IMAPASH regaloguta carajpi alicachishpaca ninandami agradicinguiman. Jesusca chai tiempopi na jambi ushanalla lepra ungüihuan 10 jaricunata jambishpami agradicinaca minishtirishca cashcata ricuchirca. ‘Paicuna puramanda shuj runaguca, ña ali tucushpami Taita Diostaca punchapambagumi cangui nishpa tigramurca’. Chaimandami “Jesusca cashna nirca: Lepra ungüi illaj tucushcacunaca, ¿nachu chungapura carca? ¿Iscun puracunaca maipita?” can nishpa (Lucas 17:12-17). Cai textocunapica, ali rurashcacunataca ñucanchipash ñapash cungajlla cashcatami ricuchijun.

Imashinami ricunchi, Taita Dios paipa Churipa causaita cushpa ñucanchicunata salvashca regaloca tucuita yali valishcami can. Shina rurashcamandaca ¿imatata rurana canchi?

• Chai regalota pi carashcataca alimi rijsina cangui. Gentecunata salvangapaj Jesús paipa causaita cushca cajpipash, yangataca na gentecunaca para siempre causaita chasquingachu. Jesusca cashnami mañarca: “Na llullaj shujlla Taita Dios cashpami, cambaj Churi Jesucristotaca cachamuhuarcangui. Shina cajta rijsishpallami, pipash causaita causagringa” nishpa (Juan 17:3). Quiquin uchila  cajpi pipash quiquinda salvashcata yachaj chayashpaca ¿nachu pi cajta o imamandata salvashcata tapungapaj munanguiman? Jehová Diosca ñucanchita paipa Churipa causaita cushpa salvashcamandami paita rijsichun, paipa amigo cachunbash munan. Bibliapica ninmi: “Taita Diospajman quimirichi. Shina quimirijpica, paipash cangunapajman quimiringami” nishpa (Santiago 4:8).

• Jesús huañushcapi feta charinami cangui. “Diospaj Churita maijambash crishpaca, causaita causagrinatami charin” (Juan 3:36). Feta charishcataca ñucanchi ruraicunahuanmi ricuchina canchi (Santiago 2:17). Pipash shuj regalota carajujpica ñucanchimi japina canchi. Taita Dios paipa Churipa causaita cushcataca, shuj regalota chasquij cuendami chasquina canchi. Chaipaca imashina ñucanchi causachun Taita Dios munashcata yachajushpami ñucanchi causaipi pactachina canchi. a Diostami perdonahuai, ali concienciata charichun ayudahuai nishpa mañana cangui. Taita Dios ñucanchita salvashcamandaca jipa punllacunapi ali, tranquilo causaitami charishun. Chaipi feta charishpami Diosman quimirina cangui (Hebreos 11:1).

• Jesús Huañushcata Yarina tandanajuiman ripangui. Jesús paipa causaita cushpa gentecunata salvashcata ama cungachunmi Jesusca mandarca: ‘Ñucata yarishpa, cashna rurashpa catinguichi’ nishpa (Lucas 22:19). Cai huataca testigo de Jehovacunaca martes 11 de abrilta, Indi pacajushca jipami Jesús mandashcashna paipa huañushca punllata yaringapaj tandanajupashun. Chaipimi Jesús huañuna imamanda minishtirishcata, Jesús huañushcamanda cunan punllacunapi, jipa punllacunapi ima bendiciongunata charinamandapash yachajupangui. Chai tandanajuica casi shuj horasllami capanga. Caina huataca mundo enteropimi Jesús Huañushcata Yarina tandanajuimanga casi 20 millón gentecuna rirca. Taita Dios paipa Churipa causaita cushpa ñucanchita salvashcamanda tucui shunguhuan agradicingapami quiquinbash chai tandanajuiman shamuchun invitapanchi.