Cai tiempoca gentecuna nunca na pasashca ninan llaqui tiempomi canga. Cai tiempomanda parlashpami Bibliapica ‘último punllacunapi’ o ‘tucurimui punllacunapimi’ chaica pasanga nin (2 Timoteo 3:1; Daniel 12:4). Marcos 13:19​pica cashnami nin: “Chai punllacunaca, llaqui tiempomi canga. Chashna llaqui tiempoca, cai mundota Taita Dios rurashca punllacunamandapacha cunangamanga nunca nara tiashcachu. Y cutinbash na tiangachu” ninmi (Daniel 12:1; Mateo 24:21, 22).

Ninan manllanai llaqui tiempopica ¿imata pasanga?

•   Panda religiongunami tucuchi tucunga. Panda religiongunaca na yashcapimi ñapash tucuchi tucunga (Apocalipsis [Revelación] 17:1, 5; 18:9, 10, 21). Gobiernocunami panda religiongunataca tucuchishpa saquinga. Cai gobiernocunaca Naciones Unidas shuti organizacionmi can. Paicunaca panda religiongunata tucuchishpaca Taita Diospa munaitami pactachinajunga (Apocalipsis 17:3, 15-18). a

•   Ali religiondami atacanga. Ashtaca llactacuna tandanajushpami cai ali religionman pertinicij gentecunataca tucuchishpa saquingapaj munanga. Cai tandanajushca llactacunami profeta Ezequiel shuj muscuipishna ricushca ‘Magog shuti llactata mandaj Gog shuti runa’ can. Shinapash Taita Diosca paipa llactata tucuchichunga nimamanda na saquingachu (Ezequiel 38:1, 2, 9-12, 18-23).

•   Cai alpapi gentecunatami juzganga. Jesusmi gentecunataca juzganga. “Paica imashinami michij runagu llamagucunata chivocunamanda separan, shinallatami gentecunataca ishcai grupopi separanga” (Mateo 25:31-33). Jesusca cai alpapi paipa ‘huauquicunata’ apoyashcata o na apoyashcata ricushpami gentecunataca juzganga. Paipa ‘huauquicuna’ nishpaca Jesushuan cielopi mandangapaj rina gentecunamandami parlan (Mateo 25:34-46).

•   Jesushuan mandangapaj rijcunatami tandachinga. Jesushuan mandangapaj rijcunaca cielopimi causachi tucunga. Paicunataca Taita Diostami cielopi causachun agllashca (Mateo 24:31; 1 Corintios 15:50-53; 1 Tesalonicenses 4:15-17).

•   Armagedón punllami chayamunga. Bibliapica Armagedón punllataca ‘Tucui Poderta Charij Taita Diospa [macanajui] jatun punlla’, shinallata ‘Mandaj Dios manllanayaita llaquichina punlla’ nishpapashmi rijsin (Apocalipsis 16:14, 16; Isaías 13:9; 2 Pedro 3:12). Tucuchi tucuna nishpa Jesús juzgashca gentecunaca chai punllapimi tucuchi tucunga (Sofonías 1:18; 2 Tesalonicenses 1:6-10). Shinallata chai punllapica cai alpapi tucuilla gobiernocunapashmi tucuchi tucunga. Cai gobiernocunatami Bibliapica 7 umacunata charij manllanai sacha animal nin (Apocalipsis 19:19-21).

Ninan manllanai llaqui tiempo jipaca ¿imata pasanga?

•   Diablota y demoniocunatapashmi vichashpa saquinga. Ninan poderta charij shuj angelmi Diablotapash y demoniocunatapash shuj ‘ucu ucu utujupi’ vichashpa saquinga (Apocalipsis 20:1-3). Chaipica paicunaca huañushcashnami canga, nimata na ruraita ushangachu. Chai ‘ucu ucu utujupi’ canaca shuj carcelpi cana cuendami canga. Diabloca chaimanda na llujshi ushaimandami pitapash controlaitaca na ushanga (Apocalipsis 20:7).

•   Jesusmi cai alpapi mil huatacunata mandai callaringa. Taita Diospa gobiernopimi Jesusca mil huatacunata mandai callaringa. Chai gobierno mandajushpaca gentecunataca ninandami bendicianga (Apocalipsis 5:9, 10; 20:4, 6). Ninan manllanai llaqui tiempopi na huañushca “na cuentai ushanalla ashtaca ashtaca gentecunami” Jesús cai alpata mil huatacunata mandai callarijta ricunga (Apocalipsis 7:9, 14; Salmo 37:9-11).