1, 2. ¿Picunallata Jehová Diospa ali amigocuna carca?

 QUIQUINBA ali amigo cachunga ¿pitata agllanguiman? ¿Nachu quiquinhuan ali llevarijta, cushilla cajta, pai imashina cajta alicachishpa quiquinba amigo cachun agllanguiman?

² Jehová Diosca huaquin gentecunataca paipa amigo cachunmi agllan. Por ejemplo, Abrahanga Jehová Diospa ali cumbagumi carca (Isaías 41:8; Santiago 2:23). Jehová Diosca Davidtapash ninandami alicachirca. Chaimandami cashna nirca: “Paimi, ñuca munashcashna imatapash rurajun” nishpa (Hechos 13:22). Profeta Danieltapash Jehová Diosca ‘ninandami juyarca’ (Daniel 9:23).

 3. ¿Imamandata Abrahán, David, Danielpash Jehovapa amigo carca?

³ ¿Imashinata Abrahán, David, Danielpash Jehovapa ali amigo tucurca? Diosca Abrahandaca nircami: ‘Ñuca rimashcata canga cazushcanguimi’ nishpa (Génesis 22:18). Jehová Diosca pai imata mandashcacunata tucui shunguhuan cazuj gentecunahuanmi amigo tucun. Israelitacunataca Jehová Diosca nircami: “Canguna cazujpica, cangunapaj Taita Diosmi casha. Cangunapash, ñuca agllashcacunami canguichi” nishpa (Jeremías 7:23). Shinaca, quiquinbash Jehovapa amigo cangapaca paita cazunami cangui.

4, 5. Jehová Diosca ¿imashinata paipa amigocunata cuidan?

⁴ Bibliapica yachachinmi, Jehová Diosca ‘ima pandatapash na yarij shunguhuan paita cazujcunaman alita  rurashpa, paipa tucui ushaita ricuchingapami ricuriajun’ nishpa (2 Crónicas 16:9). Salmo 32:8​pi Jehová Diosca ninmi: “Ñucami canda yachachishpa, can purina ñandapash ricuchisha. Candami ñuca ñavihuanga ricuriasha” nishpa.

⁵ Diospa contra Diabloca, ñucanchicuna Jehovata ama sirvichunmi jarcangapaj munan. Shinapash Jehová Diosca ñucanchita cuidanmi (Salmo 55:22, liipangui). Jehovapa amigocuna caimandaca tucui shunguhuanmi paita sirvinchi. Ima llaqui japijpipash Jehovata sirvishpami catinchi. Ñucanchipash Salmos librota escribij runagushnami Jehovapi confianchi. Paica nircami: “Pai ñuca ali ladopi cajpimi, na cuyuchi tucusha” nishpa (Salmo 16:8; 63:8). Ama Diospa amigo tucuchunga Diabloca ¿imatata ruran?

 6. Diabloca ¿imatata gentecunamandaca nirca?

⁶ Imashinami capítulo 11​pi ña yachajurcanchi, Diabloca Jehová Diostaca yangatami juchachirca. Diabloca nircami, Diosca llullami Adanda, Evataca paicunallata ima ali cajta, ima nali cajtapash na agllachun saquircachu nishpa. Job libropica ninmi, Diospa amigo cangapaj munaj gentecunatapashmi Diabloca yangata juchachijun nishpa. Diabloca ninmi, gentecunaca paicunata bendiciajpillami Jehovata sirvinajun, juyaimandaca na sirvinajunllu. Ñuca munashpaca pitapash Diosmanda caruyachita ushanimi nishpa. Shinaca Job runagumanda, paita Jehová Dios imashina cuidashcata yachajushun.

7, 8. a) Jobca ¿imashinata carca? b) ¿Imatata Diabloca Jobmandaca nirca?

⁷ Job runaguca ¿imashinata carca? Job runaguca casi 3 mil 600 huatacuna huashamanmi causarca. Paica ali alimi carca. Chai punllacunapi Jobmanda parlashpaca Jehová Diosca nircami, Job runagu shinaca pipash Alpapica na tianllu nishpa. Jobca Jehovata tucuipi cazushpami, nali ruraicunataca  na ricunayachin carca (Job 1:8). Jobca Jehová Dioshuanga ali amigomi carca.

⁸ Shinapash Diabloca nircami, Jobca na tucui shunguhuan Jehovata sirvijunllu nishpa. Chaimandami Jehovataca nirca: “¿Nachu canllata paitapash, paipaj huasi ucupuratapash, tucui imatalla pai charishcatapash, tucuilla muyundita cuidajungui? Paipaj maquihuan imata rurajpipash, ninandami bendiciarcangui. Chaimandami pai imata charishcacunaca, cai llactapica ninanda mirashca. Ashtahuangarin cunanda, cambaj maquita chutashpa, pai imatalla charishcacunata quichuyari. Shina rurajpica, ¿nachu candaca, cambaj ñaupajpillata nalicachishpa nali shimicunata rimanga?” nishpa (Job 1:10, 11).

 9. ¿Diablo imata rurachunda Jehová Diosca saquirca?

⁹ Diabloca, Jobtaca cashna nishpami juchachirca paita cuidashpa bendiciajpillami Jehovataca sirvijun nishpa. Ñuca munashpaca Jobtapash Diosmanda caruyachita ushanimi nircami. Diablo llullajushcataca Jehová Diosca alimi yacharca. Chaimandami, Job runagu paita tucui shunguhuan sirvijujta ricuchingapaj Jehová Diosca Jobta Diablo llaquichichun saquirca.

10. Diabloca ¿imashinata Jobtaca llaquichirca? ¿Imatata Jobca rurarca?

¹⁰ Pundapica, Jobpa charishca tucui animalcunatami Diabloca shuhuashpa tucuchirca. Shinallata, Jobta sirvishpa causaj casi tucui gentecunatapashmi huañuchirca. Chaimandami, Jobca imagupash illaj quedarca. Jipamangarin Diabloca shuj jatun acapanata jatarichishpami Jobpa 10 churicunata huañuchirca. Chai tucui llaquicuna japijpipash, “Job runaguca napacha juchataca rurarcachu. Taita Diostaca, ima nalitapash na rimarcachu” (Job 1:12-19, 22). Jobca tucui shunguhuanmi Jehovata sirvishpa catirca.

11. a) Diabloca ¿imashinata Jobtaca ashtahuan llaquichirca? b) ¿Imatata Jobca nirca?

 ¹¹ Diabloca Jobta shinapacha llaquichishca jahuapash na chashnalla saquircachu. Jehovataca cashnami nirca: “Paipaj tullupipash, aichapipash ungüita cuyari. Shina rurajpica, ¿nachu candaca cambaj ñaupajpillata nalicachishpa, nali shimicunata riman?” nishpa. Chai jipaca, Diabloca shuj millai ungüihuanmi Jobtaca llaquichirca (Job 2:5, 7). Shina llaquichijpipash Job runaguca nircami: “Huañungacamanmi, ñucaca ima pandatapash na rimasha” nishpa (Job 27:5).

12. Diablo llulla cajtaca ¿imashinata Job runaguca ricuchirca?

¹² Job runaguca Diablo juchachijujta, Diablopa culpamanda llaqui apajushcataca na yacharcachu. Chaimandami, Taita Diosmi cashna llaquicunataca cachamujun yarca (Job 6:4; 16:11-14). Shinapash, Job runaguca tucui shunguhuanmi Jehovata sirvijurca. Jobca, Jehová paita cuidajpi, bendiciajpillaca na sirvijurcachu, juyaimandami paica sirvijurca. Diablopa nishcacunaca llullami carca.

13. Job sirvishcamandaca ¿imatata Diosca rurarca?

¹³ Jobca jahua cielopi ima pasajujta na yachashpapash, tucui shunguhuanmi Jehovata sirvishpa catirca. Shinami Diablo llulla cashcata ricuchirca. Chaimandami, Jehová Diosca Jobtaca ninanda bendiciarca (Job 42:12-17).

14, 15. Diabloca ¿ima nishpata tucui gentecunata juchachishca?

¹⁴ Jobmandaca ashtacatami yachajui ushanchi. Diabloca cunanbipashmi ñucanchitaca Jehová Dios bendiciajpillami sirvinajun nishpa juchachijun. Job 2:4​pi Diabloca nircami: “Runaca, paipaj causaimandaca tucui imata charishcatami cunman” nishpa. Shina nishpaca Jobpash, gentecunapash Diostaca na tucui shunguhuan sirvinajunllu nishpami juchachijun. Job huañushcamanda ashtaca huatacuna yalishca jipapash, Diabloca Jehovatapash, Jehovata sirvijcunatapash juchachishpa catinrami. Shinapash Proverbios  27:11​pica Jehová Diosca ninmi: ‘Ñuca huahualla, aliguta yachajushca cashpa ñuca shungupi cushichihuayari. Shina cashpami, ñucata fiñashpa rimajmanbash [o juchachijmanbash] tigrachi ushasha’ nishpa.

¹⁵ Quiquinbash Jehová Diosta cazushpaca paipa ali amigo tucushpami Diablo llulla cashcata ricuchita ushangui. Jehovapa amigo tucungapaca quiquinba causaipi ima cambiocunata rurana cashpapash ruranallami cangui. Shina ruranaca minishtirishcapachami can. Diabloca quiquindapashmi juchachishca, llaquicunata charishpaca Jehovata na sirvishpa catingachu nishpa. Diabloca Jehovata ama sirvichunmi ashtaca jarcaicunata churan. ¿Ima jarcaicunatata churan?

16. a) Gentecuna Jehovata ama sirvichunga ¿imatata Diabloca ruran? b) Diabloca quiquin ¿imata pensachunda munan?

¹⁶ Diabloca, gentecuna Jehovapa amigo tucuchun na munashpami tauca jarcaicunata churan. Diablo llaquichingapaca “león huacashpa, pitapash micungapaj mascajunshnami muyuriajun” (1 Pedro 5:8). Chaimandami quiquinba amigocuna, familiacuna, shuj gentecunapash Bibliata quiquin yachajuchun, imapash nali ruraicunata saquichunga na munan. Shina jarcaicunata ricushpaca quiquindapash Diablo llaquichijushcatami ricungui a (Juan 15:19, 20). Shinallata Diabloca “punchapamba angelshna tucunllami”. Shinami Diabloca, Jehovata ama cazuchun ñucanchitapash umachingapaj munan (2 Corintios 11:14). Ashtahuanbash ñucanchi imapapash na valinchichu, Jehová Diostaca nunca na ali sirvita ushashunllu nishpa pensachunmi Diabloca munan. Shina pensarinaca Diablopa trampami can.

17. ¿Imamandata Jehová Diostaca cazuna capanchi?

¹⁷ Jehovata cazushpaca Diablo llulla cashcatami ricuchinchi. Cazungapaca ¿imatata rurana canchi? Bibliapica ninmi: “Canda Mandaj Taita Diostaca, cambaj tucui shunguhuan, tucui almahuan, tucui ushaihuan juyangui” nishpa (Deuteronomio 6:5). Juyaimandami Jehovata cazunchi. Paita ali rijsishpaca, paipa tucui mandashcacunatami cazungapaj munashun. Apóstol Juanga nircami: “Taita Dios mandashca shimicunata pactachishpa causanajushpallami, paita juyanajushcataca yachanchi. Pai mandashca shimicunaca, pactachi ushanallami” can nishpa (1 Juan 5:3).

18, 19. a) Jehová Diosca ¿imacunatata nali ruraicuna nin? b) Jehová Diosca ¿imamandata ñucanchi rurai ushashcatalla mañan?

¹⁸ Jehová Diosca ¿imacunatata nali ruraicuna nin? “ Jehová millanayachishcata millanayachishunchi” nishca recuadropi huaquin ejemplocunata ricupai. Chaipi ricuchishca  huaquin ruraicunaca na juchachu can nishpachari ricungui. Shinapash, Bibliapi textocunata liishpa aliguta pensarishpaca, Jehová Diospa mandashcacunata cazuna ali cashcatami ricungui. Shinallata quiquinba causaipi ima cambiocunata rurana cashcatapashmi cuenta japingui. Chaicunata saquina shinlli cajpipash Jehovata cazushpa, paihuan ali amigo cashpaca tranquilo, cushillami sintiringui (Isaías 48:17, 18). ¿Cambiaita usharingacha?

¹⁹ Jehová Diosca imatapash ñucanchicuna na rurai ushanataca na mañanllu (Deuteronomio 30:11-14). Shuj ali amigo caimandami ñucanchitaca ali rijsin. Ñucanchi imatalla rurai ushashcata, ima nali munaicunata charishcatapash Jehová Diosca alimi yachan (Salmo 103:14). Apóstol Pabloca nircami: “Taita Diosca pactachij cashpami, chai nali munaitaca canguna apai ushanatalla japichun saquinga. Ashtahuangarin chai nali munaihuanllatami, canguna shinlli tucushpa mishashpa, chai nali munaimanda llujshinataca, paillata caramunga” nishpa (1 Corintios 10:13). Shinaca,  ñucanchicuna cazuchun Jehovallata ayudanata crinami canchi. Paimi, ñucanchi llaquicunata aguantashpa catichun “ninan ushaita” cushpa ayudanga (2 Corintios 4:7).

20. Jehová Diosta cushichingapaca ¿imatata rurana capangui?

²⁰ Jehová Diospa amigo cangapaca pai nalicachishca ruraicunata saquishpa, ali ruraicunatami rurana canchi (Romanos 12:9). Jehová Diospa amigocunaca pai alicachishca ruraicunatami alicachin. Paicuna imashina cashcataca Salmo 15:1-5​pimi ricuchijun (liipangui). Jehovata sirvijcunaca ‘juyarishpa, cushijushpa, casilla aliguta, na ñapash fiñarishpa, llaquishpa, imagutapash carashpa, aliguta crishpa, na jariyashpa, nali munaicunatapash mishashpa causanatami ricuchinajun’ (Gálatas 5:22, 23).

21. Jehová imashina cajta ricuchingapaca ¿imatata rurana capangui?

²¹ Jehová Dios imashina cajta ricuchingapaca ¿imatata rurana cangui? Jehová imata alicachishcatami yachajuna cangui. Chaipaca Bibliata cada punlla liishpa, yachajushpami catina cangui (Isaías 30:20, 21). Shina rurashpaca, Jehovata ashtahuan juyashpami paita cazungapaj munangui.

22. Jehovata cazushpaca ¿imatata ricuchingui?

²² Bibliapica ninmi, ‘nalita rurashpa punda causaita’ saquishpami, ‘ña mushuj causaita’ callarina cangui nishpa (Colosenses 3:9, 10). Por ejemplo mauca ropata llujchishpa, mushuj ropata churajuj shinami quiquinba causaipi cambiana cangui. Ñucanchi causaipi cambiana na fácil cajpipash Jehovata cazujpica paica ninmi: “alitapacha japinami tian” nishpa (Salmo 19:11). Jehová Diosta cazushpaca Diablo llulla cajtami ricuchingui. Shinapash Jehová Dios ¿imatapash caranga yashpallachu sirvina cangui? Na. Jehovataca tucui shunguhuan juyaimandami sirvina cangui. Shinallami Jehovapa ali amigo tucungui.