Egipto llactamanda llujshishca ishcai quillacuna jipaca israelitacunaca “Sinaí urcu ñaupajpimi, carpacunata shayachishpa tianajurca”. Chaimi Jehová Diosca Sinaí urcupi Moisestaca: “Si ñuca imata nijta cazunguichi y cangunahuan ñuca ruragrijushca tratota cumplinguichica, tucuilla chaishuj llactacunamandaca, cangunami ñucapa especial llacta tucunguichi” nircami. Sinaí urcumanda Moisés urai shamushpa Jehová Dios ima nishcata villajpica, israelitacunaca cashna nishpa tigrachirca: “Jehová Dios tucui imata nishcata rurangapami de acuerdo capanchi”.

Jipamanga Moisesca cutinmi Sinaí urcuman rirca. Chaipimi Jehová Diosca quimsa punllapi israelitacunahuan parlasha nirca. Shinallata israelitacunaca Sinaí urcumanga na vichai shamunachu can nircapashmi. Chaimi Moisesca israelitacunata cashna ningapaj urai shamurca, Jehová Dios ima nijta uyangapaj listomi cana canguichi nirca.

Quimsa punlla jipami, shinllitapacha rayocuna culun nijta israelitacunaca uyanajurca. Chai jipaca “urcu jahuapipash shuj yana yana fuyumi tiajurca. Chai fuyu ucumandaca shuj cachomi shinllitapacha huacajuj uyarirca”. Shinallata Jehová Dios “nina rupajuj chaupipi chai urcumanga urai shamurca”. Chaimi israelitacunaca ninanda manllarishpa chujchunajurca. ‘Tucuilla Sinaí urcumi cushni junda carca’. ‘Tucuilla urcumi ninanda chujchujurca’. Shinallata ‘cachota huacachijpash, ashtahuan ashtahuanmi ninanda uyarijurca’. Chaimi Jehová Diosca: Ñucami Jehová Dios cani “ñuca ñaupajpica, ama shuj dioscunata charinguichu” nircami.

Moisesca cutinmi Sinaí urcuman tigrarca. Chaipimi Jehová Diosca israelitacunapa leycunata curca. Chai leycunapimi imashina paita adorana cashcata, israelitacuna imashina causana cashcatapash mandajurca. Moisesca chai leycunata escribishpami, israelitacunaman liishpa uyachirca. Chaita uyashpami paicunaca: “Jehová Dios tucui imata nishcata rurangapami de acuerdo capanchi” nirca. ¿Israelitacuna Jehová Diosman tucuita rurashun nishcataca pactachircacha?