Pisillata tragota ujayqa manan juchachu. Bibliapiqa willanmi vinoqa Diospa regalon kasqanta chaywan kusikusqanchistapas (Salmos 104:14, 15; Eclesiastés 3:13; 9:7). Chaymantapas Bibliaqa nillantaqmi vinoqa saludninchispaq jampi kasqanta (1 Timoteo 5:23).

 Jesuspas kay allpapi kashaspaqa vinotaqa ujaqmi (Mateo 26:29; Lucas 7:34). Chaymantapas juj casarakuypin Jesusqa juj milagrota ruwaspa unuta vinoman tukuchiran, chayta ruwaspan rikuchiran qoykukuq kasqanta (Juan 2:1-10).

Machayqa mana allin ruwaykunamanmi apawanchis

 Bibliapi willanña vinoqa allinninchispaq kasqanta, ichaqa juchachanmi nishu ujayta machaytapas. Chayraykun juj cristianoqa mana nishutaqa ujananchu (1 Timoteo 3:8; Tito 2:2, 3). Bibliapiqa kanmi allin yuyaychaykuna tragota ama nishuta tomanapaq:

•   Machaq runaqa manan allintañachu piensan, manataqmi yuyayninpiñachu kashan (Proverbios 23:29-35). Chaymantapas manan kasukushanmanchu Bibliapi kay nisqanta: “Cuerpoykichista Diosman jaywaychis kausashaq sacrificiota jina, sonqonman chayaq ch’uya sacrificiota jina, chhaynapin tukuy yuyayniykichiswan Diosta servinkichis”, nispa (Romanos 12:1).

•   Machasqa runaqa manan controlakuyta atinchu. Chaymi imatapas mana allinta ruwan (Oseas 4:11; Efesios 5:18).

•   Machaq runaqa wajchayapunmi, imaymana onqoytaqmi jap’ipun (Proverbios 23:21, 31, 32).

•   Jehová Diosqa cheqnikunmi machaytaqa (Proverbios 23:20; Gálatas 5:19-21).

¿Imaynapin yachasunman nishuta tomashasqanchista?

 Juj runa tragota nishuta ujatinqa mana allinpin tarikunman jujkunatapas mana allintan ruwanman. Bibliapi machaymanta rimaspaqa manan tragota nishuta ujaspa yuyaynin chinkanankama machayllamantachu rimashan. Aswanpas pipas tragota ujashaspa manaña yuyayninpichu kashan, jujkunawanpas discutishan, chikan thanpi-thanpitataq purishan chayqa, chay runaqa machasqañan kashan (Job 12:25; Salmos 107:27; Proverbios 23:29, 30, 33). Chaymantapas sichus juj runa nishuta ujashaspa manaña machasqachu rikukunman chaypas, payqa imaymana llakipin tarikunqa (Lucas 21:34, 35).

¿Jayk’aqmi mana ujanapunichu tragota?

 Imakunapi tarikuspan juj cristiano manapuni tragota ujananchu:

•   Jujkunata ama iñiyninpi urmachinapaq (Romanos 14:21).

•   Juj nacionpi autoridadkuna trago tomayta jark’aqtinku (Romanos 13:1).

•   Sichus machaq kasqanta mana saqeyta atinchu chayqa, tukuy atisqantan ruwanan tragota amaña malliykunanpaq (Mateo 5:29, 30).