MUNDO enteropimi Iglesia Católica Romana, budismo nishca religión, shuj religiongunapash paicunata ñaupaman pushajcunataca, na cazarashpa soltero cachun obligan. Tauca gentecunaca crinmi, religiongunata ñaupaman pushajcuna, jarihuan huarmihuan pinganai mapa, imapash shuj ruraicunapi urmashcamandami, paicunataca na cazarashpa soltero causachun obligan nishpa.

Shinaca religiongunata ñaupaman pushajcuna solterocunalla canataca, ¿Bibliapichu mandajun? Chaipaca maipi, imashina chai costumbre tiai callarishcata,Taita Dios imata pensajtapash yachajupashun.

Huata 2006​pica papa Benedicto XVIca curia romana nishcacunahuan tandanajushpami shuj discursopica cashna nirca, religionda ñaupaman pushajcunaca na cazarashca solterocunallami cana can nishpa. Shinallata nircami, chai costumbreca casi apostolcunapa punllamandapachami tiashca nishpa.

Shinapash apostolcunapa punllacunapi Jesusta ali catijcunaca chai costumbretaca na catinllu carca. Apóstol Pabloca chai tiempopi Jesusta ali catijcunataca advirtircami: gentecunaca ‘pandata yachachishcatarami uyanajunga’. “Shina cashpami, cazaranatapash jarcanga” nishpa (1 Timoteo 4:1-3).

Apostolcunapa punllacunamanda jipa huatacunapimi “Jesusta catinchi nij religiongunaca” paicunata ñaupaman pushajcuna solterocunalla cana costumbreta callarichirca. Chai religiongunallatami jipamanga Iglesia Católica Romana tucurca. Shinallata shuj libropica ninmi, chai costumbre callarijpillatami, Roma llactapipash jarihuan, huarmihuan canata jarcaj ashtaca leycunapash tiai callarirca nishpa (Celibacy and Religious Traditions).

Jipa huatacunamanga Iglesiacunata ñaupaman pushajcunapash, “Iglesiapa taitacuna nishcacunapashmi” a,  religiongunata ñaupaman pushajcunaca solterocuna cana cashcata apoyarca. Paicunaca yuyanmi carca, Iglesiacunata ñaupaman pushajcuna shuj jarihuan o shuj huarmihuan cashpaca, Iglesiapi imata ruranatapash ñana rurai ushanachu can nishpa. Shinapash Gran Bretañamanda shuj enciclopedia libropica ninmi: “Jesús shamushcamanda 1000 yali huatacunapica ashtaca sacerdotecuna, huaquin obispocunapash cazadocunami carca” nishpa (Encyclopædia Britannica).

Iglesia Catolicata ñaupajman pushajcuna Roma llactapi tandanajushpami Concilios de Letrán 1123 y 1139 huatapi curacunaca solterocunami cana can nishca leyta llujchirca. Chai leytaca cunangamanmi pactachishpa catin. Na chai leyta catishca cashpaca Católico Iglesiaca ñaupaman catitaca na ushanmanllu carca, culquitapash na charinmanllu carca. Cazarashca curacunaca iglesia imacunatalla charishcatapash paicunapa huahuacunapa shutipimi churan carian.

Religiongunata ñaupaman pushajcuna solterocuna canamanda Taita Dios imata yuyashcataca Bibliapimi ali intindichin. Jesusca pai shina soltero causajcunamandaca nircami, ‘jahua pachapi Dios mandajujpi causangapaj munashpami na cazarashpa causanajun’ nishpa (Mateo 19:12). Jesusta catijcunamanda huaquingunaca apóstol Pablopa ejemplota catishpami solterocuna causarca. Paicunamandaca apóstol Pabloca nircami, ‘ali villaita villanamandami’ shina causanajun nishpa (1 Corintios 7:8; 9:23).

Ni Jesuspash, ni apóstol Pablopash iglesiacunata ñaupaman pushajcunaca na cazarashca solterocuna cana nishpaca na mandajurcachu. Jesusca nircami, na tucuicunaca soltero causaita ushanllu nishpa. Apóstol Pablopash solterocunamandaca nircami: ‘Nara cazarajcuna imashna causachun ñuca yachachishpa purichunga, Jesusca na mandahuarcachu’ nishpa (Mateo 19:11, NM; 1 Corintios 7:25, Mushuj Testamento Quichua Imbabura Biblia).

Bibliapica punda tiempopi Diosta sirvijcunata ñaupaman pushajcunaca cazadocuna cashcatami ricuchin. Por ejemplo apóstol Pedroca cazadomi carca (Mateo 8:14; Marcos 1:29-31; 1 Corintios 9:5). Apostolcunapa punllacunapica Roma llactapica jarihuan, huarmihuan mapa, pinganai ruraicunaca ninandami mirashca carca. Chaimandami apóstol Pabloca cashna nirca, crijcunata ricushpa yachachijcuna cazado cashpaca “shujlla huarmihuan causaj”, “paipaj huahuacunatapash aliguta causachun, yachachishpa cazuchij cachun” nishpa (1 Timoteo 3:2, 4).

Imashinami ricunchi cazarashca cashpapash cusahuarmi na igual puñushpa causanataca na nijurcachu. Bibliapica cusahuarmi causaimandaca ninmi: ‘Cusaca paipaj huarmiman imata cashpapash pactachishpa causachun’ nishpa. Shinallata cusahuarmi canamandaca Bibliapica ninmi: “Ishcandimanda na munanichu nishpaca, na ninachu canguichi” nishpa (1 Corintios 7:3-5). Imashinami yachajushcanchi, Diosca paita sirvijcuna na cazarachunga na nijunllu. Religiongunata ñaupaman pushajcunatapash solterocuna cachunga na obliganllu.

Shinaca ¿imashpata Jesuspash, apóstol Pablopash soltero causachun animarca? Soltero jaricuna, huarmicunaca ali villaicunata ashtahuanmi villachita ushan. Solterocunaca, cazadocunashna huarmimanda, huahuacunamanda preocuparijunapa randica Taita Diosta ashtahuanmi sirvita ushan (1 Corintios 7:32-35).

Davidpa ejemplota ricupashun, paica México llactapimi shuj trabajopi ali ganan carca. Chai trabajota saquishpami, Bibliamanda yachachingapaj Costa Ricapi shuj puebloman rirca. Davidca ninmi, soltero caimandami ñucamandalla preocuparina carcani. “Shuj costumbrecuna tiajpi, causai diferente cajpipash yachari usharcani” nishpa.

Diosta sirvij Claudia shuti soltera huarmipash Taita Diosmanda villachijcuna ashtahuan minishtirishca pushtumanmi causangapaj rishca. Paica ninmi: “Diosta sirvijushcamandaca cushijushcami cani. Taita Dios ñucata cuidajushcata ricushpaca, ñuca feca ashtahuanmi shinlliyan. Taita Dioshuanbash ashtahuanmi ali cani” nishpa.

Soltero o soltera causanaca imapash na alica na canllu. Claudiaca ninmi: “Solterocuna cashpa o cazadocuna cashpapash Jehová Diosta tucui shunguhuan sirvishpaca cushillami causaita ushanchi” nishpa (Salmo 119:1, 2).