1. a) ¿Imashinata yachanchi, Jehovata ali sirvijcunaca Babilonia shuti jatun pueblomanda libre quedana cashcata? b) ¿Ima tapuicunatata cai temapica yachajupashun?

ÑAUPA temapimi yachajurcanchi, Babilonia shuti jatun puebloca Jesusta ali catijcunata prezotashna charijushcata. Shinapash paicunaca na para siemprechu prezoshna cana carca. ¿Imamandata shina ninchi? Bibliapica ninmi, Jehová Diosca paipa sirvijcunataca tucuilla panda religiongunamanda ‘llujshimuichi’ nishpami mandarca nishpa (Apocalipsis 18:4, liingui). Chai textopi nishca shinaca, Jesusta ali catijcunaca Babilonia shuti jatun pueblomanda libre quedaita ushanami carca. Imashina libre quedashcataca yachangapaj munanchimi. Shinapash, chaita nara yachajushpallatami cai quimsa tapuicunata yachana canchi: 1) Bibliamanda Yachajujcunaca ¿imashinata 1914 huata nara chayajpillata Babilonia shuti jatun pueblomanda llujshingapaj decidirishca carca? 2) ¿Imashinata ñucanchi huauquipanicunaca Primera Guerra Mundial punllacunapipash villachinataca na saquirca? 3) Aliguta intindichichun minishtinajujpipash ¿Babilonia shuti jatun puebloca prezotashnachu paicunataca charijurca?

2. Primera Guerra Mundial nara callarijpillata ¿imatata Charles Taze Russell huauquipash shuj huauquicunapash rurangapaj munarca?

² Primera Guerra Mundialca 1914-1918 huatacunapimi tiarca. Chai  guerra nara callarijpillatami Charles Taze Russell huauquipash shuj huauquicunapash cuenta japirca, Jesustami catinchi nij tucushca religiongunaca Bibliamanda na yachachinajushcata. Chaimandami paicunaca panda religiongunahuanga na imapipash chapuringapaj munarca. 1879 huatapi llujshishca Zion’s Watch Tower, cunanbi Villajun revistapica nircami, maijan iglesiamanda cashpapash Jesuspa noviashnami canchi nishpapash, gobiernocunata ayudanajuj religiongunaca Babilonia shuti jatun pueblopa prezoshnami can, Bibliapica panda religiongunataca shuj huainayaj huarmihuanmi chimbapuran nishpa (Apocalipsis 17:1, 2, liingui).

3. ¿Imashinata Bibliamanda Yachajujcunaca panda religiongunahuan na imapipash chapuringapaj munashcata ricuchirca? (Callari dibujota ricupangui).

³ Jesusta ali catij huauquipanicunaca panda religiongunata apoyajcunata Jehová Dios na bendicianataca alimi yacharca. Chaimandami ashtaca huauquipanicunaca, paicunapa punda religiongunamanga ñana cai iglesiamanda cangapaj munanchichu nishpa cartacunata cacharca. Huaquingunacarin, paicunapa iglesiacunapi tucuicuna yachachunmi, tucuicuna uyajta chai cartacunata liirca. Chai cartacunata liichun na saquijpica, paicunapa iglesiapi tucuilla gentecunamanmi cada unoman ñana cai iglesiamanda cangapaj munanichu nishpa shuj carta cachan carca. Bibliamanda Yachajujcunaca panda religiongunahuan imapipash na chapuringapaj munashcata seguro cashpami shina rurarca. Chai huatacunamanda ashtahuan punda huatacunaman chaita rurashpaca huañuchi tucunmanmi carca. Shinapash 1870 huatacunapi gobiernocunaca ñana religiongunataca apoyanllu carca. Gentecunaca Bibliamanda o paicunapa yuyaicunamanda parlangapaj munashpapash parlanallami carca.

4. Primera Guerra Mundial punllacunapica ¿imatata Bibliamanda Yachachijcunaca rurarca? Shuj ejemplota churapai.

⁴ Bibliamanda Yachajujcunaca familiacunaman, rijsicunaman, paicunapa iglesiacunapi cumbacunaman ñana cai iglesiamanda cangapaj munanchichu nishpapash na chaipilla saquirircachu. Paicunaca tucuilla gentecunamanmi Babilonia shuti jatun puebloca shuj huainayaj huarmishnami can nishpa villangapaj munarca. Chaimandami Jesusta ali catijcunaca ashallacuna cashpapash diciembre de 1917 huatamanda callarishpa 1918 callari quillacunacamanga, 10 millón tratadocunata gentecunaman saquirca. Chai tratadopica “Babilonia shuti jatun puebloca urmashcami” nishpami villachijurca. Ashtahuangarin, Jesustami catinchi nij tucushca religionguna imashina cajtami nijurca. Chaita uyashpa, ricushpaca iglesiacunapi ñaupaman pushajcunaca culirashcacunapachami cashcanga. Shinapash Jesusta ali catijcunaca na manllashpami villachishpa catirca. Paicunaca ‘Taita Diostami, runacunatapash yali ashtahuan cazunapacha canchi’ nishpami villachishpa catirca (Hechos 5:29). Shinaca, Primera Guerra Mundial punllacunapica ¿Babilonia shuti jatun puebloca Jesusta ali catijcunataca prezotashnachu charijurca? Na. Ashtahuangarin, Jesusta ali catij huauquipanicunaca Babilonia shuti jatun pueblomanda libre quedanajushpami shujcunapash Babiloniamanda libre quedachun ayudangapaj munarca.

5. ¿Imamandata ninchi, Primera Guerra Mundialpipashmi Jesusta ali catij huauquipanicunaca villachinata na saquircachu nishpa?

⁵ Punda huatacunapica ninmi carcanchi, Primera Guerra Mundialpi villachinata saquishcamandami Jehová Diosca paipa catijcunata na alicachishpa ricurca. Chaimandami chai punllacunapica Babilonia shuti jatun pueblo paicunata asha tiempota prezotashna charichun Jehová Diosca saquirca nishpa. Shinapash 1914manda 1918​caman Jehovata ali sirvinajushca huauquipanicunaca nircami, Bibliamanda Yachajujcunaca chai huatacunapipash villachishpa catingapami ashtacata esforzarircanchi nishpa. Shinaca, chai punllacunapi Bibliamanda Yachajujcuna imatalla rurashcata ashtahuan ali intindishpami Bibliapi parlashcacunata ashtahuan ali intindishun.

6, 7. a) Bibliamanda Yachajujcunaca ¿ima ishcai jarcaicunatata Primera Guerra Mundial punllacunapica charirca? b) ¿Imashinata yachanchi Bibliamanda Yachajujcunaca villachishpa catishcata?

⁶ Primera Guerra Mundial punllacunapica, Bibliamanda Yachajujcunaca villachinataca na saquircachu.  Shinapash jatun jarcaicunatami charirca. Ishcai jarcaicunata ricupashun. Pundapica, publicaciongunata liishpalla intindichunmi librocunata saquin carca. Bibliahuanlla imashina villachinataca na yacharcachu. Chaimandami “El misterio terminado” librota 1918 huata callari quillacunapi gobierno prohibijpica ashtaca huauquipanicunaca imashina villachinataca na atinarca. Chai punllacunapica shuj jarcaipashmi tiarca. ¿Imata carca? Gripe española nishcami tiarca. Chai ungüica ñapash chimbanllami carca. Chaimandami shuj shuj ladocunaman ritapash, villachitapash na ushan carca. Chai ishcai jarcaicuna tiajpipash Bibliamanda Yachajujcunaca villachishpa catingapami ashtacata esforzarirca.

⁷ 1914 huatapica “Foto-Drama de la Creación” peliculatami Bibliamanda Yachajujcunaca ricuchi callarirca. Colorhuan fotocuna, sonido churashca peliculami carca. Chashna peliculacunaca chai tiempocunapica nara tiarcachu. “Foto-Drama de la Creación” peliculataca “Drama” nishpami rijsin carca. Peliculaca Adán tiai callarishcamanda huaranga huatacunata Jesús mandangacaman ima pasanatami ricuchijurca. 1914 huatapica 9 millón yali gentecunami chai peliculataca ricurca. Aliguta pensarijpica cunanbi tucuilla Testigocunatapash ashtahuan yali gentecunami chai peliculataca ricurca. Shinallata shuj informepica ninmi, 1916 huatapica 809 mil yali gentecunami Estados Unidospica Bibliamanda shuj discursota uyarca nishpa. Cutin 1918 huatapica, casi 950 mil gentecunami Bibliamanda discursocunataca uyarca. Imashinami ricupanchi, Bibliamanda Yachajujcunaca villachishpami catinajurca.

8. Ñaupaman pushaj huauquicunaca ¿imashinata Primera Guerra Mundial punllacunapipash Bibliamanda Yachajujcunataca animarca?

⁸ Primera Guerra Mundial punllacunapica, ñaupaman pushaj huauquicunaca shinllitami esforzarirca Bibliamanda publicaciongunata huauquipanicunaman cungapaj, Bibliamanda Yachajujcunata tucuillata animangapapash. Ñaupaman pushajcuna aliguta ayudajpimi Bibliamanda Yachajujcunaca shinlli tucushpa villachishpa catirca. Richard H. Barber huauquica chai punllacunapipash villachishpa catircami. Paica ninmi: “Huaquin superintendentecuna congregaciongunata visitashpa catichun, Villajun revistacuna llujshishpa catichun, gobiernocuna prohibijpipash Canadá llactaman revistacunata cachashpa catichunmi ayudarcanchi. Ñucaca El misterio terminado libromanda uchilla copiacunata cachana bendiciondami charircani. Chai copiacunataca, gobiernocuna  quichujpi libro illaj quedashca huauquipanicunamanmi cachan carca. Huauqui Rutherfordca ñucanchitaca nircami, Estados Unidospa tauca llactacunapi jatun tandanajuicuna tiachun arreglocunata rurapaichi, shujcunatapash animachun discursocunata cuj huauquicunatapash cachapaichi” nishpa.

9. a) ¿Imatata Bibliamanda Yachajujcunaca 1914 huatamanda 1919 huatacamanga aliguta intindina carca? b) Aliguta intindichichun minishtinajujpipash ¿nita ushanchimanllu Babilonia shuti jatun puebloca Bibliamanda Yachajujcunataca prezotashnami charijurca nishpa?

⁹ Bibliamanda Yachajujcunaca huaquin cosascunataca ali intindinarami carca. Shuj ejemplota ricupashun. Paicunaca Bibliapi nishca shina, gobiernocunata imashina cazunataca nara ali intindircachu (Romanos 13:1). Chaimandami guerracunapi na chapurina cashcataca na ali intindirca. 30 de mayo de 1918 huatapica Estados Unidosmanda presidenteca gentecunataca nircami, guerra ama tiachunmi mañana canguichi nishpa. Shina nijpimi The Watch Tower revistapipash Bibliamanda Yachajujcunataca guerra ama tiachunmi mañana canguichi nishpa animarca. Huaquin huauquipanicunacarin, asha culquihuanmi guerrata ayudarca. Shujcunacarin soldadocuna tucushpami guerraman rirca. Imashinami ricunchi, Bibliamanda Yachajujcunaca aliguta intindichichunmi minishtinajurcara. Shinapash ¿nita ushanchimanllu Babilonia shuti jatun puebloca Bibliamanda Yachajujcunataca prezotashnami charijurca nishpa? Na. ¿Imamandata shina ninchi? Primera Guerra Mundial punllacunapica ñami Bibliamanda Yachajujcunaca tucuilla panda religiongunamanda libre quedanajurca (Lucas 12:47, 48, liingui).

10. ¿Imashinata Bibliamanda Yachajujcunaca shuj gentecunapa causaita respetashcata ricuchirca?

¹⁰ Bibliamanda Yachajujcunaca, Jesusta catijcuna guerracunapi na chapurina cashcata na ali intindishpapash shuj genteta huañuchina na ali cashcataca yacharcami. Chaimandami Primera Guerra Mundialpi huaquin huauquicunaca soldadocuna tucushpa, armacunahuan cashpapash shuj gentecunata huañuchingapaca na munarca. Na huañuchingapaj munajcunataca, macanajungapaj rinajuj soldadocunapa ñaupajpimi churan carca. Shinami guerrapi cashpaca huañuchi tucun carca.

11. Bibliamanda Yachajujcuna na guerraman ringapaj munajpica ¿imatata gobiernocunaca rurangapaj munarca?

¹¹ Bibliamanda Yachajujcuna Jehovata sirvishpa catijpica, Diabloca culirashpami ‘mandashcacunata’ o leycunata churachishpa jarcangapaj munarca (Salmo 94:20). Soldadocunata mandaj James Franklin Bell generalca huauqui Rutherfordta, shinallata Van Amburgh huauquitaca nircami, guerraman na ringapaj munajcunata, ashtahuanbachaca Bibliamanda Yachajujcunata huañuchina leytami cai llactapica llujchigrijun nishpa. Chai generalca culirashcami carca. Ashtahuanbash nircami, Estados Unidos presidente jarcaimandallami chai leyca nara llujshin. Candaca prezo churashunllatami, ñami yachanchi imata ruranata” nircami.

12, 13. a) ¿Imamandata 8 huauquicunataca prezo churarca? b) Prezo cashpapash ¿imatata 8 huauquicunaca rurashpa catirca? Shuj ejemplomanda parlapai.

¹² Jipamanga, Bibliamanda Yachajujcunataca gobiernocunaca llaquichircami. ¿Imashinata llaquichirca? Ñucanchi organizacionba 8 representantecunatami prezo churarca. Juezca nircami, paicunaca Alemania llacta soldadocunamandapash ashtahuan peligrosomi can nishpa. Ashtahuangarin gobiernotapash, soldadocunatapash, tucuilla iglesiacunapi gentecunatapash na valichishcachu nishpami paicunataca carcelpi quedachun sentenciarca. Shina nishpami, ñucanchi organizacionba 8 representantecunataca Atlanta-Georgia llactapa carcelman prezo cacharca. Shinapash guerra tucurijpica paicunaman cushca sentenciata anchuchijpimi paicunaca libre quedarca.

¹³ Carcelpi cashpapashmi chai 8 huauquicunaca Jehovata cazushpa catirca. ¿Imashinata cazushpa catirca? Paicuna prezo cashpaca Estados Unidos presidente paicunata libre llujchichunmi cashna nishpa escribirca, Bibliapica nijunmi, shuj gentecunataca na huañuchinachu canguichi nishpa. Jehová Diosman mingarishcacuna paicunapa munai Jehovata na cazushpaca Jehová Diospa ñaupajpi na ali ricurishpami tucuchi tucunga. Chaimandami  ñucanchicunaca, shuj gentecunataca na huañuchishunllu nirca. Estados Unidos presidenteman shina nishpa escribinaca na facilchu carca. Shinapash chai 8 huauquicunaca na manllashpami cartata escribirca. Imashinami ricupanchi, chai huauquicunaca siempremi Jehovata cazushpa catirca.

14. Huata 1914manda 1919​caman ima pasashcata nipai.

¹⁴ Malaquías 3:1-3​pica 1914 huatamanda, 1919pa callari quillacunacaman Bibliamanda Yachajujcuna ima pasanatami yachachijurca (chai textota liingui). Chai textocunapi nishca shinaca, Jehová Diosca shuj ‘Amomi’ can, Jesusca ‘ari ninajushcata pactachijmi’ can. Paicunami ‘Leví shuti runapa miraicuna’ imata ruranajujta ricunajurca. ‘Leví shuti runapa miraicunaca’ ungidocunami can. Paicunatami Jehová Diosca ali intindichun ayudashpa, panda yachachishcacunamandapash limpiarca. Chai jipami, 1919 huatapica ‘aliguta cazushpa, aliguta yarishpa sirvij’ esclavota Jesusca agllarca. Paicunami Jehovata tucuilla sirvijcunataca aliguta yachachishpa, imata ruranata yachachunbash ayudana carca (Mateo 24:45). Shinami Jehovata sirvijcunaca Babilonia shuti jatun pueblomanda libre quedarca. Chai punllacunamandami Jehovata sirvijcunaca Jehovamanda ashtahuan yachajushpa paita ashtahuan ashtahuan juyashca. Shina bendiciashcamandaca Jehovata sirvijcunaca ashtacatami Jehová Diostaca agradicin. ^[1] (Cai tema tucuripi notata ricupangui).

15. Babilonia shuti jatun pueblopa panda yachachishcacunamanda libre cachun ayudashcamandaca ¿imashinata Jehová Diosta agradici ushapanchi?

¹⁵ Babilonia shuti jatun pueblopa panda yachachishcacunamanda libre cashcamandaca ashtacatami cushijunchi. Diabloca Jehová Diosta ama ali adorashpa catichunmi ashtaca jarcaicunata churashca. Shinapash mishaitaca na ushashcachu. Jehová Diosca ashtaca gentecuna salvarichun munashpami Babilonia shuti pueblopa panda yachachishcacunamanda libre cachun ayudashca (2 Corintios 6:1). Shinapash panda religiongunami ashtaca millón gentecunataca umachishpa catijun. Chai gentecunaca ayudachun minishtinajunmi. Chaimandami Jehovata ali sirvijcunapa ejemplota catishpa shuj gentecunataca panda religiongunapa yachachishcacunamanda libre cachun ayudana canchi.