memoria yachajunaca nara catiriashpa llaquichijpillata ¿imashinata ayudanga?

⁹ Ñucanchi gushtashca textocunata de memoria yachajupashunchi (Mat. 13:52). Cunanbica juchayu caimandaca imata yachajushcatapash jaicatami cunganchilla. Shinapash textocunata de memoria yachajushcataca Jehová Diosca paipa espíritu santohuanmi yarichun ayudanga (Juan 14:26). Alemania oriental llacta carcelpi caj shuj huauquica cashnami nirca: “Bibliamanda 200 yali textocunata de memoria yachajushcami carcelpi cajpica Bibliamanda shuj shuj temacunamanda yarichun ayudahuarca” nishpa. Chai textocunata yarinami chai huauquigutaca Jehovahuan ali catichun, Jehovata tucui shunguhuan sirvishpa catichun ayudarca.

10. Jehovata jatunyachina canticocunata de memoria yachajunaca ¿imamandata minishtirishcapacha can?

¹⁰ Canticocunata de memoria yachajupashunchi. Shinallata candapashunchi. Pablopash Silaspash Filipos llactapi carcelpi cashpaca de memoria yachashca canticocunatami Jehovaman candanajurca (Hech. 16:25). Shinallata la antigua Unión Soviética nishcamanda Siberia llactaman carcelman huauquipanicunata cachajpica paicunaca Pabloshna, Silas apostolcunashnami rurarca. Shina rurashpami paicunapura paicunapa crishcata shillichishpa  catirca. Mariya Fedun panica nircami: “De memoria yachajushca canticocunatami candai callarircanchi”. Chai canticocunaca ñucanchicunallata ali sintirichun, Jehová Dioshuanbash ali catichunmi ayudarca nishpa. Ñucanchi gushtashca canticocunata candana, Internetpi jw.org paginapi mushuj llujshishca canticocunata de memoria yachajunaca ¿ñaupaman catichun ayudajunllu? Shinaca cunanmandallata yachajupashunchi (“ Can ayudajpimi na manllasha” nishca recuadrota ricupangui).

11, 12. a) 1 Samuel 17:37, 45-47​pi nishca shinaca Davidca ¿imamandata na manllaita charirca? b) Davidmandaca ¿imatata yachajupanchi?

¹¹ Nara catiriashpa llaquichijpillatami ama manllangapaj shinlli tucuna capanchi. Shinapash manllaita charishpaca ama manllangapaj ¿imatata rurana capanchi? Caita siempre yaripashunchi, ñucanchicuna jatun o uchilla o fuerzata charishpallaca na manllanchichu nitaca na usharinllu. Shinallata imatapash alipacha ruraita ushashpapash na manllaita charinichu nitaca na usharinllu. Cunanga Jehovata sirvij Davidmanda yachajupashunchi. David joven cashpaca Goliat jatun jatun jarihuanmi macanajurca. Goliat jarihuan ricujpica Davidca uchillagu, nimata na ruraj ushaj shinami ricurirca. Davidca macanajunatapash, macanajungapaj espadatallatapash na charircachu. Shinapash na macanajuita yachashpapash Davidca na manllaita charishpami Goliat jatun jatun jarihuan macanajungapaj rirca.

¹² Davidca ¿imamandata na manllaita charirca? Davidca Jehová Dios ayudanataca seguropachami carca (1 Samuel 17:37, 45-47, liingui). Davidca, Goliat jarica ñucata yali jatunmi nishpaca na pensarijurcachu. Ashtahuangarin Jehová Dioshna podertaca Goliat jarica na charinllu nishpami pensarirca. Caimandaca ¿imatata yachajupanchi? Ñucanchicunapash Jehovapi confiashpa, pai ayudanapi seguro cashpaca na manllaita charishunllu. Shinallata Jehovapa contracunamandaca Jehovami ashtahuan poderta charij cashcata seguromi cana capanchi. Shinami na manllashpa ñaupaman catita ushashun (2 Crón. 20:15; Sal. 16:8). Nara llaquichij punllacuna chayamujpillata ¿imatata ama manllangapaj rurana capanchi?

13. Na manllashpa villachishpa catingapaca ¿imatata rurana capanchi? Intindichipai.

¹³ Jehovamanda ali villaigucunata villachinami Jehovapi ashtahuan confiachun, gentecunata ama manllachunbash ayudanga (Prov. 29:25). Cunanga cai chimbapuraipi pensaripashunchi. Pipash ejerciciota rurashpaca paipa cuerpoca shinllipachami caita ushan. Shina cuendami huasin huasin villachishpa, ñangunapi, negociocunapi o maipi cashpapash cutin cutin villachishpaca ama manllashpa catichunmi ayudanga. Cunanmanda  na manllashpa villachijushpaca villachinata jarcajpipash villachishpami catishun (1 Tes. 2:1, 2).

14, 15. Nancy Yuen, Valentina Garnovskaya panigucunamandaca ¿imatata yachajupanchi?

¹⁴ Cunanga tucui shunguhuan Jehovata sirvij ishcai panigucunamanda yachajupashunchi. Paicunaca na manllashcatami ricuchirca. Nancy Yuen paniguca shuj metro chaupitallami medirca. Shina uchilla cashpapash gentecunataca na fácil manllanllu carca. * Jehovapa gobiernomanda villachishpa catijpimi paitaca 20 huatacunata China llactapi prezo churarca. Chai llactamanda autoridadta charijcunaca cashnami nirca: “paipa yuyashcahuanmi yalin” pipash shinapacha huarmitaca na rijsishcanchichu nishpa.

¹⁵ Cunanga Valentina Garnovskaya panigumanda yachajupashunchi. Valentina paniguca Unión Soviética nishcapica quimsa viajetami prezo carca. Paniguca 21 huatacunatami prezo carca. * Prezo cashpapash villachinataca na saquircachu. Chaimi chaimanda autoridadcunaca cashna nirca: “millaipacha millai huarmimi can” nishpa. Cai ishcai panigucunaca ¿imashpata na manllaita charishcata ricuchirca? Paicunaca, Jehová Dios ayudajujtaca seguropachami carca.

16. Na manllaita charishcata ricuchingapaca ¿imata minishtirin?

¹⁶ Na manllangapaca ñucanchi fuerzapi o imata rurai ushashcapica na confiarinachu capanchi. Shinaca ñucanchicunaca Jehová Dios ayudanapimi confiana capanchi. Shinallata Jehová Diosca siempremi ñucanchita ayudangapaj ricuriajun (Deut. 1:29, 30; Zac. 4:6). Shinallami na manllaita charishcata ricuchi ushashun.

17, 18. Juan 15:18-21​pi nishca shinaca Jesusta ali catijcunahuanga ¿imata tucunga nirca?

¹⁷ Gentecuna ñucanchita respetajpica cushillami sintiripanchi. Shinapash na rijsishca rijsishca caimanda nimapa na sirvinichu nishpaca na pensarinachu capanchi. Jesusca nircami: “Ñucata catishcamanda, cangunata millanayachijpi, paicunahuan ama tandanajuchun cangunata caruyachijpi, nalicachishpa rimanajujpi, cangunapaj shutitapash nalita rurajcunapaj shutitashna yangapi churanajujpica, ninanda cushijuichi” nishpa (Luc. 6:22). Cai shimicunata nishpaca ¿imatata Jesusca ningapaj munarca?

 ¹⁸ Jesusca ña nishcarcami, paipa catijcunataca gentecunaca na ricunayachingachu nishpa. Gentecunaca ¿imamandata ñucanchicunataca na ricunayachin? Cai mundopa ruraicunapi na chapurijpi, Jesuspa yachachishcacunata causaipi pactachijpi, ali villaigucunata villachijpimi gentecunaca ñucanchicunataca na ricunayachin (Juan 15:18-21, liingui). Jehovata juyaimanda gentecuna ñucanchicunata na ricunayachijpica na pinarinachu capanchi. Ashtahuanbachaca Jehovata cushichingapami esforzarina capanchi.

19. Jesuspa apostolcunamandaca ¿imatata yachajupanchi?

¹⁹ Gentecuna imatapash nijpi o rurajpica testigo de Jehovami cani ninataca na pinganayachinachu capanchi (Miq. 4:5). Jesús huañushca jipa Jerusalenbi apostolcuna imata rurashcata yachajunami gentecunata ama manllachun ayudanga. Jesusta ali catijcunataca judiocunata ñaupaman pushajcunaca nimamanda na ricunayachinllu carca (Hech. 5:17, 18, 27, 28). Shina cajpipash Diospa templo huasimanmi rin carca. Shinami Jesuspa ali catijcuna cashcata gentecunapa ñaupajpi ricuchirca (Hech. 5:42). Paicunata manllai mishachunga na saquircachu. Shinaca trabajopi, escuelapi, colegiopi o ñucanchi causaj pushtupi testigo de Jehovami cani nishpaca na manllashcatami ricuchipanchi (Hech. 4:29; Rom. 1:16).

20. Apostolcunata gentecuna na ricunayachijpipash ¿imamandata cushilla sintirirca?

²⁰ Apostolcunaca ¿imashpata cushilla carca? Jehovapa munaita pactachinajuimandami gentecuna na ricunayachijpipash paicunaca cushilla carca (Luc. 6:23; Hech. 5:41). Tauca huatacuna jipaca apóstol Pedroca nircami: ‘Imatapash cashcatapacha rurashpa causanajushcamanda llaquichi tucushpaca ninanda cushijunguichi’ nishpa (1 Ped. 2:19-21; 3:14). Ñucanchita gentecuna na ricunayachijpipash Jehovamanda villachinataca na saquinachu capanchi.

21, 22. a) Cunanmandallata nara catiriashpa llaquichijpillata ¿imatata ruragripangui? b)  Cati temapica ¿imatata yachajupashun?

²¹ Ima punlla ñucanchita catiriashpa llaquichinata, villachinata gobiernocuna jarcanatapash na yachapanchichu. Shinapash cunanmandallata Jehová Dioshuan alipacha amigo cana, na manllashpa shinlli tucuna, gentecuna na ricunayachijpi imata ruranataca alimi yachapanchi. Shina rurashpaca catiriashpa llaquichina punlla chayamujpica aguantashpami catita ushashun.

²² Villachinata autoridadcuna jarcajpica ¿imatata rurashun? Villachinata jarcajpipash Jehovapa mandashcata cazushpa catingapaj imata ruranatami caishuj temapica yachajupashun.