Testigo de Jehovacunapaca Bibliamanda yachajunami ashtahuan minishtirin. Chaimandami tiempo completopi sirvijcunapaca escuelacuna tian. Chaipimi paicuna ashtahuan ali villachichun, ali yachachichun ayudan (2 Timoteo 4:5).

Precursorcunapa Escuela. Cai escuelataca ladolla Tandanajui Huasipimi ruran. Precursor regularcunami 6 punllacunata rina can. Shinapash ña shuj huatata precursor cashpami chaimanga rita ushan. Chai escuelami Jehovaman ashtahuan quimirichun, ashtahuan ali villachichun, ali yachachichun, Diosta ali sirvishpa ñaupaman catichun ayudan.

Diospa Reinomanda Villachijcunapa Escuela. Cai escuelaca ishcai quillatami paran. Cazadocuna, solterocuna, solteracunapashmi rita ushan. Chaiman ringapaca, 23manda 65 huatacamanmi charina can. Precursor shinami ña unaillaguta sirvijuna can. Shinallata, maipi ashtahuan minishtirishca pushtucunapi Diosta sirvina munaitami charina can. Shinami, alipacha villachij Jesuspa chaquita catishpa “Ñucami caipi capani, ñucata cachahuailla” ninga (Isaías 6:8; Juan 7:29). Shuj llactacunapi sirvingapaj rishpaca paicunapa munainata huashaman saquishpami, chai llactapi gentecunapa costumbrecunahuan, micunacunahuan yacharina can. Chiri o cunuj llactacuna cajpipash yacharinami can, chai llactapi parlaj shimitapash yachajunami tucunga. Chai escuelami, maipi cashpapash cushijushpa Diosta sirvinata yachajuchun ayudanga. Shinallata ashtahuan ali sirvishpa Jehovatapash paipa organizaciondapash ashtahuan ali ayudachunmi yachachinga.

Galaad Escuela. Cai escuelaca 1943 huatapimi callarirca. Chai huatamanda cunangamanga 8 mil yali huauquipanicuna graduarishpami misionerocuna shina shuj shuj llactacunapi Diosmanda yachachishpa alipacha ayudanajun (Hechos 13:47). Imashina ayudashcata ricupashun. Misionerocuna Perú llactaman chayajpica shuj congregacionllapash na tiarcachu. Cunanbica mil yali congregaciongunami tian. Shinallata Japón llactaman chayajpipash 10 Testigollapash na tiarcachu. Cunanbica 200 mil yali Testigocunami tian. Chai escuelapica picha quillacunatami Bibliata alipacha yachajun. Jehovapa organización ñaupaman catichun imashina ayudanatapashmi yachajun. Chaimandami precursor especialcunata, superintendente de circuitocunata, Galaad Escuelaman nara rishca misionerocunata o Betelpi sirvijcunata invitan.

• Precursorcunapa Escuelaca ¿imapata ayudan?

• ¿Picunata Diospa Reinomanda Villachijcunapa Escuelaman rita ushan?