Taita Diosca Abrahán runagutaca “canba miraimandaca cai Alpapi tucuilla llactacuna bendiciai tucunga” nircami (Génesis 22:18, NM ). Shina nishpaca ¿pimandata Taita Diosca parlajurca?

Casi dos mil huatacuna huashamanmi Taita Diosca, Jesús milagrocunata rurachun poderta curca. Chai milagrocunami, Jesús Abrahán runagupa mirai cashcata ricuchirca. Shinami tucui gentecuna Abrahanba miraimanda bendiciai tucuna cashcata Taita Diosca pactachirca (Gálatas 3:14).

Jesusca milagrocunatami rurarca. Chai milagrocunata ricushpami Taita Dios Jesusta cachamushcata gentecunaca cuenta japirca. Shinallata chai milagrocunami Taita Dios Jesusta utilizashpa jipa punllacunapi gentecunata imashina bendicianata ricuchijurca. Shinaca Jesús imashina cajta yachangapaca cai cati yuyaicunapi ricupashun.

Jesusca juyaj. Caimandami ungushca gentecunataca jambirca.

Shuj viajeca lepra ungüita charij jarica, can munashpaca ñucata jambihuan nishpami Jesustaca mañarca. Chaimi Jesusca chai jarita tacarishpa, “Ari, alichishallami” nishpa nirca. Shinami chai jariguca sanoyarca (Marcos 1:40-42).

Jesusca na mitsaj. Caimandami ashtaca gentecunaman micunata cararca.

Jesusca gentecuna yarjai pasachunga na munarcachu. Chaimandami ashalla tandaguta, pescadoguta japishpa, shuj milagrota rurashpami Jesusca ashtaca ashtaca gentecunaman micunata cararca (Mateo 14:17-21; 15:32-38). Chai gentecunaca vijsa jundangacamanmi micurca. Ashtahuanbash micunaca puchurcami.

Jesusca gentecunata llaquimandami. Huañushcacunataca causachirca.

Jesusca shuj viuda huarmigupa shujlla churigu huañushcata ricushpa, chai huarmigupash solalla quidajujta ricushpami ‘ninanda llaquishpa’ chai huarmigupa churigutaca cutin causachirca (Lucas 7:12-15).