Marcos 14:1-72
-
Sacerdotecunaca Jesusta imashina huañuchinatami parlarirca (1, 2)
-
Shuj huarmiguca mishquilla ashnajuj aceitegutami Jesuspa umapi talirca (3-9)
-
Judasca Jesusta traicionarcami (10, 11)
-
Último Pascua micuna (12-21)
-
Jesuspa Cena (22-26)
-
Na rijsinichu nishpa Pedro neganatami Jesusca villarca (27-31)
-
Getsemaní pushtupimi Taita Diosta mañarca (32-42)
-
Jesustaca prezo japircami (43-52)
-
Sanedrinmandacunami Jesustaca juzgarca (53-65)
-
Jesustaca na rijsinichu nishpami Pedroca negarca (66-72)
14 Ishcai punlla jipaca, Pascua* Fiestapash y Levadura Illa Tandata Rurana Fiestapashmi* carca. Chaipimi importante sacerdotecunapash y Leyta yachachijcunapash llullacunata nishpa, Jesusta imashinapash prezo japichishpa huañuchinata pensarinajurca.
2 Shinapash paicunaca ninajurcami: “Fiesta punllacunapica na Jesustaca prezo japichinachu canchi. Shina rurajpica, gentecunaca ashtami bullayanga” nishpa.
3 Betania pueblopi cashpami, Jesusca lepra unguita charishca Simón shuti runagupa huasipi micujurca. Chaipimi shuj huarmiguca, nardo plantaguhuan rurashca mishquilla ashnajuj valishca aceiteguta, yura rumihuan rurashca jarragupi apashpa paipaman quimirirca. Shina apamushpami, chai jarraguta pascashpa aceitetaca Jesuspa umapi tali callarirca.
4 Chaita ricushpami huaquingunaca nalicachishpa o na gushtashpa paicunapura ninajurca: “¿Imashpata chai mishquilla ashnajuj aceitegutaca yanga yanga desperdiciajunyari?
5 Cai mishquilla ashnajuj aceitetaca, 300 denario* yali culquipa jatushpa, chai culquitaca pobre gentegucunaman carashparapashmi ali canman carca” ninajurca. Shina nishpami paicunaca chai huarmiguhuanga ninanda culiranajurca.
6 Shinapash Jesusca nircami: “Ama jarcaichichu. ¿Imamandata chai huarmigutaca shina ninajunguichi? Ñucapa ali cachunmi, paica shina rurashca.
7 Pobre gentegucunaca siempremi cangunahuan canga. Paicunata ayudangapaj munashpaca ima horapash ayudanguichillami. Pero ñucaca na siemprechu cangunahuan casha.
8 Chai huarmiguca, pai imata rurai ushashcagutallami rurarca. Mishquilla ashnajuj aceiteguta ñuca cuerpopi churashpaca, ñuca huañujpi ñucata pambangapaj alistajunshnami chai huarmiguca shina rurarca.
9 Ciertopachami cangunataca nini, mundo enteropi maipi cashpapash ali villaicunata predicajpica, cai huarmigu imata rurashcatapashmi, gentecunaca yachaj chayashpa parlanajunga” nircami.
10 Judas Iscarioteca Jesuspa 12 apostolcunapuramandami carca. Judasca Jesusta prezo japichun ayudangapami importante sacerdotecunahuan parlangapaj rirca.
11 Chaita uyashpami paicunaca ninanda cushijushpa culquita pagashunllami nirca. Chaimi Judasca, Jesusta traicionangapaj ima hora japichinata ricushpa purijurca.
12 Levadura Illa Tandata Rurana Fiestapa primer punllapimi, Pascua animalta huañuchina costumbre tiarca. Chaipimi Jesuspa discipulocunaca Jesustaca cashna tapunajurca: “Pascua micunata quiquin micuchunga ¿maipita ruragrichun munapangui?”.
13 Chaimi paipa ishcai discipulocunataca cashna nishpa cacharca: “Jerusalén llactaman ripaichi. Chaipimi yacu funduta apashpa rijuj runaguhuan tuparinguichi. Paitami catishpa rina canguichi.
14 Chai runagu maijan huasiman yaicujpipash, chai huasi dueñotaca nipanguichi: ‘Yachachijca, “maijan ucugupita ñuca discipulocunahuanga Pascua micunata micuita ushapani”’ ninmi ninguichi.
15 Chaimi paica, shuj jatun cuartota ricuchinga. Chai cuartoca jahua altibajopimi ña listo canga. Chaipimi, Pascua micunata micungapaj tucuita alistana canguichi”.
16 Shina nijpimi Jesuspa discipulocunaca chaimanda rishpa llactaman yaicurca. Jesús nishcashnami, shuj runaguhuan tuparirca. Chai runagumi shuj ucuta paicunaman ricuchirca. Chaipimi paicunaca Pascua micunata micungapaj tucuita alistarca.
17 Ña indi huashajujujpimi Jesusca paipa 12 apostolcunandi chaiman chayamurca.
18 Mezapi micushpa tianajushpami Jesusca paicunataca nirca: “Ciertopachami cangunataca nini, ñucahuan micushpa tiajuj cangunapuramanda shujmi, ñucataca traicionashpa japichigrihuan” nirca.
19 Chaita uyashpami paicunaca ninanda llaquirishpa tucuicuna Jesustaca tapunajurca: “¿Ñucachu traicionagrijupani?”.
20 Chaimi Jesusca nirca: “Ñucahuan cai platopillata micujuj runami ñucataca traicionahuanga.
21 Taita Dios escribichishca shimipi nishca shinaca, Runapa Churica* ñallami huañunga. Pero Runapa Churita traicionashpa japichij runaca, aij imachari tucunga. Na nacirishparapashmi ali canman carca” nirca.
22 Micunajushpallatami Jesusca shuj tandaguta japishpa Taita Diosta mañarca. Chai jipami, chai tandaguta partishpa, paipa discipulocunaman cushpa nirca: “Japipaichi. Cai tandaguca ñuca cuerposhnami can” nishpa.
23 Chai jipaca, vino copatapash japishpa, Taita Diosta pagui nishpami paipa discipulocunaman curca. Chaimi tucuicuna chai copamanda ufiarca.
24 Paicunataca Jesusca nircami: “Caica ñuca yahuar cuendami can. Ñucapa yahuarmandami shuj trato* tiagrin. Ashtaca gentecuna salvarichunmi ñuca yahuarta jichagrini.
25 Ciertopachami cangunataca nini, cunanmanda vichaica Taita Diospa Gobiernopi chairalla rurashca vinota ufiangacamanmi cai vinomandaca cutinga na ufiasha” nirca.
26 Ña ultimopica, Taita Diosta alabangapaj candashca jipami* Jesuspash y paipa apostolcunapash Olivos shuti lomaman rirca.
27 Chai jipami Jesusca paicunataca nirca: “Tucui cangunami ñucatalla saquishpa rigringuichi. Porque Taita Dios escribichishca shimipica nijunmi: ‘Michij runagutami huañuchisha. Chaimi llamagucunaca caita chaita rinajunga’ nishpa.
28 Shinapash causachi tucushca* jipaca, cangunata ñaupashpami Galilea llactaman ñucaca risha” nircami.
29 Chaimi Pedroca nirca: “Tucuicuna quiquinda saquijpipash, ñucaca quiquindaca na saquishachu” nishpa.
30 Shina nijpimi Jesusca nirca: “Na llullashpami candaca nini, cai tutallatami gallopash nara ishcai viajeta candajpillata, canga quimsa viajecaman na rijsinichu nishpa ñucataca negagrihuangui”.
31 Shinapash Pedroca cutin cutinmi nijurca: “Quiquinhuan igual huañuna cashpapash, na rijsinichu nishpaca nunca na quiquindaca negashachu” nishpa. Chaishujcunapashmi shinallata ni callarirca.
32 Chai jipami Jesusca paipa discipulocunandi Getsemaní nishca pushtuman chayarca. Chaipimi paicunataca nirca: “Taita Diosta mañangacamanga caipi tianajupaichi” nishpa.
33 Shina nishpami Jesusca, Pedrota, Santiagota y Juandapash pushashpa rirca. Chai jipaca ninandapachami llaquiri callarirca.
34 Jesusca paicunataca nircami: “Ñucaca* huañungashnami ninandapacha pinarishpa llaquirijuni. Caipi quidapaichilla.* Na puñushpa rijcharia capanguichi” nirca.
35 Chai jipaca paicunamanda ashaguta caruyashpami, Jesusca alpapi cungurishpa Taita Diostaca, ñalla charina llaquicunata anchuchinalla cajpica anchuchipayari nishpa mañai callarirca.
36 Paica cashna nishpami mañajurca: “Ñuca Taitalla* canga tucuitami rurai ushangui. Cai copata ñucamanda anchuchipayari. Pero ñuca munashcataca ama rurapanguichu. Sino quiquinba munashcata rurapangui”.
37 Shina mañashca jipami Jesusca, paipa discipulocunapaman tigrashpa, paicuna puñunajujta ricurca. Chaimi Pedrotaca tapurca: “¿Imashpata puñujungui? ¿Nachu shuj horasgutallapash rijcharia caita usharcangui?
38 Rijchariami cana canguichi. Pecadopi ama urmangapaca Taita Diostami mañashpa catina canguichi. Na llullashpami nini, gentecunaca alita rurangapami munan. Pero paicunapa cuerpoca* alita ruraitaca na ushanllu” nircami.
39 Chai jipami Jesusca cutin mañangapaj rishpa, Taita Diostaca punda imata mañashcatallata mañarca.
40 Paipa discipulocunapaman cutinbash tigramushpaca, Jesusca paicuna puñunajujtami ricurca. Paicunaca puñui vincijpimi puñushpa quidashcarca. Chaimi paicunaca imata ninatapash na yacharca.
41 Ña quimsa viajeta tigramushpami Jesusca paipa discipulocunataca nirca: “Cai horasca puñujuna, samajuna horasca na canllu. Ama puñunajuichillachu. Ñami tiempoca chayamushca. Ricuichi, Runapa Churita* japishpami pecador gentecunapa maquipi entreganga.
42 Jatarishpa ripashunchi. Ricuichi, ñucata traicionashpa japichigrijujca ñami chayamujun” nirca.
43 Jesús shina parlajujpillatami, Judasca chayamurca. Paica 12 apostolcunapuramandami carca. Judashuanga ashtaca gentecunapashmi espadacunahuan, garrote caspicunahuan shamunajurca. Chai gentecunataca importante sacerdotecuna, Leyta yachachijcuna y llactapi autoridadta charijcunami cachamushcarca.
44 Jesús pi cashcata gentecuna cuenta japichunmi Judasca nishcarca: “Maijandami ñavipi muchani, paitami japina canguichi. Ama escaparichunga aliguta ricushpami apana canguichi” nishpa.
45 Judasca Jesuspaman directo rishpami, paipaman quimirishpa nirca: “Buenas noches Yachachij”.* Shina nishpami ñavipi mucharca.
46 Chaimi gentecunaca Jesustaca prezo japirca.
47 Shinapash Jesuspa discipulocunapuramanda shujmi, paipa espadata llujchishpa, sacerdote principalpa* shuj esclavopa rinrita fitirca.
48 Shinapash Jesusca paicunataca nircami: “¿Shua cajpishnachu cangunaca espadacunahuan, garrote caspicunahuan ñucataca japingapaj shamunajunguichi?
49 Taita Diospa templo huasipi yachachijushpaca, cada punllami cangunahuan carcani. Shinapash cangunaca na prezo japihuarcanguichichu. Taita Dios escribichishca shimi pactarichunmi shina pasashca” nirca.
50 Chai jipami, Jesuspa discipulocunaca paitalla saquishpa tucuilla pacajushpa rirca.
51 Shinapash, shuj joven runagumi, huasha huashalla cati callarirca. Paica fino, ali telahuan rurashca churajunata churajushcami carca. Gentecunaca paita prezo japingapami munanajurca.
52 Shinapash paica jahualla churajunatapash shitashpami, ucuman churajunahuanlla calpashpa rirca.
53 Chai jipami Jesustaca sacerdote principalpaman apanajurca. Chaipimi tucuilla importante sacerdotecunapash llactapi autoridadta charijcunapash y Leyta yachachijcunapash tandanajurca.
54 Shinapash Pedroca caru carullami sacerdote principalpa huasi patiocaman catishpa rirca. Chaipimi Pedroca chai huasipi sirvijcunahuan tiarishpa nina ladopi cunushpa quidarca.
55 Importante sacerdotecunapash y Sanedrinmanda* tucuilla sacerdotecunapash Jesusta huañuchingapami, llullacunata nishpa Jesusta juchachichun testigocunata mascanajurca. Pero na imatapash tarircachu.
56 Tauca gentecunami llullacunata nishpa Jesusta juchachinajurca. Shinapash paicunaca shujta shujtami ninajurca.
57 Huaquingunacarin shayarishpami, llullacunata nishpa Jesustaca cashna juchachinajurca:
58 “Ñucanchipachami cashna nijta uyarcanchi: ‘Runacunapa maquihuan rurashca Taita Diospa cai templo huasita urmachishpami, quimsa punllahuanga shuj templo huasita cutin shayachisha. Chai templo huasica runacunapa maquihuan rurashca huasica na cangachu’”.
59 Shina ninajushpapash, paicunapurallatami shujta shujta ninajurca.
60 Chaimi chai sacerdote principalca paicunapa ñaupapi shayarishpa Jesustaca tapurca: “¿Nachu imatapash nigringui? Cai runacuna canda imata ninajujtaca ¿nachu uyajungui?” nirca.
61 Shinapash Jesusca upallami quidarca, na imatapash tigrachircachu. Chaimi sacerdote principalca cutin tapurca: “¿Canllu Taita Diospa Churi* Cristo cangui?”.
62 Chaimi Jesusca nirca: “Ari, ñucami cani.* Cangunaca Runapa Churitaca* ninan poderta charij Taita Diospa ali ladopi tiajujta y fuyu* jahuata shamujujtapashmi ricunguichi” nirca.
63 Chaita uyashpami sacerdote principalca paipa churajunata liquishpa nirca: “¿Pitapash ashtahuan tapujunaca minishtirinrachu?
64 Taita Diosta nalicachishpa o na ricunayachishpa imacunatapash rimajtaca cangunallatami uyanajunguichi. Shinaca ¿imatata pensanguichi?”. Chaimi tucuicuna, paica huañunapachami can ninajurca.
65 Huaquingunaca tucashpa* ñavita tapashpa* y maquihuan shinllita huactashpami Jesustaca ninajurca: “Can profeta cashpaca pi huactajujta villayari” nishpa. Ñavipi huactashca jipami, tribunalmanda guardiacunaca apashpa rirca.
66 Shinapash Pedroca ucu lado patiopimi tiajurca. Shina tiajujpimi sacerdote principalpa shuj sirvienta huarmigu shamurca.
67 Nina ladopi Pedro cunujujta ricushpami, chai sirvienta huarmiguca paita ricunman quidashpa nirca: “Canbashmi Nazaret llactamanda chai Jesushuan igual purin carcangui”.
68 Chaimi Pedroca negashpa nirca: “Paitaca rijsitallapash na rijsinichu. Imatacha nijunguipash” nishpa. Shina nishpami patioman yaicuna punguman rirca.
69 Shinapash chai sirvienta huarmiguca Pedrota ricushpami chaipi shayanajuj gentecunamanga cutin nirca: “Paipashmi paipa discipulopura can”.
70 Shina nijpipashmi paica negashpa catirca. Chai jipallami, chaipi shayanajuj gentecunaca, cutin Pedrotaca ninajurca: “Canbashmi paicunahuan igual purin carcangui. Galilea llactamanda cashcataca ricunallami can”.
71 Chaimi paica juramentushpa nirca: “Chai runataca rijsitallapash na rijsinichu. Pimanda parlajujtapash na yachanichu”.
72 Shina nijhuanmi shuj galloca cutin candarca. Chaipimi Pedroca Jesuspa cai shimicunata yarirca:* “Gallopash nara ishcai viajeta candajpillatami canga quimsa viajecaman na rijsinichu nishpa, ñucataca negahuangui” nishcata. Chaimi Pedroca ninandapacha llaquirishpa huacarca.
Notacuna
^ Glosariopi “Pascua Fiesta” shimita ricupangui.
^ Glosariopi “Levadura Illa Tandata Rurana Fiesta” shimita ricupangui.
^ Shuj trabajadorca punlla enterota pambapi trabajashpami shuj denario culquita ganan carca. Glosariopi “denario” shimita ricupangui.
^ Glosariopi “Runapa Churi” shimita ricupangui.
^ O “salmocunata candashca jipami”.
^ Griego shimipica “jatarichi tucushca” nijunmi.
^ O “saquiripaichilla”.
^ Hebreo o arameo shimipica “Abba, Taita” nijunmi. Cai shimitaca, taitata juyaihuan, respetohuan parlangapami huahuacunaca utilizan carca. Shina nishpaca “papito” nijuj cuendami can.
^ Cuerpo nishpaca “gentecuna pecador cashcatami” nijun.
^ Glosariopi “Runapa Churi” shimita ricupangui.
^ Glosariopi “sacerdote principal” shimita ricupangui.
^ Griego shimipica “Bendito” nijunmi. Bendito nishpaca “limpio canata, jatunyachishca canata, pimandapash alita parlanatami” shina nijun.
^ Griego shimipica “canllatami nishcangui” nijunmi. Ari ningapami shina nin carca.
^ Glosariopi “Runapa Churi” shimita ricupangui.
^ Griego shimipica “jahua cielo fuyucuna” nijunmi.
^ O “escupishpa”.
^ O “quilpashpa”.
^ O “yuyarirca”.
