1. Jehovapa organizacionbi cashcamandaca ¿ima bendiciongunatata charipanchi?

 JEHOVÁ Diospa organizacionbi caita ushashcamandaca ninandami cushijupanchi. Último punllacunapi causanajushcamandami ashtaca llaquicuna mirashpa catishca. Shinapash Jehová Diospa organizacionbi cashcamandami huauquipanicunata shuj familiatashna charipanchi (Sal. 133:1). Jehová Dios ayudajushcamandami ñucanchi familiahuanbash cushilla causaita ushapanchi (Efes. 5:33–6:1). Shinallata nali yuyaicunata mishachun y cushilla causai ushachunmi Jehová Diosca paipa ali yachaita carashpa ayudan.

 2. ¿Imamandata huaquinbica ninanda esforzarina tucupashun?

² Na desanimarishpa Jehová Diosta sirvishpa catingapaca huaquinbica ashtahuanmi esforzarinami tucupashun. ¿Imamandata shina nipanchi? Talvez shujcuna imatapash nishpa o rurashpami ñucanchitaca nali sintichita ushan. Na cashpaca imapipash cutin cutin pandarimandami desanimado sintirita ushapanchiman. Cashna situacionguna ricurijpipash Jehová Diosta sirvishpa catichunmi cai temata yachajunaca ayudapanga. 1) Shuj huauqui o shuj pani imatapash nishpa nali sintichijpi. 2) Cusahuarmi causaipi problemacuna ricurijpi. 3) Imapipash pandarimanda desanimado sintirijushpa. Cashna situaciongunata charishca shuj personamandami Bibliapica yachajupashun.

SHUJ HUAUQUI O SHUJ PANI IMATAPASH NISHPA NALI SINTICHIJPI

 3. Jehovata sirvijcunaca ¿ima problemacunatata chimbapurana tucun?

³ Problemacuna ricurijpi. Cabalta parlashpaca huaquin huauquipanicunaca imatapash rurashpami culirachinga. O shujcunaca nalimi tratanga. Huaquinbica anciano huauquicunapashmi pandarin. Cai tucui cosascunata ricuimandami huaquingunaca ciertopachacha Taita Diospa organizacionbi cani nishpa pensaringa.  Chaimandami Jehová Diosta ‘tucuilla shujllashna’ tandanajushpa sirvinapa randica, nali sintichishca huauquita o panihuan na parlanata decidin o na cashpaca tandanajuicunamanbash ñana rinatami decidin (Sof. 3:9). Shina rurashpaca ¿alitachu decidinajun? Cunanga punda tiempopi Jehovata sirvij cashna situaciongunata charishpa imata rurashcatami yachajupashun.

 4. Apóstol Pabloca ¿ima problemacunatata chimbapurana tucurca?

⁴ Punda tiempopi Jehovata sirvij. Apóstol Pabloca huauquipanicuna juchayucuna cajtaca alimi yacharca. Por ejemplo, apóstol Pablo Jerusalén llactapi congregacionman ri callarijpica, chai congregacionmanda huauquipanicunaca apóstol Pablopica na confianllu carca. Ashtahuangarin manllashpami ricun carca (Hech. 9:26). Jipamangarin huaquingunaca apóstol Pablota nalicachishpami huasha rimanajurca (2 Cor. 10:10). Apóstol Pabloca espiritualmente shinlli caj shuj huauqui nali decisionda agllajtami ricurca. Chai huauqui chashna decidishcamandami shuj huauquipanicunaca talvez pandarita ushanman carca (Gál. 2:​11, 12). Shinallata apóstol Pabloca, paipa cumba Marcos runaguhuanbashmi nali sintirirca (Hech. 15:​37, 38). Apóstol Pabloca ñucata nali sintichishcamanda cai huauquicunahuanga ñana tandanajushachu nishpami pensaita ushanman carca. Pero shina pensanapa randica cai huauquicunapa ali cualidadcunata ricungapami esforzarirca. Shinaca chai situacionguna Jehová Diosmanda caruyachichun na saquishpami paita sirvishpa cati usharca. Pero chaita rurachunga ¿imata ayudarca?

 5. Apóstol Pablo huauquipanicunahuan ama resentido quidachunga ¿imata ayudarca? (Colosenses 3:​13, 14; dibujotapash ricupangui).

⁵ Apóstol Pabloca huauquipanicunata ninanda juyaimandami paicunapa pandarishcacunata ricujunapa randica ali cualidadcunata ricungapami esforzarirca. Shinallata Colosenses 3:13 y 14​pi nishcashnami apóstol Pablo huauquipanicunata juyaimanda perdonachun ayudarca (cai textota liipangui). Apóstol Pabloca Marcos runagu predicacionbi paita saquishpa rishca cajpipash na risintirishpami perdonarca. Chaitaca, Colosas llactamanda huauquipanicunaman shuj cartaguta escribishpami ricuchirca. Chai cartapica Marcos runaguca ninan valishcami can y ‘paica ñucataca ninandami cushichihuashca’ nijurcami (Col. 4:​10, 11). Ashtahuanbash Roma llactapi prezo cashpaca Marcos runagupa ayudatami mañarca (2 Tim. 4:11). Shinaca apóstol Pabloca huauquipanicunapa ali cualidadcunatami ricun carca. Cai ejemplomandaca ¿imatata yachajupanchi?

6, 7. Juchayucuna cashpapash ñucanchi huauquipanicunata juyaihuan tratachunga ¿imata ayudanga? (1 Juan 4:7).

⁶ ¿Imatata yachajupanchi? Jehová Diosca ñucanchi huauquipanicunata juyashpa catichunmi munan (1 Juan 4:7​ta liipangui). Shuj huauqui o  shuj pani ñucanchita nali tratajpica ñucanchita llaquichina munaihuan na rurashcatami pensarina capanchi (Prov. 12:18). Jehová Diosca ñucanchicuna siempre pandarijpipashmi ninanda juyan. Ñucanchicuna pandarijpipash Jehová Diosca na risintirishca quidanllu (Sal. 103:9). Jehová Diospa ejemplota catina y shujcunata perdonanaca ninan importantemi can (Efes. 4:32–5:1).

⁷ Ashtahuanbash último punllacunapi causanajushcamandami ñucanchi huauquipanicunahuanga shujllashna ashtahuan tandanajushca cana capanchi. Ñucanchicunataca ñallami catiriashpa llaquichinga. Carcelcunapipashmi churanga. Chai horascunapica ñucanchi huauquipanicunataca ninandami minishtipashun (Prov. 17:17). Cunanga España llactamanda Josep a anciano huauquiguhuan ima pasashcata ricupashun. Cai huauquigutaca política cosascunapi na chapurishcamandami carcelpi churarca. Chai carcelpica shuj huauquicunapashmi carca. Huauquiguca ninmi: “Carcelpica tucuicunallata igualmi siempre can carcanchi. Chaimi imagumandapash culirarinaca fácil carca. Chaimandami randimanda aguantarishpa, juyaihuan perdonarina carcanchi. Chaita rurangapaj esforzarinami, huauquipanicunahuan shujllashna tandanajushca cachun y na testigo prezocunamanda cuidarichunbash ayudarca. Shuj viajeca rigrata quibishca caimandami maquita cuyuchitaca na usharcani. Pero shuj huauquigumi ñucapa ropata tajshashpa y shuj cosasgucunapipash ayudahuan carca. Chai horascunapimi huauquicunapa ciertopacha juyaita ricurcani” ninmi. Shinaca ñucanchi huauquipanicunahuan imapash problemacunata charishpaca uchalla arreglanaca importantemi can.

CUSAHUARMI CAUSAIPI PROBLEMACUNA RICURIJPI

 8. Cazarashcacunaca ¿ima problemacunatata charin?

⁸ Problemacuna ricurijpi. Bibliapi nishcashnami tucui ‘cazarashcacuna ashtaca problemacunata charinga’ ninmi (1 Cor. 7:28). Cusapash huarmipash juchayucunami can. Shinallata diferente culturapi viñashca caimanda, shuj shuj costumbrecunata charimandami shuj shuj yuyaicunata charinga. Y tiempohuanga shuj costumbrecunata charishcatami cuenta japinga. Chaimandami talvez imapash problemacuna ricuringa. Shina pasajpi randimanda imapi pandarishcata reconocishpa, uchalla arreglanapa randica, randimanda culparishpa o cashna problemacunata ama charingapaca separarishparapash o divorciarishparapashmi ali canman nishpami talvezpash pensaripanga. Pero chashna yuyanaca ¿alichu can? b Cunanga punda tiempopi Jehovata sirvij cazarashca causaipi llaquicunata charishpapash imamanda na desanimarishcata yachajupashun.

 9. Abigaíl huarmiguca ¿ima problemacunatata charirca?

⁹ Punda tiempopi Jehovata sirvij. Abigaíl huarmiguca nalita ruraj, millai millai runahuanmi cazarashca carca (1 Sam 25:3). Chashna runahuan igual causanaca Abigaíl huarmigupaca dificilmi cashcanga. Shuj viajeca Abigaíl huarmiguca Nabal runa huañujpi tranquila causana oportunidadtami charirca. Nabal runaca Davidta y paipa soldadocunatapashmi nali tratashcarca. Chaimandami Davidca Nabal runata huañuchingapaj munajurca (1 Sam 25:​9-13). Abigaíl huarmiguca paipa cusa Nabalta David huañuchichun saquita ushanmanmi carca. Pero chaipa randica Nabal runata perdonashpa, ama huañuchichunmi Davidtaca rogarca (1 Sam 25:​23-27). ¿Imamandata Abigaíl huarmiguca chaita rurarca?

10. Cazarashca causaipi problemacunata charishpapash Abigaíl huarmigutaca ¿imata ayudarca?

¹⁰ Abigaíl huarmiguca Jehová Diostaca tucui shungumi juyan carca. Shinallata cazarashca causai Jehovapa ninan importante cashcatapashmi  yacharca. Adán y Evata Jehová Dios cazarachishcataca Abigaíl huarmiguca seguromi ali yachashcanga (Gén. 2:24). Abigaíl huarmiguca cazarashca causai Jehová Diospa ñaupapi ninan importante cashcataca alimi yacharca. Shinallata Jehová Diospa ñaupapi ali ricuringapaj munaimandami paipa cusata y chai huasipi causajcunata salvangapaj munashcanga. Nabal runata David ama huañuchichunga Abigaíl huarmiguca huaquin cosascunata uchallami rurarca. Shinallata na culpata charishpapash disculparingapaj dispuestami carca. Jehová Diosca Abigaíl huarmigu na manllaj y ali shunguta charishcamandaca seguromi ninanda juyan cashcanga. Cusahuarmicunaca Abigaíl huarmigumandaca ¿imatata yachajuita ushan?

11. a) ¿Cazarashcacuna imata rurachunda Jehová Diosca munan? (Efesios 5:33). b) Carmen panigumandaca ¿imatata yachajupanchi? (fotocunata ricupangui).

¹¹ ¿Imatata yachajupanchi? Cusahuarmicuna ishcandillata diferente cashpapash, Jehová Diosca cazarashca causaita cusahuarmicuna respetashpa causachunmi munan. Cusahuarmicuna problemacunata aliguman arreglangapaj, juyaihuan, respetohuan trataringapaj esforzarijta ricushpaca Jehová Diosca seguromi ninanda cushijupanga (Efesios 5:33​ta liipangui). Cunanga Carmen panigupa ejemplota ricupashun. Paniguca 6 huatacunata casada cashpami, testigo de Jehovacunahuan Bibliamanda yachajushpa bautizarirca. Paniguca ninmi: “Jehovata sirvinata decidishcataca ñuca cusaguca nimamanda na gushtarcachu. Jehovata sirvinata saquichun munaimandami nali shimicunahuan rimashpa o huasimandapash rishami” nihuan carca. Shina cajpipash Carmen paniguca na desanimarishpami 50 huatacunata paipa cusaguta juyaihuan, respetohuan tratangapaj esforzarirca. Paniguca ninbashmi: “Tiempohuanmi ñuca cusagutaca intindishpa, juyaihuan parlanata yachajurcani. Cazarashca causai Jehová Diospa importante cashcata ali yachaimandami, ñuca cusaguta saquinataca yaitapash na yarcani. Shinaca Jehová Diosta tucui shunguhuan juyanami na desanimarishpa, ñaupaman catichun ayudahuarca”. c Quiquinba cusahuan o huarmiguhuan imapash problemacunata charijpica na desanimarishpa ñaupaman catichunga seguromi Jehová Diosca ayudapanga.

NA DESANIMARISHPA JEHOVATA SIRVISHPA CATIPANGUI

12. Shuj jatun juchata rurashca cashpaca ¿imashinata sintiripanchiman?

¹² Problemacuna ricurijpi. Shuj jatun juchata rurashcamandami talvez desanimarishcapacha sintiripanchiman. Bibliapica juchata rurashpa pandarijcunaca ‘ninanda llaquirishca shungumi’ tucun ninmi (Sal. 51:17). Chaitami Robert huauquigutaca pasarca. Paica siervo ministerial shina sirvingapaj munaimandami ashtaca huatacunata  esforzarijushcarca. Shinapash shuj jatun juchata ruraimandami Jehová Diosta ninanda llaquichishcata cuenta japirca. Huauquiguca ninmi: “Ashtaca ladrillocuna ñuca jahuapi urmashcajpishnami nalipacha sintirircani. Shina llaquillapacha sintirimandami huacashpa Jehová Diosta mañarcani. Nalita rurashpa Jehová Diosta llaquichishcamandaca paica ñuca mañaicunataca nunca na uyangachu nishpami pensarcani”. Shuj jatun juchata rurashpa ninan llaquilla caimandami talvez Jehová Diosca ñucataca jichushpami saquihuashca y paita sirvishpa catitaca ñana ushanichu nishpami pensanchiman (Sal. 38:4). ¿Quiquinbash huaquinbica shinallatachu sintiripashcangui? Shina sintirijushpaca punda tiempopi Jehovata sirvij shuj jatun juchata rurashca cashpapash Jehovata sirvishpa cati ushashcata yachajunami ayudapanga.

13. Apóstol Pedroca ¿ima jatun juchatata rurarca? ¿Imamandata shina pandarirca?

¹³ Punda tiempopi Jehovata sirvij. Jesusta huañuchingapaj shuj tuta faltajpillami apóstol Pedroca huaquin cosascunapimi pandarirca. Chaimandami paica ninanda llaquirirca. Primeropica, apóstol Pedroca paipilla confiaimandami shuj apostolcuna Jesusta jichushpa saquijpipash, paica na saquishachu nishpa asegurarca (Mar. 14:​27-29). Jipaca, Getsemaní nishca pushtupimi huaquin viajecunata puñushpa quidarca (Mar. 14:​32, 37-41). Jipaca, Jesusta prezo apanajujpica Pedroca paitaca jichushpami saquirca (Mar. 14:50). Ultimopica, apóstol Pedroca quimsa viajecamanmi Jesustaca na rijsinichu nishpa negarca (Mar. 14:​66-71). Apóstol Pedroca shuj jatun juchata rurashcata cuenta japishpaca ¿imashinata sintirirca? Paica ninandapacha llaquirishpami huacarca (Mar. 14:72). Apóstol Pedroca shuj racu caspipi Jesusta huañuchishcata ricushpaca ¿imashinashi sintirishcanga? Seguromi paica ashtahuan nali llaquillapacha sintirishcanga.

14. Apóstol Pedro Jehovata sirvishpa catichunga ¿imata ayudarca? ( dibujota ricupangui).

¹⁴ Apóstol Pedroca Jehová Diosmandaca na caruyarcachu. Chaipa randica paita ashtahuan sirvishpa catingapami esforzarirca. Shina rurachunga ¿imata ayudarca? Paica huauquipanicunamanda ama caruyangapami esforzarirca. Y seguromi cai huauquipanicunaca animashpa ayudashcanga (Luc. 24:33). Ashtahuanbash, Jesusca causarishpaca apóstol Pedromanmi primero ricurirca. Y seguromi paita animangapaj ricurishcanga (Luc. 24:34; 1 Cor. 15:5). Pedroman Jesús ricurishpaca paita jichushpa saquishcamandaca na reclamarcachu. Ashtahuangarin paipa amigo Pedrotaca ashtahuan responsabilidadcunatami charigringui nircami (Juan 21:​15-17). Apóstol Pedroca jatun juchata rurashcataca alimi yacharca. Shinapash na desanimarishpami Jehovata sirvishpa catirca. Shina rurachunga ¿imata ayudarca? Apóstol Pedroca Jesús paita na saquishcataca seguromi carca. Shinallata huauquipanicunapa  ayudatapashmi charirca. Cai ejemplomandaca ¿imatata yachajupanchi?

15. ¿Imata seguro cachunda Jehová Diosca munan? (Salmo 86:5; Romanos 8:​38, 39; fotota ricupangui).

¹⁵ ¿Imatata yachajupanchi? Jehová Diosca, ñucanchicunata pai ninanda juyajta y imapi pandarijpipash perdonangapaj dispuesto cashcata seguro cachunmi munan (Salmo 86:5; Romanos 8:​38, 39​ta liipangui). Juchata rurashpa pandarishcamanda nali, llaquilla sintirinaca alimi can. Shinapash chai pandarishcamanda Jehová Dios ñucanchitaca ñana juyangachu y perdonaitapash ñana perdonahuangachu nishpaca na pensanachu capanchi. Chaipa randica uchallami ayudata mascana capanchi. Párrafo 12​pi parlashca Robert huauquiguca ninmi: “Imapash tentación ricurijpica chai tentaciondaca ñucallata mishaita ushani nishpa pensaimandami juchata rurashpa pandarircani”. Huauquiguca ancianocunahuan parlanapacha cashcatami cuenta japirca. Robert huauquiguca ninbashmi: “Ancianocunaca Jehová Dios ñucata juyashpa catijushcatami cuenta japichihuarca. Shinallata ancianocunapash ñucata jichushpaca na saquihuarcachu. Chaipa randica juyaihuanmi, Jehová Diospash ñucata na jichushpa saquishcata cuenta japichihuarca”. Robert huauquigushnallatami ñucanchicunapash Jehová Dios ñucanchita ninanda juyashcata seguro caita ushapanchi. Shinallata imapash juchacunamanda ciertopacha arripintirishpa, ayudata mascashpa y chai juchacunata ama cutin rurangapaj esforzarijpica, Jehová Dios perdonan cashcatami seguro caita ushapanchi (1 Juan 1:​8, 9). Jehová Dios ñucanchita juyashpa catijta yarinami imapi pandarishpapash na desanimarishpa, ñaupaman catichun ayudanga.

16. ¿Imamandata Jehová Diosta sirvishpa catingapaj munapangui?

¹⁶ Jehová Diosca paita sirvijcuna cai último punllacunapi paita sirvingapaj ninanda esforzarijta ricushpaca ninandami valichin. Ima situaciongunapi cajpipash Jehová Diosca paimanda ama caruyachun y ñaupaman catichunmi ayudanga. Ñucanchi huauquipanicunata juyashpa catingapaj y ñucanchita imatapash nishpa nali sintichijpipash perdonashpa catingapami esforzarina capanchi. Shinallata cazarashca causaipi imapash problemacuna ricurijpi, aliguman arreglangapaj esforzarishpaca Jehová Diosta ciertopacha juyashcata y cazarashca causaita respetashcatami ricuchinajupanchi. Ashtahuanbash shuj jatun juchata rurashpaca Jehová Diospa ayudata mañashpami paita sirvishpa catina capanchi. Shina rurajpica paica juyaihuanmi perdonanga. Shinallata “alita ruranataca na saquinachu capanchi”. Shina rurajpica Jehová Diosca ñucanchitaca ninandami bendicianga (Gál. 6:9).