Israelitacunata ñaupaman pushachun Jehová Dios juezcunata churajpipash, paicunaca shuj reyta churachunmi munarca. Chaimandami israelitacunaca Samueltaca: “Chaishuj llactacuna charishcashnallata ñucanchitapash gobernachun shuj reyta churapai” ninajurca. Chaita uyashpaca Samuelca ninandami culirarca. Shinapash Jehová Diosca Samueltaca: ‘Israelitacuna tucui ima nishcata rurailla. Paicunaca candaca na rechazashcachu, ñucatami paicunapa rey cachun na munan. Shinallata shuj rey yaicushpaca, paicunata imashna mandashpa charinata advirtina cangui’ nirca. Shina nijpipash israelitacunaca: “Na importanllu. Ñucanchicunaca shuj reytami charingapaj munanchi” ninajurcami.

Chaimi Jehová Diosca Samuelmanga Saulmi punda rey canga nirca. Chai jipami Saulca Samuelhuan parlangapaj Ramá shuti puebloman rirca. Saultaca israelitacunata mandaj cachun aceitehuan umapi talishpa agllarca.

Chai jipami Samuelca israelitacunata gulpita tandachishpa paicunata pi mandagrijushcata ricuchigrijurca. Shinapash Saulca ni maipi na ricurircachu. ¿Imamandata Saulca na ricurirca? Paica quipicuna chaupipimi pacajushca carca. Samuelca chaipi tarishpami chaimanda llujchishpa tucui israelitacunapa chaupipi shayachirca. Paica, tucui gentecunamanda yali jatun y juyaillagumi carca. Samuelca: “Ricuichi, Jehová Diosmi paitaca rey cachun agllashca” nircami. Shina nijpimi tucuilla israelitacunaca “reyca bendiciai tucushca cachun” nishpa caparinajurca.

Callaripica rey Saulca Jehovatapash, Samueltapashmi cazurca. Shinapash jipamanga paica cambiarcami. Shuj viajeca Samuelca, Saultaca animalcunata Jehovaman rupachingapaj shuyahuangui nircami. Shinapash Samuel na ucha chayamujpimi, Saulca Jehová Diosman animalcunata pailla rupachirca. ¿Imatata Samuelca rurarca? Samuelca: “Canga nalitapachami rurashcangui. Canba Jehová Dios mandashcataca na cazushcanguichu” nirca. ¿Saulca Jehovata tucuipi cazuna cashcata yachajurcacha?

Jipamanga Saúl amalequitacunahuan macanajungapaj rijujpimi, Samuelca ama pitapash causajta saquinguichu nirca. Shina nishca jahuapash Saulca na cazushpami rey Agagtaca na huañuchirca. Chaimi Jehová Diosca Samueltaca: Saulca ñucata cazunata saquishpami, ñuca nishcataca na pactachijun. Chaimandami Samuelca ninanda llaquirishpa Saultaca: “Canga Jehová Diospa nishcacunatami na cazurcangui. Chaimandami paica can rey cashpa catichunga  ñana munan” nirca. ‘Chai jipami Samuel ña tigrajujpi Saulca Samuelpa churajuna ropa puntapi huarcurirca. Shina huarcurijpimi chai churajuna ropaca liquirirca’. Chaimi Samuelca, Saultaca: “Cai ropahuan pasashcashnallatami Jehová Diosca can Israel llactata gobernanataca quichunga. Y gobernachunga canda yali mejor personatami churanga” nircami. Jehová Diosca paita juyashpa, cazushpa causajtami, rey cachun agllagrijurca.