1, 2. Jeftepash paipa ushipash ¿imatata rurana tucurca?

SHUJ runaguca macanajuita mishashpami paipa huasiman tigrajurca. Shinapash huasiman ña chayajujta ricushpami chai runapa ushiguca ninanda cushijushpa candashpa, bailashpa chasquingapaj llujshirca. Chaita ricushpami taitaca paipa jahualla churajushca ropata liquishpa “aij ñuca ushigulla” nishpa llaquirirca. Chai jipami taitaca Jehovaman imata cusha nishcata ushimanga villarca. Jehová Diosman imata nishcata pactachijpica paipa ushiguca ima horapash na cazarashpami huahuacunatapash na charina carca. Shinapash Jehová Diosman imata nishcata yachashpaca ¿imatata chai runagupa ushica rurarca? Ushiguca uyashcandimi nirca, Taita Diosman imaguta carashami nishcataca pactachinapachami cangui nishpa. Chai cuitsaguca Jehovapa mañashca siempre ali cashcata confiashpami shina nirca (Jueces 11:34-37). Paipa ushigu shinlli feta charijta ricushpami chai runagupash ninanda cushijurca. Jehová Dios paipa ushiguta alicachishpa ricunatapash seguromi carca.

 ² Chai runaguca Jefté shutimi carca. Jeftepash paipa ushigupash tucui shunguhuanmi Jehovapi confiashpa Jehovapa mañashcacuna siempre ali cashcatapash confiarca. Chaimandami jatun llaquicunapi cashpapash shinlli feta charishcata ricuchirca. Paicunaca Jehová bendiciachun munashpami ima llaquicunatapash ladoman saquin carca.

3. Jeftepa paipa ushipa ejemplomandaca ¿imatata yachajui ushapanchi?

³ Shinlli feta charishcata ricuchishpa catinaca na facilchu can, ashtacatami esforzarina canchi (Judas 3). Chaimandami cai temapica, llaquicunapi cashpapash Jeftepash paipa ushipash shinlli feta charishcata imashina ricuchishcata yachajupashun.

4, 5. a) Jehová Dios carasha nishca Alpaman chayashpaca ¿imatata israelitacunaca rurana carca? b) Salmo 106​pi nishca shinaca, Jehovata na cazuimandaca ¿imata israelitacunataca pasarca?

⁴ Jeftepash paipa ushipash tucui punllacunami israelitacuna Jehovata na cazuimanda imashina llaqui apanajujtaca ricunajurca. Casi 300 huatacuna ñaupamanmi Jehová Diosca israelitacunataca mandarca, ñuca carasha nishca Alpaman chayashpaca yanga dioscunata adorashpa causanajuj gentecunata huañuchinami canguichi nishpa. Shina nishpa Jehová Dios mandajpipash israelitacunaca na cazurcachu (Deuteronomio 7:1-4). Cazunapa randicarin, israelitacunaca Canaán llactamanda gentecunashnami yanga dioscunata adorai callarishpa, huainayana juchacunapi urmarca (Salmo 106:34-39, liingui).

⁵ Israelitacunallata na cazujpimi Jehová Diosca paicunata contracuna llaquichichun saquirca (Jueces 2:1-3, 11-15; Salmo 106:40-43). Chai llaqui punllacunapica, shinlli feta charishcata ricuchinaca shinllimi cashcanga. Shinlli cajpipash Bibliapi nishca shinaca, huaquingunaca Jehovata tucui shunguhuan juyaimandami Jehovata siempre cushichingapaj munarca. Chai shinlli punllacunapica Jefté paipa ushi, shinallata Elqaná paipa huarmi Ana, paicunapa churi Samuelmi Jehovataca tucui shunguhuan juyan carca (1 Samuel 1:20-28; 2:26).

6. a) Cai mundopi gentecunaca ¿imashinata can? b) ¿Imata rurangapata esforzarina capanchi?

⁶ Cunan punllacunapi ashtaca gentecunaca Canaán llactamanda gentecunashnami can. Jarihuan huarmihuan puñunatalla, millai canatalla, culquita mascanatalla yariami causan. Jehová Diosca chai gentecunapa nali ejemplota catichunga na munanllu. Chaimandami Jehová Diosca imashina israelitacunata cuidarca shinallata ñucanchicunatapash cuidangapaj munan (1 Corintios 10:6-11). Shinaca, israelitacuna imashina llaqui apashcata yarishpami ñucanchicunapash Jehovata na rijsij gentecunapa yuyaicunata, munaicunata na catingapaj esforzarina canchi (Romanos 12:2).

7. a) Jeftepa huauquicunapash, Israel llactamanda ancianocunapash ¿imashinata Jeftetaca tratarca? b) ¿Imatata Jefteca rurarca?

⁷ Jeftepa punllacunapica Jehovata na cazuimandami israelitacunaca cutin cutin contracunapa maquipi llaquichi tucurca (Jueces 10:7, 8). Chashna llaquicunata ricushca jahuapash, paipa huauquicunallata ninanda culirashpa na ricunayachijpimi Jefteca causarca. Israel llactamanda ancianocunapash Jeftetaca na ricunayachinllu carca. Ashtahuangarin huauquicunallata na ricunayachishpa llujchishpa cachajpimi Jefteca paipa chasquina alpacunatapash saquishpa rirca (Jueces 11:1-3). Paita shina tratajpipash Jefteca  paicunapa nali ejemplotaca na catircachu. Chaimandami, Israel llactamanda ancianocuna ayudai nishpa rogajpica, tucui shunguhuan ayudarca (Jueces 11:4-11). Shinapash ¿imamandata paicunapa nali ejemplotaca na catirca?

8, 9. a) Jefteca ¿Moisesman Cushca Leypi ima yuyaicunata intindishpata causarca? b) Jeftepaca ¿imata ashtahuan minishtirishca carca?

⁸ Jefteca alipacha macanajuj soldadomi carca. Ashtahuangarin, Israel llacta imashina tiai callarishcatapash, Moisesman Cushca Leytapash alipachami rijsin carca. Paica Jehová Dios paipa llactata imashina tratajta ricushpami ima ali cajta, ima nali cajtapash intindi usharca (Jueces 11:12-27). Chaimandami paipa tucuilla causaipi imata ruragrijushpapash Jehová imata munashcata intindishpa decisiogunataca ruran carca. Paica alimi yacharca, Jehovata sirvijcunaca na randimanda llaquichirishpa caishujhuan chaishujhuan juyarichun Jehová Dios munashcata. Ashtahuangarin, Moisesman Cushca Leypimi Jefteca paita na ricunayachijcunatapash ali tratana cashcata yachajurca (Éxodo 23:5; Levítico 19:17, 18, liingui).

⁹ Jeftetaca Josepa ali ejemplopashmi ayudashcanga. Joseca paipa huauquicunamanda na ricunayachishca cashpapash llaquishpami paipa huauquicunataca tratarca. (Génesis 37:4; 45:4, 5). Jefteca chaita yarishpami Jehová munashcashna paipash rurashcanga. Jefteca paipa huauquicuna ninanda llaquichijpi sufrishca cashpapash na paipilla pensarijurcachu. Paipaca Jehovapa llactata difindina, Jehovapa shutita difindinami ashtahuan minishtirishca carca (Jueces 11:9). Jehovapi confiashcata ricuchingapami tucui shunguhuan munarca. Chaita ricushpami Jehová Diosca Jeftetapash paipa llactatapash bendiciarca (Hebreos 11:32, 33).

10. ¿Imashinata Bibliapi consejocunaca Jesuspa ali catijcuna cashcata ricuchichun ayudan?

¹⁰ ¿Imashinata Jeftepa ejemplota cati ushanchi? Pensaripashun. Shuj huauqui ñucanchita llaquichishcanman o nalishnalla tratashcanman. ¿Imatashi ruranchiman? Jeftepa ejemplota catishpami Bibliapi yuyachij consejocunapi pensarishpa ima decisiondapash rurana canchi. Shungupi nanachinshna sintirijushpapash Jehovata sirvinata, tandanajuicunaman rinata, huauquipanicunahuan tandanajunataca na saquishpami Jehovata cazuna canchi. Shina rurashpami, llaquicunata aguantashpa shujcunamanbash ali ejemplota ricuchi ushashun (Romanos 12:20, 21; Colosenses 3:13).

11, 12. a) Jefteca ¿imatata Jehovaman carashapachami nirca? b) Paipa nishcata pactachingapaca ¿imatata Jefteca rurana carca?

¹¹ Jefteca Jehová Diospa ayudahuanlla israelitacunapa contracunata mishai ushanataca alimi yacharca. Chaimandami Jehovataca nirca, contracunata mishachun ayudajpica huasiman tigrajujpi maijan ñucata punda chasquingapaj llujshijtami canman ‘cushpa tucuillata rupachisha’ nishpa (Jueces 11:30, 31). Shinapash ¿imamandata Jefteca shina nirca? Ricupashun.

 ¹² Israelitacunapa punllacunapica Jehovata agradicishpami Jehovaman cushpa tucuillata rupachin carca (“¿Imatata nisha nin?” nishca recuadrota ricupangui). Shinaca ¿Jehovata punda chasquingapaj llujshijtachu Jefteca rupachisha nijurca? Na. Jefteca alimi yacharca Jehová Diosca gentecunata huañuchishpa rupachinataca ninanda nalicachijta (Deuteronomio 18:9, 10). Jehovaman cushpa tucuillata rupachisha nishpaca, punda llujshimujtami tucuilla paipa causaipi tabernáculo nishca carpa huasipi Jehovata sirvichun cachasha nishpami Jefteca shina nirca. Jeftepa caranata chasquishpami Jehová Diosca paipa contracunata mishachun ayudarca (Jueces 11:32, 33). Shinapash ¿pitata Jefteca Jehovaman caragrijurca?

13, 14. Jueces 11:35​pica ¿imatata Jeftemandaca yachajui ushapanchi?

¹³ Imashinami cai temapa párrafo 1​pi ricurcanchi, Jeftetaca paipa juyashca shujlla ushigumi pundapi chasquingapaj llujshirca. Chaita ricushpaca ¿imatashi Jefteca rurarca? ¿Jehovaman carashapachami nishcataca pactachircachu? ¿Paipa shujlla ushitaca tabernáculo carpa huasipi paipa tucuilla causaipi sirvichun cacharcachu?

¹⁴ Chashna llaquipi cashpapash Moisesman Cushca Leypa yuyaicunapi pensarishpami Jefteca imata ruranataca ali yachashcanga. Shinaca ¿maijan leycunapishi Jefteca pensarishcanga? Shuj leypica nijurcami, canba ashtahuan ali charishcacunatami pundapica Jehovaman cunan cangui nishpa (Éxodo 23:19). Shinallata shuj leypica nijurcami: ‘Maijan cashpapash Mandaj Diospajta rurashapachami nishpaca paipa shimihuan tucui imatalla nishcataca pactachinami’ can nishpa (Números 30:2). Jefteca Jehovata ali sirvij Anapa ejemplotapashmi catina carca. Anaca Jeftepa punllacunapimi causashcanga. Jehovaman carashami nishcata pactachina shinlli cajpipash Jeftepash paipa ushipash pactachinami carca. Tabernáculo carpa huasipi sirvijuimandaca Jeftepa ushica nunca na cazarashpami huahuacunatapash na charina carca.  Jeftepa familiapash chingarijpimi pai charishca alpacunatapash shujcuna japina carca (Jueces 11:34). Shina cajpipash Jefteca nircami: “Mandaj Diosmanmi cushapachami nircani. Chaitaca, na saqui ushanichu” nishpa (Jueces 11:35). Imashinami ricupanchi Jefteca shinlli fetami charirca. Shinllita esforzarishcamandami Jehová Diosca Jeftetapash paipa ushitapash ninanda alicachishpa bendiciarca. ¿Ñucanchipash Jefteshna shinlli feta charishcata ricuchi ushanchimanllu carca?

15. a) Jehovaman mingarishpaca ¿imatata niparcanchi? b) ¿Imashinata shinlli feta charishcata ricuchi ushapanchi?

¹⁵ Jehovaman mingarishpaca nircanchimi, canba munaitami pundapi churasha nishpa. Chai nishcata pactachina na siempre fácil canataca alimi yacharcanchi. Shinapash ñucanchi na munashcata Jehová mandajpica ¿imashinata sintirinchi? Jehovaman nishcata pactachishpa, Jehovata aliguman cazushpami Jefteshna shinlli feta charishcata ricuchinchi. Shinlli cajpipash cazungapaj esforzarijpi Jehová Dios ashtacata bendicianataca alimi yachanchi (Malaquías 3:10). Cutin Jeftepa ushica ¿imata tucurca? Paipa taita imata carasha nishcata yachashpaca ¿imatata rurarca?

16. Paipa taita imata nishcata yachashpaca ¿imatata Jeftepa ushica rurarca? (Callari dibujota ricupangui).

¹⁶ Jeftepa carashami nishcapash, Anapa carashami nishcapash shuj shujmi carca. ¿Imamandata shican carca? Ana paipa churiguta Jehovaman carashami nishpaca, nazareo cuenda tucushpa Jehovapa tabernáculo carpa huasiman rishpa causanatami nijurca (1 Samuel 1:11). (“¿Imatata nisha nin?” nishca recuadrota ricupangui). Nazareo nishcacunaca cazarashpa huahuacunatapash charinallami carca. Cutin Jefteca paipa ushita rupachinshna Jehovaman caranamandami parlajurca (Jueces 11:37-39). Chaimandami Jeftepa ushica na cazarashpa huahuacunatapash na charina carca. Pensaripai, Jefteca Israel llactapica importantepachami carca. Jeftepa ushi caimandaca Israel llactapi shuj ali familiamanda huambraguhuanmi cazaranalla carca. Shinapash taita nishcata pactachishpaca tabernáculo carpa huasipimi Jeftepa ushica sirvishpa huañuna carca. Chaita yachashpaca ¿imatashi Jeftepa ushica rurarca? Jehovata sirvina ashtahuan importante cashcata ricuchishpami nirca: ‘Ñuca taitalla Mandaj Diosman imagutapash carashapachami nishca cashpaca, imashina can  nishcashnallata imatapash rurahuailla’ nircami (Jueces 11:36). Jehovata sirvinamandami Jeftepa ushiguca cazarana munaitapash, huahuacunata charina munaitapash ladoman saquirca. Shinaca ¿imashinata Jeftepa ushipa ali ejemplota cati ushanchi?

17. a) Jefteshna paipa ushishna shinlli feta charishcata ricuchingapaca ¿imatata rurai ushapanchi? b) Hebreos 6:10-12​pi shimicunaca ¿imashinata quiquindaca animan?

¹⁷ ¿Imashinata Jeftepa, paipa ushipa ejemplotaca cati ushanchi? Cunan punllacunapica ashtaca joven Testigocunami huaquin huatacunatallapash cazarana munaita, huahuacunata charina munaitapash ladoman saquishca. ¿Imamandata shina rurashca? Jehovata ashtahuan sirvingapaj munashpami shina rurashca. Cutin mayorlla huauquipanicunaca huahuacunahuan, nietocunahuan canata alicachishpapash, paicunahuan cana tiempotami ashata ladoman saquishca. Paicunapash paicunapa tucui fuerzahuan Jehovata sirvingapaj munashpami shina rurashca. Huaquingunaca Tandanajui Huasita rurashpami ayudan. Cutin shujcunaca Diospa Reinomanda Villachijcunapa Escuelaman rishpami ayudachun minishtijuj congregaciongunapi sirvingapaj rishca. Cutin shujcunacarin, Jesús Huañushcata Yarina tiempopi ashtahuan villachingapami arreglocunata rurashca. Jehová Diosca paita juyaimanda chai huauquipanicuna imatalla rurashcataca na cungangachu (Hebreos 6:10-12, liingui). Cutin quiquinga ¿Jehovata ashtahuan sirvingapaj esforzarigripanguichu?

18, 19. a) ¿Imatata Jeftemandapash paipa ushimandapash yachajuita ushapanchi? b) ¿Imashinata Jeftepa paipa ushipa ejemplota cati ushapanchi?

¹⁸ Jeftemanda paipa ushimandaca ashtaca ali cosascunatami yachajuita ushanchi. Jefteca imata ruragrijushpapash Jehová imata nijta pundapi churashpami decisiondaca ruran carca. Nali gentecunapurapi causashpapash paicunapa nali ejemplota ama catingapami esforzarirca. Shujcuna llaquichishpa nali tratajpipash shinlli feta charishcatami ricuchirca. Shujcuna Jehovata na cazujpipash Jeftepash paipa ushipash shinlli feta charishcatami ricuchirca. Paicunapa munaicunata huashaman saquishpa Jehovata pundapi churashcamandami Jehová Diosca Jeftetapash paipash ushitapash bendiciarca. Ashtahuangarin, paicunapa ali ejemplohuanmi Jehová Diosca shujcunapash paita sirvichun ayudashca.

¹⁹ Bibliapica ninmi: ‘Dios carashapachami nishcacunata crishpa, shuyashpa japijcunata ricushpa cangunapash paicunashnallata catinguichi’ nishpa (Hebreos 6:12). Shinaca Jeftepa paipa ushipa ali ejemplota catishpa ñucanchicunapash tucui horas shinlli feta charishcata ricuchipashunchi. Siempre yaripashunchi, Jehová Diosca paipi crishpa, shinlli feta charijcunataca alicachishpami ricujun.