Saulo runaca Roma llactamanda Tarso pueblopimi nacirirca. Paica judiocunapa leycunata alipacha yachajushca fariseomi carca. Jesuspa discipulocunataca nimamanda na ricunayachinllu carca. Chaimandami Sauloca paicunapa huasiman rishpa jari cajpipash, huarmi cajpipash aisashpa carcelman apan carca. Shuj viajeca Esteban runaguta imashina gentecuna rumihuan pigashpa huañuchinajujtami Sauloca ricujurca.

Saulo runaca Jerusalenmanda Jesuspa discipulocunata prezo apashpapash paicunataca ashtahuan llaquichingapami sacerdotecunapaman rishpa, Damasco llactaman cachahuai nirca. Shinapash Damasco llactaman rishpa, ña chayagrijujpica, shuj michami jahua cielomanda paipa jahuapi punchapamba brillamurca. Chaimi Sauloca alpaman urmajpi: “Saulo, Saulo ¿imamandata ñucataca catiriashpa llaquichihuajungui?” nijta uyarca. Shina nijta uyashpami Sauloca: “Quiquinga ¿pita capangui?” nishpa tapurca. Shina nijpimi: “Ñucaca Jesusmi cani”. Cunanga jatarishpa Damasco llactaman ri. Chaipimi shuj runaguca quiquin imata rurana cashcata ninga nirca. Saulo alpamanda jatarishpaca ñana ricui usharcachu. “Chaimi paitaca maquimanda japishpa, Damasco llactaman apashpa rinajurca”.

Damasco pueblopica Jesuspa ali discípulo Ananías runagumi causan carca. Jesusca Ananiasmanga shuj muscuipishna ricurishpami: ‘Jatarishpa, Recta shuti ñanman ripai. Chaiman chayashpaca Saulo shuti runata mascana capangui’ nirca. Shina nijpimi Ananiasca: ‘Señor Jesuslla, ashtaca gentecuna cai runamanda parlanajujtami uyashcani. Shinallata tucuilla quiquinba discipulocunatapash prezo churajujtami uyashcani’ nirca. Chaimi Jesusca: Rilla cai runataca shuj shuj llactacunapi ali villaicunata villachichunmi agllashcani nirca.

Chaimi Ananiasca Saulopaman rishpa: Huauqui Saulo, ‘Jesusmi ñucataca quiquin cutin ricui ushachun cachamuhuashca’ nirca. Chai jipallami Sauloca cutin ñapash ricui usharca. Chaimi Sauloca Jesusmanda yachajushpa, paipa catij tucushpa bautizarirca. Shinami sinagoga huasicunapi shuj discipulocunahuan  predicai callarirca. Saulo predicajta uyashpami gentecunaca manllarishpa ¿Nachu cai runaca Jerusalén llactapi Jesuspa discipulocunataca catiriashpa llaquichijurca? nishpa tapurinajurca. Cunanga Saulo runa Jesusmanda yachachijujtami gentecunaca ricunajurca.

Saulo runaca quimsa huatacunatami Damasco pueblopi gentecunaman yachachirca. Judiocunaca paita na ricunayachishpami imashina huañuchinata ricunajurca. Chaimanda huauquipanicunaca huañuchingapaj munanajujta uyashpami, chai pueblomanda llujshichun ‘Saulotaca canastapi churashpa, jatun pirca jahuata uriajuchishpa tuta cacharca’.

Sauloca Jerusalenman rishpa huauquipanicunata ricungapami munarca. Shinapash paicunaca Saulotaca manllanmi carca. Chaimi Bernabé runaguca Saulota apostolcunapaman pushashpa, pai ña ciertopacha cambiashcata ricuchirca. Shinami Sauloca Jerusalén congregacionhuan Diosmanda ali villaicunata ninanda villachi callarirca. Jipamanga gentecunaca paitacaPablo nishpami rijsin carca.