Ña precursor shina sirvi callarishpaca na yashca bendiciongunatami chasquircani (Efes. 3:20). ¿Imata pasarca? Ñuca causaimanda parlapasha.

Alemaniamanda Berlín llactapi 1939 huatapimi nacirircani. Segunda Guerra Mundial macanajui callarishca jipa huaquin quillacuna jipallami nacirircani. Chai guerra tucurishca jipallami 1945 huatapica Berlín llactataca avionmanda bombacunata cacharishpa ninanda chai llactataca llaquichirca. Chai huaquin bombacunaca ñucanchi causaj pushtu ladocunapimi urmarca. Chaimi ñuca, ñuca familiapash alpa ucupi pacajuna ucumanmi rircanchi. Shinallata ashtahuan seguro cangapaca ñuca mama nacirishca Erfurt llactamanmi rircanchi.

Ñuca mamaca ali religionda taringapaj ninandami mascajurca. Chaimi huaquin librocunata liirca, shuj shuj religiongunamanbash rirca. Shina rurashpapash Bibliamandaca nimata na yachajui usharcachu. Shinapash casi 1948 huatapimi ishcai testigo de Jehovacuna ñucanchita visitarca. Huasiman paicunata yaicuchishpaca ñuca mamaca ashtacatami tapurca. Paicunahuan parlashcaca ni shuj horaspash nara yalijpillatami ñucaman, ñuca panimanbash, cunansi, “ali religiondami tarircani” nishpa ñuca mamaca nirca. Huaquin punllacuna yalishca jipallami ñuca mamapash, ñucapash, ñuca panipash Erfurt llactapi tandanajuicunaman ri callarircanchi.

1950 huatapica Berlín llactamanmi tigrarcanchi. Chaipica Berlín-Kreuzberg congregacionmanmi rircanchi. Tiempohuanga ñuca mamaca bautizarircami. Cutin ñucaca nara bautizarircanichu. ¿Imamanda?

Gentecunahuan parlanata pingaimandami Jehovata ashtahuan sirvitaca na usharcani. Villachingapaj llujshishpapash pingaimandaca 2 huatacunata nipihuan na parlarcanichu. Shinapash ¿imata ayudahuarca? Chaipaca tucui shunguhuan Jehovata sirvij huauquipanicunahuan tiempota yalinami ayudahuarca. Huaquin huauquipanicunaca campos de concentración nazis nishcapi o Alemania oriental llactapimi prezo cashca carca. Cutin shuj huauquipanicunaca Alemania oriental llactamanmi publicaciongunata pacalla yalichishpa paicunapa causaita peligropi churashca carca. Paicunapa experienciacunami ñuca cambiachun ayudahuarca. Paicunaca Jehovata sirvinamanda, shuj huauquipanicunapa causaita libre saquichun munaimanda  paicunapa propio causaita peligropi churashcatami pensarircani. Chaimi gentecunahuan parlana pingaita mishai ushashami nishpa esforzarircani.

Gentecunahuan parlana pingaitaca 1955 huatapimi campaña especial nishca villachinaman llujshishpami mishaita usharcani. Shuj punllaca el Informador, * nishca cartapi huauqui Nathan Knorr liishpami cashna nirca, Taita Diospa llactallami shina villachichun shuj jatun campañata rurashca nishpa villarca. Shinallata nircami, tucuilla publicadorcuna chai campañapi villachijcunaca “chai quillacunapi shina villachishcaca alipacha experienciami carca. Chashna experienciataca cutinga cai alpapica na chari ushashunllu” nishpa. Chaica ciertomi carca. Chai jipallami Jehovata mañashpa canba munaita ñuca causaipi pactachishpa causangapami munani nishpa Jehovata mañarcani. Huata 1956​pica ñuca taitandi, ñuca panindimi igual bautizarircanchi. Chai jipaca shuj decisiondami agllana tucurcani.

Ashtaca huatacunata precursor canaca alimi can nishpa causarcani. Shina nishcaca ashtaca huatacunami yalirca. Cashnami pensari callarircani, primeroca Berlín llactapi estudiashpa randishpa, jatushpa canata ashtahuan ali estudianaca alimi canman nishpa. Chai jipaca ñuca estudiashca trabajopi ashtahuan experienciata charingapaca chaipimi trabajana nishpa pensarircani. Chaimi 1961 huatapica Hamburgo llactapi shuj trabajota chasquircani. Hamburgo llactapica Alemaniamanda barcocuna shayari jatun pushtumi tiarca. Ñuca trabajopi ashtahuan trabajaimandami tiempo completopi sirvingapaca ashtahuan ashtahuan huatacunaca yalirca. Shinapash jipamanga ¿imatata rurarcani?

Jehovata sirvinata pundapi churachun ashtaca huauquipanicuna ñucata ayudashcamandaca Jehovataca ninandami agradicina. Ñucapa huaquin amigocunaca precursor shinami sirvinajurca. Paicunaca ñucapaca shuj ali ejemplomi carca. Shinallata Erich Mundt huauquica campo de concentracionbimi prezo cashcarca. Paica Jehovapi confiachunmi ayudahuarca. Paica nihuarcami, campo de concentracionbi prezo cashca huaquin huauquicunaca paicunapillata yapata confiarimandami espiritualmente ñana ali carca. Cutin shuj huauquicunaca Jehovapi confiaimandami Jehovataca na saquirca. Paicunaca congregaciongunapipash huauquipanicunataca ninandami ayudai ushashca.

Martin Poetzinger huauquica Cuerpo Gobernantepimi sirvi callarirca. Paica siempremi huauquipanicunataca cushichin carca. Shinallata ninmi: “Na manllanami llaquicunata aguantachun ayudan” nishpa. Chai shimicunapimi cutin cutin pesarijurcani. Chaimi trabajota saquishpa junio de 1963 huatapi precursor shina sirvi callarircani. Shina sirvinaca shuj alipacha decisionmi carca. Ishcai quillacuna jipa, trabajotapash nara mascai callarijpillatami precursor especial shina sirvichun cachahuarca. Cutin huaquin huatacuna jipaca clase 44 Galaad Escuelaman invitahuarca. Jehová Diosca na yashca bendiciongunatami cuhuarca.

Galaad Escuelapica Nathan Knorr huauquimanda, Lyman Swingle huauquimandaca cai alipacha yuyaitami yachajurcani. Shuj asignación shinlli cajpipash ñaupaman catina cashcatami yachajurcani. Shinallata ñucanchicuna llaquicunata charijpipash ñaupaman catichunmi animarca. Huauqui Nathan Knorrca nircami: “¿Mapapi, shuj shuj jurucunapi, chuspicunapi, pobre caj gentecunapichu yapata preocuparigringuichi? O ¿shuj shuj yuracunapi, sisacunapi, gentecuna cushilla cajta ricushpachu cushijugringuichi? Gentecunata juyanata yachajunami canguichi” nishpa. Shuj punllaca Swingle huauquica huaquin huauquicuna imamanda jaicata desanimarijta parlajushpami casi huacarca. Chaimi ashaguta upalla quedarca. Chaica shungucamanmi chayahuarca. Chaimi Jesustapash, Jehovata tucui shunguhuan sirvij huauquipanicunatapash ama llaquilla sintichingapaj dicidirircani (Mat. 25:40).

Asignacionda ña chasquijpimi Betelpi sirvij quimsa huauquicunaca maimanda sirvichun cachajun nishpami ñucanchitaca tapurca. Maiman cachajpipash alimi ringa nishpami cushichinajurca. Chaimi República del Congo llactamanmi cachahuajun nircani. Chaita uyashpami paicunaca ashata upalla quedashpa cashna nirca: “Jehová Dios quiquinda cuidachun” nishpa. Chai punllacunapica Congo llactapi guerra tiashcata, gentecunata huañuchijcuna tiashcata, shuj shuj llaquicuna tiashcatami uyarcani. Shinapash ñucaca Galaad Escuelapi imata yachajushcatami yarircani. Galaad Escuelamanda graduarishca jipaca, septiembre de 1967 huatapimi Heinrich Dehnbostel huauquihuan, Claude Lindsa huauquihuanmi Kinsasa llactaman rircanchi. Kinsasa llactaca Congo jatun llactapa capitalmi carca.

Kinsasa llactaman chayashpaca quimsa quillacunapimi francés shimita yachajurcanchi. Chai jipaca Lubumbashi llactamanmi rircanchi (Lubumbashi llactataca Elisabethville nishpami pundapica rijsin carca ). Chaimi Zambia llactapa frontera ladoman chayarcanchi. Chaipica misionerocunapa huasipimi quedarcanchi.

Lubumbashi llactapica pipash nara villachishcarcachu. Chaimi ñucanchicuna primero chai llactamanda gentecunaman villachinata yachashpaca ninandami cushijurcanchi. Asha tiempota villachishca jipallami ña ashtaca gentecunata Bibliamanda yachachijurcanchi. Shinallata gobiernopi autoridadta charijcunaman, policiacunamanbashmi villachircanchi. Ashtacacunami Taita Diospa shimitapash, villachinatapash alicachishpa ricun carca. Chai llactamanda gentecunaca suajili shimitami parlan carca. Chaimi Claude Lindsay huauquipash, ñucapash suajili shimita yachajurcanchi. Chai jipami ñucanchitaca suajili shimita parlaj congregacionbi sirvichun cacharca.

Alipacha experienciacunatami charircanchi. Shinapash shuj shuj llaquicunatami chimbapurana tucurcanchi. Ashtaca viajemi machashca soldadocuna, culirashca policiacunaca ñucanchicunataca imacunamandapash yangata juchachin carca. Shuj punllaca misionerocunapa huasipimi shuj tandanajuita charircanchi. Chaipimi huaquin policiacuna yaicushpa ñucanchitaca tapuchingapaj nishpa aparca. Chaipica casi las 10 tutacamanmi charirca. Chai jipami richun saquirca.

1969 huatapica ñucataca superintendente shina sirvichunmi cacharca. Chaimi África llactamanda pueblocunapi visitangapaca sachacunata, turu turu ñangunatami ashtaca horascunata purina tucurcani. Ñuca causajuj pueblogupica shuj atalpa, paipa pollogucunandimi ñuca cama ucupi puñun carca. Chai atalpa tutamanda bullayaj cashcata, tutacuna huauquipanicunahuan Bibliamanda parlashcatapash nunca na cungashachu.

 Chai tiempopica Kitawala * nishca grupota apoyaj huauquicunami congregacionbi tiarca. Jehovata sirvinchi nij tucushcacuna chai huauquicunamandaca huaquingunaca anciano shinami sirvinajurca. Chai nij tucushca huauquicunaca Jehovata tucui shunguhuan sirvij huauquipanicunataca na pandachi usharcachu (Jud. 12). Tiempohuanga Jehová Diosllatami chai nij tucushca huauquicunataca congregaciongunamanda llujchirca. Shinami congregaciongunapica ashtaca gentecuna mirashpa catirca.

1971 huatapica Kinsasa llactamanda Betelpi sirvichunmi cachahuarca. Chaipica correspondencia nishcapi, pedidos de publicaciones nishcapi, congregaciongunapa contribuciongunata cuentata rurashpa, Departamento de Servicio nishcamanda huaquin ruraicunapi rurashpa sirvircani. Betelpica chai jatun llactapi villachinata organizachunmi yachachihuarca. Chai llactapica casi tucui ladopimi micha illan carca. Ñangunapash carrocunapash nali carca. Huaquinbica avionbi cachashca cartacuna, publicaciongunaca congregaciongunaman chayangapaca huaquin quillacunatami paran carca. Cartacunata, publicaciongunata avionmanda uriajuchishca jipaca uchilla barcocunapimi churashpa apan carcanchi. Huaquinbica ashtaca semanacunatami barcocunaca yacu jahuapi viñashca jihuacunapi trancarishca quedan carca. Shinapash Congo llactamanda huauquipanicunaca shina problemacunata, shuj llaquicunatapash aguantachunmi yachachihuarca.

Chai llactamanda huauquipanicunaca ashalla culquiguhuanmi Jatun Tandanajuicunataca ruran carca. Por ejemplo, chai huauquipanicunaca plataformata ruran carca. Shinallata jatun fangacunahuan pirca cuendata shayachin carca. Ashtahuanbash chai jatun fangacunataca pillushpami asientocunatapash ruran carca. Bambú nishca quiruhuanmi huasitaca shayachin carca. Jahuataca jatun esteracunahuanmi quilpan carca. Shinallata mesacunatapash ruran carca. Cutin quirucunamandami uchilla clavos cuendata ruran carca. Chai huauquipanicuna shina rurajta ricushpami mallarishca quedarcani. Chai huauquipanicunataca ninandami juyarcani. Shuj ladopi sirvichun ñucata cachajpica chai huauquipanicunataca ninandami llaquircani.

Nairobi (Kenia) llacta sucursalmanga Betelmanga huata 1974​pimi chayarcani. Betelpica ashtaca ashtaca ruranami tiarca. Chai Betelmandami ladolla 10 llactacunapi villachina ñaupaman catichun ricuriajurca. Huaquin llactacunapicarin ñucanchicuna villachichun jarcashcami carca. Chai llactacunata visitachunmi casi siempre cachahuan carca. Ashtahuanbachaca Etiopía llactamanmi cachahuarca. Chai llactapimi huauquipanicunataca contracuna catiriashpa llaquichijpi, paicunaca ninanda sufrishpapash aguantashpa catirca. Shinallata ashtacacunataca ninanda llaquichishpa, huaquingunatacarin prezomi churarca. Huaquingunatacarin huañuchitapashmi huañuchirca. Shina contracuna llaquichijpipash chai huauquipanicunaca Jehová Dioshuan alipacha caimanda, huauquipanicunahuanbash ali llevarimandami paicunaca Jehovata tucui shunguhuan sirvishpa catirca.

1980 huatapica Gail Matheson paniguhuan cazaraimandami ninanda cushijurcani. Ñuca huarmiguca Canadá llactamandami can. Ishcandimi Galaad Escuelatapi carcanchi. Chai punllamandapachami cartacunata escribirin carcanchi. Paica Bolivia llactapimi misionera carca. 12 huatacuna jipami Nueva York llactapi tuparircanchi. Jipamanga Kenia llactapimi cazararcanchi. Gail ñuca huarmigu Jehová Dios munashcashna causanata gushtashcashna, ima charishcaguhuan cushilla cajta ricushpaca ninandami cushichihuan. Cunangamanmi tucui shunguhuan ñucata cumbashpa purihuan.

1986 huatapica superintendente shina sirvishpapash Comité de sucursalpipashmi sirvin carcani. Kenia llactamanda shuj shuj Betelcunata ricurianajun congregaciongunatami ñuca, ñuca huarmigundi visitan carcanchi.

1992 huatapi Asmara llactapi shuj Jatun Tandanajuita charingapaj imacunatalla rurashcataca siempremi yarishpa causani (Asmara llactaca Eritria llactapimi can). Chai llacta ladocunapica villachinataca na jarcashca carcachu. Shinapash Jatun Tandanajuita rurangapaj shuj huasiguta mascajujpica granota alichij huasitallami tarircanchi. Chai huasica canllarapashmi ali carca. Shinapash huauquipanicuna chai huasiguta Jatun Tandanajuita charingapaj aligutapacha rurashcata ricushpaca ninandami cushijurcani. Shinami Jehovamanda yachajungapaj tandanajui usharcanchi. Ashtaca familiacunami ashtaca juyailla telacunata apamurca. Chai telacunahuanmi fierolla pushtucunataca quilparca. Chai Jatun Tandanajuipica cushillami  yaliparcanchi. Chai Jatun Tandanajuimanga 1.279 gentecunami shamurca.

Congregaciongunata visitashpaca shuj shuj huasicunapimi cada semana mingarishcanchi. Huaquinbica mar ladopi juyailla huasigupimi quedanchi. Cutin shuj semanacunaca trabajadorcuna trabajanajun ladopi latahuan rurashca huasigupimi quedana tucunchi. Bañopash lata huasigumandaca 100 metro cuendapimi can. Maipi sirvinajushpapash ashtahuanbachaca precursor huauquipanicunahuan, publicadorcunahuan caru caruta villachingapaj llujshishcatami siempre yarini. Mushuj asignacionda chasquishpaca ñucanchi juyashca huauquipanicunata saquishpa rinaca llaquipachami carca.

Huata 1987manda 1992​pica libre villachita ushanguichimi nishca papeltami chasquircanchi. Chai punllacunapica Kenia llacta Betelmandami shuj shuj congregacionbi ruraicunata ricurian carca. Shina nijpimi ashtaca ashtaca oficinacunami chai llactapica tiai callarirca. Cutin huata 1993​pica Adís Abeba (Etiopía) nishca oficinamanmi ñucanchitaca cacharca. Chai llactapica ashtaca huatacunatami pacalla villachishpa catishca carca. Cunanbica chai llactapica libremi villachita ushan.

Etiopía llactapica Jehová Diosca paimanda ashtaca gentecuna yachajuchunmi ayudashca. Ashtaca huauquipanicunaca precursorcunami tucushca. Huata 2012​pica cada huatami 20% yali publicadorcunaca precursor regularcuna tucushca. Escuelas teocráticas nishca escuelaca imatalla ruranacunatami ali ali yachachishca. Shinallata 120 yali tandanajui huasicunatami shayachishca. Huata 2004​pica Betelpi sirvij huauquipanicunaca mushuj huasi shayachishcacunamanmi yalirca. Chaipillatami Jatun Tandanajui Huasitapash shayachishca. Chaicunami tucuilla huauquipanicunata ninanda ayudashca.

Huatacuna yalijpica Gail ñuca huarmiguhuanga Etiopía llactamanda huauquipanicunahuanga alipachami llavarishcanchi. Chai huauquipanicuna juyaihuan ñucanchita tratashcaca ñucanchi shungumanmi chayarca. Ñucanchi salud ashata nali caimandami Europa central Betelman cacharca. Chaipica alipachami ñucanchitaca cuidan. Shinapash Etiopía llactamanda huauquipanicunataca ninandami yaripanchi.

Jehovapa Reino ñaupaman catijujtaca testigo de Jehovacunaca ñucanchi ñavihuanbachami ricunajupanchi (1 Cor. 3:6, 9). Por ejemplo, cinturón de cobre del Congo nishcapi orota mascaj gentecunaman primera vez villachijpica Ruanda llactapica ni shuj publicador na tiarcachu. Cunanbica 30 mil yali huauquipanicunami chai llactapica tian. Cutin huata 1967​pi la República del Congo llacta ladocunapica 6 mil publicadorcunami tian. Cunanbica casi 230 mil huauquipanicunami tian. Huata 2018​pica Jesús Huañushcata Yarina Punlla Tandanajuita yaringapaca shuj millón yali gentecunami shamurca. Kenia llactamanda Betel ricuriajushcaca 100 mil yalitami publicadorcunaca ashtahuan ashtahuan mirashpa catishca.

Tiempo completopi Jehovata sirvichunga tauca huauquicunami ayudahuarca. Shina nishcaca ñami 50 huatacuna yalishca. Tiempo completopi ñuca sirvichunga chai huauquipanicunatami Jehová Diosca utilizarca. Cunanbipash gentecunahuan parlangapaca ninandami pinganayan. Shinapash tucui shunguhuan Jehovapi confianatami yachajushcani. África llactapi causanami ama ñapash culirachun ayudahuashca. Shinallata ima charishcaguhuan cushilla causachunbashmi ayudahuashca. Gail, ñucapash chai llactamanda huauquipanicuna tucui shunguhuan mingachijta ricushpa, imashina causashpapash paicuna cushilla causajta ricushpa, Jehovapi confianzata charijta ricushpaca ñucanchica paicunamandaca ashtacatami yachajupashcanchi. Jehová Dios juyaihuan tratajta ricushpaca Jehovatallami pagui nishpa causapani. Cai tucuita Jehová Dios bendicianataca yaitallapash na yashcanichu (Sal. 37:4).