CAPÍTULO 25

Masturbarinataca ¿saquita ushashacha?

“Ocho huatacunata charishpami ñucallata mastubari callarircani. Jipaman Jehová Dios chaimanda imata pensajta yachaj chayashpaca nalipachami sintirin carcani. Y chaipi cutin urmashpaca nalipacha sintirishpami ‘Jehová Diosca nunca na juyahuangachu’ yashpa pensarin carcani”. (Luis)

CHAIRALLA viñai cajpi jarihuan o huarmihuan cana munaicuna ashtahuan fuerte tucujpimi huaquin jovengunaca masturbacionbi urmaita ushan. * Huaquingunaca chaita ruranaca nalimanga na canllu nishpami nita ushan. Shinapash masturbarina shuj mapa rurai cashcata cringapaca huaquin razongunatami charipanchi. Por ejemplo, Apóstol Pablo ima nishcata ricupai: “Quiquingunapi tiashca [...] jarihuan huarmihuan cana ansia [...] munaicunataca huañuchinami capanguichi” (Colosenses 3:​5, TNM). Masturbarinaca jarihuan o huarmihuan cana munaitaca na anchuchinllu. Chaipa randica, chai munaita ashtahuan charichunmi ayudan. Shinallata cai nali munaicunatapashmi ashtahuan mirachin:

● Pailla ali sintiringapaj munai. Por ejemplo, pipash masturbarishpaca paipilla pensarishpami paipa partecunata tacarin.

● Jarita o huarmita cashpapash shuj jugueteta cuenda ricun. Chaimi paicunapilla pensarishpa puñungapalla utilizan.

● Cusahuarmi puñushpa ali sintirinapa randica, cusapi o huarmipi na pensarishpa paipa munaitalla ruranaman apan.

Jarihuan o huarmihuan cana munaimanda masturbarishpa ali sintirinapa randica controlaringapami esforzarina cangui (1 Tesalonicenses 4:​4, 5, TNM). Pero ¿imashinata controlarita ushapangui? Bibliapica jarihuan o huarmihuan cana munaicunamanda cuidaringui nishpami consejan (Proverbios 5:8, 9). Shinapash masturbarina ruraipi ña urmashca cashpaca ¿imatata rurai ushapangui? Masturbarinata saquingapaj esforzarijushpapash talvez cutinmi chaipillata urmapashcagui. Chaimi mejor ñana esforzarishpa Taita Dios munashcashnaca na causai ushanichu nishpachari pensaririangui. Shinallatami shuj jovenbash pensan carca. Paica Pedromi can. Paica ninmi: “Masturbarinapi cutin urmashpaca nalipachami sintirin carcani. Chaimi nunca na cambiai ushashachu nishpa yan carcani. Y Jehová Diostapash mañaitaca na ushan carcanichu”.

Quiquinbash shinallata sintirijushpaca ama desanimaripaichu. Chaita saqui ushanguimi. Tanto mayorcuna como jovengunapashmi chai nali ruraitaca saquita ushashca. Shinaca chai nali ruraita shujcuna saquita ushashca cajpica quiquinbashmi saquita ushapangui.

Ninanda culparishpa nali sintirina

Imashinami ricupanchi masturbacionda rurajcunaca nalipachami sintirin. 2 Corintios 7:​11​pi nishcashna paicunaca ‘Taita Dios munashcashnami llaquirin’. Pero shina sintirinaca alimi can. Porque chai nali ruraita saquichunmi ayudan. Shinapash yapata culparishpa nalipacha sintirinaca ninandami desanimachin. Esforzarishpa catichunbash na saquinllu (Proverbios 24:10).

Masturbarinaca shuj nali mapa ruraimi can. Shinallata quiquinba munaicunapa esclavoshna causachun, quiquinba yuyaicunatapash huaglichishpami saquin (Tito 3:​3, TNM). Shinapash fornicación o huainayana juchahuan ricujpica shuj pecado graveca na canllu (Judas 7, TNM). Shinaca ‘masturbarishpaca shuj pecado gravetami rurashcani’ yashpa pensarishpaca ama desanimaripaichu. Chaipa randica quiquinba munaicunata controlangapaj y chai nali ruraitapash saquingapapachami ninanda esforzarishpa catina capangui.

Shinallata masturbarinapi cutin urmashpaca ama desanimaripaichu. Chaipa randica Proverbios 24:16​pi shimicunata yaripai. Chaipica ninmi: “[Alita] ruraj runaca, canchiscaman urmashpapash, cutin jatarinllami. Ashtahuangarin Diosta na manllajcunaca, jatun llaquipimi urmanga” nishpa. Cutin pandarishpaca shuj nali personami cani yashpaca ama pensaripaichu. Chaipa randica, imashpa cutin pandarishcata, shinallata ama cutin chaihuanllata pandaringapaj imata rurai ushashcata pensaripai.

Shinallata Jehová Dios juyaj, perdonaj Dios cashcatapash yaripai. Shuj viajeca Rey Davidpashmi paipa munaicunamanda pandarishpaca quiquinshna llaquilla sintirirca. Paica nircami: “Huahuacunata taita llaquinshnallatami, Mandaj Diosca paita manllajcunataca llaquin. Paica, ñucanchi imashna cajtami rijsin. Ñucanchitaca, ñutu alpa cajtami yarin” (Salmo 103:​13, 14). Jehová Diosca ñucanchicuna imperfectos cashcataca alimi yachan. Chaimi paica perdonangapaj listo can (Salmo 86:​5). Shinallata ñucanchicunapash cambiocunata rurangapaj esforzarichunbashmi munan. Cunanga chai nali ruraita saquingapaj imacunatalla rurana cashcata ricupashunchi.

Imacunatalla rurajushcata ali ali ricupai. ¿Quiquinga imapash peliculacunata o internetpi imapash paginacunata ricushpa jarihuan o huarmihuan cana munaicuna ashtahuan fuerte tucujtachu cuenta japipashcangui? Quiquinda shina pasajujpica Salmista jarigu Jehová Diosman oracionbi ima nishcata yaripai. Paica “ñuca ñavitapash, imapash yangacunatara ricunamandaca anchuchihuayari” nircami (Salmo 119:37). *

Shuj cosascunapi pensaringapaj esforzaripai. Chaita rurangapaca William ima nishcata yaripai. Paica nircami: “Puñungapaj nara rishpallata Bibliamanda parlaj temacunata liinami ayudan. Shinami quiquinga Jehová Diospa mandashcacunapi y Bibliapi nishcacunapi pensarishpa tranquilo samaita ushapangui” (Filipenses 4:​8).

Shuj ali amigohuan parlapai. Ninanda pinganayachishpapash shuj ali amigoman villanallami capangui. Shinami chai nali ruraita saquichun ayudanga. Chaitami Davidca rurarca. Paica ninmi: “Ñuca taitahuan parlanatami decidircani. Pai ñucaman ima nishcataca ñucaca na cungashachu. Paihuan parlana ñucapa difícil cashcata cuenta japishpami ‘Ñucahuan parlashcamandaca ninandami cushijuni’ nishpami nihuarca. Chaita uyashpaca ninandami animarircani. Chaimi cambiangapapacha decidircani.

“Ñuca taitaca ñuca ama nalipacha sintirichunmi Bibliapa huaquin textocunata liihuarca. Shinallata chaita rurana nali cashcata ñuca intindijujta o na intindijujta ricungapami shuj textocunatapash liihuarca. Shinallata ñuca taitahuan cutin parlana horascaman masturbarinapi ama cutin urmachunmi animahuarca. Y chaipillata cutin urmashpaca ama yapata llaquirishpa cati viajeta ashtahuan tiempota esforzarichunmi animahuarca. Ñucata ayudangapaj ñuca taita pendiente cajta ricushpaca ninandami cushijurcani”. *

CATI CAPITULOPI

Divertirinamandalla relaciones sexualescunata charinaca ¿ciertopachachu ali can?

[Notacuna]

BIBLIAMANDA TEXTO

“Chaimandami, jovenguna charishca munaicunamandaca caruyana cangui. Ali shunguta charishpa Taita Diospi confiajcunahuan igualmi alita ruranata tucui shunguhuan crinata, juyanata, tranquilo ali causanata mascana cangui” (2 Timoteo 2:​22, TNM)

CAITA RURANAMI AYUDANGA

Chai munaicuna nara fuerte cajpillatami orana capangui. Jehová Diosman orajushpaca aguantashpa catingapaj paipa “ninan ushaita” carachunmi mañana capangui (2 Corintios 4:​7).

¿YACHAPARCANGUICHU?

Jarihuan o huarmihuan cana munai mishachun saquinaca facilmi caita ushan. Shinapash quiquin espiritualmente shinlli cashpaca, sololla cashpapash chai munaicuna ama mishachun controlarita ushanguimi.

CAITA RURAPAI

Ali cosascunapilla pensaringapaca ¿imatata rurana cani?

Shuj tentación ricurijpi ama cutin chaipillata urmangapaca ¿imatata ruragrini?

Cai temamandaca ¿imacunatallata ñuca taitacunata tapungapaj munani?

QUIQUINGA ¿IMATA YUYAPANGUI?

● Jehová Dios perdonangapaj listo cashcata yaipi charinaca ¿imamandata ali can? (Salmo 86:​5).

● Jarihuan o huarmihuan cana munaitaca Jehová Diosllatami cushca. Pero chai munaicunata controlachunmi mandan. Shinapash ¿nachu quiquin chaita pactachi ushanalla cajpi chaita rurachunga mandan?

[Comentario]

“Masturbarinata saquishca horasmandaca ñuca concienciapipash tranquilami sintirini. Shina sintirinataca nimahuanbash na cambiashachu.” (Sara)

[Foto]

Shuj carrerapi calpajushpa nitijashpa urmashpapash, cutin jatarishpami calpashpa catipangui. Shina cuendami masturbarinapi cutin urmashpaca yangatami esforzarijuni nijunapa randica, chaita saquingapapachami esforzarina capangui