Jehová Diosca Edén shuti pushtupimi shuj juyailla jardingutaca rurarca. Chaipica sisacuna, jatun yuracuna, animalcunapashmi tiarca. Chai jipaca primer jari Adandaca ñutu alpamanda japishpami rurarca y Taita Dios singapi fucujpi Adanga causai callarirca. Jehová Diosca Adandaca jardín de Edenda cuidachun, tucui animalcunata shutita churachunmi mingarca.

Jehová Diosca Adandaca cashna nishpami mandarca: ‘Jardinbi tiaj tucui quirucunamandaca vijsa pactangacamanmi micuita ushangui. Shinapash árbol del conocimiento de lo bueno y de lo malo quirumandaca na micunachu cangui. Chai quirumanda micushpaca huañunguimi’.

Jipamanga Jehová Diosca: “Paihuan cumba tucuchunmi paita ayudaj huarmiguta ruragrini” nircami. Chaimanda “Jehová Diosca Adandaca sumajta puñuchirca. Sumajta puñujungacamanmi shuj costillasguta llujchirca. Y chai llujchishca costillashuanmi Jehová Diosca shuj huarmiguta rurarca”. Chai huarmitaca Eva  shutitami churarca. Shinami Adán y Evaca shuj familia tucurca. ¿Imashinata Adanga sintirirca? Evata ricushpaca cushijushpami cashna nirca: “Pai si ñuca tullumandallata llujshishca tullugu capan”.

Chai jipaca Jehová Diosca Adanda y Evata huahuacunata charishpa cai alpata jundachinguichi nishpami mandarca. Shinallata ishcandi cai alpa shuj juyailla paraíso tucushpa cushilla trabajachunmi Jehová Diosca munarca. Tucui alpami jardín de Edén shina tucuna carca. Shinapash chaica na pactarircachu. ¿Imamandata na pactarirca? Chaitaca shamuj capitulopimi ashtahuan yachajupashun.