1-3. a) Judá llactamanda profetaca ¿imatata na rurarca? b) Shina rurashcamandaca ¿imata pasarca? (Callari dibujota ricupangui).

 ISRAEL llactata mandaj rey Jeroboanga yanga dioscunata adorangapami, Betel shuti llactapica shuj altarta rurarca. Chaimandami Jehová Diosca Judá llactamanda shuj profetata rey Jeroboanbaman cacharca. Chai profetaca llaquichi tucugringuimi nishpami villana carca. Judá llactamanda profetaca humildemi carca. Paica Jehová Dios imata mandashcatami villangapaj rirca. Shina villajpimi rey Jeroboanga chai profetahuan ashtacata culirarca. Shinapash, Jehová Diosmi chai profetataca ama imapash pasachun cuidarca (1 Reyes 13:​1-​10).

² Jehová Diosca Judá llactamanda profetataca nircami, Israel llactapi cashpaca ama imatapash micunguichi, ama imatapash ufianguichu, huasiman tigrajushpapash shuj ñanda ringui nishpa. Shinapash chai profeta huasiman tigrajujpica shuj rucu runagu tuparishpami paita llullashpa nirca, ñucaca Jehová Dios cachamujpimi shamujuni nishpa. Ashtahuangarin, paipa huasipi micungapaj, ufiangapaj richunmi profetataca invitarca. Shina invitajpimi profetaca Jehová Dios nishcata na cazushpa chai rucugupa huasiman rirca. Chaimandami Jehová Diosca chai profetahuanga culirarca. Shinami, micushca jipa chai profeta paipa huasiman tigrajujpica, ñanbica shuj león ricurishpa huañuchirca (1 Reyes 13:​11-​24).

 ³ ¿Imamandashi chai profetaca Jehová Diosta na cazushpa, chai rucu runagupa huasiman micungapaj rirca? Chaitaca na yachanchichu. Shinapash paica tucuita ari nishpa na humilde caimandami Jehová Diosta na cazurca (Miqueas 6:8). Humildecunaca Jehová Diosta siempre mañana cashcataca yariami can. Chai profeta humilde cashca cashpaca Jehová Diostarami tapuna carca, ciertochu quiquinba yuyaita cambiaparcangui nishpa. Huaquinbica ñucanchipashmi imapash jatun decisiongunata agllana canchi. Shinapash Jehová Dios imata rurachun munashcata nara ali yachashpaca ¿imatata rurashun? Humildecuna cashpaca Jehová Diostami ayudahuai nishpa mañashun. Shinami jatun llaquicunapi na urmashun.

 4. ¿Imatata cai temapica yachajupashun?

⁴ Ñaupa temapica humildecuna imashina cajta, humilde cana minishtirishca cashcatami yachajurcanchi. Shinapash cai temapica cai tapuicunatami yachajushun: Humilde cashpa catingapaca ¿imatata rurai ushanchi? Huaquinbica ¿imamandata humilde canaca shinlli can? Ciertopacha humilde cashcata o jariyashca cashcata yachangapaca quimsa yuyaicunata ricupashun (Proverbios 11:2).

5, 6. ¿Imashinata Barzilaica na tucuita ari nishpa humilde cashcata ricuchirca?

⁵ Ñucanchi causaipi imapash cambiajpi o shuj mushuj asignacionda cujpimi humilde cashcata o jariyashca cashcata ricuchinchi. Chaita ali intindingapaca Barzilai shuti runagupa ejemplota ricupashun. Paica rey Davidpa ali amigomi carca. Barzilai 80 huatacunata charijpimi rey Davidca jacu ñuca huasipi causangui nirca. Reypa huasipi causana alipacha cashcataca alimi Barzilaica yacharca. Shinapash paipa randica Kimham (Quiman) shuti runata apachunmi munarca. Kimhamga tal vez Barzilaipa churimi cashcanga (2 Samuel 19:​31-​37).

⁶ ¿Imamandata Barzilaica rey Davidpa huasiman na ringapaj munarca? ¿Barzilaica na ashtahuan responsabilidadcunata charingapaj munashcamanda o tranquilo causangapaj munashcamandachu reypa huasimanga na rirca? Na. Barzilaica na tucuita ari nishpa humilde caimandami rey Davidtaca na nirca. Paipa causaica ñami cambiashcarca. Pundashna ruraitaca ñana ushajurcachu. Chaita ali intindishpami Barzilaica rey Davidtaca na nirca (Gálatas 6:​4, 5, liingui). Ñucanchicunapash Barzilaipa ejemplotami catina canchi. Ñucanchi munaita pactachinapi yapata preocuparijunapa randi, o shujcunahuan compararijunapa randica, Jehovata ali sirvinapimi ashtahuanga preocuparina canchi. Jehovata ali sirvinami tucuicunapa ñaupajpi rijsishca canamanda, o shuj jatun asignacionda charinamandaca ashtahuan importante can (Gálatas 5:​26). Humilde cashpaca Jehová Diosta alabangapaj, shujcunata ayudangapami huauquipanicunahuanga shujllashna tandanajushpa Jehovapa munaita rurashun (1 Corintios 10:31).

7, 8. Humilde canaca ¿imashinata na ñucanchipillata confiachun ayudan?

⁷ Ashtahuan autoridadta o ashtahuan responsabilidadcunata chasquishpa humilde cashpa catinaca huaquinbica shinllimi can. Humilde cashpa catina shinlli cajpica Nehemiaspa ejemplota catipashun. Jerusalenbi gentecuna llaqui apanajujta yachaj chayashpaca, Jehová Diostami Nehemiasca ayudahuai nishpa mañarca (Nehemías 1:​4, 11). Jehová Diospash Nehemías mañashcata uyashpami paita ayudarca. Shinapash ¿imashinata ayudarca? Rey Artajerjesca Nehemiastami Jerusalenbi gobernador cachun churarca. Nehemiasca charij cashpapash, ashtaca autoridadta charishpapash na paipa fuerzahuanlla imatapash rurai ushashcatami ali intindirca. Chaimandami Jehová Dios paita ayudachun munan carca. Jehová Dios cushca Leycunatapash siempremi liin carca (Nehemías 8:​1, 8, 9). Ashtaca autoridadta charishpapash, nunca na pai charishca autoridadta aprovechashpa shuj gentecunata maltratarcachu, pailla ali ricurinatapash na mascarcachu (Nehemías 5:​14-​19).

 ⁸ Ñucanchicunapash ashtahuan responsabilidadcunata chasquishpa o shuj mushuj asignacionda chasquishpaca, Nehemiaspa ejemplota catishpami humilde cana canchi. Humilde cashpaca ñucanchipilla o ñucanchi experienciapillaca na confiashunllu. Shinapash ¿imashinata yachai ushanchi, ñucanchipilla confiai callarijushcata? Shuj ejemplota ricupashun. Shuj ancianoca congregacionba imatapash ruragrijushpaca Jehovata na mañashpami rurai callarinman. Cutin huaquinbica ñucanchillatami imapash decisionda agllashca jipara Jehovataca cai decisionbi bendiciahuangui nishpa mañanchiman. Shinapash humildecunaca, experienciata charishpapash na paicunapilla confianllu. Humildecunaca paicuna imata ali rurai ushashpapash, Jehová Dios tucuita ali rurai ushashcatami siempre yarin (Proverbios 3:​5, 6, liingui). Cunan punllacunapica ashtaca gentecunami paicunapilla pensarin, shujcunamanda ashtahuan ali cangapapash munan. Shinapash Jehovata sirvijcunaca na shinachu canchi. Imapash responsabilidadta charimandalla shuj huauquipanicunamanda o ñucanchi familiamanda ashtahuan ali cashcataca na yuyanchichu. Ashtahuangarin, Jehová Diospa organizacionbi tucuillacuna minishtirishca cashcata intindishpami, ñucanchi huauquipanicunahuanga shujllashna tandanajushpa Jehovapa munaita ruranchi (1 Timoteo 3:​15).

9, 10. Shujcuna yangamanda juchachijpica ¿imashinata humilde canaca ayudan?

⁹ Yangamanda shujcuna nalicachishpa rimajpica  ashtacatami llaquirinchi. Ana shuti huarmigupa ejemplota yaripashun. Paipa cusa Elqaná ashtacata juyajpipash, Anaca huahuacunata na chari ushashpami llaquilla carca. Paipa cusapa chaishuj huarmipash siempremi paimanda burlarijun carca. Shuj punllaca ashtacata llaquirishpami Anaca, Jehovapa tabernáculo carpa huasipi mañangapaj rishpa ushashcata huacajurca. Chaita ricushpami Elí shuti sumo sacerdoteca machashcami cangui nishpa rimarca. Anaca culiranapa randica, respetohuanmi Elihuanga parlarca. Jipamanga shuj oracionda rurashpami, chai oracionbica Jehovapi confiashcata, Jehovata juyashcatapash ricuchirca (1 Samuel 1:​5-7, 12-​16; 2:​1-​10).

¹⁰ Humilde cashpaca ‘alita rurashpami nalitapash mishai ushashun’ (Romanos 12:21). Cai mundotaca Diablomi mandajun. Chaimandami ashtaca nali cosascuna pasajun. Ima punllapash yangamanda llaquichi tucushunmi. Yangamanda ñucanchita llaquichijpica culiranayangami. Shinapash na culiranachu canchi (Salmo 37:​1, 2). Congregacionbi shuj huauquihuan o shuj panihuan problemata charishpacarin ashtahuanmi llaquirinchiman. Shina llaquipi cashpaca Jesuspa ejemplota catipashunchi. Bibliapica ninmi, contracuna rimajpipash Jesusca na chashnallata tigrachircachu nishpa. Chaipa randica, Taita Dios ricuchun nishpami Taita Diosman “tucuita mingarca” (1 Pedro 2:​23). Jesusca humildemi carca, ima nalitapash Jehová Dios arreglanatami confiarca (Romanos 12:19). Ñucanchicunapash humildemi cana canchi. Pi “nalita rurajpipash, na chashnallata tigrachinachu” canchi (1 Pedro 3:​8, 9).

11, 12. a) Shujcuna alicachishpa tratangapaj munajpica ¿imashinata humilde cashpa catita ushapanchi? b) Humildecuna cashpaca ¿imashinata mudarishun, portarishun?

 ¹¹ Ciertopacha humilde cashpami, shujcuna alicachishpa ricujujpipash humilde cashpa catita ushashun. Ester shuti huarmigupa ejemplota ricupashun. Esterca Persia llactapi huarmicunamanda ashtahuan juyaillagumi carca. Shuj huata enterotami Estermanga reypa ñaupajpi ashtahuan juyaillagu ricurichun nishpa mishquilla ashnajuj shuj shuj aceitecunata churarca. Shuj huarmicunapashmi reypa ñaupajpica juyaillagu ricuringapaj munanajurca. Shinapash reyca Estertami reina cachunga agllarca. Chaimandami ashtaca gentecuna Estertaca alicachishpa tratan carca. Shinapash Esterca na cridayarcachu, na paipilla pensarircachu. Chaipa randica humildemi cashpa catirca, shujcunatapash cushilla respetohuanmi tratashpa catirca (Ester 2:​9, 12, 15, 17).

¹² Humilde cashpaca ñucanchitapash respetohuan tratachun munashpa, shujcunapa yuyaitapash respetashpami aliguta mudarishun, aliguta portarishun. Jariyashcata mudarinapa randi, o shujcuna alicachishpa ricuchunllu mudarinapa randica ‘shungu ucupi na huaglita yarijushcata, cushijushpa juyailla causajushcatami’ ricuchina canchi (1 Pedro 3:​3, 4, liingui; Jeremías 9:​23, 24). Ñucanchicuna na ciertopacha humilde cajpica, ñucanchi parlocunata uyashpa, imashina portarijta ricushpami shujcunaca ñucanchicuna imashina cajta cuenta japinga. Shuj ejemplota ricupashun. Huaquinbica alimi imatapash yachanchi. Cutin huaquinbica alimi imatapash ruranchi. Huaquinbicarin, privilegiota charij rijsicunatami charinchi. Shinaca ¿chaicunamandallachu shujcuna ñucanchita alicachishpa tratachun munanchi? ¿Shujcuna ayudashca cajpipashchu ñucanchilla alipi ricuringapaj munanchi? Jesusta yaripashun. Jesusca ashtaca cosascunata nishpami shujcunapa ñaupajpi ali ricurita ushanman carca. Shinapash Jesusca shujcuna paita alicachishpa ricuchunga na munarcachu. Chaimandami paica cutin cutin Diospa Shimipica cashnami nin nishpa parlan carca. Jesusca siempremi gentecuna Jehová Diosta alabachun munarca (Juan 8:​28).

13, 14. Humilde canaca ¿imashinata ali decisiongunata agllachun ayudan?

¹³ Shujcunapa decisionguna ñucanchitapash afectajujpi o ñucanchillata decisiongunata agllajushpapash humilde cashcatami ricuchina canchi. Shuj ejemplota ricupashun. Apóstol Pabloca Jehovapa mingashcata Jerusalenbi rurangapaj rijushpami, Cesarea llactapi huaquin punllacunata quedarca. Chaipimi Ágabo nishca profetaca nirca, ama Jerusalenman richu, chaiman rishpaca huañuchi tucunguimi nishpa. Ama richu nishpa huauquicuna rogajpipash apóstol Pabloca Jerusalenman rinatami decidirca. Shinaca ¿paipilla confiaimandachu Pabloca Jerusalenman ringapaj munarca? Na. Pabloca humildemi carca, tucui shunguhuanmi Jehová Diospi confiarca. Chaimandami chai punllacunapi huauquicunapash Pablo imata decidishcata respetashpa Pablotaca richun saquirca. Shinami chai huauquicunapash humilde cashcata ricuchirca (Hechos 21:​10-​14).

¹⁴ Jipaman ima pasanata na yachashpapash humilde cashpaca ali decisiongunatami agllai ushashun. Shuj ejemplota ricupashun. Tiempo completopi sirvingapaj munajushpaca, tal vez pensarinchipashchari jipaman ñucanchicuna ungushpa o ñucanchi taitamamacuna ungujpi cuidana cashpaca imatashi rurashun nishpa. O tal vez pensanchipashchari, mayorlla tucushpaca imashinashi causasha, imahuanshi micusha nishpa. Chaicunamanda Jehová Diosta mañashpapash, chaicunapi yapata preocuparishpapash na imatapash rurai ushashunllu (Eclesiastés 8:​16, 17). Humilde cashpa, Jehovapi confiashpaca ñucanchicuna imata ñana rurai ushashcata intindishpami, imata ruranata aliguta pensarishun, shujcuna ayudachunbash consejota mañashun. Ashtahuanbachaca Jehovatami ayudahuai nishpa mañashun. Mañashca jipaca paipa espíritu santohuan ayudachunmi saquina canchi (Eclesiastés  11:4-6, liingui). Jehová Diosca ñucanchi decisiongunata bendiciai ushanmi, o ñucanchi decisiongunata cambiachunbashmi ayudaita ushan (Proverbios 16:​3, 9).

15. ¿Imashinata Jehová Diospi pensarinaca humilde cashpa catichun ayudan?

¹⁵ Jesusta catijcunaca ¿imashinata ashtahuan humilde caita ushanchi? Chuscu yuyaicunata ricupashun. Pundapica Jehová Diospimi aliguta pensarina canchi. Paimi ashtahuan jatun Dios, ali yachaita charij Dios can. Chaicunapi aliguta pensarishpaca Jehová Diospa ñaupajpi na imatapash yachashcata, imapash yangallagucuna cashcatami cuenta japishun (Isaías 8:​13). Ñucanchica Tucui Ushaita Charij Taita Diostami sirvinajunchi. Na angelcunata o gentecunatachu sirvinajunchi. Chaicunapi pensarinami ñucanchitaca humilde cachun, Jehová Dioslla tucui autoridadta charishcata intindichun ayudanga (1 Pedro 5:6).

16. Jehová Dios ashtacata juyashcata yarinaca ¿imashinata humilde cashpa catichun ayudan?

¹⁶ Ashtahuan humilde cangapaca Jehová Dios ñucanchita ashtacata juyashcatami pensarina canchi. Apóstol Pabloca congregacionbi tucuilla huauquipanicunataca cuerpopi partecunahuanmi chimbapurarca. Chaimandami Jehová Dios munashca shina congregacionbica tucuicunallata imagutapash rurashpa ayudanchi (1 Corintios 12:​23, 24). Jehová Diospa ñaupajpica tucuicunami minishtirishcacuna canchi. Shinaca, maipi sirvinajushpapash Jehovatami sirvinajunchi. Paica ñucanchi rurashcacunataca na shujcunapa rurashcacunahuan comparajunllu. Shinallata pandarijpipash paipaman tigrachunmi shuyajun. Jehová Dios ashtacata juyajta yachashpami tranquilo, ali sintirinchi.

17. ¿Imamandata shujcuna imata ali rurai ushashcata ricuna capanchi?

¹⁷ Ashtahuan humilde cashpa catingapaca Jehová Diospa ejemplota catishpami shujcuna imata ali rurashcata ricuna canchi. Chaita ruranaca ¿imamandata ali can? Shujcuna imata ali rurai ushashcata ricushpaca, shujcuna ñucanchitara alicachishpa ricuchunga na munanajushunllu. Shinallata shujcuna imata rurana cashcatapash na ninajushunllu. Chaipa randica consejota mañashpami paicunapa yuyaicunatapash chasquishun (Proverbios 13:10). Shinallata, ñucanchi huauquicuna imata ali ruranajujta ricushpaca imapash mushuj asignacionda chasquijpica cushijushunmi. Ashtahuangarin, ñucanchi huauquipanicunahuan igual sirvita ushashcamandami Jehová Diostaca agradicishun (1 Pedro 5:9).

18. Ashtahuan ali concienciata charingapaj, humilde cashpa catingapaca ¿imatata rurana capanchi?

¹⁸ Ashtahuan humilde cashpa catingapaj munashpaca, Bibliapa textocunapi pensarishpami ashtahuan ali concienciata charina canchi. Bibliapi textocunami Jehová Dios imata pensajta, imashina sintirijta intindichun ayudan. Jehová Dios munashcashna pensari callarishpaca pai alicachishca decisiongunatami agllashun. Bibliata estudiashpa, Jehovata mañashpa, imata yachajushcata pactachishpaca ashtahuan ali concienciata charishpami shujcunapipash pensarishun (1 Timoteo 1:5). Tucui chaicunata rurajpica Jehová Diosca ninmi, Jesusta ashtahuan ali catichun, humilde cashpa catichunmi ayudasha nishpa (1 Pedro 5: 10).

19. Cunanbipash shamuj punllacunapipash humilde cashpa catichunga ¿imata ayudanga?

¹⁹ Judá llactamanda profetata cutin yaripashun. Paica tucuita ari nishpa na humilde cashcamandami huañuitapash tarirca, Jehová Diospa ñaupajpi ali ricurinatapash chingachirca. Cutin, Jehová Diosta ali sirvijcunapa ejemplota yarinaca, shinlli cajpipash humilde cashpa catichunmi ayudan. Jehová Diosta ashtaca huatacunata sirvijushpacarin ashtahuanmi Jehovapi confiana canchi (Proverbios 8:​13). Ñucanchi causaipi ima cambiocuna ricurijpipash Jehovata cazushpami catina canchi. Chaita ruranaca shuj jatun bendicionmi can. Shinaca, cai temapi yachajushcata pactachishpa catingapaj esforzaripashunchi. Shinami, humildecuna cashun, Jehová Diospa munaitapash siempre rurashpa causashun.