1, 2. a) Robert huauquica ¿imatata cuenta japirca? b) Bibliamanda ali yachajungapaca ¿imatata rurarca?

 ROBERT jovenga 15 huatacunata charishpami bautizarirca. Shinapash Jehová Diostaca na tucui shunguhuan sirvijurcachu. Paica cashnami nin: “Imapash nalitaca nunca na rurarcanichu. Jehová Diosta sirvishpapash villachina cashcamandalla, tandanajuicunaman rina cashcamandallami rin carcani. Shinapash tucuilla tandanajuicunamanmi rin carcani. Huatapica tauca viajetami precursorado auxiliartapash japin carcani. Chaicunata rurashpaca espiritualmente alishnallami carcani. Shinapash imacharimi faltajuhuarca” nishpa.

² Robert huauquica espiritualmente na shinlli cashcataca cazarashparami cuenta japirca. Paica huaquinbillami paipa huarmiguhuanga Bibliamanda tapuicunata rurashpa yachajun carca. Paipa huarmiguca espiritualmente shinlli caimandami, Bibliamanda tapuicunataca ñapash tigrachinlla carca. Cutin Robertca Bibliamanda huaquin tapuicunatallami tigrachin carca. Chaimi nimata na yachanichu yashpa paica ashata pinganayachin  carca. Robertca cashnami pensarirca: “Espiritualmente ñuca huarmiguta ñaupaman pushangapaca, ñucarami Bibliamanda ali yachajuna cani” nishpa. Paica ninmi: “Bibliamandami ashtahuan ashtahuan yachajurcani. Chaimi Bibliataca ali intindi usharcani” nishpa. Shina ruraimandami paica Bibliamanda alipacha yachajurca. Ashtahuanbachaca Jehová Diospa ali amigomi tucurca.

 3. a) Robert huauquimandaca ¿imatata yachajupanchi? b) ¿Ima tapuicunatata yachajupashun?

³ Robert huauquimandaca ¿imatata yachajupanchi? Bibliamanda ashallata yachashpapash, tandanajuicunaman rishpapash, huauquipanicunahuan villachishpapash espiritualmente shinlli cashcataca na ricuchinchichu. Espiritualmente ñaupaman catinajushpapash, imapipash ashtahuan mejorashpa catingapami ñucanchillata ricuriana capanchi (Filip. 3:16). Espiritualmente ñaupaman catingapaj imata ruranataca, cai temapimi quimsa yuyaicunata yachajupashun. Primero, espiritualmente ali cashcata o nali cashcata yachachunga ¿imata ayudanga? Segundo, espiritualmente shinlli cangapaca ¿imatata rurana capanchi? Tercero, espiritualmente shinlli canaca ¿imashinata ñucanchi causaipi ayudanga?

 4. Efesios 4:23, 24​pa shimicunataca ¿picunallata pactachina can?

⁴ Taita Diosta sirvingapaca ñucanchi causaipica ashtaca cambiocunatami rurana tucurcanchi. Bautizarishca jipapashmi shinallata rurashpa catircanchi. Bibliapica ninmi: “Cangunapaj yuyaipica, mushujtalla yarishpami causana canguichi” nishpa (Efes. 4:23, 24). Tucuicunallatami juchayu caimandaca siempre imagupipash cambiashpa catina capanchi. Jehová Diosta ashtaca huatacunata sirvinajushpapash espiritualmente ñaupaman catingapami esforzarina capanchi (Filip. 3:12, 13).

 5. Espiritualmente ali cashcata o nali cashcata yachangapaca ¿imacunatata tapurina capanchi?

⁵ Joven cashpa, mayorcuna cashpapash cada unomi cashna tapurina capanchi: “¿Espiritualmente ñaupaman catijunichu? ¿Ñuca causaipica Jesuspa ali cualidadcunata ashtahuan ricuchijunichu? Ñuca ruraicunahuan, ñuca yuyaicunahuanga tandanajuicunapica ¿imashina cashcatata ricuchijuni? Ñuca parlocunahuanga ¿imata munashcatata ricuchijuni?, Bibliamanda yachajunapi, ropa churajushcacunapi, consejocunata cujpipash ¿imashina cashcatata ricuchijuni? Tentacionguna ricurijpica ¿imatata rurani? ¿Imapash cosascunata saquishpa, espiritualmente shinlli cashcatachu ricuchijuni?” nishpa (Efes. 4:13). Cai tapuicunata ñucanchillata tapurinami espiritualmente ali cashcata o nali cashcata yachachun ayudanga.

 6. Espiritualmente shinlli cashcata yachangapaca ¿imatata ashtahuan minishtinchi?

⁶ Espiritualmente ali cashcata yachangapaca shuj huauquipanicunapa ayudatami minishtinchi. Apóstol Pabloca nircami, Diospa espirituta na charijcunaca paicunapa rurashcacunahuan  Taita Diosta nali sintichishcataca na cuenta japinllu nishpa. Cutin espiritualmente shinlli cajcunaca Taita Dios pensashcashnami pensan. Paicunaca alimi yachan paicunapa munaitalla rurashpa causajcunataca Taita Dios na ricunayachij cashcata (1 Cor. 2:14-16; 3:1-3). Ancianocunaca Cristopa yuyaita charimandami pipash espiritualmente nali cashcata jaicata cuenta japin. Ñucanchi shina cajpi ancianocuna ayudangapaj munashpa paicuna consejajpica ¿cazunchimanlla? Paicunapa consejota cazushpaca espiritualmente shinlli cangapaj munashcatami ricuchishun (Ecl. 7:5, 9).

 7. Bibliamanda ali yachashpapash espiritualmente shinlli cashcataca na ricuchinllu ¿imamandata shina nipanchi?

⁷ Espiritualmente shinlli cangapaca Bibliamanda ali yachanallaca na minishtirinllu. Rey Salomonga Jehová Diosmandaca alipachami yacharca. Paipa huaquin nishcacunaca Bibliapi ricurin. Shina ali yachashpapash Jehová Diospa ñaupajpica pandarircami (1 Rey. 4:29, 30; 11:4-6). Bibliamanda ali yachashpapash espiritualmente shinlli cangapami ashtahuan esforzarina capanchi (Col. 2:6, 7). Chaitaca ¿imashinata pactachipashun?

8, 9. a) Espiritualmente ñaupaman catingapaca ¿imatata rurana capanchi? b) ¿Ima munaihuanda Bibliata yachajuna, yachajushcapipash pensarina capanchi? (Callari fotocunata ricupangui).

⁸ Apóstol Pabloca Jesusta punda catijcunataca nircami, espiritualmente ñaupaman catingapami esforzarina capanguichi nishpa (Heb. 6:1). Cunanbipashmi apóstol Pablopa nishcata cazuna capanchi. Chaimi Continué en el amor de Dios nishca librota yachajunaca minishtirishca can. Cai librota yachajunami Bibliapa consejocunata ñucanchi causaipi pactachichun ayudanga. Chai librota ña yachajuita tucuchishca cashpaca, ñucanchi fe shinlli cachunga shuj publicaciongunata yachajunallami capanchi (Col. 1:23). Ashtahuanbash, imata yachajushcapimi pensarina capanchi. Shinallata imata yachajushcata ñucanchi causaipi pactachingapami Jehová Diosta mañana capanchi.

⁹ Shinaca Jehová Diosta cushichina munaihuan, paita cazuna munaihuanmi Bibliata liishpa, liishcapipash pensarina capanchi (Sal. 40:8; 119:97). Shina rurashpaca imapash na jarcachun saquishpami espiritualmente ñaupaman cati ushashun (Tito 2:11, 12).

10. Espiritualmente shinlli cangapaca ¿imatata jovengunaca rurai ushan?

 ¹⁰ Joven ¿ima metacunatata charipangui? Betelpi sirvijuj shuj huauquica Jatun Tandanajuipi bautizarigrinajuj jovengunahuan parlana costumbretami charin. Paicunataca cashnami tapun, ¿ima metacunatata charinguichi? nishpa. Chai jovengunaca imata nishcahuanmi Jehová Diosta ashtahuan sirvingapaj munashcata o na munashcatapash ricuchin. Huaquingunaca tiempo completopi sirvingapami munan. Cutin shujcunaca ashtahuan minishtirishca ladocunapi sirvinatami gushtan. Chai huauqui shina tapuchijpica huaquin jovengunaca espiritual metacunata na charimandami imata ninatapash na atinan yarin. Chaimandami jovengunaca cashna tapurina can: “¿Tandanajuicunaman, villachinamanga ñuca taitamamacuna nijpillachu rini? ¿O ñucallatachu Jehová Dioshuan ali amigo tucushcani?” nishpa. Jovenguna cashpa, mayorcuna cashpapash espiritual metacunata charinami capanchi. Chaimi espiritualmente shinlli catichun ayudanga (Ecl. 12:1, 13).

11. a) Espiritualmente ñaupaman catingapaca ¿imatata rurana capanchi? b) ¿Pipa ejemplotata cati ushapanchi?

¹¹ Imapipash cambiana cashcata cuenta japishpaca uchallami cambiangapaj esforzarina capanchi. Chaica minishtirishcapachami can. Shinallami para siempre causaita ushashun (Rom. 8:6-8). Shinapash espiritualmente shinlli canaca jucha illaj cashcataca na nijunllu. Jehová Diosca paipa espíritu santota cushpami ayudan. Shina ayudajpipash ñucanchillatami esforzarina capanchi. Huaquin huatacuna huashamanga Cuerpo Gobernantemanda  John Barr huauquica Lucas 13:24​manda parlashpaca nircami, huaquin huauquipanicunaca “espiritualmente na esforzarimandami” nali causan nishpa. Ñucanchica Jacobpa ejemplotami catina capanchi. Paica bendiciangacamanmi shuj angelhuan macanajurca (Gén. 32:26-28). Bibliamanda yachajushpaca quiquinllatami cushijungui. Shinapash Bibliata liijushpaca shuj novela librota liijuj cuendaca na liinachu capanchi. Ashtahuangarin espiritual cosascunamanda ashtahuan yachajuna munaihuanmi yachajuna capanchi. Chaimi espiritualmente ñaupaman catichun ayudanga.

12, 13. a) Cristopa yuyaita charichunga ¿imata ayudanga? b) ¿Imashinata apóstol Pedropa ejemplo, paipa consejopash ñucanchitaca ayudan? c) Espiritualmente ñaupaman catingapaca ¿imatata rurana capanchi? (“ Espiritualmente ñaupaman catingapaca ¿imatata rurai ushapanchi?” nishca recuadrota ricupangui).

¹² Espiritualmente ali cangapaj esforzarishpaca Taita Diospa espirituta chasquishpami ñucanchi yuyaicunata cambiai ushashun. Chaimi Jesús pensashcashna pensai callarishun (1 Cor. 2:16). Shinallata Taita Diospa espíritu santoca ñucanchi shungumanda jariyana munaicunata anchuchichun, ali cualidadcunata charichunmi ayudan (Gál. 5:16, 22, 23). Nali munaicunata charishcata, ashtaca cosascunata charina munaicunata charishcata cuenta japishpaca, cambiangapami esforzarishpa catina capanchi. Chaipaca Jehová Diospa espíritu santota mañapashunchi. Chaimi ali pensamientocunata charichun ayudanga (Luc. 11:13). Apóstol Pedro ima tucushcata ricupashunchi, paica huaquinbica espiritualmente na shinlli cashcatami ricuchirca (Mat. 16:22, 23; Luc. 22:34, 54-62; Gál. 2:11-14). Jehová Dios ayudajpimi apóstol Pedroca Cristopa yuyaita chari callarirca. Paica espiritualmente ali cangapami esforzarishpa catirca. Ñucanchipash shinallata rurapashunchi.

¹³ Jipamanga apóstol Pedroca ali cualidadcunamanda parlashpami cashna nirca: Nali munaicunata saquinata, na ñapash fiñarinata, huauquipurashna juyarinatami charina canguichi nishpa. Chai cualidadcunata charingapami esforzarina capanchi (2 Pedro 1:5-8, liingui). Chai ali cualidadcunata charingapaj esforzarishpami espiritualmente ñaupaman cati ushashun. Chaimandami cada punlla cashna tapurina capanchi: “Espiritualmente ashtahuan shinlli cangapaca ¿imatata rurai ushani?” nishpa.

14. Espiritualmente shinlli canaca ¿imashinata ñucanchi causaipica ayudanga?

¹⁴ Cristopa yuyaita charishcataca trabajopi, escuelapi, parlocunapi, cada punlla imapash decisiongunata agllashcapimi ricuchi ushapanchi. Shinami Jesusta catijushcata ricuchipashun. Espiritualmente shinlli cashpaca Jehová Diospa amigo cashpa catichun imapash jarcachunga na saquishunllu. Shinallata imapash tentacionguna ricurijpica uchallami anchurishun. Ashtahuanbash, imapash decisiongunata agllagrijushpaca cashnami tapurishun: “¿Imata ruranata yachachunga Bibliapa maijan consejocunata ayudahuanga? ¿Jesusca imatashi ruranman carca? ¿Ñuca agllashca decisiongunataca maijandashi Jehová Diosca alicachin?” nishpa. Siempremi chashna tapurina capanchi. Huaquin ejemplocunata ricupashunchi. Cada ejemplopimi Bibliapa shuj consejo ali decidichun imashina ayudajta ricupashun.

15, 16. Cristopa yuyaita charinaca ¿imashinata ayudan?: a) pihuan cazaranata agllanapi; b) amigocunata agllanapi.

¹⁵ Pihuan cazaranata agllanapi. Chaipaca 2 Corintios 6:14, 15​pi consejomi ayudanga (chai textota liingui). Apóstol Pabloca nircami, espiritualmente shinlli cajcunaca, paipa  munaitalla rurashpa causajhuanga na cazaranllu nishpa. Shinaca cazarangapaj munashpaca ¿imashinata cai consejota cati ushapanchi?

¹⁶ Amigocunata agllanapi. Chaipaca Proverbios 13:20​pi consejota ricupangui (chai textota liingui). Espiritualmente shinlli cajcunaca Jehová Dioshuan ali cachun na ayudaj amigocunataca na charinllu. Cai consejo imacunapilla ayudajta ricupashun: “Internetta ali utilizachunga ¿imashinata ayudahuan? Pipash na rijsishca Internetpi pugllangapaj invitajpica ¿imatata ruraiman?”.

17-19. a) Espiritualmente shinlli cashpaca ¿ima ruraicunamandata caruyashun? b) Espiritualmente shinlli cashpaca ¿ima metacunatata charishun? c) Espiritualmente shinlli cashpaca pihuanbash nali cashpaca ¿imatata rurashun?

¹⁷ Espiritualmente ñaupaman ama catichun jarcaicuna. Chaipaca Hebreos 6:1​pimi shuj alipacha consejota tari ushapanchi (chai textota liingui). “Huañushcashna” nali ruraicunamanda caruyana nishpaca ¿imatata apóstol Pabloca ningapaj munarca? Espiritualmente shinlli cachun na ayudaj yanga cosascunamanda caruyanatami shina nirca. Cai consejomi ñucanchi causaipi ayudaita ushan. Por ejemplo: “¿Chaita ruranaca espiritualmente shinlli catichun ayudahuanllu? ¿Ashtahuan culquita ganangapallachu cai trabajotaca chasquigrini? Cai mundopa ruraicunata cambiangapaj munajcunahuanga ¿imamandata na tandanajuna cani?” nishpa.

¹⁸ Espiritual metacuna. Mateo 5-7 capitulocunapica imata pundapi churana cashcatami Jesusca parlarca (Mat. 6:33). Espiritualmente shinlli cajcunaca paicunapa causaipica Taita Diospa Reinotami pundapi churan. Cai consejota yarinami ñucanchi causaipi ali decisiongunata agllachun ayudanga. Por ejemplo, universidadpi estudianata o na estudianata agllachun. Shinallata shuj trabajota ali agllachunbash ayudanga.

¹⁹ Pihuanbash nali cashpa. Pihuanbash nali cashpaca apóstol Pablo Roma llactamanda huauquipanicunaman cushca consejotami catina capanchi (Rom. 12:18 ). Jesusta ali catijcunaca ‘tucuicunahuan casilla aliguta causangapami’ esforzarinchi. Shinaca cashna tapuripashunchi: Pihuanbash problemata charishpaca ¿imatata rurani? ¿Tranquilo o ñapash culirajlla cashcatachu rijsihuan? nishpa (Sant. 3:18).

20. ¿Imamandata espiritualmente shinlli cangapaj munapangui?

²⁰ Imashinami ña ricupashcanchi. Cai consejocunapi pensarinami ali decisiongunata agllachun ayudan. Shinami espiritualmente shinlli cashcata ricuchishun. Shina ruranami ñucanchillata cushilla causachun ayudan. Punda parrafocunapi parlashca Robert huauquica ninmi: “Jehová Dioshuan ali amigo canami ali cusa, ali taita cachun ayudahuarca. Chaimi ninanda cushijurcani” nishpa. Espiritualmente shinlli cangapaj esforzarinajushpaca ashtaca bendiciongunatami charishun. Shina rurashpaca cunanbillatami cushilla causaita charishun. Shamuj punllacunapicarin ‘causaita causanatami japishun’ (1 Tim. 6:19).