1, 2. ¿Imamandata apóstol Pabloca Hebreos nishca cartata escribirca?

 HUATA 61​pica, Jesusta catij israelitacunaca tranquilomi causanajurca. Apóstol Pablopash Roma llactapi prezo cashpapash, huaquin punllacuna jipa llujshinatami shuyajurca. Cutin, paipa cumba Timoteoca ñami carcelmanda llujshishcarca. Paicunaca Judea llactamanda huauquipanicunata ricungapaj rinatami pensarishca carca (Hebreos 13:23). Shinapash, chai tranquilo causaica ñallami tucurigrijurca. Jesús nishca shinaca, 5 huatacuna jipaca romano soldadocunami Jerusalendaca llaquichigrinajurca. Chaimandami Jesusca nishcarca, romano soldadocuna shamujujta ricushpaca Judeapi, Jerusalenbi causajcunaca llujshinami canguichi nishpa (Lucas 21:20-24).

² Jesús cai shimicunata nishcamandaca, ñami 28 huatacuna yalishcarca. Jesusta catij israelitacunaca chai huatacunapi llaquicunata, problemacunata charishpapash Jehovata sirvinataca na saquircachu (Hebreos 10:32-34). Shinapash, chai punllacaman na tiashca jatun llaqui japijpimi paicunapa fe imashina cashcata ricuchina carca (Mateo 24:20, 21; Hebreos 12:4). Jesusta cazushpa catingapaj, salvaringapaca paicunapa fe shinlli cachun, ima horapash na tiashca llaqui japijpi aguantashpa catinatami minishtirca (Hebreos 10:36-39, liingui). Chaimandami, Jehová Diosca apóstol Pablotaca chai huauquipanicunaman shuj cartata escribichirca. Chai cartatami cunanbica Hebreos nishpa rijsinchi.  Chai cartami ima llaquicuna shamujpipash shinlli tucushpa catichun paicunataca ayudarca.

 3. ¿Imamandata Hebreos nishca cartapi shimicunataca yaipi charina capanchi?

³ Cunanbipashmi Hebreos nishca cartapi shimicunataca yaipi charina canchi. Ñucanchicunapash Judea llactapi Jesusta catijcunashnami causanajunchi. Casi tucuicunami pipash na llaquichijpi tranquilo Jehovata ali sirvishpa catinchi. Shinapash, ashtaca huauquipanicunaca cai ‘tucurimui punllacunapica’ jatun llaquicunata, problemacunata charishpapash ñaupamanmi catishca (2 Timoteo 3:1, 12). Ima cajpipash, tucuicunallatami apóstol Pablopa punllacunapi Jesusta catijcunashna, ñucanchi fe imashina cashcata ricuchina punlla chayamunata yaipi charina canchi (Lucas 21:34-36, liingui).

 4. a) Huata 2016paca ¿ima textota canga? b) ¿Imapata cai textoca ayudanga?

⁴ Chai punllapa listo cangapaca ¿imata ayudanga? Bibliapica cai ali consejotami cun: “Huauquipurashna juyarinataca na cunganachu canguichi” nishpa (Hebreos 13:1, MTQI). Cai textopi shimicunataca, apóstol Pabloca hebreo huauquipanicunapa fe ashtahuan shinlliyachunmi escribirca. Caimi 2016 huatapa texto canga. Cai textopi shimicunami ñucanchi fe ashtahuan shinlliyachun ayudanga.

 5. Huauquipurashna juyarinaca ¿imata can?

⁵ Huauquipurashna juyarina nishpaca, ñucanchi propio familiata o shuj ali rijsi amigota juyanatami nijun (Juan 11:36) (“¿Imatata nisha nin?” nishca recuadrota ricupangui). Shinaca, Jesusta ali catijcunaca na jahua shimillachu huauquipanimi canchi ninchi, ciertopacha huauquipanicunami canchi (Mateo 23:8). Apóstol Pabloca nircami: “Huauquipurashnami, aliguta juyarina canguichi. Paimi, ñucatapash yali ali yashpami, caishuj chaishuj alicachirina canguichi” nishpa (Romanos 12:10). Cai shimicunaca, ñucanchi huauquipanicunata ninanda juyana cashcatami intindichin. Huauquipurashna juyarishpa, Jesús juyashcashna juyashpaca, gulpicunallata ali amigocuna cashpami ali cashun.

 6. Jesusta ali catijcunaca ¿picunatata huauquipurashna juyana capanchi?

⁶ Shuj yachajushca runa nishca shinaca, Jesusta catijcunallami paicunapa librocunapica ‘huauquipurashna juyarina’ shimitaca utilizan. Punda tiempopica, judiocunaca paicunapa familiata o ali rijsi amigocunatallami “huauqui” nishpa parlan carca. Na judío cajpica nunca na “huauqui” ninllu carca. Shinapash, Jesusta ali catijcunapaca Jehovata sirvijcunaca maijan llactamanda cashpapash tucuicunami huauquipanicuna can (Romanos 10:12). Chaimandami, Jehová yachachishca shinaca tucuicuna propio huauquipanicunashna caishuj chaishuj juyarinchi (1 Tesalonicenses 4:9). Shinapash ¿imamandata huauquipanicunashna juyarishpa catina minishtirin?

 7. a) ¿Imamandata huauquipurashna juyarina capanchi? b) ¿Imamandata huauquipurashna ashtahuan juyarina minishtirin?

⁷ Jehová Dios mandashcamandami ñucanchicunaca huauquipurashna juyarishpa catina canchi. Ñucanchi huauquipanicunata na juyashpaca, Jehovata juyaitaca na ushashunllu (1 Juan 4:7, 20, 21). Shinallata, tucuicunallatami caishuj chaishuj imagupipash ayudaringapaj minishtinchi. Llaquicuna japijpicarin ashtahuanmi minishtinchi. Hebreo huauquipanicunaman apóstol Pablo escribishpaca, paicuna asha punllacuna jipalla tucuita saquishpa, chai llactamanda llujshishpa rina cashcatami yacharca. Jesuspash chai punllacuna ninan llaquicuna tiana cashcataca ñami villashcarca (Marcos 13:14-18; Lucas 21:21-23). Chai llaqui punllacuna nara chayajpillatami, Jesusta catijcunaca huauquipurashna ashtahuan juyarina carca (Romanos 12:9).

 8. Jatun Manllanai Llaqui Punllacuna nara chayamujpillata ¿imatata rurana capanchi?

 ⁸ Jatun Manllanai Llaqui Punllacunaca ñallapachami chayamunga (Marcos 13:19; Apocalipsis 7:1-3). Chai punllapica, ‘cangunaca ucucunaman yaicushpa punguta vicharichi. Dios fiñashcata yalichingacaman ashaguta pacajuichi’ nishpa mandashcatami yaipi charina canchi (Isaías 26:20). ‘Ucucunaca’ tal vez congregaciongunami canga. Congregaciongunapimi huauquipanicunahuan tandanajushpa Jehovata adoranchi. Cada semana tandanajushpapash, hebreocunaman apóstol Pablo nishca shinaca, ñucanchicunapash caishuj chaishuj animarishpa, juyarishpa, alita rurashpami causana canchi (Hebreos 10:24, 25). Cunanbimi ashtahuan juyarina canchi. Shinami ima llaquicuna japijpipash aguantashpa catita ushashun.

 9. a) ¿Imashinata cunanbillata ñucanchi huauquipanicunata juyashcata ricuchi ushapanchi? b) Quiquinba llactapi o shuj ladocunapi huauquipanicuna imashina juyaita ricuchishcata parlapai.

⁹ Cunanmi ñucanchi huauquipanicunata juyashcata ricuchina oportunidadta charinchi. Ashtacacunaca terremotocuna tiajpi, yacu jatarishpa llaquichijpi, manllanaita huaira jatarishpa llaquichijpi, marpi olacuna jatarijpi, shuj shuj llaquicuna japijpimi ninanda sufrinajun. Shujcunacarin shinlli jarcaicunatami chimbapuranajun (Mateo 24:6-9). Cutin ashtaca huauquipanicunaca cai nali mundopi causajuimandami culqui faltalla causan (Apocalipsis 6:5, 6). Ashtahuan llaquicuna japijpicarin, huauquipanicunata ashtahuan juyashcatami ricuchita ushanchi. Cai mundopi gentecuna ñana juyaita ricuchijpipash, ñucanchicunaca huauquipurashna juyarishpami catina canchi (Mateo 24:12) ^[1] (cai tema tucuripi notata ricupangui).

10. ¿Imatata cunanga yachajupashun?

¹⁰ Ashtaca llaquicuna tiajpipash huauquipurashna juyarishcata ricuchingapaca ¿imatata rurana canchi? Huauquipurashna shungumanda juyarishcataca ¿imashinata ricuchi ushanchi? Apóstol Pabloca huauquipurashna juyarishcata ricuchingapaj imata rurana cashcataca, Hebreos capítulo 13​pimi escribirca. Shinaca 6 yuyaicunata yachajupashun.

11, 12. Mingachinaca ¿imatata nisha nin? (Callari dibujota ricupangui).

¹¹ ‘Mingachinataca na cunganachu canguichi’ (Hebreos 13:2, liingui). Mingachina nishpaca, na rijsishca gentecunata ali tratanatami nijun. Chai shimicunaca Abrahán, Lot imata rurashcatami yarichin. Paicunaca na rijsishcacunatami ali tratashpa paicunapa huasipi chasquirca. Jipamanga, chai na rijsishcacunaca angelcuna cashcatami yachaj chayarca (Génesis 18:2-5; 19:1-3). Apóstol Pabloca hebreo huauquipanicuna paicunapura mingachinata ama cungachun animangapami Abrahanmandapash, Lotmandapash parlarca.

¹² Ñucanchicunapash mingachijcuna cangapaca ¿imatata rurana canchi? Huasipi micungapaj o asha ratoguta yalingapami huauquipanicunata invitai ushanchi. Shinallata, superintendente huauqui paipa huarmindi ñucanchi congregacionda visitajujpica, paicunata nali rijsishpapash ñucanchi huasiman invitaita ushanchimi (3 Juan 5-8). Shinapash, huauquipanicuna ricuchunlla imapash ashtaca, valishca micunata rurashpa culquita gashtanaca na minishtirinllu. Paicunata animangapami munanchi. Shinallata, ñucatapash invitashcanman yashpaca na invitanachu canchi (Lucas 10:42; 14:12-14). Ocupado cashpapash ñucanchi huauquicunata mingachinataca na cunganachu canchi.

13, 14. Jehovata cazuimanda prezo caj huauquicunataca ¿imashinata ayudai ushapanchi?

¹³ ‘Prezo tiajcunatapash yarinami canguichi’ (Hebreos 13:3, liingui). Apóstol Pabloca Jehovata sirvimanda huauquicuna prezo cashcata yarishpami chai shimicunataca escribirca. Hebreo huauquipanicunaca prezo tiajuj huauquicunata ninanda llaquishcatami ricuchirca. Chaimandami, apóstol Pabloca hebreo huauquipanicunataca ninanda  alicachirca (Hebreos 10:34). Apóstol Pablo chuscu huatacunata prezo cajpica, ladollapi causaj huauquipanicunami paitaca ayudarca. Cutin carupi causaj huauquicunaca, apóstol Pablomanda Diosta mañashpami ayudarca (Filipenses 1:12-14; Hebreos 13:18, 19).

¹⁴ Cunanbipash ashtaca huauquicunami Jehovata cazuimanda prezo can. Chai cárcel ladollapi causaj huauquipanicunaca ima usharishcapimi paicunataca ayudan. Cutin, carupi causashpaca ¿imashinata ayudai ushanchi? ¿Imashinata paicunata na cungashcata ricuchi ushanchi? Huauquicunatashna juyashcata ricuchingapaca paicunamandami Jehovata siempre mañana canchi. Eritrea llactapica huauquicuna, panicuna, uchilla huahuacunapashmi prezo can. Paicunapurapica Paulos Eyassu, Isaac Mogos, Negede Teklemariam huauquicunami can. Paicunaca 20 huatacunata yalitami prezo can. Shinaca, paicunamandami Jehovata mañai ushanchi.

15. ¿Imashinata cusahuarmi causaita respetashcata ricuchinchi?

¹⁵ “Cazaraipash tucuipi alicachi tucushca cachun” (Hebreos 13:4, liingui). Cusahuarmi causaita respetashpa, huainayana juchapi na urmashpami huauquicunata juyashcata ricuchinchi (1 Timoteo 5:1, 2). Congregacionbi shuj panihuan o turihuan juchapi urmashpaca, paitapash paipa familiatapashmi ninanda llaquichishun. Ashtahuangarin, huauquipanicunaca ñucanchipi ñana confiangachu (1 Tesalonicenses 4:3-8). Shinallata pensaripashunchi: Shuj panigu paipa cusa pornografiata ricujushcata yachaj chayashpaca ¿imashinashi sintirinman? ¿Ñuca cusaca ñucata juyahuanmi, cusahuarmi causaitapash respetanmi ninmanllu? Na, na shina ninmanllu (Mateo 5:28).

16. Charishca cosascunahuanlla cushilla causanaca ¿imashinata huauquicunata juyashcata ricuchichun ayudan?

¹⁶ ‘Imaguta charishpapash chaihuanlla cushijushpa causaichi’ (Hebreos 13:5, liingui). Jehovapi confiashpaca charishca cosascunahuanllami cushijushpa causashun. Shina causanaca ¿imashinata ñucanchi huauquicunata juyashcata ricuchichun ayudan? Charishca cosascunahuanlla cushilla causashpaca, huauquipanicuna chai cosascunata o culquita yali importante cashcatami ricuchishun (1 Timoteo 6:6-8). Shinallata, huauquipanicunamandaca na huasha huashalla rimanajushunllu. Ñucanchi causai imashina  cashcamandapash na quejarinajushunllu. Ashtahuanbash, ñucanchi huauquicunataca na envidiashunllu, ashtahuan ashtahuan cosascunata charinatapash na mascashunllu. Chaipa randica, shujcunaman carana munaitami charishun (1 Timoteo 6:17-19).

17. Cushijushca o shinlli tucushca canaca ¿imashinata huauquicunata juyashcata ricuchichun ayudan?

¹⁷ ‘Cushijushca’ o shinlli tucushcami caita ushanchi (Hebreos 13:6, liingui). Jehovapi confiashpaca na manllashpa, shinlli tucushpami jatun llaquicuna ricurijpipash cushilla ñaupaman catishun. Llaquicuna ricurijpipash cushilla canami huauquicunata animachun, cushichichunbash ayudanga. Shinami paicunata juyashcata ricuchishun (1 Tesalonicenses 5:14, 15). Shinallata Jehovapi confiashpaca, Jatun Manllanai Llaqui punllacuna shamujpipash shinlli tucushpa, na manllashpami Jehová salvanata cushijushpa shuyashun (Lucas 21:25-28).

18. Anciano huauquicunata ashtahuan juyashcata ricuchingapaca ¿imatata rurana capanchi?

¹⁸ ‘Cangunata michijcunata yariashpa causaichi’ (Hebreos 13:7, 17, liingui). Congregacionbi anciano huauquicunaca ashtaca cosascunatami rurana can. Chai tucui cosascunata rurangapami paicunaca tiempota llujchin. Chaimandami, anciano huauquicunataca ‘paicuna imagutalla rurashcamandaca ninanda alicachishpa, juyashpa charina’ canchi (1 Tesalonicenses 5:13). Ñucanchicunata imashina ayudashcatapash na cunganachu canchi. Shinami paicunata ninanda agradicishun, paicunata ashtahuan juyashcatapash ricuchishun. Shinallata, ñucanchipa ruraicunamanda ancianocuna fiñarichun o preocuparijuchunga na munanchichu. Chaipa randica paicunata ayudangapaj, cazungapami munanchi.

19, 20. Ñucanchi huauquipanicunata ashtahuan juyachunga ¿imata ayudanga?

¹⁹ Gentecunaca testigo de Jehovacunataca caishuj chaishuj juyaita ricuchishcamandami rijsin. Apóstol Pablopa punllacunapipash shinallatami carca. Shinapash, huauquipanicunapura ashtahuan juyarishpa catichunmi apóstol Pabloca nirca: “Ashtahuan ashtahuan juyarishpa causapanguichi” nishpa (1 Tesalonicenses 4:9, 10). ¿Imatata caimandaca yachajunchi? Tucuicunami cada punlla ñucanchi huauquipanicunata ashtahuan juyashpa catina canchi.

²⁰ Shinaca, ñucanchi Tandanajui Huasipi 2016 huatapa textota ricushpaca, cashna pensaripashun: “Shujcunata ali chasquingapaj, mingachingapaca ¿imatata ashtahuan rurai ushani? Prezo caj huauquicunataca ¿imashinata ayudai ushani? ¿Cusahuarmi causaita respetanichu? ¿Charishca cosascunahuanlla cushilla causanichu? ¿Imata Jehovapi ashtahuan confiachun ayudanga? Congregacionbi ancianocunata ashtahuan cazungapaca ¿imatata rurai ushani?” nishpa. Cai 6 yuyaicunata pactachingapaj ninanda esforzarishunchi. Shinami, cai huatapa textoca Tandanajui huasipi na yanga tiajunga. Chaipa randica, apóstol Pablopa consejota ali pactachichunmi ayudanga. Paica nircami: “Huauquipurashna juyarinataca na cunganachu canguichi” nishpa (Hebreos 13:1, MTQI).