LECCIÓN 8
Abrahanbash, Sarapash Jehovata cazurca
Babel llacta ladollapica Ur shuti llactami tiarca. Chai llactapi causajcunaca yanga dioscunatami adoran carca. Shinapash shuj jarica Jehová Diostami adoran carca. Paipa shutica Abrahanmi can.
Jehová Diosca Abrahanmanga nircami: “Canba familiacunata, canba taitapa familiacunata y cai llactatapash saquishpa ñuca ricuchigrijushca llactaman ri”. Jipamanga nircami: “Canga shuj jatun jatun llactami tucungui. Candaca bendiciashami. Canmandami shujcunapash bendiciai tucunga”.
Jehová Dios maiman cachagrijujta na yachashpapash Abrahanga Jehová Diospimi confiarca. Abrahán, Sara, Abrahanba taita Taré, Abrahanba sobrino Lotpashmi Jehová Diostaca tucuipi cazurca. Paicunaca paicunapa cosascunata japishpami chai llactamanda ri callarirca.
Jehová Dios carasha nishca llactaman paipa familiandi chayashpaca Abrahanga 75 huatacunatami charirca. Chai llactaca Canaán shutimi carca. Chai llactapimi Jehová Diosca cashna nirca: “Canba huahuaman o miraicunamanmi cai alpataca cugrini”. Shinapash Abrahanbash, Sarapash ña mayorllacunami carca. Huahuacunatapash na charircachu. Shinaca Jehová Diosca ¿imashinashi paipa nishcataca pactachigrijurca?
“Abrahanga tucui shunguhuan crimandami Taita Dios cayajpica, paita cazushpa pai causajushca pushtutaca saquishpa Taita Dios carasha nishca pushtuman rirca. Maiman rijushcata na yachashpapashmi Abrahanga rirca” (Hebreos 11:8).
