1, 2. a) Apóstol Pablo Hebreos librota escribijuj horasca Judea llactapica ¿imata pasajurca? b) ¿Ima horata Hebreos librotaca cristiano judiocunaca chasquirca?

 JESÚS huañushca jipaca cristiano judiocunaca ashtaca huatacunatami llaquicunata charirca. Jerusalenbi mushuj congregación tiai callarishcapimi huauquipanicunataca ninanda catiriashpa llaquichinajurca (Hech. 8:1). Más o menos 20 huatacuna jipaca chai llactapi yarjai tiashcamandami judío cristianocunaca pobre, culqui illa quidarca (Hech. 11:​27-30). Shinapash más o menos huata 61​pica judío cristianocunaca ñana yapata llaquichi tucunajujpimi ashata tranquilo causanajurca. Shinapash paicunataca ñallami cutin ashtahuan catiriashpa llaquichigrinajurca. Paicuna tranquilo causanajuj tiempopimi apóstol Pablomandaca Hebreos librota chasquirca. Chai libroca paicunataca jipamanga ninandami ayudagrijurca.

² Cristiano judiocunaca Hebreos librotaca nara llaqui tiempo chayamujpillatami chasquirca. Apóstol Pabloca cristiano judiocuna llaquicunata aguantachunmi cai consejocunataca curca. Porque Jesusca paipa catijcunamanga Jerusalenda y templo huasipash tucuchi tucugrijushcatami villashca carca (Luc. 21:20). Pablopash, Judea llactamanda cristianocunapash chai llaquicuna ima punllapacha pasanataca na yacharcachu. Shinapash chai tiempopi cristianocunaca chai llaquicuna nara chayamujpillatami paicunapa feta shinlliyachingapaj, aguantashpa catingapaj y preparado cangapapash chai tiempota aprovechana carca (Heb. 10:25; 12:​1, 2).

3. Hebreos libroca ¿imashinata ñucanchicunatapash ayudaita ushan?

 ³ Cristiano judiocunaca ashtaca llaquicunatami chimbapurana tucurca. Shinapash ñucanchicunaca ñallami paicuna charishca llaquicunata yali ashtahuan llaquicunata charipashun (Mat. 24:21; Apoc. 16:​14, 16). Jehová Dios cristiano judiocunaman cushca consejocunaca ñucanchicunatapashmi ayudaita ushan. Chai consejocunamanda huaquingunata ricupashunchi.

‘ASHTAHUAN ALIPACHA YACHAJUSHPAMI ÑAUPAMAN CATINA CAPANCHI’

4. Cristiano judiocunapaca ¿imamandata cambiocunata ruranaca difícil carca? (Dibujota ricupangui).

⁴ Apóstol Pabloca judío religionda saquishca judío cristianocunamanmi Hebreos librotaca escribirca. Judiocunapaca cristiano tucunaca na facilchu cashca carca. Shinapash judiocunaca Jehová Diospa agllashca llactami carca. Jerusalenbica ashtaca huatacunatami Jehová Dios agllashca reycuna mandanajurca. Shinallata chaipica templo huasipashmi tiarca. Chaimandami Jerusalenga importante pushtu carca. Tucui judiocunami Moisesman Cushca Leyta cazun carca. Shinallata ñaupaman pushaj mandajcunapa yachachishcacunatapashmi catin carca. Paicunaca imata micunata, circuncisionda ruranata o na ruranata, shinallata shuj llactamanda gentecunata imashina tratana cashcataca alimi yacharca. Jesús huañushcamandaca judiocunapa sacrificiocunataca ñana Jehová Diosca templopica chasquijurcachu. Moisesman Cushca Leyta catishpa causaj judiocunapaca cristianocuna tucushpa chai Leycunata huashaman saquinaca dificilmi cashcanga (Heb. 10:​1, 4, 10). Shinallata apóstol Pedropapashmi chai cambiocunata chasquinaca difícil carca (Hech. 10:​9-14; Gál. 2:​11-14). Shinallata ñaupaman pushaj judiocunaca chairalla cristiano tucushcacunatami paicunapa crishcacunamanda catiriashpa llaquichi callarirca.

5. ¿Picunata judío cristianocunapa contra carca?

⁵ Ishcai laya grupocunami judío cristianocunapa contra shayarirca. Shuj grupoca judiocunata ñaupaman pushajcunami carca. Chaishuj grupoca catiriashpa llaquichij tucunata manllaimandami Moisesman Cushca Leyta catinchi  nishca cristianocuna carca (Gál. 6:12). Shinaca Jehová Diosta cazuchunga cristiano judiocunataca ¿imata ayudarca?

6. Apóstol Pabloca cristiano judiocunataca ¿imata rurachunda animarca? (Hebreos 5:​14–6:1).

⁶ Apóstol Pabloca judío cristianocunataca Bibliata liichun y liishcapi pensarichunmi animarca (Hebreos 5:​14–6:1​ta liipangui). Apóstol Pabloca Escrituras Hebreasta utilizashpami cristianocuna, judiocunata yali ashtahuan Diosta ali adorajushcata intindichirca. a Apóstol Pabloca cristianocunallata Bibliata ashtahuan aliguta intindishpaca panda yachachishcacuna maijan cashcata cuenta japichun, shinallata Jehová Diospa mandashcacunamanda ama caruyachun ayudagrijushcataca alimi yacharca.

7. Testigo de Jehovacunaca ¿ima jarcaicunatata chimbapurana capanchi?

⁷ Cunan punllacunapipashmi Jehová Diospa yachachishcacunamandaca panda informaciongunata yachachij gentecuna tian. Y paicunaca Jehová Diospa yachachishcacunahuanga na de acuerdo canllu. Huaquin gentecunaca testigo de Jehovacunaca Jehová Diospa mandashcacunata cazuimandami relaciones sexualesmanda charishca yuyaicunaca yapa exageradomi can nishpa yuyan. Cai mundopi gentecunaca paicunapa ruraicunahuan, pensamientocunahuanga na Jehová Dioshna pensajtami ricuchin (Prov. 17:15). Chaimandami panda yachachishcacuna maijan cashcata cuenta japingapaca Bibliata aliguta estudiashpa catina capanchi. Shina rurashpami Jehová Diosmandaca na caruyashun (Heb. 13:9).

8. ¿Imashinata espiritualmente ñaupaman catita ushapanchi?

⁸ Apóstol Pabloca judío cristianocunataca espiritualmente ñaupaman catichunmi animarca. Ñucanchicunapashmi espiritualmente ñaupaman catingapaj esforzarina capanchi. Chaipaca ñucanchicunaca Bibliata estudiashpami Jehová Dios pensanshna pensangapaj esforzarina capanchi. Bautizarishca jipapashmi Bibliata estudiashpa Jehová Dios pensanshna pensashpa catingapaj esforzarina capanchi. Shinaca chairalla o ashtaca tiempota bautizarishca cashpapashmi ñucanchicunaca Bibliata cada punlla liishpa, estudiana capanchi (Sal. 1:2). Estudio personalta rurangapaj shuj ali horariota charishpa y chai horariota pactachishpaca, apóstol Pablo nishcashnami shinlli feta charipashun (Heb. 11:​1, 6).

TUCUI SHUNGU CRISHPAMI SALVARITA USHASHUN

9. Cristiano judiocunaca ¿imamandata shinlli feta charina carca?

⁹ Cristiano judiocunaca llaqui tiempocunata aguantangapaca shinlli feta charinatami minishtigrinajurca (Heb. 10:​37-39). Jesusca paipa catijcunataca Jerusalén llactata soldadocuna muyuria shayanajujta ricushpaca urcucunapi pacajungapaj richunmi mandarca. Cai consejocunaca Jerusalén llactapi causaj cristianocunapa y canllapi causaj cristianocunapami carca (Luc. 21:​20-24). Chai tiempocunapica soldadocuna llaquichijpica gentecunaca pircacunata charij llactacunapimi pacajungapaj rina carca. Chaimandami judiocunapaca urcucunaman pacajungapaj rina nalishna ricurijpipash shinlli feta charishcata ricuchina carca.

10. Cristiano judiocunaca ¿imatata rurana carca? (Hebreos 13:17).

¹⁰ Chai tiempopi cristiano judiocunaca Jehová Dios congregacionda ñaupaman pushachun churashca huauquicunapimi confiana carca. Ñaupaman pushaj huauquicunami cristiano  judiocunamanga imata ruranata y maiman rina instrucciongunataca cushcanga (Hebreos 13:17​ta liipangui). Apóstol Pabloca huauquipanicunataca ‘ñaupaman pushajcunata cazunami canguichi’ nishpaca na paicunata obligacionmandalla cazuna cashcataca ningapaj munarcachu. Sino paicunapi confiashcata ricuchimanda cazuna cashcatami ningapaj munarca. Cristianocunaca llaqui tiempocuna nara chayamujpillatami ñaupaman pushajcunapi confianata yachajuna carca. Shinaca cristiano judiocunaca imapash nara pasajpillata ancianocunata cazushpaca llaqui tiempopi cazunaca ashtahuan facilmi ricurina carca.

11. ¿Imamandata shinlli feta charinata minishtipanchi?

¹¹ Cazuj judío cristianocunashnami ñucanchicunapash shinlli feta charingapaj munapanchi. Cunanbi gentecunaca Taita Diospa punlla ñallami chayamunga nijpica na crinllu. Shinallata ñucanchicuna chaicunapi crishcamandami gentecunaca ñucanchicunamanda burlarin (2 Ped. 3:​3, 4). Shinallata Bibliapica ninan manllanai llaqui tiempocuna chayamujpi imacunalla pasanatami yachachin. Shinapash ñucanchicunaca na tucuita cabal yachapanchichu. Jehová Diosca paipa punllataca ña agllashcallami charin. Y chai punllapi Jehová Dios ñucanchicunata cuidanata seguro cangapaca shinlli fetami charina capanchi (Hab. 2:3).

12. Ninan manllanai llaqui tiempo chayamujpi salvarichunga ¿imata ayudanga?

¹² Cunan tiempopipash Jehová Diosca ‘aliguta cazushpa, aliguta pensarishpa sirvij esclavotami’ ñucanchicunata ñaupaman pushangapaca utilizajun. Chaimandami paicunapi confiana capanchi (Mat. 24:45). Cristiano judiocunaca, romano soldadocuna chayamujpica huaquin instrucciongunatami chasquirca. Ñucanchicunapashmi ninan manllanai llaqui tiempo callarijpica instrucciongunata chasquipashun. Cunanmandallatami Jehová Dios ñaupaman pushachun churashca huauquicunapi confianata yachajuna capanchi. Ñaupaman pushaj huauquicunata na cazushpa y paicunapi na confiashpaca ninan manllanai llaqui tiempo chayamujpica paicuna cushca instrucciongunata cazunaca ashtahuan dificilmi canga.

13. Cristiano judiocunaca ¿imamandata Hebreos 13:5​pi consejotaca cazuna carca?

¹³ Cristiano judiocunaca Jerusalenmanda llujshina tiempocamanga minishtirishca cosascunahuanllami causana carca. Shinallata ‘ashtahuan culquita charina munaimandapashmi’ cuidarina carca (Hebreos 13:5​ta liipangui). Huaquingunaca pobre pobre caimandami micunagutapash na charirca (Heb. 10:​32-34). Huaquin tiempotami cristianocunaca Jehová Diosta cazuimanda llaquicunata aguantashpa causanajurca. Shinapash tiempohuanga huaquin cristianocunaca seguro causangapaj y pobre canata saquingapami ashtahuan culquita charinapi concentrarirca. Shinapash Jerusalén ñalla tucuchi tucugrijujpimi paicuna charishca culquica na paicunapa causaitaca salvagrita ushagrijurca (Sant. 5:3). Culquita juyajcunapaca Jerusalenmanda llujshina y paipa cosascunata saquinaca ashtahuan dificilmi cagrijurca.

14. Shinlli feta charishpaca ¿imashina causanatata dicidipashun?

¹⁴ Jehová Diospa punlla ñalla shamunapi crishpaca, ashtaca cosascunata y culquita charina munaipica na urmashunllu. Porque ninan manllanai llaqui tiempopica culquipash y ñucanchi charishca cosascunapash imapapash na valingachu. Bibliapica “Mandaj Dios ninanda fiñashpa llaquichijui punllapica, paicunapaj culquipash, oropash na quishpichi ushangachu” ninmi. Chaimandami gentecunaca “paicunapa culquitapash ñangunapimi shitanajunga” nin (Ezeq. 7:19). Ashtaca ashtaca cosascunata o culquita charinapi pensarinapa randica minishtirishca cosascunahuanlla causangapami dicidina capanchi. Na yangamanda dibi tucunachu capanchi. Shinallata ñucanchi  charishca cosascunapi yapata ocuparishpaca Jehová Diosta sirvingapaca na tiempota charipashunllu. Shinallata ñucanchi causaipi ñucanchi charishca cosascuna ashtahuan importante cachunga na saquinachu capanchi (Mat. 6:​19, 24). Jehová Diospa punlla chayamungacamanga ñucanchi cosascunapi confianapa randica Jehová Diospi confiashcatami ricuchina capanchi.

‘AGUANTASHPAMI CATINA CAPANGUICHI’

15. Cristianocunaca ¿imamandata aguantashpa catina carca?

¹⁵ Cristiano judiocunaca, Judea llactapi ashtahuan ashtahuan llaquicuna mirajujpica shinlli feta charishpa y aguantashpami catina carca (Heb. 10:36). Shinapash huaquin judío cristianocunaca ñami catiriashpa llaquichijpi, llaquicunata aguantana tucurca. Cutin shuj cristiano judiocunaca chai llaquicunataca na charishcarcachu. Chaimandami apóstol Pabloca cristiano judiocunataca ashtahuanmi catiriashpa llaquichinga nishpa advirtirca. Shinallata Jesús shinami Taita Diostaca huañungacaman cazuna canguichi nirca (Heb. 12:4). Ashtaca judiocunaca, cristiano judiocuna miranajujta ricushpami ninanda culirashpa llaquichingapaj munanajurca. Huaquin huatacuna huashamanga Pablo Jerusalenbi predicajujpica shuj grupo gentecunami paitaca llaquichirca. 40 yali judiocunaca “juramentushpami Pablota huañuchingacamanga nimata na micushunllu, nimata na ufiashunllu ninajurca” (Hech. 22:22; 23:​12-14). Cristiano judiocunataca ashtaca gentecunami na ricunayachirca. Shinapash paicunaca tandanajushpa, predicashpa y shinlli feta charishpami catina carca.

16. Llaquicunata aguantashpaca ¿ima beneficiocunatata chari ushapanchi? (Hebreos 12:7).

¹⁶ Cristiano judiocunataca catiriashpa llaquichijpica aguantashpa catingapaca ¿imata ayudagrijurca? Pabloca cristiano judiocuna llaquicunata aguantashpa ima beneficiocunatalla chari ushana cashcataca alimi yacharca. Chaimandami apóstol Pabloca cristiano judiocunamanga Taita Dios llaquicunata charichun saquishpaca ashtahuan ali cristianocuna tucuchunmi ayudan  nirca (Hebreos 12:7​ta liipangui). Chaimandami judío cristianocunaca llaquicunata charishpaca chai llaquicuna ali cualidadcunata charichun ayudagrijushcata ricuna carca. Shinaca llaquicunata aguantajpi imashina beneficiarinata yachashpaca cristiano judiocunapaca llaquicunata aguantanaca ashtahuan facilmi cagrijurca (Heb. 12:11).

17. Apóstol Pabloca catiriashpa llaquichijpi aguantanamandaca ¿imatata yacharca?

¹⁷ Apóstol Pabloca catiriashpa llaquichina ima cashcata ali yachaimandami cristiano judiocunataca aguantashpa catichun animarca. ¿Imamandata shina nipanchi? Pundapica apóstol Pabloca cristianocunatami catiriashpa llaquichin carca. Shinallata apóstol Pablo cristiano tucujpica paitapashmi catiriashpa llaquichirca. Chai experienciacunata paipa causaipi charimandami huauquipanicunataca animaita usharca (2 Cor. 11:​23-25). Apóstol Pabloca llaquicunata aguantangapaj Jehová Diospi confiana cashcataca alimi yacharca. Chaimandami apóstol Pabloca: “Jehová Diosmi ñucataca ayudahuanga. Ñucaca na manllashachu” nirca (Heb. 13:6).

18. Tucui cristianocunaca ¿imatata yaipi charina capanchi?

¹⁸ Cunanbi ñucanchi huauquipanicunapashmi catiriashpa llaquichijpi aguantashpa catinajun. Ñucanchicunaca paicunamanda imagutapash rurashpa, paicunamanda mañashpami paicunata juyashcataca ricuchi ushapanchi (Heb. 10:33). Bibliapica: “Jesushuan shujllashna tucushpa Taita Diosta tucui shunguhuan sirvishpa causangapaj munajcunaca, tucuicunami catiriashpa llaquichi tucunga” nijunmi (2 Tim. 3:12). Tucuicunallatami llaqui tiempo nara chayamujpillata preparado cana capanchi. Ima llaquicuna ricurijpipash chai llaquicunata aguantachun Jehová Dios ayudanapica tucui shungumi confiana capanchi. Jehová Diosmi paipa sirvijcunamanga paicuna minishtijuj horaspipacha tranquilo, ali sintirichun ayudanga (2 Tes. 1:​7, 8).

19. Ninan manllanai llaqui tiempo nara chayamujpica ¿imatata rurana capanchi? (Dibujota ricupangui).

¹⁹ Apóstol Pablo cristiano judiocunaman escribishca libroca catiriashpa llaquichij tucugrinajuj cristianocunataca ashtacatami ayudarianga. Apóstol Pabloca panda yachachishcacuna maijan cashcata cuenta japichun y Jehová Diosmanda ama caruyachunga Bibliatami aliguta yachajuna canguichi nishpami animarca. Ashtahuangarin Jesuspa y congregacionda ñaupaman pushaj huauquicunapa instrucciongunata catingapami shinlli feta charina canguichi nirca. Shinallata ali cristianocuna caita ushangapaca llaquicunata aguantana cashcatapashmi nirca. Shinaca apóstol Pablo cushca consejocunata ñucanchi causaipi pactachishpaca llaquicunapi cashpapash Jehová Diostaca tucui shunguhuanmi sirvita ushapashun (Heb. 3:14).