1, 2. Tonyca ¿imacunapita cambiarca? Chaimandaca ¿imatata yachajupanchi?

 TONYCA taita illami viñarca. Paica estudianataca na gushtanllu carca. Colegiotapash saquingapami pensarijurca. Sabadocunata, domingocunataca paipa amigocunahuan llujshin carca. Shinallata peliculacunata ricungapami cineman rin carca. Tonyca pihuanbash ni macanajuita, ni drogaritapash na drogarinllu carca. Shina causashpapash Tonyca na cushilla causanllu carca. Paica Taita Dios tiajta o na tiajtaca na seguro sintirinllu carca. Chai jipami paica shuj Testigo cusahuarmita rijsirca. Chaimi Taita Dios tiajta o na tiajta na seguro sintirimandami paicunataca cashna tapurca ¿Taita Diosca tianllu? nishpa. Shina tapujpimi Testigo cusahuarmica El origen de la vida nishca folletota, ¿Es la vida obra de un Creador? nishca folletotapash saquirca.

² Testigo cusahuarmi cutin visitajpica Tonyca shujpachami carca. Tauca viajeta chai folletocunata cutin cutin liishcamandami chai folletocunaca ña maucayashca carca. Tonyca Testigo cusahuarmitaca cashnami nirca: “Taita Diosca tianbachami” nishpa. Chaimi Bibliata yachajui callarirca. Shinallata asha asha paipa causaipi cambiaimandami cushilla sintirirca. Ashtahuanbash  colegiopica ali estudiantemi tucurca. Chaita ricushpami colegiomanda directorpash Tonytaca cashna nirca: “Quiquin cushilla cajtami ricuni. Ali notacunatami chari callarishcangui. ¿Testigo de Jehovacunahuan Bibliata yachajuimandachu shina cambiashcangui?” nishpa. Tonyca nircami: “Ari, paicunahuan Bibliata yachajuimandami shina cambiashcani” nishpa. Shinallata imacunatalla yachajushcatami directormanga parlarca. Tonyca colegiomanda graduarishca jipaca precursor regularmi tucurca. Jehovata shuj juyaj taitatashna charimandami Tonyca cushilla sintirin. Cunanga siervo ministerial shinami sirvijun (Sal. 68:5).

 3. Jovengunamanga ¿ima consejotata Jehová Diosca cun?

³ Tonymandaca ¿imatata yachajupanchi? Tucui jovengunamanda Jehová Dios preocuparishcatami yachajupanchi. Jovenguna cushilla causachunbashmi munan. Chaimi Jehová Diosca jovengunamanga cai consejota cun: “Canda Ruraj Diostaca, chairalla viñai cashpallata yaringui” nishpa (Ecl. 12:1). Cunan punllacunapica chai consejota pactachinaca jovengunapaca shinllimi ricurin. Shinapash cushilla causachun, shamuj punllacunapipash ali causachunmi Jehová Diosca ayudanga. Israelitacuna Jehová Dios carasha nishca alpacunaman yaicuchun, Goliat runata David mishachun imashina ayudashcatapashmi yachajupashun.

4, 5. a) Jehová Dios carasha nishca alpacunaman yaicungapaca ¿imatata israelitacunaca rurarca? b) Goliat runata mishangapaca ¿imatata Davidca rurarca? (Callari dibujocunata ricupangui).

⁴ Jehová Dios carasha nishca alpacunaman israelitacuna yaicugrinajujpica paicuna ali soldadocuna cachun, ali macanajujcuna cachunbash na yachachircachu (Deut. 28:1, 2). Chaipa randica paipa mandashcacunata cazuchun, paipi confiachunmi Jehová Diosca mandarca (Jos. 1:7-9). Gentecunapa ricuipica chai mandashcaca nalishnallami ricurirca. Shinapash israelitacunataca chai mandashcata cazunami Canaán llactamanda gentecunata cutin cutin mishachun ayudarca (Jos. 24:11-13). Israelitacuna Jehovata cazungapaca paipi crinami minishtirca. Ñucanchicunapash Jehovapi crishpaca cushillami causashun. Imashinami ricupanchi, cunanbipash Jehová Diospi crinaca minishtirishcapachami can.

⁵ Goliat runaca quimsa metrotashna midij jatun soldadomi carca. Paica macanajungapaca tucuitami charirca. Chaimi Goliatca Davidhuan macanajungapaj llujshirca (1 Sam. 17:4-7). Cutin Davidca paipa huaracahuan, Jehová Dios ayudanapi confiashpami macanajungapaj llujshirca. Taita Diospi na crij gentecunapaca Davidca muspa juizu illanshnami ricurirca. Shina nishpaca chai gentecunaca pandatami ninajurca. Goliat runami muspa juizu illanshna carca (1 Sam. 17:48-51).

 6. Cai temapica ¿imatata yachajupashun?

⁶ Caishuj temapica, cushilla causangapaca Bibliamanda ashtahuan yachajunata, ali amigocunata charinata, Jehovata ashtahuan sirvinata, causaipi imata ruranata ali agllanatami yachajuparcanchi. Cai temapipashmi Salmo 16manda Jehová Diospa mandashcacunata cazunamanda ashtahuan yachajupashun.

 7. a) Espiritualmente shinlli huauquipanicunaca ¿imashinata can? b) “Jehová Diosca tucuita caraj Diosmi can” nishpaca ¿imatata Davidca ningapaj munarca?

⁷ Espiritualmente shinlli huaquipanicunaca Jehová Diospimi crin. Shinallata Jehová  Dioshna pensangapaj, paipa mandashcacunata cazungapami munan (1 Cor. 2:12, 13). Rey Davidca espiritualmente shinllimi carca. Paica Jehová Diosman cashnami nirca: “Jehová Diosca tucuita caraj Diosmi can” nishpa (Sal. 16:5, NM ). David shina nishpaca Jehová Dioshuan ali amigo cashcata ricuchingapami shina nirca. Davidca Jehová Dioshuan ali amigo caimandaca ninanda agradicishpami siempre Jehovapi confian carca (Sal. 16:1). Chaimi Davidca Jehová Dioshuan alipacha amigo caimanda ninanda cushijurca (Salmo 16:9, 11, liingui).

 8. Cushilla causangapaca ¿imatata rurana cangui?

⁸ Gentecunaca paicunapa munaita rurashpa, ashtaca culquita charishpapash rey Davidshna cushilla causaitaca na ushashcachu (1 Tim. 6:9, 10). Canadá llactamanda shuj huauquica ninmi: “Ñucanchi munaita rurashpaca na cushilla causashunllu. Jehovata sirvishpallami cushilla causashun. Paimi ñucanchimanga tucuita caran” nishpa (Sant. 1:17). Shinaca Jehovapi tucui shunguhuan crishpa, paitalla sirvishpaca cushillami causangui. Shinallata quiquinba causaipi imata ruranatapashmi ali yachangui. Jehová Diospi tucui shunguhuan cringapaca ¿imatata rurana capangui? Chaipaca Bibliata liina, Jehová Diospa rurashcacunata ricuna, Jehová imashnapacha cashcata yachajunami cangui. Shinallata Jehová Dios quiquinda ninanda juyashcatapashmi yarina cangui (Rom. 1:20; 5:8).

 9. Rey Davidshna Taita Diospa Shimi ayudachunga ¿imatata rurana capanchi?

⁹ Jehová Diosca juyaj taita caimandami ñucanchi pandarijpipash consejashpa ayudan. Davidca Jehová Dios consejajpica alimanmi chasquin carca. Chaimi Davidca cashna nirca: “Mandaj Diostami alicachisha. Paimi, ñucataca alita yarichihuan. Tutacunapashmi, ñuca yuyaipica alita yachachihuan” nishpa (Sal. 16:7). Davidca Jehovapa consejocunapimi pensarin carca. Paica Jehová Dioshna pensangapami esforzarin carca. Chai consejocunaca paipa causaita cambiachun, ali gente cachunmi ayudarca. Quiquinbash Davidshna rurashpaca ashtahuan Jehová Diosta juyangui, Jehovapa mandashcacunata cazungapapashmi munangui. Shinallata espiritualmentepash shinllimi caita ushangui. Christin shuti paniguca ninmi: “Diospa Shimita yachajushpa, chai yachajushcacunapi pensarishpaca Jehová Diosmi ñucapa escribishcatashna sintini” nishpa.

10. Isaías 26:3​pi nishcashnaca, espiritualmente shinlli canaca ¿imamandata ali can?

¹⁰ Quiquin espiritualmente shinlli cajpica cai mundo imashina cashcata, shamuj punllacunapi cai mundo imashna canata yachachunmi Jehová Diosca ali yuyaitapash, ali yachaitapash charichun ayudan. Quiquinba causaipi imapacha ali cashcata yachachun, ali decisiongunata agllachun, shamuj punllacunapi ima pasanata ama manllachunbashmi Jehová Diosca ayudanga. Profeta Isaiasca nircami, Jehová Diosca paipi tucui shunguhuan confiajcunataca cuidashpa, casilla ali causaita charichunbashmi ayudanga nishpa (Isaías 26:3, liingui). Estados Unidos llactamanda Joshua shuti huauquica ninmi: “Jehová Diosta ashtahuan sirvishpaca ñucanchi causaipi imapacha ali cashcata, ima nali cashcata cuenta japichunmi ayudan” nishpa.

11. Davidpa amigocunaca ¿imashinata carca?

¹¹ (Salmo 16:3, liingui). Jehová Diosta tucui shunguhuan sirvijcuna ali amigocuna cashcatami Davidca ali yacharca. Chai amigocuna  Jehovapa mandashcacunata cazungapaj esforzarijujtami Davidca ricurca. Chaimi paica cashna nirca: Paicunaca ‘ima nalitapash na rurajcunami’ can nishpa. Shinallata nircami, chai ali amigocunahuan llevarimandami “ninanda cushijuni” nishpa. Salmosta shuj escribij runapashmi chashnallata nirca. Paica nircami: Taita Diosta ‘manllajcunapa, can mandashcacunata pactachijcunapa’ amigomi cani nishpa (Sal. 119:63). Imashinami caishuj temapi yachajuparcanchi, quiquinbashmi ali amigocunata chari ushangui. Chai ali amigocunaca Jehovata juyajcuna, cazujcunami cana can. Chai amigocunapurapica joven o mayorcunami caita ushan.

12. Davidpash, Jonatanbash ¿imamandata ali amigocunaca carca?

¹² Davidca paipura edadtallata paipa amigo cachunga na agllarcachu. Davidpa alipacha amigoca ¿pita carca? Jonatanmi carca. Bibliapica paicunamanda aligutapachami parlan. ¿Jonatanga mashna huatacunahuanda Davidpaca mayor carca? Jonatanga 30 huatacunahuan yali mayormi carca. Chashna huatacunata charishpapash ¿imamandata ali amigocuna carca? Paicunaca Jehovapimi tucui shunguhuan crin carca. Shinallata ishcandimandami respetarin carca. Diospa contracunahuan na manllashpa macanajushcamandapashmi randimanda alicachishpa ricun carca (1 Sam. 13:3; 14:13; 17:48-50; 18:1).

13. Kiera panigumandaca ¿imatata yachajupanchi?

¹³ Davidshna, Jonatanshna Jehovapi tucui shunguhuan crijcunahuan, paita juyajcunahuan amigocuna cashpaca cushillami causashun. Ashtaca huatacunata Jehovata sirvij Kiera paniguca ninmi: “Mundo enteropimi ashtaca amigocunata charini. Ñuca amigocunaca shuj shuj causaita charijcuna, shuj shuj costumbrecunata charij turiñañacunami can” nishpa. Chai panigushna ali amigocunata charishpaca Taita Diospa Shimipash, Diospa espíritu santopash shujllashna tandanajushpa causachun ayudajushcatami cuenta japingui.

14. a) Jehovata ashtahuan sirvingapaca ¿imatata rurana cangui? b) Huaquin jovengunaca ¿imatata rurashca?

¹⁴ (Salmo 16:8, liingui). Davidpaca Jehová Diosta sirvinami ashtahuan ali carca. Quiquinbash Davidshna tucui shunguhuan Jehovata sirvishpaca cushillami sintiringui.  Davidshnami Jehovapa munaita pundapi churana cangui. Shinallata Jehová Dios munashcashnami paitaca ashtahuan sirvina cangui. Steven shuti huauquica ninmi: “Jehovata ashtahuan sirvingapaj, ñuca causaipi cambiangapami esforzarircani. Shina ruraimandami cushilla sintirircani” nishpa. Cutin Alemania llactamanda shuj joven huauquica shuj llactapimi sirvijun. Paica ninmi: “Ña mayor cashpaca, na pensaringapaj munanichu joven cai horaspi ñucapa munaitalla rurashpa causashcata” nishpa. Quiquinbash chai huauquicunashna Jehová Diosta jatunyachingapaj, shujcunata ayudangapami tucui imata rurai ushashcata rurana cangui (Gál. 6:10). Jehovata ashtahuan sirvingapami esforzarina cangui. Chaipaca Jehovata ayudahuai nishpami mañana cangui. Shina mañajpica Jehová Diosca uyangapachami (1 Juan 3:22; 5:14, 15).

15. Jehovata ashtahuan sirvingapaca ¿imatata rurai ushangui? (“Joven caita rurapangui” nishca recuadrota ricupangui).

¹⁵ Jehovata ashtahuan sirvingapaca ¿imatata rurai ushangui? Tandanajuipi quiquinba propio shimicunapi comentangapaj, precursor cangapaj, Betelpi sirvingapami esforzarita ushangui. Shinallata shuj shimita parlaj pushtucunapi villachingapami shuj shimita yachajuita ushangui. Tiempo completopi sirvij Barak huauquica ninmi: “Jehová Diosta sirvinaca nimahuan na igualanllu. Cada punlla Jehová Diosta sirvimandaca ninandami cushijuni” nishpa.

16. Jehovapa mandashcacunamanda, yachachishcacunamandaca ¿imatata Davidca nirca?

¹⁶ Caishuj temapica Jehovapa mandashcacuna, yachachishcacunaca ñucanchi causaipi imata ruranata ali agllanata, alita ruranata, nalicunata na ruranatami yachajurcanchi (Amós 5:15). Rey Davidca Jehová Diosmandaca nircami: “Cambaj juyaica jatunmari” can nishpa (Salmo 31:19). Davidca Jehová Dioshna cangapaj, alita rurangapami esforzarirca. Davidca yanga dioscunata na sirvishpa, Jehová Diospa munaita rurashpami causarca. Jehová Diosca yanga dioscunata sirvichunga na munanllu. Yanga dioscunata sirvij gentecunaca Jehová Diostaca yangapimi saquinajun. Paicunaca Diospa ñaupapica nalimi ricurin (Is. 2:8, 9; Apoc. 4:11).

17, 18. a) Yanga dioscunata sirvinamandaca ¿imatata Davidca nirca? b) Ashtaca gentecunaca ¿imamandata llaquilla causan?

¹⁷ Punda tiempopica yanga dioscunata sirvij gentecunaca chai dioscunata sirvinchi nishpami shuj jarihuan, shuj huarmihuan nalicunata ruran carca. Shinallata shuj jatun juchacunatapashmi ruran carca (Os. 4:13, 14). Chai gentecunaca shuj huarmihuan o shuj jarihuan nalicunata rurangapaj munaimandallami yanga dioscunata sirvin carca. Shinallata chai gentecunaca yanga dioscunaman cungapaj nishpami, paicunapa huahuacunatapash rupachin carca. Paicuna shina rurashpapash na cushilla causarcachu. Chaimi Davidca nirca, yanga dioscunata sirvijcunaca nanaicunata o llaquicunatami charinga nishpa (Is. 57:5). Jehová Diosca chai nali ruraicunataca ricuitapachami na ricunayachin carca (Jer. 7:31). Quiquin chai tiempopi causashpaca quiquinba taitamamacuna Jehová Diosta sirvishcamandaca ¿nachu cushilla sintiringuiman carca?

¹⁸ Cunanbi panda religiongunaca shuj jarihuan, shuj huarmihuan nalicunata ruranataca alitashnami ricun. Shinallata jaripura, huarmipura igual canatapash alitashnami ricun. Paicunaca, punda tiempopi gentecunashnami  nalicunata rurashpa causan (1 Cor. 6:18, 19). Gentecunaca paicunapa munaita rurashpapash ashtaca llaquicunatami charishca. Quiquinbash chaita cuenta japishpaca Jehová Diosta cazungapami esforzarina cangui. Shina cazushpaca cushillami causangui. Cutin nalicunata rurashpaca llaquillami causangui. Chaitaca na cunganachu cangui (Gál. 6:8). Párrafo 10​pi parlashca Joshua huauquica ninmi: “Ñucanchi causaipi imata ruranata agllai ushanchimi. Shinapash nalicunatara ruranata agllashpaca ñucanchillatami llaquilla causashun” nishpa.

19, 20. Jehovapi crijpi, paita cazujpica ¿imashinata jovengunaca causanga?

¹⁹ Jesusca paipa catijcunataca nircami: ‘Ñuca yachachishca shimicunata canguna cazushpaca, ñucapa yachajujcunapachami canguichi. Shinami na llullashpa villajtapash rijsinguichi. Chaimi cangunataca cacharichinga’ nishpa (Juan 8:31, 32). Cunanbipash Jehovapa yachachishcacunaca panda religionmanda llujshichun, llulla yachachishcacunata saquichun, huañushcacunata ama manllachun, muscuicunapi ama crichun, huairashca nishcacunapi ama crichunbashmi ayudashca. Quiquindaca shamuj punllacunapi Jehová Diosca ‘paipa huahuacunatashna punchapamba cachunmi cacharichinga’ (Rom. 8:21). Shinaca quiquinba causaipi imata ruranata ali agllangapaca ¿imatata rurana cangui? Chaipaca Jesuspa yachachishcacunata cazungapami esforzarina cangui. Shinami ‘na llullashpa villaita’ ali rijsingui. Chai villaitami quiquinba causaipi imashina pactachinatapash ali yachangui.

²⁰ Jehová Dios munashcashnami quiquinba causaipica imata ruranata ali agllana cangui. Shinami shamuj punllacunapipash imata ruranata ali agllai ushangui. Shuj Testigo jovenga nircami: “Cunanbillata ñucanchi causaipi imata ruranata ali agllashpaca shamuj punllacunapipashmi ali agllashun. Por ejemplo ima trabajota agllanata, pihuan cazaranata, soltero quedanata o na quedanataca alimi agllashun” nishpa.

21. ‘Causaita causanata japingapaca’ ¿imatata rurana cangui?

²¹ Cai mundopi gentecunaca ali causanchi nishpapash na cushilla causanllu. Caya punlla ima tucunataca pipash na yachai ushanllu (Sant. 4:13, 14). Chaimi ‘causaita causanata japingapaj’ esforzarina cangui (1 Tim. 6:19). Jehová Diosca paita sirvichunga na obliganllu. Cada unomi Jehovata sirvinata o na sirvinataca agllana can. Shinapash Jehovapa ali amigo cangapami esforzarina cangui. Pai carashcacunatapashmi alicachina cangui (1 Tim. 6:17). Shinallata cushilla causaita Jehová Dios caranatapashmi tucui shunguhuan confiana cangui (Sal. 16:11).