CAI “tucurimui punllacunapica” ashtaca problemacunatami charinchi. Chaimi pacienciata charina minishtirishcapacha can (2 Tim. 3:1-5). Cunanbica ‘paicunalla ali cangapaj munajcuna, ninanda fiñarishcamanda ali tucungapaj na munajcuna’, paicuna munashcata ruraj gentecunami tian. Chashna gentecunaca pacienciatapash na charinllu. Chaimanda cashna tapuripashunchi: “¿Pacienciata charishcatachu ricuchijuni? ¿Cunanbi gentecunashnachu cani? Pacienciata charinaca ¿imata can? Pacienciata charichunga ¿imata ayudahuanga?” nishpa.

Pacienciata charinamanda Bibliapi parlashpaca, imapash problemata charishpa chai problema nunca na tucuringachu nishpa pensarinamandaca na parlajunllu. Chaipa randica ali causaiguta shuyanatami parlajun. Shinallata pacienciata charinaca ñucanchipillata ama pensarichun, shujcunapa minishtishcacunapi pensarichunmi ayudan. Ashtahuangarin ñucanchita nali trataj gentecunapa minishtishcacunapi pensarichun, paicunahuan ali llevarichunbashmi ayudan. Chaimi Bibliapica cashna nin, juyaimi pacienciata charichun ayudan nishpa (1 Cor. 13:4). * Ashtahuanbash pacienciata charinaca ‘Diospa espíritu santo granota fucuchinshna fucuchishca’ cualidadcunamandami can (Gál. 5:22, 23). Shinapash pacienciata charichunga ¿imata ayudanga?

Pacienciata charingapaca, Jehová Diospa espíritu santota mañashpa pai ayudanapimi confiana capanchi (Luc. 11:13). Taita Dios ñucanchita ayudangapaj ushaita charijpipash ñucanchita ayudachunga paita mañashcashnami rurana capanchi (Sal. 86:10, 11). Shinallata pacienciata charingapaca cada punllami tucui shunguhuan esforzarina capanchi. Shinapash pacienciata charingapaca ¿imatata ashtahuan rurana capanchi?

Shinallata pacienciata charingapaca Jesusmanda yachajushpa paipa chaquitami catina capanchi. Apóstol Pabloca Jesusta catijcunataca nircami: ‘Pacienciata charingapaca mushuj churajunata churajunshna churajuna canguichi’ nishpa. Shinallata nircami: ‘Casilla ali causaita [“Jesús”, NM] carashpa, cangunapa shungupi yarichijuchun’ saquipaichi nishpa (Col. 3:10, 12, 15, NM ). Chaipaca Jesús charishca feta charingapaj, Jehová Dios pai agllashca tiempopi llaquicunata tucuchinata cringapami esforzarina capanchi. Chaita crinami, ñucanchi causaipi ima pasajpipash pacienciata charishpa catishun (Juan 14:27; 16:33).

Paraíso alpagu chayamuchunmi munapanchi. Shinapash Jehová Diosca pacienciata charimandami paipa punllataca nara apamushca. Chaimi Bibliapica nin: “Unayajunmi nishpa huaquin gentecuna rimanajujpipash, Jehová Diosca paipa  nishcacunapica na unayanllu. Paica cangunapuramanda shujllapash tucuchi tucuchunga na munanllu. Ashtahuangarin arripintirichunmi munan. Chaimandami pacienciahuan shuyajun” nishpa (2 Ped. 3:9, NM ). Jehová Dios pacienciata charishcapi pensarinami, ñucanchicunapash shujcunahuan pacienciata charichun ayudan (Rom. 2:4). Shinaca ¿imacunapillata pacienciata charina capanchi?

Pihuanbash parlajushpaca paicunara parlachunmi shuyana capanchi. Shina rurashpaca pacienciata charishcatami ricuchishun (Sant. 1:19). Shinallata shuj huauqui o shuj pani ñucanchi na gushtashca costumbreta charijpi, paicunahuan culiranapa randica Jehová Dioshna, Jesushnami pacienciata charina capanchi. Paicunaca ñucanchicuna pandarishcata ricunapa randica ñucanchi ali cualidadcunata, ali gentecuna cangapaj esforzarijujtami ricun (1 Tim. 1:16; 1 Ped. 3:12).

Nalitami rurarcangui o nalitami nircangui nijpica pacienciata charinami minishtirin. Shina nijpica yangatami juchachijun nishpa ñapash culiranchiman. Shinapash Bibliapica cashnami nin: “Jariyashca yuyaihuan canapaj randica, na ñapash fiñarij yuyaita charinami ashtahuan ali. Cambaj yuyaipica, ama ñapash fiñaringuichu. Shinlli shungu runacunapaj yuyaipimi, chashna fiñarinaca tiajun” nishpa (Ecl. 7:8, 9). Jesusca paita yangata juchachijpipash na ñapash culirarcachu. Shinallatami ñucanchita yangata juchachijpica imata ninata o imata ruranata aliguta pensarina capanchi (Mat. 11:19).

Huahuacuna nalita ruranajujpi o nali munaicunata charijpica taitamamacunaca pacienciahuanmi paicunataca consejana can. Chaipaca Europa llactamanda Betelpi sirvij Mattias huauquimanda ricupashunchi. Pai joven cajpica escuelamanda cumbacunaca paipa crishcacunamandami burlarin carca. Chaimandami Bibliapa nishcacuna cierto o na cierto cashcataca ñana seguro carca. Mattias shina pasajujtaca paipa taitamamacunaca na yacharcachu. Mattiasca paipa taitata tapun carca: ¿Pita Dios can? ¿Bibliaca ciertopachachu Diospa Shimi can? Taita Dios shina mandajujtaca ¿imashinata yachanchi?  Cangunashna na crinaca ¿imamanda nali can? nishpa. Mattias shina tapujpipash paipa taitaca na culirashpa alimanmi parlan carca.

Mattiaspa taitaca ninmi: “Huaquinbica ñuca churiguca culirami nin carca: Bibliata yachajuimandami shina causajuni nishpa. Tauca viajemi paihuan parlan carcani. Shinallata paita aliguta uyashpa, pai imashina sintirishcata, imata pensashcata yachangapami tapun carcani. Huaquinbica pai imagutapash tapujpica paillata ali pensarichunmi saquin carcani. Chai jipami cutin paihuan parlan carcani. Cutin huaquinbica ñuca churihuan nara parlashpallatami ima ninata ali pensarin carcani. Cutin cutin ñuca churiguhuan parlashcamandami Jehová Dioslla mandana cashcata, Taita Dios gentecunata juyashcata, Jesús gentecunamanda huañushcata cutin cri callarirca. Tiempohuanga Jehovatapash juyai callarirca. Ñucanchi churiguta ayudashcamandaca ñucapash, ñuca huarmigupash ninandami cushijupanchi” nishpa.

Mattiaspa taitamamacunaca paipa churiguta ayudachun Jehová ayudanapimi tucui shunguhuan confian carca. Mattiaspa taitaca ninmi: “Ñucapash, ñuca huarmigupash tauca viajetami Mattiastaca nircanchi, ninanda juyaimandami Jehová Dios canda ayudachun tucui shunguhuan mañan carcanchi” nishpa. Mattiasta pacienciahuan ayudashcamanda paipa taitamamacunaca ninandami cushijun.

Ñucanchi familia o shuj amigo millai ungüita charijpi paicunata cuidangapaca pacienciata charingapami esforzarina capanchi. Cunanga Europa llactamanda Ellen paniguhuan  * ima tucushcata ricupashunchi.

Ocho huatacuna huashamanga, pani Ellenpa cusaca ishcai viajetami derrame cerebralta charimanda ni juyaita, ni cushilla caita, ni llaquilla caita na ushan. Chaica Ellen panigupaca shinllimi can. Paica ninmi: “Pacienciata charingapami Taita Diosta ninanda mañashcani. Chai llaquita aguantachunga Filipenses 4:13​mi ayudahuashca. Chaipica ninmi: Taita Dios “ushaita carajpimi, tucuita rurai ushani”” nishpa. Chai paniguca Jehovapa ayudahuanmi paipa cusata cuidai ushashca (Sal. 62:5, 6).

Jehová Diosmi shujcunamanda ashtahuan yali pacienciata charin (2 Ped. 3:15). Jehová Dios pacienciata charishcatami Bibliapica yachajupanchi (Neh. 9:30; Is. 30:18). Abrahanhuan ima tucushcata ricupashunchi. Sodoma llactata tucuchigrini nishpami Jehová Diosca Abrahanmanga villarca. Abrahanga cutin cutinmi Jehovata tapujurcalla. Shina tapujujpipash Jehová Diosca pacienciahuanmi paitaca uyarca. Chaimi Jehová Diosca cashna nirca, Sodoma llactapi chunga ali gentecuna tiajpica chai llactataca na tucuchishachu nishpa (Gén. 18:22-33). Jehová Diosca na ñapash culirashpami gentecunataca siempre uyan.

Imashinami ricupanchi Jehovata sirvijcunapaca pacienciata charinaca minishtirishcapachami can. Ñucanchicuna pacienciata charingapaj esforzarishpaca Jehová Diostami jatunyachipashun. Shinallata ‘Dios carasha nishcacunata crishpa, na ñapash fiñarishpa shuyashpa japijcunami’ cashun (Heb. 6:10-12).