1, 2. Sadocca ¿pita carca? (1 Crónicas 12:​22, 26-28).

 ISRAEL llactata David mandachun munaimandami paita reyta rurangapaca más de 340 mil gentecuna tandanajurca. Hebrón llactapica quimsa punllatami paicunaca tandanajushca carca. Y chaipica paicunapa parlashcacuna, candashcacunaca bullami uyarijurca (1 Crón. 12:39). Chai ashtaca gentecunapurapica Sadoc shuti jovenbashmi carca. Gentecunapa ñaupapi pai na rijsishca cajpipash Jehová Diospa ñaupapica rijsishcami ricurirca. Chaimandami ñucanchicunapash paimanda yachachun escribichishpa saquishca (1 Crónicas 12:​22, 26-28​ta liipangui). Shinaca Sadoc joven pi cashcata ricupashunchi.

² Sadoc runaguca sacerdotemi carca. Paica sumo sacerdote Abiatarhuanmi trabajan carca. Ashtahuanbash paimanga Jehová Diosca ali yachaita y paipa voluntadta ali intindina ushaitapashmi cararca (2 Sam 15:27). Sadoc ali consejocunata cunata yachajpimi gentecunaca paipa ayudata mascan carca. Shinallata paica na manllaj runagumi carca. Y cai temapica Sadoc runagu na manllaj cashcamandami ashtahuan parlapashun.

 3. a) ¿Imamandata na manllana capanchi? b) Cai temapica ¿imatata ricupashun?

³ Cai último punllacunapica Diabloca Jehovata sirvijcunata ashtahuanmi llaquichijushca (1 Ped. 5:8). Pero Diablota y nali ruraicunata Jehová Dios tucuchingacamanmi na manllashpa Jehová Diosta shuyana capanchi (Sal. 31:24). Cai temapica Sadoc runagupa ejemplota imashina catinata quimsa yuyaicunapi ricupashun.

JEHOVÁ DIOSPA GOBIERNOTA APOYAPASHUNCHI

 4. Jehová Diospa Gobiernotalla apoyangapaca ¿imamandata na manllana capanchi? (Fotota ricupangui).

⁴ Jehová Diosta sirvijcunaca Jehová Diospa Gobiernota tucui shunguhuan apoyangapami esforzaripanchi. Pero chaipaca na manllajcuna cashcata ricuchinami minishtirin (Mat. 6:33). Por  ejemplo, cai nali mundopi causanajuimandami Jehová Diospa mandashcata cazungapaj y paipa gobiernomanda gentecunaman predicangapaca na manllajcuna canata minishtipanchi (1 Tes. 2:2). Shinallata cai mundopa politicacunapi na chapuringapapashmi ninanda esforzarinchi (Juan 18:36). Ashtahuanbash ashtaca testigo de Jehovacunami política cosascunapi na chapurishcamanda y guerraman na rishcamanda ninanda llaquichi tucushca. Shujcunacarin carcelpipashmi churai tucushca.

 5. Davidta apoyangapaca Sadoc runaguca ¿imamandata na manllaj cashcata ricuchina carca?

⁵ Sadoc runaguca, David rey tucujpi celebrangapallaca na chaipi carcachu. Sino guerrapi macanajungapapash preparadomi carca (1 Crón. 12:38). David maiman macanajungapaj rijpipash cumbashpa ringapaj listomi carca. Ashtahuanbash Israel llactata contracunamanda difindingapapash listomi carca. Sadoc runagu macanajungapaj experienciata na charishpapash na manllaj runagumi carca.

 6. Davidca ¿imashinata Sadocmanga na manllaj canataca yachachirca? (Salmo 138:3).

⁶ Sadoc runagu na manllaj cachunga ¿imata ayudarca? Sadoc runagutaca chai tiempopi Jehovata sirvij runagucunapa ejemplocunami ama manllachun ayudarca. Por ejemplo, Davidca guerracunapi macanajungapaca na manllashpami israelitacunataca ñaupaman pushan carca. Chaimandami paicunaca David rey tucuchunga de acuerdo carca (1 Crón. 11:​1, 2). Davidca, contracuna catiriashpa llaquichingapaj mascanajujpica Jehová Diospa ayudatami mascarca (Sal. 28:7; Salmo 138:3​ta liipangui). Sadoc runaguca 22 soldadocunapa ejemplota charirca. Shinallata Jehoiadapa ejemplota y paipa churi Benayapa ejemplotapashmi catirca (1 Crón. 11:​22-25; 12:​26-28). Paicunaca Davidta apoyangapaca decididomi carca.

 7. a) Cunan punllacunapica ¿picunapa ejemplota ama manllachun ayudan? b) Videopi llujshishca huauqui Nsilumandaca ¿imatata yachajupanchi?

⁷ Jehová Diosta ali sirvijcunapa ejemplomanda yachajunami ñucanchicuna na manllaj cachun  ayudanga. Jesucristoca cai mundopi política cosascunahuanga chapuringapaca nimamanda na munarcachu (Mat. 4:​8-11; Juan 6:​14, 15). Jesusca siempre Jehovapi confiaimandami paipa ayudataca mañan carca. Cunan punllacunapipashmi huaquin jovengunapa ali ejemplota charipanchi. Por ejemplo ejercitoman ama ringapaj y política cosascunapi ama chapuringapami decidishca. Cai experienciacunamandaca jw.org paginapi mascaita ushapangui. a

HUAUQUIPANICUNATA AYUDAPASHUNCHI

 8. ¿Ima situaciongunapica ancianocunaca na manllaj canataca minishtin?

⁸ Tucui testigo de Jehovacunami randimanda ayudarinataca ninanda gushtan (2 Cor. 8:4). Shinapash huaquinbica na manllaj canami minishtirin. Por ejemplo guerra callarijpica ancianocunaca huauquipanicuna animota minishtijta, shinallata espiritualmente ali cachun publicaciongunata apanata y minishtirishca cosasgucunata apanataca alimi yachan. Ancianocunaca huauquipanicunata juyaimandami imata minishtishcagutaca peligroso cajpipash apangapaj dispuesto can (Juan 15:​12, 13). Shinami Sadoc runagushna na manllajcuna cashcataca ricuchinajun.

 9. 2 Samuel 15:​27-29​pi ricushca shinaca Davidca ¿imata rurachunda Sadoctaca mandarca? (Dibujota ricupangui).

⁹ Davidpa causaica peligropimi carca. Paipa churi Absalonmi Davidpa randi rey tucungapaj decidido carca (2 Sam 15:​12, 13). Davidca Jerusalenmanda ucha pacajushpa rinami tucurca. Chaimandami paipa sirvijcunamanga: ‘Jatarishpa pacajungapaj jacuchi sinoca Absalón runapa ñaupamandaca na pacajushpa ri usharingachu’ nircami (2 Sam 15:14). Ña rijushpaca Davidca Absalón runa imatalla rurangapaj munajushcata chayangapami pipash Jerusalenbi quedana cashcatami cuenta japirca. Chaimandami Sadocta y chaishuj sacerdotecunatapash Jerusalenman tigrachun cacharca (2 Samuel 15:​27-29​ta liipangui). Davidpa mandashcata pactachina  peligroso cashcamandami ninan cuidadota charina carca. Absalonga nalipacha jarimi carca. Chaimi paipa propio taitatallata traicionarca. Shinaca Absalonda chapachun David cachashcata cuenta japishpaca ¿imatashi Absalonga ruranman carca?

10. Sadoc y sacerdotecunaca ¿imashinata Davidpa causaitaca salvaita usharca?

¹⁰ Davidca Absalón runata umachingapaj munaimandami Sadoc y Husái runaguta utilizarca (2 Sam 15:​32-37). Chaimi Husaica Davidpa instrucciongunata catimanda Absalón runapa confianzata ganarca. Husái runagu Absalonda umachingapaj munashpami Davidta imashina atacanata consejarca. Shinami Davidpash macanajungapaj prepararita usharca. Jipaca Husaica Absalón runa imata rurangapaj munashcatami Sadocman y Abiatarman villarca (2 Sam 17:​8-16). Chaimi Sadoc y Abiatarca Davidman villaita usharca (2 Sam 17:17). Jehovapa ayudahuan, shinallata sacerdotecunapa ayudahuan y Sadocpa ayudahuanmi Davidpa causaitaca salvaita usharca (2 Sam 17:​21, 22).

11. Ñucanchi huauquipanicunata ayudana cashpaca ¿imashinata Sadocpa ejemplota catita ushapanchi?

¹¹ Ñucanchi huauquipanicuna peligropi cajpica ¿imashinata Sadocpa ejemplota catita ushapanchi? 1) Chaipaca Jehovapa instrucciongunata catina capanchi. Llaquicunapi cashpaca sucursalmanda huauquicunapa mandashcacunatami cazuna capanchi. Shinami huauquipanicunahuan unido caitapash ushapashun (Heb. 13:17). Ancianocunaca narapash llaquicuna chayamujpillatami huauquipanicunata imashna ayudanata yachangapaca sucursalmanda cushca instrucciongunataca ali ali yachana can. Shinami huauquipanicunataca ayudaita ushapanga (1 Cor. 14:​33, 40). 2) Na manllashpa catipashunchi. Imapash peligroso situaciongunapi cashpaca nara imata rurashpallatami ali ali pensarina capangui (Prov. 22:3). 3) Jehovapi confiana capanchi. Shinallata Jehová Diosca tucuicuna ali cachun munaimandami tucuicunamanda preocuparin. Jehová Diosca ñucanchi huauquipanicunata ayudai ushachunmi ñucanchitaca ayudajun.

12, 13. Viktorpa y Vitalipa ejemplomanda ¿imatata yachajui ushapanchi? (Fotota ricupangui).

 ¹² Cunanga Víktor y Vitali ishcai ancianocuna imata rurashcata ricupashun. Paicunaca Ucrania llactapi caimandami huauquipanicunaman yacuta, micunaguta yalichishpa ayudarca. Víktor huauquiguca ninmi: “Huauquipanicunaman micunaguta yalichingapaj mascanajuj horascunaca ashtaca disparocunami uyarin carca. Shuj huauquiguca pai charishca micunaguta carashpa ayudajpimi ñucanchi huauquipanicunaca huaquin punllacunapa micunaguta charirca. Micunacunata vitsicachinajuj horaspipachami ñucanchimanda 20 metroscunata shuj misil nishca urmamurca. Pero antsicarin na tujyarcachu. Jehová Diostaca huauquipanicunata ayudashpa catingapaj fuerzata carahuai nishpami ninanda mañarcani”.

¹³ Vitali huauquiguca cashnami nin: “Huauquipanicunata ayudangapaca 12 horascunatami viajana tucurcani. Chaita pactachingapaca Jehová Diosta mañashpandimi rircani” ninmi. Vitali huauquigu na manllashcata ricuchina cashpapash ninandami cuidarina carca. Shinallata huauquiguca: “Aliguta pensarishpa imagutapash rurangapami Jehovapa ayudata mañarcani. Shinallata ñucaca gobierno autorizashca pushtucunatallami rircani. Huauquipanicuna tucuilla unidos trabajanajujta ricushpami ñuca feca ashtahuan shinlliyarca. Chaipi cashca huauquipanicunaca shuj huauquipanicunaman micunaguta apachunmi carroman vitsijachishpa ñapash ayudarca. Shinallata ñucanchita paicunapa huasipi mingachishpa micunagutapashmi cararca” nircami.

JEHOVATA SIRVISHPA CATIPANGUI

14. Ñucanchi juyashca persona Jehovata saquijpica ¿imashinata sintiripanchi?

¹⁴ Shuj familia o shuj amigo Jehovata sirvinata saquijpica ninandami llaquiripanchi (Sal. 78:40; Prov. 24:10). Chai huauquihuan o panihuan alipacha amigo cashca cashpacarin ashtahuanbachami llaquirinchi. Shina situacionda quiquin yalishca cashpaca Sadocpa ejemplomi quiquindaca ninanda ayudapanga.

15. Sadocca ¿imamandata Jehovata sirvishpa catingapaca fuerzata minishtirca? (1 Reyes 1:​5-8).

¹⁵ David mandajuj tiempopica Sadoc runagupa amigo Abiatar Jehová Diosta sirvinata saquijpipash Sadocca Jehová Diosta sirvishpami catirca. David ña rucugu cajpimi paipa churi Adoniasca paipa gobiernota quichungapami munarca. Pero Jehová Diosca Salomón runagu mandachunmi munarca (1 Crón. 22:​9, 10). Adonías Davidpa gobiernota quichungapaj munajushcamandami Abiatarca paitaca apoyarca (1 Reyes 1:​5-8​ta liipangui). Shina rurashcamandami Abiatarca Jehová Diosta y Davidtapash traicionashcata ricuchirca. Abiatar runa shina rurajujta ricushpaca Sadoc runaguca de seguromi ninandapacha llaquirishcanga. Porque paihuanga más de 40 huatacunatami ishcandi trabajashcarca (2 Sam 8:17). Pundaca Sadoc runaguca Abiatarhuanmi “Taita Diospaj arcata” cuidan cashcarca (2 Sam 15:29). Shinallata Davidta apoyashpa y Jehovatapash ishcandillatami sirvin cashcarca (2 Sam 19:​11-14).

16. Sadoc runagu Jehovata sirvishpa catichunga ¿pipa ejemplocunata ayudarca?

¹⁶ Abiatar runa Jehová Diosta sirvinata saquinata decidijpipash Sadoc runaguca Jehová Diosta sirvishpa catinatami decidirca. Chaimandami Davidca Sadoc runagu paita na saquishpa ayudanataca seguro carca. David paipa churi Adonías imata ruragrijujta yachai chayashpaca Sadocpa, Natanba y Benayapa ayudatami mascarca. Shinami Salomón runagutaca rey tucuchun ayudarca (1 Rey. 1:​32-34). Natán runaguca Jehová Diosta ali sirvij runagumi carca. Shinallata Davidtapash tucuipi apoyangapami esforzarirca. Cashna ejemplocunami Sadoctaca ninanda animarca (1 Rey. 1:​38, 39). Salomón runagu rey tucushpaca Abiatar runapa randimi Sadocta sumo sacerdote cachun churarca (1 Rey. 2:35).

17. Shuj juyashca persona Jehovata sirvinata saquijpica ¿imashinata Sadocpa ejemploca ayudanga?

 ¹⁷ ¿Imashinata Sadocpa ejemplota cati ushapangui? Shuj juyashca persona Jehová Diosta saquijpipash quiquinga Jehová Diosta juyaimanda paita na saquishpa sirvishpa catingapami decidido cana capangui (Jos. 24:15). Jehová Diosca paita sirvishpa catichunga paillatami ñucanchimanga fuerzata cushpa ayudanga. Ashtahuanbash Jehovata mañashpa y huauquipanicunamanda ama caruyangapami esforzarina capangui. Jehová Diosta na saquishpa sirvijpica paica bendiciangami (2 Sam 22:26).

18. Marco y Sidse cusahuarmigumandaca ¿imatata yachajupanchi?

¹⁸ Cunanga Marco y Sidse cusahuarmigucunamanda parlapashun. Paicunapa ushicuna viñashpaca Jehová Diosta sirvinataca saquirca. Huauquiguca ninmi: “Huahuacuna nacirishca punllamandapachami paicunataca ninanda juyai callarinchi. Paicunata cuidangapaca ninandami esforzarinchi. Chaimandami Jehová Diosta sirvinata saquijpica ninandapachami llaquiripanchi”. Huauquiguca ninbashmi: “Jehová Diosca ñucanchita ayudangapaca siempremi listo cashca. Ñuca desanimado cajpica Jehová Diosca ñuca huarmiguhuanmi animahuashca. Shinallata ñuca huarmigu Sidse desanimada cajpica ñucami ayudaita ushapashcani”. Paniguca ninmi: “Jehová aguantachun ayudashcamandallami aguantashpa ñaupaman catita ushashcanchi. Ñuca culpamandami ñuca ushicunaca Jehovata sirvinata saquirca yashpa pensaimandami nalipacha sintirircani. Shina sintirijuimandami ñuca imashina sintirijushcataca Jehová Diosman villashpa mañarcani. Asha tiempo jipallami huaquin huatacunata na ricushca shuj ñañagu ñucapaman quimirimushpami juyaihuan ñucataca: ‘Na canba culpa canllu’ nihuarcami. Jehová Diospa ayudahuanllami paitaca cushilla sirvishpa catita ushajushcani”.

19. ¿Imata rurangapata munapangui?

¹⁹ Jehová Diosca tucui paita sirvijcuna Sadoc runagupa ejemplota catichunmi munan (2 Tim. 1:7). Ñucanchi ushashcacunapilla confianapa randica Jehová Diosca paipi tucui shungu confiachunmi munan. Chaimandami imapash llaquicunata o problemacunata charishpaca Jehová Diospa ayudatami siempre mañana capangui. Shinaca Sadoc runagushna ama manllachunga Jehová Dios, quiquinda ayudanataca seguromi caita ushapangui (1 Ped. 5:10).