Siria llactapica, Israelmanda shuj cuitsagumi paipa huasimanda, familiamandapash carupi causajurca. Sirio soldadocunami paitaca apashcarca. Shinami soldadocunata mandaj Naamán runapa huarmita sirvijurca. Chaipi causaj gentecuna Jehovata na adorajpipash, chai cuitsaguca Jehová Diostami adoran carca.

Naamán runaca millai nali unguita charishpami ninanda nanachin carca. Israelita cuitsaguca chai runata ayudangapaj munashpami, Naamán runapa huarmitaca cashna nirca: Diospa profeta runaguca Israel llactapimi causan. Paica Eliseomi can. ‘Cai ungüimanda jambichihuai ningapaj ñuca amo rijpica, cai lepra ungüimandaca, paica jambichingami’ nishpa.

Naamán runapa huarmica israelita cuitsagu ima nishcatami paipa cusaman parlarca. Chaimi paica imatapash rurashpa jambiringapaj munaimanda Israel llactapi Eliseopa huasiman rirca. Naamanga, Eliseoca ninanda alicachishpami ñucataca chasquihuanga yarcami. Shinapash, Naamán runahuan parlangapaj llujshinapa randica, Eliseoca paipa sirvijtami Naamán runata chasquishpa cashna nichun cacharca: “Jordán yacupi canchiscaman armangapaj rilla. Chashna  armajpimi, cambaj aichaca ali tucushpa, ima ungüipash illaj quedangui” nishpa.

Naamán runaca chaita uyashpaca ninanda culirashpami: ‘Ricui, paipacha ñucata tuparingapaj Ilujshimushpa, ñuca ladopi shayarishpa, paita Mandaj Taita Diospa shutipi mañanga yarcanimi. Maipilla lepra ungüi tiaj pushtupi paipa maquihuan tacarishpami alichinga yarcanimi’. Shinapash Israel llacta yacucunapi armachunmi cachahuarca. ¿Nachu Siria llactapica Israel llactapi tiaj tucui yacucunata yali ashtahuan ali yacucuna tian? “Chai yacucunapillata armashpaca, ¿nachu ali tucuimanlla carcani?” nirca. Chai jipaca Naamán runaca ninanda culirashpami Eliseopa huasimanda rirca.

Ashtahuangarin paita sirvijcunaca cashnami ninajurca, jambiringapaca ¿nachu imatapash rurashalla nircangui? Diospa profeta ‘canba ungüi anchurichun armagri nishcataca, ¿imashpata na ruranguiyari?’ nishpa. ‘Shina nijpimi Naamán runaca Jordán yacupi 7 viajecaman pambarirca. Chashna rurajpimi, paica ima ungüipash illaj quedarca’. Chai jipami Naamán runaca Eliseopaman tigrashpa ninanda agradicirca. Shinallata Jehová Dios ciertopacha Dios cashcataca cunanmi yachani nirca. Shinami Naamán runaca huasiman sano tigrarca. Israelita cuitsaguca Naamán ali tucushcata ricushpaca ¿imashinashi sintirirca?