1 Timoteo 6:1-21
6 Esclavocunaca tucui shunguhuanmi paicunapa dueñotaca respetana can. Taita Diospa shutita y paipa yachachishcacunatapash nalicunata ama rimachunmi shina rurana can.
2 Esclavocunaca, Jesuspa discípulo caj dueñocunataca na sin respetoca tratanachu can. Porque paicunaca huauquicunami can. Ashtahuangarin, paicunataca ashtahuan alimi sirvina can. Porque esclavocunapa trabajomanda beneficiarij dueñocunaca Jesuspa discipulocuna y juyashca huauquicunami can.
Quiquinga cashna cosascunata yachachishpa y cashna consejashpami catina cangui.
3 Si picunapash shuj cosascunatara yachachishpa y ñucanchi Señor Jesucristopa ali yachachishcahuanbash, Taita Diosta tucui shunguhuan sirvichun ayudaj yachachishcahuanbash na igualta yachachinajushpaca,
4 jariyashcacunapachami can. Y paicunaca nimata na intindinajunllu. Siempremi tapuj tucunajun, imapash palabracunamanda discutirinatallami* yapata gushtan. Chashna ruraicunamandami gentecunaca envidian, macanajun, groserota parlan y shujcunapipash na confian.
5 Shinallata na importante cosascunamandami cutin cutin discutirinajun. Chaicunataca nalipacha yuyaicunata charijcuna y cabal yachachishcacunata ñana intindijcunami shina yachachin. Paicunaca imacunatapash charinamandallami, Taita Diostaca tucui shunguhuan sirvij tucun.
6 Y ciertomi can, ñucanchi charishca cosasgucunahuanlla contento cashpaca, Taita Diosta tucui shunguhuan sirvimandami ninanda charijyashcashna canchi.
7 Porque ñucanchicuna cai mundopi nacirishpaca nimata na apamurcanchichu y huañushpapash nimata na apashpa rishunllu.
8 Shinaca ñucanchi charishca micunahuanlla y charishca ropaguhuanlla** contento capashunchi.
9 Shinapash imashinapash charijyangapaj* munajcunaca, tentaciongunapi, trampacunapimi urman. Shinallata llaquicunaman apaj nali munaicunapipashmi urman. Chaicunami paicunataca ninanda sufrichin y huañuimanbash apan.
10 Porque culquita juyanami tucui clase o tucui laya nali ruraicunata callarichin. Y culquita juyaimandami, huaquingunaca Taita Diospi confianata saquishca y tucui clase o tucui laya sufrimientocunatapash charishca.
11 Pero quiquinga Taita Diosta sirvijmi cangui. Y chai cosascunamandaca calpashpa rinshnami caruyana cangui. Chaipa randica alita rurangapaj* Taita Diosta tucui shunguhuan sirvingapaj, feta charingapaj, shujcunata juyangapaj, aguantangapaj y ali ali cangapami esforzarina cangui.
12 Taita Diospa yachachishcacunata difindingapami, cai ali macanajuitaca macanajuna cangui. Para siempre causanataca imapipash shinllita charirinshnami na saquina cangui. Cai causaita chasquichunmi Taita Diosca quiquindaca agllashca. Y cai causaimandami ashtaca gentecunamanga aliguta villachishcangui.
13 Tucuiman causaita cujuj Taita Dios ricujta y Poncio Pilatopa ñaupapi aliguta villachishca Cristo Jesús ricujtami quiquindaca cashna mandani,
14 ñuca imata mandashcataca aligutapacha, imamandapash na juchachi tucushpami ñucanchi Señor Jesucristo ricuringacaman cazuna cangui.
15 Paica bendiciai tucushca, Ashtaca Poderta Charijmi can. Y señalashca tiempopimi paipa podertaca ricuchinga. Paimi reycunashna mandajujcunapa Rey can. Y paimi tucui mandajcunata yali Jatun Mandaj can.
16 Único paillami nunca na huañunga. Paica ninan punchapamba pushtupimi causajun. Chai pushtumanga ni shuj gente na quimirita ushanllu. Paitaca nipi na ricushcachu y nipi na ricui ushanllu. Paica respetashca cachun y para siempre poderta charichun. Amén.
17 Cai tiempopi* charijcunataca cashna mandapangui, na jariyanachu capanguichi. Tucurinalla imata charishcacunapipash na confianachu capanguichi. Sino Taita Diospimi confiana capanguichi. Paimi ñucanchi tucui ima charishcataca ninandapacha caramujun.
18 Shinallata ashtaca ali ruraicunatami rurana canguichi, imagutapash caranami canguichi y shujcunaman imagutapash compartingapaca listomi cana canguichi nishpa ningui.
19 Shinami paicunaca Taita Diospa valishcapacha carashcacunata tandachishpa, shamuj punllacunapica seguro caita ushanga. Y shinami paicunaca ciertopacha ali causaitaca imapipash charirinshna charirita ushanga.
20 Ñuca juyashca Timoteo, Taita Dios imata quiquinman mingashcataca cuidanami cangui. Taita Diospa contra rimashca yanga parlocunataca na uyanachu cangui. Shinallata, alimi yachanchi ninata yachajcunapa yuyaicunatapash na uyanachu cangui. Chai yuyaicunaca cabal yachachishcacunapaca contrami can.
21 Chai yuyaicunata catimandami huaquingunaca, cabal yachachishcacunata saquishca.
Taita Diospa ninan juyaica* quiquingunahuan cachun.
Notacuna
^ O “pliturinatallami, fiñanajunatallami”.
^ O “llachapaguhuanlla”.
^ Griego shimipica “imahuan taparinata charishcahuanlla” nijunmi.
^ O “ricoyangapaj”.
^ Glosariopi “cai tiempo” shimita ricupangui.
^ Glosariopi “bondad inmerecida” shimita ricupangui.
