1 Tesalonicenses 1:1-10
1 Ñucaca Pablomi capani. Silvano* huauqui y Timoteoca ñucahuanmi can. Cai cartaca Tesalónica llactapi congregacionbami* can. Quiquingunaca Taita Dioshuan y Señor Jesucristohuanga shujllashnami capanguichi.
Taita Dios quiquingunata ninanda juyapachun* y paihuan tranquilo ali canata quiquingunaman carachunmi munapanchi.
2 Taita Diosta mañanajushpaca, siempremi paitaca tucui quiquingunamanda agradicipanchi.
3 Quiquinguna Taita Diospi crishcamanda y juyaimanda imata rurashcataca, ñucanchi Taita Diospa ñaupapica na cungapanchichu. Shinallata, ñucanchi Señor Jesucristopi shuyanajuimanda llaquicunata aguantashcatapash na cungapanchichu.
4 Taita Dios juyashca huauquicuna, quiquingunata pai agllashcataca alimi yachapanchi.
5 Ali villaicunata quiquingunaman predicashpaca, na shimillachu predicaparcanchi. Sino Taita Diospa espíritu santopa* ayudahuanmi predicaparcanchi. Quiquingunaman predicashca ali villaicuna cabal cashcata y chai villaicuna quiquingunata ayudashcataca seguromi capanchi. Quiquingunapa alipallata ñucanchicuna imashina causashcataca alimi yachapanguichi.
6 Ashtahuangarin, tauca llaquicunata charishpapash, Taita Diospa espíritu santo carashca cushijuihuanmi Taita Diospa shimitaca chasquiparcanguichi. Shina rurashpami Señor Jesushna ruraparcanguichi y ñucanchicunashnapash ruraparcanguichi.
7 Shinami quiquingunaca Macedonia llactapi y Acaya* llactapi Jesuspa tucui discipulocunapaca shuj ali ejemplo tucuparcanguichi.
8 Quiquinguna predicashcamandami Macedonia llactapipash, Acaya llactapipash Jehová* Diospa shimitaca uyashca. Shinallata quiquinguna Taita Diospi crishcataca tucui ladocunapi gentecunami uyashca. Chaimi ñucanchica imata ninatapash na charipanchi.
9 Porque chai gentecunaca quiquinguna ñucanchita imashina chasquishcataca cunangamanmi parlanajun. Shinallata causajuj y ciertopacha Taita Diospaman tigrashpa paita sirvingapaj quiquingunapa yanga dioscunata saquishcatapash cunangamanmi parlanajun.
10 Shinallata, Taita Diospa Churi jahua cielomanda shamunata shuyangapami, quiquingunaca Taita Diospaman tigrarcanguichi. Paimi Jesustaca huañushcacunapuramanda causachirca.* Y Jesusmi Taita Diospa shamujuj castigomandaca salvanga.
Notacuna
^ O “Silas”.
^ Glosariopi “congregación” shimita ricupangui.
^ Glosariopi “bondad inmerecida” shimita ricupangui.
^ O “Taita Diospa poderpa”. Glosariopi “espíritu santo” shimita ricupangui.
^ Acayaca Roma llactapa shuj provinciami carca. Acaya provinciapa capitalca Corintomi carca.
^ Griego shimipica “jatarichirca” nijunmi.
