1, 2. a) Apóstol Pabloca ¿imamandata ‘juyaica ashtahuan importantemi can’ nirca? b) ¿Ima tapuicunatata yachajupashun?

 APÓSTOL Pabloca femanda, Taita Diospa ayudata shuyanamanda y juyaimanda parlashpaca: “Cai quimsacunamandaca juyaimi ashtahuan importante can” nircami (1 Cor. 13:13). Apóstol Pabloca ¿imamandata shina nirca? Porque shamuj punllacunapica paraíso alpagupica ñami causajuringa. Chaimandami Taita Dios carasha nishca promesapi feta charinaca ñana minishtiringa. Pero juyaita ricuchishpa catinaca importantepachami canga. Shinallata Jehovata y gentecunatapash ninanda juyashcata ricuchishpami catina capashun.

² Shinaca juyaitaca siempremi ricuchishpa catina capashun. Cunanga cai quimsa tapuicunamanda yachajupashun: Primero, ¿imamandata caishujmanda chaishujmanda juyaita ricuchina capanchi? Segundo, ¿imashinata randimanda juyarishcataca ricuchita ushapanchi? Tercero, ¿imamandata juyaita ricuchishpa catinaca importantepacha can?

3. ¿Imamandata randimanda juyaita ricuchina capanchi?

³ Huauquipanicunata juyanaca importantemi can. Shinami ciertopacha cristianocuna cashcatami ricuchishun. Jesusca paipa apostolcunataca: “Cangunapura caishuj chaishuj juyarijpimi, tucui gentecuna ñucapa discipulocuna cashcata  yachanga” nircami (Juan 13:35). Ashtahuanbash juyaica tucuicunahuanllata shujllashna unido cachunmi ayudan. Chaimandallatami apóstol Pabloca: “Juyanaca, tucuicuna alipacha unido cachunmi ayudan” nircami (Col. 3:14). Apóstol Juanga huauquipanicunamanga: “Taita Diosta juyashpaca, paipa huauquitapashmi juyana can” nircami. Chaimandami juyaita ricuchinaca ninan importante can (1 Juan 4:21). Shinaca huauquipanicunata juyashpaca Jehová Diostapashmi juyashcata ricuchipanchi.

4, 5. Jehová Diosta y huauquipanicunata ciertopacha juyashcataca ¿imashinata cuenta japita ushapanchi? Shuj ejemplomanda parlapai.

⁴ Huauquipanigucunata juyanaca ¿imashinata Jehová Diosta tucui shunguhuan juyashcata cuenta japichun ayudan? Por ejemplo caipi pensaripashunchi: Shuj doctorca shuj personapa corazón ali o nali cashcata yachangapaca paipa maquipi pulsotami tacarin. Shinami corazón ali o nali cashcata yachai ushan.

⁵ Shina cuendallatami ñucanchicunapash Jehová Diosta tucui shunguhuan juyashcata yachangapaca huauquipanicunata tucui shunguhuan juyashcata o na juyashcatami ricuna capanchi. Porque ñucanchicuna huauquipanicunata tucui shunguhuan juyashpaca Jehová Diostapashmi tucui shunguhuan juyanajushcata ricuchinajupanchi.

6. Ñucanchi huauquipanicunata ñana ashta juyashpaca ¿imata pasanga? (1 Juan 4:​7-9, 11).

⁶ Ñucanchi huauquipanicunata ñana ashta juyashpaca Jehová Diosmandapash caruyana peligropimi canchiman. Chaimandallata parlashpami apóstol Juanga: “Paipa huauquita ricui ushashpapash na juyashpaca ¿maitata pai na ricushca Taita Diostacarin juyangayari?” nircami (1 Juan 4:20). Caimandaca ¿imatata yachajupanchi? Ñucanchi huauquipanicunata juyashpallami Jehová Diosta ñaupapica ali ricurita ushapashun (1 Juan 4:​7-9, 11​ta liipangui).

7, 8. Randimanda juyarishcataca ¿imashinata ricuchita ushapanchi?

⁷ Bibliapica: “Caishuj chaishuj juyarichunmi cangunataca chashna mandajuni” nishca mandashcacunaca tauca viajecunatami ricurin (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Cai ciertopacha juyaitaca shungumandami ricuchina capanchi. Shinaca huauquipanicunata ciertopacha juyashcataca parlocunahuan y ruraicunahuanmi ricuchina capanchi.

⁸ Shuj shuj cosascunata rurashpami ñucanchi huauquipanicunata juyashcataca ricuchita ushapanchi. Chaipaca Bibliapa huaquin textocunata ricupashun. Bibliapica: “Caishujmanda, chaishujmanda na llullashpami parlana canguichi” nin (Zac. 8:16). “Shinami cangunapura tranquilo ali causaiguta chari ushanguichi” (Mar. 9:50). “Shujcunata respetohuan tratangapami cangunara siempre listo cana capanguichi” (Rom. 12:10). “Caishujhuan chaishujhuan cushijushpa chasquirina capanguichi” (Rom. 15:7). “Tucui shunguhuan perdonarishpa catina capanguichi” (Col. 3:13). “Llaquicunapi cashpaca caishuj chaishujmi ayudarina capanguichi” (Gál. 6:2). “Caishuj chaishuj cushichirishpa catina capanguichi” (1 Tes. 4:18). “Caishuj chaishuj animarishpa, ayudarishpa catina capanguichi” (1 Tes. 5:11). “Caishujmanda chaishujmandami Taita Diostaca mañana capanguichi” (Sant. 5:16).

9. Huauquipanicunata cushichishpa, animashpaca ¿imatata ricuchinajupanchi? (Fotocunata ricupangui).

⁹ Caishuj parrafopi yachajushcashna juyaita ashtahuan imashina ricuchina cashcata  yachajupashun. Apóstol Pabloca: “Caishuj chaishuj cushichirishpa catina capanguichi” nircami. ¿Imamandata shujcunata cushichishpa juyaita ricuchinaca importantemi can nipanchi? Bibliamanda parlaj shuj libropica cashnami nirca: Griego shimipi apóstol Pablo “shujcunata cushichina” nishpaca “shujcuna llaquicunahuan o problemacunahuan cajpi animashpa cushichinami can” ningapami munarca. Shinaca imapash llaqui apanajun huauquipanicunata animashpa cushichishpaca paicuna Jehová Diosta tucui shunguhuan sirvishpa catichunmi ayudapashun. Shinaca imapash llaquita o problemacunata charinajuj huauquipanicunata animashpa cushichishpaca paicunata tucui shunguhuan juyashcatami ricuchinajupanchi (2 Cor. 7:​6, 7, 13).

10. Shujcunata llaquina y cushichina cualidadcunaca ¿imamandata importante can?

¹⁰ Shujcunata llaquishpa y cushichina cualidadcunaca ¿imamandata importantepacha can? Porque pipash llaquilla o sufrijujta ricushpaca cushichishpa ayudana munaitami charin. Shinaca chai personata llaquimandami paita cushichina munaita charipashun. Chaimandallata parlashpami apóstol Pabloca Jehová Dios, gentecunata ninanda llaquimandami paicunata cushichingapaj munan. Shinallata nircapashmi: “Taita Diosca ninanda llaquij y tucuipi cushichij Taita Diosmi can” (2 Cor. 1:3). Apóstol Pablo “ninanda llaquij” shimicunata utilizashpaca cai cualidad ‘Taita Diosmanda’ shamuj cashcata ningapami munarca. Y chai cualidadta Jehová Dios charimandami ñucanchicuna imapash llaquicunata charijpica paica cushichishpa ayudan (2 Cor. 1:4). Imashinami pipash yacunayachijushpaca yacuta ufiashpaca ali sintirin, shinallatami pipash llaquilla cajpi Jehová Dios cushichishpa ayudajpica chai personaca ali sintiringa. Shinaca Jehová Dioshnallata ñucanchi huauquipanicunata llaquishpa cushichingapaca ¿imata ayudanga? Llaquina cualidadta charinami ayudanga. Chaipaca huaquin yuyaicunata ricupashun.

11. Colosenses 3:12 y 1 Pedro 3:8​pi nishca shinaca ¿ima cualidadcunatallata ricuchina capanchi?

¹¹ Huauquipanicunata juyashpa y cushichishpa randimanda catichunga ¿imata ayudanga? Chaipaca ñucanchipacha llaquipi canshnami llaquina capanchi. Familia propiotashnami juyana capanchi. Shinallata juyaihuan aligumanbashmi tratana capanchi (Colosenses 3:12; 1 Pedro 3:8​ta liipangui). Shujcunata llaquina y shuj ali cualidadcunata charishpaca shujcuna llaquilla o imapash problemacunata charijpica paicunata cushichishpa ayudana munaitami charipashun. Chaimandami Jesusca: “Gentecunaca shungupi imata charishcatami parlan. Ali gentecunaca paicunapa shungupi ali cosascunata charimandami, alicunata parlan” nircami (Mat. 12:​34, 35). Shinaca ñucanchi huauquipanicunata cushichishpaca paicunata tucui shunguhuan juyashcatami ricuchipashun.

12. a) ¿Imamandata cuidadota charina capanchi? b) ¿Ima tapuimandata yachajupashun?

¹² ‘Caishuj chaishuj juyarishpa catipanguichi’ nishpa mandashcataca tucuicunallatami cazungapaj munapanchi (1 Juan 4:7). Jesusca: ‘Ashtaca gentecunaca juyarishpa causanataca saquingami’ nircami. Chai advirtishcataca na cunganachu capanchi (Mat. 24:12). Shinapash Jesús cai shimicunata nishpaca paipa discipulocuna randimanda juyarinata saquinataca na nijurcachu. Chaipa randica cai mundopi na juyarij gentecunapa yuyaicunamanda cuidadota charina cashcatami ningapaj munarca. Shinaca ñucanchi huauquipanicunataca  ¿imashinata tucui shunguhuan juyashcataca ricuchi ushapanchi? nishca tapuitami yachajupashun.

13. ¿Ima pasajpita juyaita ricuchinaca difícil caita ushan?

¹³ Ñucanchi huauquipanicunahuan imapash problemacunata charishpaca ¿imashinata paicunata ciertopacha juyashcata ricuchita ushapanchi? (2 Cor. 8:8). Chaipaca apóstol Pedroca: “Ashtahuanbachaca, caishuj chaishujmi tucui shunguhuan juyarina capanguichi. Porque juyanata yachajcunami, shujcunata perdonangapaca siempre listo” canga nircami (1 Ped. 4:8). Shinaca ñucanchi huauquipanicuna ñucanchita yangamanda llaquichijpimi paicunata juyashcata ricuchinaca difícil caita ushan.

14. 1 Pedro 4:8​pi nishcashnaca ¿imashina juyaita charinata minishtirin? Shuj ejemplomanda parlapai.

¹⁴ Cunanga 1 Pedro 4:8​pi nishca shimicunata ricupashun. Callari verso 8​pica ima laya juyaita ricuchina cashcatami yachachin. Chaipica: ‘Tucui shunguhuanmi juyarina’ canguichi nin. Apóstol Pedro griego shimipi “tucui” nishpaca “ninan juyaita ricuchina cashcatami” ningapaj munan. Chai versopa cati partepica ñucanchi huauquipanicuna pandarijpipash paicunata tucui shunguhuan juyana cashcatami ningapaj munan. Por ejemplo, caipi pensaripashunchi. Shuj mesa rayashca,  manchashca cashcanga. Chai mesapi rayacuna, manchacuna ama ricurichunga shuj jatun jatun telahuanmi tapapanguiman. Shina cuendallatami ñucanchi huauquipanicuna tauca viajeta pandarijpipash paicunata ninanda juyaimandami “perdonangapaj siempre listo” capashun.

15. Ñucanchi huauquipanicunata ninanda juyanaca ¿imata rurachunda ayudanga? (Colosenses 3:13).

¹⁵ Ñucanchi huauquipanicunata ninanda juyashpaca tauca viajecunata pandarijpi paicunata perdonangapaj difícil cajpipash, perdonaita ushapanchimi (Colosenses 3:13​ta liipangui). Ñucanchi huauquipanicunata perdonashpaca paicunata ninanda juyashcatami ricuchipanchi. Shinallata Jehová Diospa ñaupapipashmi ali ricurita ushapanchi. Ñucanchi huauquipanicuna cutin cutin pandarijpipash paicunata perdonashpa catingapaca ¿imata ayudanga?

16, 17. Huauquipanicuna pandarijpipash ¿imatata rurana capanchi? Shuj ejemplomanda parlapai. (Fotocunata ricupangui).

¹⁶ Huauquipanicunapa pandarishcacunata ricujunapa randica, paicunapa ali cualidadcunata ricungapaj esforzaripangui. Por ejemplo, shuj ali amigocunahuan cashpa fotota llujchinata decidipashcanguiman. Shinapash ¿chai huauquigu o panigu fotopi nali llujshishca cajpica? ¿Nachu nali llujshishca fotota borrashpa ali fotogucunahuanlla quidapanguiman?

¹⁷ Chai ali fotogucunata alichishpaca, chai huauquipanicunahuan ali yalishcatami yuyaripanchiman. Shinapash shuj huauqui o shuj  pani imatapash nishpa o imatapash rurashpa nali sintichishcanman. Shina pasashca cajpipash nali fotota borranshnami chai huauquita o panita perdonana capangui (Prov. 19:11; Efes. 4:32). Shinaca chai huauqui o panihuan alipacha amigocuna caimandami imagupi pandarishca cajpipash fácil perdonaita ushapanchiman. Ali llujshishca fotogucunataca cushijushpami alichipanchi. Shina cuendallatami ali amigocunahuan yalishca tiempogutaca siempre yaringapaj munapanchi.

18. Cai temapica ¿imacunatallata yachajupashcanchi?

¹⁸ ¿Imamandata huauquipanicunataca ninanda juyashpa catina capanchi? Porque si huauquipanicunata juyashpaca Jehová Diosta juyashcatami ricuchinajupanchiman. Ñucanchi huauquipanicunata juyashcataca ¿imashinata ricuchita ushapanchi? Chaipaca ñucanchi huauquipanicuna problemacunahuan cajpimi paicunata llaquishcata ricuchingapaca cushichishpa, aliguman tratashpami catina capanchi. Shinaca ñucanchi huauquipanicunata ninanda juyashcataca perdonashpapashmi ricuchina capanchi.

19. Huauquipanicunata juyashcata ricuchinaca ¿imamandata importante can?

¹⁹ Ñucanchi huauquipanicunata juyashcata ricuchinaca ¿imamandata importante can? Apóstol Pedroca cashnami nirca: “Tucuilla cosascuna tucurina tiempoca ñami chayamushca. Chaimandami […] caishuj chaishujmi tucui shunguhuan juyarina capanguichi” nishpa (1 Ped. 4:​7, 8). Tucuri punlla chayamungacamanga ¿imacunallata pasanga? Jesusca: “Ñucapa catijcuna cashcamandami, shuj llactamanda gentecunapash cangunataca na ricunayachinga” nircami (Mat. 24:9). Shujcuna ñucanchita na ricunayachijpipash Jehová Diostaca shujllashna tandanajushpami sirvishpa catina capanchi. Ñucanchi huauquipanicunata “juyanaca, tucuicuna alipacha unido cachunmi ayudan”. Cashna juyarijpica Satanasca ñucanchi huauquipanicunamanda caruyachitaca na ushangachu (Col. 3:14; Filip. 2:​1, 2).