ÑUCA taita nara jichushpa rijpillatami ñucaca Bibliamanda ña yachajujurcani. Ñuca mamaca Bibliamanda huaquin publicaciongunatami charirca. Chai publicaciongunata alicachishpapash dibujocunatami ashtahuanga alicachin carcani. Ñuca taitaca ñuca mama Bibliamanda ñucaman yachachichunga na munanllu carca. Shinapash ñucaca yachajungapaj munashpami Bibliamanda huaquin tapuicunata ruran carcani. Chaimandami ñuca taita na huasipi caj horascuna ñuca mamaca ñucaman Bibliamanda yachachin carca. Bibliamanda yachajushpami ñuca causaita Jehovaman mingashpa 1943 huatapica 10 huatacunatalla charishpa Blackpool-Inglaterra llactapi bautizarircani.

Ñuca mamapash ñucapashmi Jehovata ashtahuan sirvingapaj munarcanchi. Chai punllacunapica gramófono nishcacunahuanmi villachin carcanchi. Gramofonoca jatun, llasha llashami carca, casi 5 kilotami pezan carca. Shinaca pensaripai, shuj uchilla huambraguca imashinashi gramofonotaca apajurca nishpa.

Ña 14 huatacunata charishpaca precursor cangapami munarcani. Chaimandami ñuca mamaca nihuarca, siervo para hermanos nishca huauquihuan (cunanbica superintendente de circuito) parlai nishpa. Chai huauquica nihuarcami, precursor cangapaj munashpaca imagupipash trabajanatami  yachajuna cangui nishpa. Shinami ishcai huatacunata trabajashca jipaca shuj superintendente huauquitaca tapurcani, ñachu precursor caita ushani nishpa. Shina nijpimi paica “ari, ushanguimi” nihuarca.

Shinami abril de 1949 huatapica, ñucanchi charishca huaquin cosascunata jatushpa Middleton-Mánchester llactapi ñuca mamahuanga sirvingapaj rircanchi. Chaipimi precursorcuna shina sirvi callarircanchi. Chuscu quillacuna jipaca shuj huauquihuanmi precursor cumba tucurcani. Sucursalca Irlam llactapi chairalla tiai callarishca congregacionbi sirvingapaj richunmi ñucanchitaca animarca. Ñuca mamaca shuj paniguhuan cumba tucushpami shuj congregacionbi precursoracuna shina sirvinajurca.

17 huatacunata charishpallami ñuca cumbapash ñucapash mushuj congregacionbi tandanajuicunata ñaupaman pushana carcanchi. Chai congregacionbica huaquin huauquicunallami yachachita ushan carca. Jipamanga Buxton congregacionbi ashalla publicadorcuna tiajpi, ayudata minishtinajujpimi chai congregacionbi sirvingapaj rircanchi. Ayudata minishtijuj congregaciongunapi sirvinami jipaman mushuj asignaciongunata pactachichun ayudarca.

1951 huatapica Galaad Escuelaman ringapaj munashpami shuj solicitudta jundachircani. Shinapash diciembre de 1952 huatapica cuartelman ringapaj presentarichunmi cayahuarca. Chaimandami chai llacta Tribunalman presentarishpaca nircani, ñucaca Taita Diosmanda villachishpami purini, nachu ñucataca ladoman saquita ushahuanguichi nishpa. Shina nijpipash Tribunalca na ari nishpami ñucataca 6 quillacunata carcelman cachahuarca. Carcelpi cajpimi Galaad Escuelapa clase 22man rina invitación chayamuhuarca. Shinami julio de 1953 huatapica carcelmanda llujshishcandi Georgic nishca barcota japishpa Nueva York llactaman rircani.

Chayashcandimi 1953 huatapica “Sociedad del Nuevo Mundo” nishca jatun tandanajuiman rircani. Chai jipaca, Galaad Escuela South Lansing-Nueva York llactapi tiana cajpimi chai llactaman trenbi rijurcani. Shinapash carcelmanda chairalla llujshishca caimandaca asha culquigutallami charircani. Chaimandami trenmanda uriajushpa busta japingapaj pasajepa culqui faltajpica shuj runaguta 25 centavosta fiashpa rircani.

Galaad Escuelapica ‘tucuita rurashpa tucui gentecuna imashina causajta catina’ cashcatami alipacha yachachirca (1 Corintios 9:​22). Paul Bruun huauquitapash, Raymond Leach huauquitapash ñucatapash Filipinas llactapi sirvichunmi cacharca. Shinapash visata charingapaca tauca quillacunatami shuyana carcanchi. Shinami visa llujshijpica Rotterdam llactatapash, mar Mediterráneo nishcatapash, canal de Suez nishcatapash, océano Índico nishcatapash, Malasia llactatapash Hong Kong llactatapash yalishpa Manila nishca llactaman chayarcanchi. 47 punllacunata barcopilla rinajushpami 19 de noviembre de 1954 huatataca Manila llactaman chayarcanchi.

Manila llactataca na rijsircanchichu. Chaimandami mushuj costumbrecunata, mushuj idiomata yachajuna carcanchi. Shinapash chairalla chayashpaca Quezón City llacta congregacionbi sirvichunmi ñucanchitaca cacharca. Chaipi ashtaca gentecunaca inglés shimitami parlan carca. Chaimandami 6 quillacuna jipapash huaquin shimicunatalla tagalo nishca idiomapica yacharcanchi. Shinapash shuj mushuj asignacionbica tagalo shimita yachajunami tucurcanchi.

Mayo de 1955 huatapica Leach huauquihuanmi villachishpa huasiman tigrarcanchi. Huasiman chayashpaca cartacuna tiajujtami ricurcanchi. Chaipica ishcandillata superintendente de circuitopi sirvina asignacionda chasquishcatami villajurca. Ñucaca 22 huatacunatallami charircani. Shinapash superintendente de circuito cashpami ‘tucuita rurashpa tucui gentecuna imashina causajta catina’ cashcata yachajushpa catircani.

Shuj ejemplomanda parlapasha. Superintendente de circuito cashpaca ñucapa punda discurso publicotaca visitajushca pueblopa shuj tienda canllapimi curcani. Chai punllacunapica ashtaca gentecuna tiaj pushtucunapimi Filipinas llactapica discurso publicotaca cun carca. Superintendente caimandaca shuj shuj congregaciongunata visitashpami discurso publicota cun carcani. Huaquinbica municipio canllacunapi, plazacunapi, basquetta pugllana canchacunapi, parquecunapi ashtahuanga calle esquinacunapimi discurso publicotaca cun carcani. Shuj punllaca San Pablopimi carcani. Ushashcata tamiajpimi  discurso publicotaca na shuj plazapi cui usharcani. Chaimandami chai congregacionda ñaupaman pushajcunataca Tandanajui Huasipillata discursotaca cusha nishpa. Jipamanga paicunaca tapuhuarcami, Tandanajui Huasipi discursota cushcamandaca discurso público nishpa cuentaita ushanchichu nishpa.

Ñucaca siempremi huauquicunapa huasipi quedan carcani. Huasicunaca pobrellagu cashpapash limpiomi can carca. Tauca viajemi entablado jahuapi shuj esteraguta mandashpalla puñun carcani. Chai huasicunapica canllapi shayarishpami armana carca. Chaimandami imaguhuanbash taparishpa armanata yachajurcani. Ñucaca buspi, huaquinbica uchilla barcocunapi rishpami islacunapi congregaciongunataca visitangapaj rishcani. Nunca na shuj carrotaca charishcanichu.

Tagalo idiomata yachajungapaj na cursota catishpapash huauquicunahuan villachingapaj llujshishpa, congregaciongunata visitangapaj rishpami yachajurcani. Huauquicunaca tagalo idiomata yachajuchun munashpami asha asha yachachihuan carca. Imata panda nijpipash cashna ningui nishpami yachachihuan carca.

Jipamanga, mushuj asignacionda chasquishpami shuj cambiocunatapash rurana carcani. 1956 huatapica Nathan Knorr huauqui visitangapaj shamujpimi shuj asamblea nacionalta charircanchi. Chaimandami ñucaca radiocunaman rishpa asamblea tianata villana carcani. Nunca na chaitaca rurashcarcanichu. Shinapash chaipi huauquicunami chaita rurachunga ayudahuarca. Knorr huauqui shamushcamanda narapash shuj huata tucujpillatami, shuj asamblea nacionalta charircanchi. Ñucami chai asambleapa superintendente carcani. Huauqui Frederick Franzmi visitangapaj shamurca. Paica Estados Unidos Betelmandami carca. Chai huauquiman daca ashtaca cosascunatami yachajurcani. Huauqui Franzca Filipinas llactamanda gentecuna churajuj ropata churajushpami discursotaca curca. Chaita ricushpami huauquipanicunaca cushijushca carca. Ñucapash chai llactapi gentecuna imashina causajtami ashtahuan yachajuna cashcata cuenta japircani.

Superintendente de distrito tucushpaca shuj cambiocunatapashmi rurana carcani. Chai punllacunapica “La felicidad de la Sociedad del Nuevo Mundo” nishca videotami gentecunamanga ricuchin carcanchi. Lugarlla pushtucunapi chai videota ricuchijpimi, ashtaca chuspicuna proyector micha ladoman quimirimushpa molestan carca. Chaimandami jipaman proyectorta limpianaca shinlli carca. Gentecunaman villachishpa videota ricuchinaca na facilchu carca. Shinapash gentecuna cushijujta ricushpa, mundo enteropi Jehovapa organizacionda rijsichunmi ayudanajunchi yashpami cushilla sintirin carcanchi.

Católico curacunaca Testigocuna jatun tandanajuicunata ama charichun nishpami autoridadcunahuanga permisota ama cuchun parlan carca. Paicunapa iglesia ladollapi discursocunata ñucanchicuna cunajujpica gentecuna ama uyachunmi campanacunata shinllita huacachin carca. Shinapash gentecunaca Bibliamanda yachajushpa catircami. Cunanbica chai pushtucunapillatami ashtaca huauquipanicuna Jehovata adoranajun.

1959 huatapica chai llacta sucursalpi sirvichunmi ñucataca invitahuarca. Chaipimi shuj mushuj cosascunatapash yachajurcani. Jipamanga superintendente de zona cachunmi invitahuarca. Shinami shuj llactacunata visitajushpaca Tailandia llactapi sirvijuj Janet Dumond shuti misionera panigutami rijsircani. Unaillaguta ishcandillata cartacunata escribirishca jipami cazararcanchi. Cunangamanga ñami 51 huatacunata cushijushpa Jehovata sirvinajushcanchi.

33 llactacunapi huauquipanicunata visitashpami cushijushcani. Ñucaman cushca asignaciongunamanda shuj llacta gentecunapa costumbrecunata  rijsi ushashcamandaca cushijushcapachami cani. Shuj llactamanda congregaciongunata visitashpami tucui llactamanda gentecunata Jehová Dios juyajta cuenta japishcani (Hechos 10:​34, 35).

Filipinas llactamanda huauquipanicunahuan igual ñucapash ñuca huarmigupash Jehovata sirvi ushashcamandaca ashtacatami cushijunchi. Cunanbica Quezón llacta Betelpimi sirvishpa catinchi. 60 huatacuna huashamanga casi 20 mil publicadorcunallami tiarca. Cunanbica casi 200 mil publicadorcunami tian. Chai tucui huatacuna jipapash Jehovapa munashcata rurangapaca mushuj cambiocunata rurashpami catina cani. Cai último huatacunapica ashtaca cambiocunatami Jehovapa organizacionga rurashca. Chaimandami mushuj cambiocunata rurashpa catina canchi.

Ñucanchicunaca Jehová Dios cushca instrucciongunata catingapaj esforzarishpami ashtacata cushijushcanchi. Shinallata huauquipanicunata sirvishpa catingapaca shuj cambiocunatapash rurashpa catinami canchi. Ñucanchicunaca Jehová Dios caicamanlla ningacamanmi ‘tucuita rurashpa tucui gentecuna imashina causajta catingapaj’ munanchi.