1. Jehovapa cabal yachachishcacunamandaca ¿imatata yuyapangui?

 TUCUI Jehová Diosta sirvijcunaca Jehovapa cabal yachachishcacunataca ninandami juyapanchi. Jehovapa cabal yachachishcacunata yachajuimandami shinlli feta chari ushashcanchi (Rom. 10:17). Jehová Diosca congregaciongunataca paipa cabal yachachishcacunata yachajuchunmi shuj ‘pilartashna’ churashpa saquishca (1 Tim. 3:15). Chaimandami congregacionbi ñaupaman pushajcunata cazungapaj esforzaripanchi. Paicunaca Bibliapa cabal yachachishcacunata aliguta yachachishpa, instrucciongunata cushpami Jehová Diospa voluntadta aliguta pactachichun ayudanajun (Heb. 13:17).

 2. Santiago 5:19​pi nishcashnaca Jehová Diosta sirvijcunaca ¿ima peligropita caita ushapanchi?

² Jehovapa cabal yachachishcacunata yachajushca cashpa y Jehovapa organizacionbi instrucciongunata catina cashcata ali yachashpapash ñucanchicunaca Jehovapa cabal yachachishcacunamanda caruyana peligropimi caita ushapanchi (Santiago 5:19​ta liipangui). Diabloca ñucanchicuna Bibliapi y Jehovapa organización cushca instrucciongunapi confianata saquijpica ninandami cushijunman (Efes. 4:14).

 3. ¿Imamandata Jehovapa cabal yachachishcacunata yachajuna capanchi? (Efesios 6:​13, 14).

³ (Efesios 6:​13, 14​ta liipangui). Ashtaca llactacuna Jehová Diospa contra tucuchunga Diabloca ñallami imapash llullacunata ni callaringa (Apoc. 16:​13, 14). Shinallata Diablo Jehovapa sirvijcunata umachingapaj imacunatapash ashtahuan ruranataca alimi yachapanchi (Apoc. 12:9). Chaimandami ima cabal cashcata y ima llulla cashcataca aliguta yachajuna capanchi (Rom. 6:17;  1 Ped. 1:22). Ima cabal cashcata ali yachajushpallami Ninan Manllanai Llaqui Tiempocunamandaca salvarita ushapashun.

 4. Cai temapica ¿imatata yachajupashun?

⁴ Cai temapica Bibliamanda cabal yachachishcacuna maijan cajta yachangapaj y Jehovapa organización cushca instrucciongunata catingapaj ishcai cualidadcunata minishtishcatami yachajupashun. Shinallata Jehovapa cabal yachachishcacunamanda ama caruyangapaj quimsa cosascunata rurana cashcatami ricugripanchi.

CABAL YACHACHISHCACUNATA YACHAJUNGAPACA ¿IMA CUALIDADCUNATATA MINISHTIPANCHI?

 5. Jehovata manllanaca ¿imapata ñucanchitaca ayudaita ushan?

⁵ Jehová Diosta manllana. Jehová Diosta manllashpaca, pai nalicachishca cosascunataca nunca na rurashunllu. Shinallata paipa ñaupapi ali ricuringapaj munaimandami, ima ali cashcata, ima nali cashcata, ima cabal cashcata, ima llulla cashcatapash yachajungapaj munapashun (Prov. 2:​3-6; Heb. 5:14). Chaimandami gentecunata manllanapa randica Jehová Diosta ashtahuan manllaita charina capanchi. Porque Jehovata na sirvij gentecunaca huaquinbica Jehová na gustashca cosascunatami ruran.

 6. Gentecunata manllaimandaca, 10 jaricunaca ¿imatata rurarca?

⁶ Si ñucanchicuna Jehová Diosta manllanapa randi gentecunatara ashtahuan manllashpaca, Jehovapa cabal yachachishcacunataca ladomanmi churai callarishun. Israelitacunaman Jehová Dios carasha nishca alpacunata chapagrichun 12 jaricunata cachashcapi pensaripashunchi. Caicunamanda 10puraca Jehová Diosta manllanapa randica cananeo gentecunatarami ashtahuan manllarca. Chaimandami paicunaca: “Chai llactapi causajcunahuan macanajungapaca, na vichai ri ushashunllu. Paicunaca, ñucanchita ashtahuan yali shinllicunami ninajurcami” (Núm. 13:​27-31). Paicunapa ricuipica, cananeo gentecunaca ashtahuan yali, shinlli gentecunami ricurirca. Shinapash chashna pensashpaca, paicunaca Jehová Dios ayudanapica na confianajurcachu. Paicunaca cananeo gentecunata manllanapa randica, Jehová Dios  imata rurangapaj munajushcapimi pensarina carca. Shinallata Jehová Dios paicunata ayudangapaj imacunatalla paicunamanda rurashcatami yarina carca. Chashna pensarishpaca, paicunata cananeo gentecuna na mishai ushana cashcata, Jehová Dios paicunata ayudana cashcatami yarinman carca. Shinapash cai ishcai jaricuna Josué y Calebca na paicunashnachu carca. Paicunaca Taita Diospica tucui shungumi confiarca. Y Taita Diospa ñaupapica ali ricuringapami munarca. Chaimandami tucui Israel llactataca: ‘Mandaj Dios ñucanchita alicachishpaca, paillatami ñucanchitaca, chai llactamanga pushanga’ ninajurca (Núm. 14:​6-9).

 7. Jehová Diosta manllangapaca ¿imatata rurai ushapanchi? (Dibujota ricupangui).

⁷ Shuj decisionda nara japishpallatami, Jehová Dios ima cosascunatalla gushtajta siempre yaipi charina capanchi. Chaicunami Jehová Diospi confiashpa paita ashtahuan manllachun ayudanga (Sal. 16:8). Bibliamanda imapash ejemplocunata liijushpaca, chashna situaciongunapi cashpaca: “¿Imatashi ruraiman carcani?” nishpa pensaripangui. Por ejemplo, cai 10 jaricunapa nishcacunata uyashpaca, quiquinga ¿imatata pensaripanguiman carca? ¿Gentecunata manllaimandachu paicunapa nishcata cringapaj munanguiman carca? ¿O Jehová Diosta juyashpa manllaimandachu pai munashcata rurangapaj munanguiman carca? Chai viajeca israelitacunaca Josué y Caleb ciertota ninajushcataca na cuenta japircachu. Chaimandami paicunaca Jehová Dios carasha nishca alpagumanga ñana yaicui usharca (Núm. 14:​10, 22, 23).

 8. ¿Ima cualidadta charingapata esforzarina capanchi?

⁸ Humilde cana. Jehová Diosca paipa cabal yachachishcacunataca humilde gentecunamanmi yachajuchun ayudan (Mat. 11:25). Callaripi Jehovapa cabal yachachishcacunata yachajushpaca, humildadta ricuchishpami shujcuna ñucanchita ayudachun saquiparcanchi (Hech. 8:​30, 31). Shinapash ñucanchicunaca ama orgulloso tucungapami cuidadota charina capanchi. Orgulloso tucushpaca ñucanchipa pensashcacuna Bibliapa consejocunahuan y Jehová Diospa organización cushca instrucciongunahuan igual valishcami can yashpami pensaita ushapanchiman.

 9. Humildecuna cashpa catichunga ¿imata ayudanga?

⁹ Humildecuna cashpa catingapaca Jehová Dios ñucanchimanda tucuipi yali cashcata yarinami ñucanchitaca ayudanga (Sal. 8:​3, 4). Ñucanchicunaca Jehová Diostaca yachajuna munaita charingapaj, humildadta charingapaj ayudahuai nishpami mañaita ushapanchi. Jehová Diosca Bibliapi yachachishcacunata, paipa organizacionbi cushca instrucciongunata yaipi charichunmi ñucanchitaca siempre ayudaita ushan. Bibliata liijushpaca Jehová Dios humilde gentecunata alicachijta y orgulloso gentecunata na ricunayachijtami cuenta japita ushapangui. Shuj jatun o importante responsabilidadta chasquishpaca, ama jariyashca tucungapami cuidadota charina capangui.

CABAL YACHACHISHCACUNAPI TUCUI SHUNGUHUAN CONFIANGAPACA ¿IMATATA RURANA CAPANCHI?

10. Jehová Diosca paipa sirvijcunata ñaupaman pushangapaj, instrucciongunata cungapaca ¿picunatata utilizashca?

¹⁰ Jehovapa organización cushca instrucciongunapi confiapashunchi. Jehová Diosca israelitacunaman instrucciongunata cungapaca Moisesta y Josuetami utilizarca (Jos. 1:​16, 17). Jehová Dios ñaupaman pushachun churashca jaricunata israelitacuna cazushpaca, ali causaitami charirca. Ashtaca huatacuna jipa, Jehová Dios cristianocunapa congregacionda callarichishpaca, instrucciongunata cungapaca 12 apostolcunatami utilizarca (Hech. 8:​14, 15). Jipamanga Jehová Diosca Jerusalenmanda ancianocunatami apostolcunata ayudachun churarca. Y huauquipanicunaca ñaupaman pushanajun huauquicunapa instrucciongunata pactachishpa catishcamandami ‘congregaciongunapi huauquipanicunaca tucui shunguhuan crishpa y cada punlla ashtahuan ashtahuan mirashpa catinajurca’ (Hech. 16:​4, 5). Cunan punllacunapipash Jehová Diosca paipa organización cushca instrucciongunata catijpimi  ñucanchitaca bendiciajun. Shinapash Jehová Dios ñaupaman pushachun churashca huauquicunata na cazujpica paica ¿imashinata sintirin? Chaita yachangapaca israelitacunaman carasha nishca alpaman rinajujpi ima pasashcata ricupashunchi.

11. Jehová Diosca paipa llactata ñaupaman pushangapaca, Moisestami agllarca. Y Moisesta na cazushcacunataca ¿imata pasarca? (Dibujota ricupangui).

¹¹ Israelitacuna Jehová Dios carasha nishca alpaman rinajujpica huaquin importante jaricunaca Jehová Dios Moisesman cushca autoridadtaca na respetashcatami ricuchirca. Chaimandami paicunaca: ‘Tucuilla tandanajushca israelcunallatami, Diospajlla shicanyachishca canchi. Mandaj Diosca, ñucanchipa chaupipimi causajun’ ninajurcami (Núm. 16:​1-3). ‘Tucuilla israelitacuna Taita Diospalla shicanyachishca’ cajpipash Jehová Diosca israelitacunata mandashpa ñaupaman pushachunga Moisestami agllashpa churarca (Núm. 16:28). Shinaca Moisesta na cazungapaj munashpa rimai callarishpaca, Jehová Diosta rimajui cuendallatami carca. Jehová Dios imata rurachun munashcata cungashpami, paicunapa munaipilla pensarinajurca. Paicunaca shujcunapa ñaupapi ashtahuan importante ali ricurishcacuna tucungapami munarca. Chaimandami Jehová Diosca Moisespa contra tucushcacunata y ashtaca ashtaca israelitacunataca tucuchirca (Núm. 16:​30-35, 41, 49). Cunan punllapipash paipa organizacionda ñaupaman pushachun agllashca huauquicunata na respetajtaca, Jehová Diosca na ricunayachinllu.

12. Jehová Diospa organizacionbi ashtahuan confiangapaca ¿ima razongunatata charipanchi?

¹² Jehová Diospa organizacionbi confiangapaca ashtaca razongunatami charipanchi. Jehová Diospa organizacionda ñaupaman pushaj huauquicuna Bibliamanda shuj mushuj entendimiento tiajpi y Jehovapa organizacionbi imapash cambiocunata rurana ricurijpica, uchallami ruran (Prov. 4:18). Cai cambiocunata rurangapaca imapash jarcachunga na saquinllu. Caitaca Jehová Diosta cushichingapaj munaimandami ruran. Y paicunaca imapash decisiongunata japingapaca, siempremi Bibliapa consejocunata catingapaj esforzarin. Tucuicunallatami paicunapa ejemplota catingapaj munapanchi.

13. ‘Ali shimicunaca’ ¿imata can? Y cai shimicunahuanga ¿imatata rurana capanchi?

 ¹³ “Ali shimicunataca imapipash shinllita charirinshnami na saquishpa catina cangui” (2 Tim. 1:13). ‘Ali shimicuna’ nishpaca Bibliapa yachachishcacunamandami parlajun (Juan 17:17). Y ñucanchipa tucui crishcacunaca Bibliamandami shamun. Jehová Diospa organizacionga shuj limpio ali causaita charichunmi yachachishca. Y caicunata pactachishpaca, shuj ali causaigutami charishun.

14. Huaquin cristianocuna ¿imashinata ‘ali shimicunata’ na tucui shunguhuan confiashcata ricuchirca?

¹⁴ ‘Ali shimicunata’ ñana tucui shunguhuan confiajpica ¿imata pasaita ushanman? Apostolcunapa tiempopi ima pasashcata ricupashunchi. Huaquin cristianocunaca Jehová Diospa punlla ñami chayamushca nishpami yangata shuj shuj huauquicunaman villanajurca. Y chashna llullacunata ningapaca paicunaca talvez shuj cartataimanmi utilizashcanga. Y chai cartataca apóstol Pablomi escribishca ninajushcangapashmi. Tesalónica llactamanda huaquin cristianocunaca ciertopacha cashcata o na ciertopacha cashcata na ali investigashpallatami paicunapa nishcata crishpa shujcunamanbash villanajurca. Paicunaca apóstol Pablo imata yachachishcata aliguta yarishpaca, cai llullacunataca na crinmanllu carca (2 Tes. 2:​1-5). Apóstol Pabloca imapash nishcacunataca na yangata crinachu canguichi nishpami consejashca carca. Y cashna llulla yachachishcacunata ama cutin crichunmi apóstol Pabloca cati cartata escribishpa tucuri partepica: “Ñucaca Pablomi capani. Cai saludotaca ñuca maquihuanbachami escribipani. Ñucapacha escribishcata yachachunmi tucuilla cartacunata shina escribipani” nirca (2 Tes. 3:17).

15. ¿Imashinata llulla informaciongunamandaca cuidarita ushapanchi? Shuj ejemplomanda parlapai (Fotocunata ricupangui).

¹⁵ Apóstol Pablo Tesalónica llactapi cristianocunaman escribishcamandaca ¿imatata yachajupanchi? Imapash manllarinalla noticiacunata uyashpa o liishpaca siempremi chai yachachishcacunaca Bibliapa yachachishcacunahuan igual o na igual cashcata ali ali ricuna capanchi. Unión Soviética tiashca tiempopica ñucanchi organizacionba contracunaca shuj cartata escribishpami huauquipanicunaman cacharca. Chai cartapica huauquipanicunataca separishpa shuj organizacionda ruraichi nijurcami. Y chai cartaca Cuerpo Gobernantemandapacha shamujunshnapachami carca.  Shinapash tucui shunguhuan Jehovata sirvijcunaca cai llullacunataca na crircachu. Paicunaca chai cartapi nishcacuna Bibliapa yachachishcacunahuan na de acuerdo cajtami cuenta japirca. Cunan punllacunapipash Jehovapa cabal yachachishcacunata na ricunayachij gentecunaca, internetta, redes sociales nishcacunata utilizashpami ñucanchicunata pandachishpa separangapaj munan. Shinapash cashna trampacunapi ama urmangapaca, ñucanchicunaca ‘aliguta pensarinataca na ñapash saquinachu capanchi’. Ashtahuangarin imata uyashpa, liishpapash Bibliapa cabal yachachishcacunahuan igual o na igual cashcatami ricuna capanchi (2 Tes. 2:2; 1 Juan 4:1).

16. Romanos 16:​17, 18​pi nishcashnaca Jehovapa cabal yachachishcacunamanda, caruyajcunahuanga ¿imatata rurana capanchi?

¹⁶ Jehová Diosta sirvijcunahuan unido capashunchi. Jehová Diosca tucuicunallata tandajushpa, unido paita adorachunmi munan. Y chaitaca Jehová Diospa cabal yachachishcacunapi tucui shunguhuan confiashpallami pactachita ushapashun. Jehovapa cabal yachachishcacunapi na tucui shunguhuan confiajcunaca, huauquipanicuna unido cachunga na ayudanllu. Chaimandami Jehová Diosca shujcunata separachijcunahuan, nitijachijcunahuanga ama tandanajuichichu nishpami mandan (Romanos 16:​17, 18​ta liipangui).

17. Jehovapa cabal yachachishcacunata yachajuna, juyanaca ¿imapata ayudanga?

¹⁷ Jehovapa cabal yachachishcacunata aliguta yachajushpa y chaicunapi tucui shunguhuan confiashpaca, espiritualmente ali, sanomi caita ushapashun (Efes. 4:​15, 16). Shinallata Satanaspa llullacunapi, panda yachachishcacunapica na urmashunllu. Ashtahuangarin Ninan Manllanai Llaqui tiempocunapica Jehovapa ayudatami charipashun. Y cabal yachachishcacunata tucui shunguhuan juyajpica, “tranquilo, ali canata caraj Taita Diosca” ñucanchicunahuanmi canga (Filip. 4:​8, 9).