Chairalla nacirishca llullu huahuagucunapaca, callari 60 minutocunaca importantepachami can. ¿Imamandata importante can? Chai horaspimi mamapash huahuapash aliguta rijsirin. Chaimi llullu huahuagupash ali sintirishpa viñaita ushan. a

¿Imamandata mamacunaca juyashpa llullu huahuagutaca cuidai callarin? Shuj periodicopica shuj profesoraca ninmi: “Huahuacunata ungushca jipaca, oxitocina nishca hormona mirajpimi mamacunaca, paicunapa llullu huahuaguta juyaihuan ricushpa, ugllan, chuchuchin” nishpa. Chai ratocunapimi mamapa cuerpopica shuj hormonapash tiai callarin. Chaimandami llullu huahuaguhuan parlashpa, ashtahuan juyai callarin. ¿Imamandata chaita yachanaca importante can?

Mamahuan, llullu huahuaguhuan juyarinataca, ñucanchita ruraj Jehová b Diosmi churarca. Rey Davidca, paipa mamapa vijsamanda llujchishpa, paipa mama marcajpi seguro sintichishcamandami Taita Diostaca agradicirca. Rey Davidca, nacirishca punllamandapacha Jehová Dios cuidajushcata intindishpami, shuj oracionda rurashpaca nirca: “Ñuca mamapaj vijsapi cashcamandapacha, canmi ñuca Taita Dios cangui” nishpa (Salmo 22:9, 10).

PENSARIPAI: Mamacuna paicunapa huahuagucunata juyashpa cuidachun, hormona nishcacunata Taita Dios churashca cashpaca ¿nachu cada unomanda preocuparijunga?

Jesusca, Tucuita Ruraj Taita Diosta alipacha rijsishpami nirca: ‘Ishcai [gorrión pajarogutaca] shuj realpajllami jatunajun. Chaicunaca, huañuchun Taita Dios saquijpillami huañun. Paica cangunapa umapi mashna ajcha tiajtapash yachanmi. Shinamandami na manllana canguichi. Cangunacarin ashtaca ashtaca [gorriongunatapash] yalimari canguichi’ nishpa (Mateo 10:29-31, MTQI).

Huaquingunallami ima laya pajarogucuna tiajtaca ricun. Pajarogucuna huañujtacarin, casi  pipash na preocuparinllu. Shinapash, ñucanchi jahua pachapi Taita Diosca, cada pajarogutami ricujun. Pajarogucuna ashtacacunapacha cashpapash, Taita Diospa ñaupajpi shujlla gentegushna valishcapacha ricuritaca na ushanllu. Shinaca, Taita Diosca quiquinda ricujunmi. Ashtacatami quiquinmandaca preocuparin.

Bibliapica ninmi:

• “Mandaj Diospaj ñavihuanga, tucui maipipashmi ricujun. Alicunatapash, nalicunatapashmi ricujun” nishpa (PROVERBIOS 15:3).

• “Mandaj Diosca, [alita] rurajcunatami ricuriajun. Paicuna caparishpa mañanajujtaca, aligutapachami uyariajun” nishpa (SALMO 34:15).

• ‘Ñuca llaquilla cajta can ricushcamandami, can llaquijpi ninanda cushijusha. Ñuca ninan llaquihuan cai horascunami, ñuca almataca rijsihuarcangui’ nishpa (SALMO 31:7).

Taita Dios ñucanchimanda preocuparijta, ñucanchita juyashpa cuidajta yachanaca ¿minishtirishcachu can? Ari. Inglaterra llactamanda Hannahca c ninmi:

“Cutin cutinmi pensarcani, Jehová Diosca na juyahuanllu, na tucui shunguhuan crijpimi, ñuca mañashcacunataca na uyan. Ñuca na imapapash sirvijpimi Taita Diosca na ricuhuan, o castigajuhuan” nishpa.

Cunanbimi Hannahca, Jehová Dios paita juyajta, paimanda preocuparijta tucui shunguhuan crin. Shinapash ¿imamandata cunanbica shina yuyan? Hannahca ninmi: “Asha ashami cambiai usharcani. Huaquin huatacuna huashamanga, Jesús paipa causaita cushcata shuj discursopi uyashpami, Jehová Dios ñucata ninanda juyashcata cuenta japircani. Ñuca oraciongunatapash uyajta cuenta japishpami, tauca viaje huacashcani. Ashtahuangarin, Bibliata yachajushpa, tandanajuicunamanbash rishpami, Jehovata ashtahuan rijsishpa gentecunata juyajtapash intindircani. Jehová Dios ñucanchita juyajta, ayudajta, cuidajujtaca cunanmi intindishcani” nin.

Chaita intindinaca alimi can. Shinapash ¿imashinata Jehová Dios quiquinbi preocuparijta, quiquinda intindijtaca yachai ushapangui? Chaitaca cati temapimi yachajupashun.