1, 2. a) ¿Imamandata Jehová Diosca Danieltaca nirca: ‘Canga ninanda juyai tucushcami cangui’ nishpa? b) Danielshna Jehovata cazungapaca ¿imatata rurana capanchi?

 JUDIOCUNATA Babilonia llactaman prezo apajpica chai llactapi ashtaca yanga dioscuna tiajta, ayacunata gentecuna adoranajujtami ricurca. Shina gentecunapurapi causashpapash Danielpash, paipa quimsa amigocunapash, shuj ashtaca judiocunapash Jehovata cazushpami chai gentecunapa nali ruraicunataca na catirca (Daniel 1:6, 8, 12; 3:16-18). Danielpash paipa quimsa amigocunapash Jehová Dios paicunata shuj alpa mangagutashna formachun munashpami Jehovatalla adorarca. Danielca casi paipa tucuilla causaipimi chai nali gentecunapurapi causarca. Shinapash Jehová Diospa shuj angelca paita ninanda alicachishpami nirca: ‘Daniel, canga ninanda juyai tucushcami cangui’ nishpa (Daniel 10:11, 19).

² Bibliata escribishca punllacunapi alpa mangata ruraj runacunaca paicuna munashcashnami alpa mangacunataca forman carca. Cunan punllacunapi Jehovata sirvijcunapash Jehová Dios tucuita mandaj Taita Dios cashcataca alimi yachanchi. Tucuita mandaj Taita Dios cashcamandami paica, llactacunatapash, ñucanchicunatapash cada unota pai munashcashna formangapaj autoridadta charin (Jeremías 18:6, liingui). Tucui autoridadta charishpapash pai munashcashna cambiachunga na pitapash obliganllu. Ashtahuangarin, pai ñucanchita shuj alpa mangagutashna formachun saquinata  o na saquinata ñucanchillata agllachunmi munan. Chaimandami cai temapica cai quimsa tapuicunata yachajushun: 1) Jehová Diospa consejocunata na cazuimanda shinlli barroshna ama tucungapaca ¿imatata na rurana canchi? 2) Jehovata cazushpa catingapaj, ali barroshna cangapaca ¿ima cualidadcunata charinata ayudanga? 3) ¿Imashinata taitamamacunaca paicunapa huahuacunata shuj alpa mangagutashna formanajushpaca Jehovata apoyai ushan?

 3. ¿Ima cosascunata ñucanchi shunguta shinlliyachita ushanman? Shuj ejemplomanda parlapai.

³ Proverbios 4:23​pica ninmi, pundapica cangunapa shungutami alichina o cuidana canguichi. Shungumandami causaica shamun nishpa. Ñucanchi shungu ama shinlliyachunga na jariyashca canachu canchi, juchatapash na rurajunachu canchi, ashalla fetapash na charinachu canchi (“¿Imatata nisha nin?” nishca recuadrota ricupangui). Chai cosascunapi na cuidadota charishpaca ñucanchipashmi Jehovata na cazujcuna caita ushanchi (Daniel 5:1, 20; Hebreos 3:13, 18, 19). Judá llactamanda rey Uzías ima pasashcata ricupashun (2 Crónicas 26:3-5, 16-21, liingui). Callaripica Jehovata cazunmi carca. Jehovapa ali amigomi carca. Jehová Diospa ayudahuangarin ashtaca ushaita charij reymi tucurca. Shinapash ‘paipa shungupi jariyashca’ tucuimandami Jehovapa templo huasiman rishpa inciensota rupachirca. Sacerdotecuna nalitami rurajungui nijpicarin Uziasca ninandami fiñarirca. Chaimandami Jehová Diosca tucui causaipi lepra ungüihuan causachun Uziastaca llaquichirca (Proverbios 16:18).

4, 5. ¿Imacunata ñucanchi shungutaca shinlliyachi ushanman? Shuj ejemplomanda parlapai.

⁴ Jariyashca canata na ladoman saquishpaca, shujcunamanda ashtahuan yali ali cashcata crishpami, Bibliamanda consejocunataca na chasquingapaj munashun (Proverbios 29:1; Romanos 12:3). Shuj congregacionmanda Jim shuti anciano ima pasashcata ricupashun. Paica congregacionmanda ancianocunahuan tandanajuita charishpaca, chai ancianocunapa decisiondaca nalicachircachu. Chaimandami paica, chai decisionhuanga na juyaita ricuchinajunguichichu nishpa, ancianocunapa tandanajuimanda rirca. 6 quillacuna jipaca shuj congregacionmanmi cambiarirca. Chaipica anciano cana nombramientotaca na chasquircachu. Paica nanarishcami carca. Paipa yuyaipica chaishuj ancianocuna pandarishcataca seguromi carca. Chaimandami villachinatapash, tandanajuicunaman rinatapash saquirca. Chunga huatacunatami chashna causarca. Cunanbica paica ninmi, shungupi jariyashca caimandami chashna pasashcamandaca Jehovatapash culpai callarircani nishpa. Ayudangapaj munashpami shuj huauquicunaca tauca huatacunata cutin cutin visitarca. Shinapash Jimga paicunapa ayudataca na chasquircachu.

⁵ Jimga ninmi: “Chaishujcuna pandarijushcataca pensarijunllami carcani” nishpa. Shinaca ¿imatata Jimmandaca yachajunchi? Shungupi jariyashcacunaca, pretextocunata churashpami paicuna nalita ruranajushcataca na cuenta urman. Ñucanchicunapash shina rurashpaca Jehová Dios ñucanchita shuj alpa mangagutashna formachunga na saquinajushunllu (Jeremías 17:9). Shinaca, maijanbash huauqui llaquichijpi o congregacionbi privilegiocunata, responsabilidadcunata quichujpica ¿imashinata shungu ucupica sintirircanchi? ¿Jariyashcachu carcanchi o ñucanchi huauquipanicunahuan tranquilo ali cana, Jehovata cazuna ashtahuan importante cashcatachu intindircanchi? (Salmo 119:165; Efesios 4:32, liingui).

 6. Juchata ruranajushpaca ¿imata tucunchiman?

⁶ Juchata rurashca jahuapash chai juchata pacashpaca Diospa consejocunata chasquinaca na facilchu canga. Ashtahuangarin, ashtahuan jahuallami  juchatapash rurashpa catishun. Shuj huauquica ninmi, nali cosascunata rurashcamanda callaripi nali sintirishpapash, jipamanga ñana imatapash sintirircanichu nishpa (Eclesiastés 8:11). Cutin shuj huauquica, asha tiempotaca pornografía nishcata ricuna nali costumbretami charirca. Paica na cuenta japishpapash, asha ashami ancianocunataca nalicachishpa rimai callarirca. Chai nali costumbremandami Jehovapa ñaupajpi ali ricuritaca ñana usharca. Shujcuna pai imata ricujujta yachaj chayajpimi, paica ancianocunapa ayudata chasquirca. Tucuicunallatami juchayucuna caimandaca imapipash pandarinchi. Shinapash ñucanchita consejajcunata nalicachishpa huashalla rimai callarishpa o pretextocunata churai callarishpaca ñucanchi shungutami shinlliyachinajunchi. Chaimandami ñucanchi shungu ama shinlliyachunga, Jehovata perdonahuai, ayudahuai nishpa mañana canchi.

7, 8. a) Israelitacunapa ejemplopi ricushca shinaca ¿imashinata na shinlli feta charinaca shunguta shinlliyachin? b) ¿Imatata israelitacunamandaca yachajunchi?

⁷ Israelitacuna Egipto llactamanda llujshishpaca Jehová Diospa ashtaca milagrocunatami ricurca. Shinapash, Jehová Dios carasha nishca alpacunaman ña chayagrinajushpaca paicunapa shungu shinlliyachunmi saquirca. ¿Imamandata paicunapa shunguca shinlliyarca? Na shinlli feta charimandami shinlliyarca. Jehová Dios ayudashpa catinata confianapa randica manllarishpami Moisesmandapash quejarinajurca. Ashtahuangarin, esclavocuna cashcatapash na yarishpami Egiptomanmi tigrangapaj munanchi ninajurca. Chaita ricushpami Jehová Diosca ninanda nanarishpa paicunataca, ima horacamanda ñucata na respetagrihuanguichi nirca (Números 14:1-4, 11; Salmo 78:40, 41, NM). Israelitacunaca paicunapa shungu shinlliyashpa Jehovapi confianata saquishcamandami chaquishca alpacunapi huañurca.

⁸ Shinaca ¿imatata israelitacunamandaca yachajunchi? Ñucanchicunaca ñallami Jehová Dios mandajun mundopi causanajushun. Chaimandami shinlli feta charishcata o na shinlli feta charishcata ricuchina canchi. Shinapash ¿imashinata ricuchishun? Mateo 6:33​pi Jesuspa shimicunata yarishpa tapurishunchi: “Ñucapa rurangapaj munashcacunahuan, ñuca decisiongunahuanga Jesuspa shimicunapi crishcata ricuchijunichu? ¿Culquita ashtahuan gananamandallachu tandanajuicunaman, villachinamanbash faltagrini? Ñuca trabajomanda tiempota ñana charishpa o shaijushca sintirijushpaca ¿imatata ruragrini? ¿Cai mundora ñucata shuj alpa mangatashna formashpa, Jehovata sirvinata jarcachunllu saquigrini?” nishpa.

 9. a) ¿Imamandata 2 Corintios 13:5​pa shimicunapi pensarina capanchi? b) ¿Imashinata chai shimicunataca pactachi ushapanchi?

⁹ ¿Nali cumbacunamanda, expulsashcacunamanda, nali diversiongunamanda Biblia imata nijtaca cazunchichu? Na cazushpaca ñucanchi shungutami shinlliyachinajunchi. Ama shina llaqui apangapaca uchami Bibliapi nishca shinaca “¿ñachu alipacha crij cani, narachu ali crij cani?” nishpa pensarina canchi (2 Corintios 13:5). ¿Imashinata chaitaca rurashun? Ñucanchipillata pensarishpami, ñucanchi yuyaicunata Biblia cambiachun saquina canchi.

10. Jehová Dios formana ali barrogushna cachunga ¿imata ñucanchitaca ayudanga?

¹⁰ Ali barro alpagushna cachunmi Jehová Diosca Bibliata, congregacionda, villachinatapash cushca. Cada punlla Bibliata liina, imata liishcapi pensarinami, Jehová Dios formana ali barrogushna cachun ñucanchitaca ayudanga. Punda tiempo Israel llactapi reycunataca Jehová Diosca mandarcami, Moisesman cushca Leytaca copiashpa escribinami canguichi, cada punllami liina canguichi nishpa (Deuteronomio 17:18, 19). Apostolcunapash Taita Dios escribichishca shimicunata liina, chai liishcacunapi pensarina villachingapaj minishtirishca cashcataca alimi yacharca. Chaimandami Escrituras Griegas nishcata escribishpaca Escrituras Hebreas nishcapa tauca textocunamanda escribirca. Villachinajushpapash Taita Dios escribichishca shimicunata liichunmi gentecunataca animarca (Hechos 17:11). Ñucanchicunapapash Bibliata cada punlla liina, imata liishcapi pensarinaca minishtirishcapachami can (1 Timoteo 4:15). Chaita ruranami ñucanchitaca humilde cachun, Jehová Dios ñucanchita shuj alpa mangagutashna formachun ayudan.

11, 12. ¿Imashinata Jehová Diosca congregacionda utilizashpa cada uno imata minishtijujta ricushpa aliguta forman? Shuj ejemplota churapai.

¹¹ Jehová Diosca cada uno imata minishtijujtaca alimi yachan. Chaimandami ñucanchita shuj alpa mangagutashna formangapaca congregacionda churashca. Párrafo 4​pi parlashca Jim huauquita cutin yaripashun. Paica shuj anciano paimanda preocuparijpimi cambiai callarirca. Jimga ninmi: “Chai ancianoca nunca na nihuarcachu canba culpamandallatami shina pasajungui  nishpa. Chaipa randica animashpami ayudangapaj munajushcata ricuchirca” nishpa. Quimsa quillacuna jipaca, tandanajuimanmi ancianoca invitarca. Jimga ninmi, tandanajuiman rijpica huauquipanicunaca cushijushpa, juyaihuanmi chasquihuarca nishpa. Huauquipanicunapa juyaita ricushpami Jimga cuenta japirca, paipa yuyaicunapica na yapata preocuparina cashcata. Ancianocunapash, paipa huarmipash animajpimi Jimga asha asha Jehovataca cutin sirvi callarirca. Shinallata, La Atalaya del 15 de noviembre de 1992 huatapi “Jehová no tiene la culpa”, “Sirva a Jehová lealmente” nishca temacunata liinami Jimdaca ayudarca.

¹² Jipamanga cutinmi Jimga anciano tucurca. Chai punllamandami Jimga pai charishca problemacunata charij huauquicunataca ayudashpa paicunapa feta shinlliyachichun animan. Jimga ninmi: “Ñucaca Jehovapa ali amigomi cani yashpapash na Jehovapa amigo cashcarcanichu” nishpa. Paica shungupi jariyashca caimandami ashtahuan importante cosascunata ricunapa randica shujcuna imapi pandarijushcatara ricujurca. Chaita yarishpami Jimga ninandami llaquirin (1 Corintios 10:12).

13. a) Villachinaca ¿ima cualidadcunata charichunda ayudan? b) Villachinaca ¿picunapallata ali can?

¹³ Villachinapashmi ñucanchitaca shuj alpa mangagutashna formashpa ashtahuan mejorachun ayudan. ¿Imamandata shina ninchi? Diospa Reinomanda villachinajushpaca humilde cashcata, granota fucuchinshna ali cualidadcunata charishcatami ricuchina canchi (Gálatas 5:22, 23). Pensaripashunchi, villachinaca ¿ima cualidadcunapi mejorachunda ayudashca? Jesús charishca cualidadcunata catishpa villachijpica gentecunaca alicachishpami ali villaicunataca uyanga. Huaquinbicarin, ñucanchicunatapashmi alicachinga. Australia llactapi ima pasashcata ricupashun. Ishcai Testigocunami shuj huarmigupa huasiman villachingapaj chayarca. Shinapash chai huarmiguca ninanda culirashpami paicunataca nali tratarca. Shina nali tratajpipash chai ishcai Testigocunaca respetohuanmi tratarca. Chai huarmiguca jipaman arripintirishpami disculparingapaj munashpa sucursalmanga cashna nishpa escribirca: “Chai ishcai Testigocunaca Diospa Shimitallami villachinajurca. Paicunata nali tratashpaca nalitami rurashcani, muspa caimandami shina rurashcani” nishpa. Imashinami ricupanchi, villachinajushpaca respetohuanmi gentecunataca tratana canchi. Villachinaca shujcunapapash, ñucanchipapash alimi can. Villachinami ñucanchi cualidadcunapi mejorachun ayudan.

14. Huahuacunata shuj alpa mangagutashna aliguta formangapaj munashpaca ¿imatata taitamamacunaca rurana can?

¹⁴ Ashtaca huahuacunaca humildemi can, yachajungapapash munanmi (Mateo 18:1-4). Chaimandami taitamamacunaca huahuacuna uchilla cajpillata paicunamanga Bibliata yachachishpapash, Bibliapi yachachishcacunata alicachishpa causanatapash yachachina can (2 Timoteo 3:14, 15). Huahuacunata shuj alpa mangagutashna aliguta formangapaj munashpaca, pundapica taitamamacunami  Bibliapi yachachishcacunata tucui shunguhuan alicachishpa, Bibliapi ima nijujta cazushpa causana can. Chaita ricushpami huahuacunapash Bibliapi yachachishcacunata tucui shunguhuan alicachishpa cuenta japinga, paicunata juyaimanda taitamamacunapash Jehovapash intindichishpa yachachijushcata.

15, 16. Shuj churi expulsai tucujpica ¿imashinata taitamamacunaca Jehovapi confiashcata ricuchina can?

¹⁵ Taitamamacuna Bibliamanda aliguta huahuacunaman yachachijpipash huaquin huahuacunaca Jehová Diosmanda caruyan o expulsai tucunmi. Shina pasajpica familiacunaca ninandami llaquirin. Sudáfrica llactamanda shuj paniguca ninmi: “Ñuca turita expulsajpica huañujpishnami ninanda llaquirircanchi” nishpa. Shinapash ¿imatata paipash, paipa taitamamapash rurarca? Paicunaca Biblia ima nijtami cazurca (1 Corintios 5:11, 13, liingui). Taitamamacunaca Taita Diospa consejota cazuna tucuicunapa ali cajtaca alimi yacharca. Paicunaca alimi intindirca, Jehová Diosca juyaimanda congregacionmanda expulsajta. Chaimandami familiapi imatapash parlana minishtirijpilla expulsai tucushca churihuanga parlan carca.

¹⁶ Expulsai tucushca churica ¿imashina sintirirca? Huaquin tiempo jipaca paica nircami: “Ñuca familia ñucata na millanayachishcataca alimi yacharcani. Paicunaca Jehovata, paipa organizacionda cazuimandami ñucataca shina tratahuarca” nishpa. Paica Jehová Dioslla ayudai ushajta, paipa perdonda ashtahuanbachaca minishtijushcata cuenta japishpami intindirca, Jehovata ninanda minishtijushcata. Jehovata cutin sirvi callarijpica tucuilla familiami cushijurca. Imashinami ricupanchi, Jehovata siempre cazunaca, ñucanchipallatami ali can, cushilla causachunmi ayudan (Proverbios 3:5, 6; 28:26).

17. a) ¿Imamandata siempre Jehovapa munaita pactachina canchi? b) Chaita ruranaca ¿imamandata ali can?

¹⁷ Profeta Isaiasca nircami, Babilonia llactapi judiocunaca arripintirishpami cashna ninga: “Cunanga Mandaj Dioslla, canmi ñucanchi taita cangui. Ñucanchica, alpamanda rurashcacunallami canchi, canmi ñucanchita rurarcangui. Ñucanchica, tucuicunami cambaj maquihuan rurashca canchi. Ñucanchi jatun nalita rurashcatapash, ama causaita causaicaman yarijupaichu. Ricui, cunanga tucui ñucanchimi can agllashcacuna canchi” nishpa (Isaías 64:8, 9). Shinaca, siempre humilde cashunchi, Jehová Diostapash cazushunchi. Paipa munaita pactachijpica Jehová Diosca profeta Danieltashnami ñucanchitaca ninanda alicachinga. Jehová Diosca Bibliahuan, paipa espíritu santohuan, paipa organizacionhuanmi ñucanchitaca shuj alpa mangagutashna formashpa catinga. Shinami shamuj punllacunapica Diospa jucha illaj “churicuna” tucushun (Romanos 8:21).