Hinduismo nishca religionda catijcunaca, gentecunaca paicunallata nalita rurashcamanda, o punda causaipi nalita rurashcamandami llaquicunahuan sufrishpa causan nishpa crin. Shinallata moksha nishcata o shuj shuj cuerpopi causarishca jipami llaquicunahuan sufrishpa causanataca saquin nin. Chaipaca cai mundopa cosascunamanda na preocuparinachu can ninmi.

Musulmán nishca religionda catijcunaca, juchacunamanda o Diospi crishcata o na crishcata ricuchingapami llaquicunataca charinchi nishpa crin. Sociedad Islámica de América del Norte nishcapa ex presidente Sayyid Syeed shuti jarica ninmi: “Taita Dios carashca bendiciongunamanda siempre agradicina cashcata, shinallata ayudata minishtij gentecunata ayudana cashcata yarichunmi llaquicunata charinaca ayudan” ninmi.

Judaísmo nishca religionda catijcunaca, gentecunaca paicunapa culpamandallata sufrijtami crin. Huaquin judiocunaca huañushcacuna cutin causarinata, chai jipa yangamanda llaquichishca gentecuna bendiciai tucunatami crin. Shinapash judaísmo místico o cabalístico nishca religionda catijcunaca, shuj cuerpopi o shuj animalpa cuerpopi cutin causarinapimi crin. Shina cutin cutin causarishpami gentecunaca jucha illaj quidana oportunidadta charin nishpami crin.

Budismo nishca religionda catijcunaca, gentecuna huañujpipash cutin cutin nacirishpa causarinapimi crin. Shinallata cada causarishcami gentecuna paicunapa nali munaicunata, nali ruraicunata, nali pensamientocunata saquingacaman llaquicunahuan sufrishpa causanataca saquin nishpami crin. Gentecunaca ali yachaita charishpa, alita rurashpa, paicunapa pensamientocunata controlai ushashpami nirvana nishca causaita chasquin nin. Nirvana nishpaca, gentecuna llaqui illaj causai chasquinatami nijun.

Diccionario de religiones comparadas nishca libropica ninmi: Confucionismo nishca religionda catijcunaca, “gentecunapa nali ruraicunamandami ashtahuanbachaca” llaquicunaca tian nishpami crin nishpa. Shinapash paicunaca, “alita rurashpa causashpallami” ñana pundashna llaquicunahuan causaitaca usharinga ninmi. Paicunaca llaquicunataca casi siempremi “ushaita charij espiritucuna” cachamun nishpami crin. Chaimandami gentecunaca, destinashca causaitaca munai na munaimi chasquina canchi nin.

Huaquin religiongunata catijcunaca, brujeriamandami llaquicunahuan causanchi ninmi. Huaquin gentecunaca, brujocunaca llaquichijta o suerteta charichun ayudaita ushan nishpami crin. Shinallata brujushcata tucuchingapaca huaquin ruraicunata rurashpami tucuchita usharin nishpami crin. Chaimi chai gentecunaca pipash huañujujpica yachajcunapaman jambiringapaj rin. Chaipimi shuj ruraicunata rurashpa chai brujushcata tucuchingapaj rin.

Cristianocunaca, Génesis libropi nishcashnami punda jari, punda huarmi juchapi urmaimanda cunanbica llaquicunahuan causanchi nishpami crin. Shinapash ashtaca cristianocunaca paicunapa yuyaicunatallata mirachishpami gentecunataca yachachishca. Por ejemplo, huaquin católico gentecunaca llaquicunahuan causashpami Taita Diosmanga shuj ofrenda cuenda cunchi ninmi. Shinami Taita Diosca paicunapa iglesiata bendicianata o pitapash salvai ushanata crin.