Diabloca tianmi. Diabloca shuj espiritumi can. Paica nali tigrashpami Taita Diospa contra tucurca. Paimi ‘cai [mundota] mandaj’ can (Juan 14:30; Efesios 6:11, 12). Bibliapica Diablo imashina cashcata ricuchingapami huaquin shuticunata utilizan. Maijangunalla cashcata ricupashunchi:

•   Satanás nishpami rijsin. Chaica “Taita Diospa contra” nisha ninmi (Job 1:6).

•   Diablo nishpami rijsin. Chaica “llullashpa juchachij” nisha ninmi (Apocalipsis 12:9).

•   Bibliapica Culebra nishpami rijsin. Chaica umachij cashcata ricuchingapami utilizan (2 Corintios 11:3).

•   Nali yuyaita cuj Diablo o tentador (Mateo 4:3).

•   Llullashpa rimaj. Chaica llullapacha cashcatami ricuchin (Juan 8:44).

Nali ruraicunata o tucui gentecunapi nali tiashcataimanga na ricuchijunllu

 Huaquingunaca nali ruraicunata, gentecunapi o Taita Diospi nalicuna tiashcata ricuchingapami Diablo shimitaca utilizan. Pero shinapash Bibliapica Taita Diosca Diablohuan parlashcatami ricuchin. Shinapash Taita Diosca jucha illaj, santo Diosmi can. Shina cashpaca paipa shungupica ima nalipash na tianllu. Taita Diosca paipa shungupi charishca shuj nali personahuanga na parlajushcangachu (Deuteronomio 32:4; Job 2:1-6.) Bibliapica jucha illaj Jesustapash tentaciongunata Diablo churashcatami nin (Mateo 4:8-10; 1 Juan 3:5.) Imashinami ricupanchi Satanasca tianbacha nishpami Bibliapica yachachin. Nalicunata ricuchingapaj utilizashca shuj shimillaca na canllu.

 Ashtaca gentecunami Diabloca na tianllu nishpa crin. ¿Imamandata shina crin? Bibliapica Satanasmi gentecunata umachingapaj pandacunata crichin ninmi (2 Tesalonicenses 2:9, 10). Satanasca pai na tiashcata crichishpami gentecunataca umachishca (2 Corintios 4:4).

  Huaquingunaca nishcami: Lucifer nishpaca Diablopa shuj shutimi can.

 Bibliapica ninmi: Huaquin Bibliacunapica hebreo shimipi “Lucifer” shimica ‘punchayachijuj’ nisha ninmi (Isaías 14:12). Cai shimica Bibliapi shuj profeciamanda parlajuj textocunapimi ricurin. Shinallata cai shimica Babilonia llactamanda reycunamanda parlajushcatami ricuchin. Chai profeciapica chai reycunataca orgullosocuna cashcamandami Taita Diosca llaquichinga nijurcami (Isaías 14:4, 13-20). Cai profeciapica Babiloniamanda reycuna llaqui apajpimi burlarijuj cuenda ‘paimi punchayachijuj’ nishpa nin.

  Huaquingunaca nishcami: Diabloca Taita Diospami trabajan.

 Bibliapica ninmi: Diabloca Taita Diospa contrami can. Paica Taita Diosta sirvijca na canllu. Satanasca Taita Diosta sirvijcunapapash contrami can. Chaimi Jehová Diosta sirvijcunataca catiriashpa, paicunamanda llullacunata nishpa llaquichin (1 Pedro 5:8; Revelación 12:10).