Na tucui religiongunachu Taita Diosman quimirichun ayudan. Ashtaca religiongunapica Taita Dios munashcashna na adorashcatami Bibliapica ricuchin. Chaipaca ishcai nali ruraicunata ricupashun.

Primer yuyai: Yanga dioscunatami adoran

 Bibliapica yanga dioscunata adoranaca nimapa na sirvinllu ninmi (Jeremías 10:3-5; 16:19, 20). Jehová Diosca Israel llactataca: “Ñuca ñaupapica, ama shuj dioscunata charinguichu” nircami (Éxodo 20:3, 23; 23:24). a Shinapash israelitacuna yanga dioscunata adorai callarijpica Jehová Diosca ‘israelcunahuanga nina japirinshnami fiñarirca’ (Números 25:3; Levítico 20:2; Jueces 2:13, 14).

 Cunanbipashmi Taita Diosca yanga ‘dioscunataca’ na adoranachu canguichi nin (1 Corintios 8:5, 6; Gálatas 4:8). Paita sirvingapaj munajcunataca panda religionbi yachachishca ruraicunataca saquichunmi mañan. Bibliapica: “Paicunapaj chaupimanda llujshishpa anchurichi” nijunmi (2 Corintios 6:14-17). Tucui religiongunallata igual cajpica ¿imamandashi paicunapa chaupimanda llujshishpa anchurichi nijun?

Segundo yuyai: Diosta adorangapaca Dios millanayachishca cosascunatami ruran

 Israelitacunaca yanga dioscunata adoranshnallatami Jehová Diostapash adorai callarirca. Jehová munashcashnaca na adoranajurcachu. Chaimandami Jehová Diosca paicunahuanga culirarca (Éxodo 32:8; Deuteronomio 12:2-4). Curacunata mandajcunaca Diostaca panda yuyaicunahuanmi adoranajurca. Chaimandami Jesusca nalitami ruranajunguichi nishpa tacurirca. Paicunaca tucui shunguhuan Diosta adoranajunshna cashpapash na tucui shungu adoranajurcachu. Paicunaca mandashca shimipi nishcashna: ‘Imatapash cashcatapacha rurashpa causanata, shujcunatapash llaquishpa juyanata, Diostapash ali crishpa’ causanataca na pactachinajurcachu (Mateo 23:23).

 Shinaca Bibliapa nishcacunataca pactachij religionllami Taita Diosman ashtahuan quimirichun ayudan (Juan 4:24; 17:17; 2 Timoteo 3:16, 17). Pandacunata yachachij religiongunaca gentecunata Diosman quimirichun ayudanapa randica caruyachitarami caruyachishca. Ashtaca gentecunaca Trinidadmanda, huañushca jipa alma causashpa catijta, shinallata huañushca jipa nalicuna para siempre llaquichi tucunamandapash Bibliapi yachachi nishpami criin. Pero cai yuyaicunaca yanga dioscunata adorana costumbrecunamandami shamun. Cashna yuyaicunata catinaca nimapi na ayudanllu. Cai panda yuyaicunaca Dios yachachishcashna adorachunga na ayudanllu (Marcos 7:7, 8).

 Jahua shungulla Diosta adoraj religiongunataca Taita Diosca nalicachishpami ricun (Tito 1:16). Ñucanchicunata Diosman quimirichun ayudangapaca shuj religionbi yachachishcacunaca ñucanchi causaipimi ayudana can. Por ejemplo Bibliapica cashnami yachachin: “Canguna purapi maijambash ali crijmi cani nirijushpapash, pai rimajuj jallutapash na jarcai ushashpaca, paipaj shungupillatami umachirijun. Shina crijmi cani nijushcapash, yanga yangami. Taita Diospa ñaupapi tucui shunguhuanbacha ima mapapash illaj crij canaca o [ali religionga], cashnami: Taitamama illaj huahuagucuna, sapalla huarmigucuna jatun llaquipi cajpica ricugrinami. Cai pachapi imapash nalihuan mapayanamandaca, cuidarishpami causana” nijunmi (Santiago 1:26, 27). Ima mapapash illaj crij cana nishca shimicunataca La Palabra de Dios para Todos traducción Bibliapica “ali religión” nishpami churashca.