¿Pikunan janaq pachata rinku?
¿Ima ninmi Biblia?
Diosmi ajllarqan juj t’aqa cristianokunata, paykunaqa wañusqanku qhepamanmi janaq pachapi tiyanankupaq kausarimpunqaku (1 Pedro 1:3, 4). Paykunaqa ajllasqa kasqanku qhepamanqa astawanmi kallpachakunanku allin iñiyniyoq kanankupaq, Diospa yachachikuyninkunaman jina kausanankupaq, mana chayqa manan janaq pachapi premionkuta chaskiyta atinkumanchu (Efesios 5:5; Filipenses 3:12-14).
¿Imatan janaq pachapi ruwanqaku?
Jesuswan kuskan waranqa watakuna kay ajllasqa cristianokunaqa reykuna, sacerdotekuna ima kanqaku (Apocalipsis 5:9, 10; 20:6). Paykunawanmi janaq pachapi mosoq gobierno kanqa chaytan Bibliapi nishan “mosoq cielo” nispa. Chaymantapas kay pachapi Diosta kasukuq runakunatan kamachimunqaku paykunatan Bibliapi nishan “mosoq pacha” nispa. Kay reykuna kamachikamuqtinkun kay jallp’anchispi chanin kausay kanqa qallariypi Diospa munasqanman jina (Isaías 65:17; 2 Pedro 3:13).
¿Jayk’an janaq pachaman rinqaku?
Bibliaq nisqanman jinaqa 144.000 runakunan kausarichisqa kanqaku janaq pachapi tiyanankupaq (Apocalipsis 7:4). Juj rijuriypin apóstol Juan rikurqan “Corderota otaq [Jesucristota kausarimpusqan qhepaman] Sión orqopi sayashaqta, paywan kuska 144.000 runakunatawan” (Apocalipsis 14:1-3; Juan 1:29; 1 Pedro 1:19). Sión orqoqa representan Jesusman, 144.000 ajllasqa cristianokunawan, janaq pachamanta kamachikamunankupaq Jehová Diosmanta ancha importante llank’ayta chaskisqankutan (Salmos 2:6; Hebreos 12:22).
“Diospa wajasqankuna, paypa ajllasqankuna” Cristowan kuska gobiernonpi kamachikuqkunatan nikullantaq: “Pisi t’aqa ovejakuna”, nispa (Apocalipsis 17:14; Lucas 12:32). Kaymi rikuchin Cristoq llapan ovejankunamantaqa janaq pachapaq ajllasqa cristianokunaqa pisilla kasqankuta (Juan 10:16).
Janaq pachaman rijkunamanta pantasqa yachachikuykuna
Wakin runakunaq creesqanku: Llapa allin runakunan janaq pachamanqa rinku.
Cheqaq yachachikuy: Diospa prometesqanman jinaqa allin runakunaqa kay jallp’apin tiyanqaku (Salmos 37:11, 29, 34).
Jesusmi nirqan: “Manan pipas janaq pachamanqa wicharqanchu”, nispa (Juan 3:13). Chay nisqanwanmi sut’ita entiendenchis manaraq Jesús kay jallp’aman jamushaqtin ñaupa tiempopi wañupuq allin runakunaqa manan janaq pachamanchu rirqanku. Paykunamantan kashanku: Abrahán, Moisés, Job, David (Hechos 2:29, 34). Paykunaqa kay jallp’api tiyanankupaqmi kausarichisqa kanqaku (Job 14:13-15).
Janaq pachapaq kausarimpuytan Biblia nin: “Ñaupaq kaq kausarimpuy”, nispa (Apocalipsis 20:6). Chhaynaqa kanqapunin jujkaq kaq kausarimpuypas chayqa kay allp’api kausarimpuymi.
Bibliapi willasqan jina Diospa gobiernonpiqa “manan wañuy” kanqachu (Apocalipsis 21:3, 4). Chaywanmi entiendenchis wañuyqa kay jallp’anchismantan chinkapunqa, janaq pachapiqa manan wañuyqa kanchu.
Wakin runakunaq creesqanku: Sapankanchismantan janaq pachapichus icha kay jallp’apichus tiyayta munasqanchisqa.
Cheqaq yachachikuy: “Janaq pachapi premiota qonanpaq” otaq janaq pachaman pipas rinanpaqqa Diosmi ajllan junt’aq sonqo cristianokunataqa (Filipenses 3:14). Chhaynaqa janaq pachaman pipas rinanpaqqa Diosmi decidin manan sapanka runachu (Mateo 20:20-23).
Wakin runakunaq creesqanku: Wiñay kausayqa kanqa janaq pachapaq mana ajllasqa runakunapaqmi.
Cheqaq yachachikuy: Pikunachus kay jallp’api wiñaypaq tiyanqaku chay runakunamantan Diosqa nin: “Llaqtayqa”, “ajllakusqaykunaqa” “ñoqa Señor Diosmi paykunataqa saminchashallasaqpuni”, nispa (Isaías 65:21-23, Diospa Simin Qelqa). Chay runakunaqa qallariypi imatas Dios munarqan chaytan junt’anqaku, sumaq paraisopin mana juchayoq ch’uya runakuna wiñaypaq tiyanqaku (Génesis 1:28; Salmos 115:16; Isaías 45:18).
Wakin runakunaq creesqanku: Apocalipsis libropi 144.000 numeroqa juj rijch’anachiyllamantan rimashan.
Cheqaq yachachikuy: Apocalipsis libropiqa kanmi imatapas rijch’anachiq numerokuna, ichaqa wakin numerokunaqa manan juj rijch’anachiymantachu rimashan. Ejemplopaq Bibliapi nin: “Corderoq chunka iskayniyoq apostolninkunaq sutin”, nispa (Apocalipsis 21:14). Chaymantapas juj textokunan yanapawallasunmantaq 144.000 numeroqa mana juj rijch’anachiychu kasqanta.
Apocalipsis 7:4 nin: “144.000 runakuna [janaq pachapi tiyanankupaq] sellasqa kasqaku”, nispa. Chay nisqan qhepallamanmi nillantaq juj t’aqa runakunamanta: “Mana piqpa yupay atinan ancha askha runakuna”, nispa. Kay “ancha askha runakunaqa” salvasqan kallankutaq (Apocalipsis 7:9, 10). Sichus 144.000 número juj rijch’anachiylla kanman chayqa, manan iskay kaq t’aqa runakunamantaqa rimanmanñachu karqan. a
Chaymantapas 144.000 runakunamantaqa Biblia nin: “Paykunaqa runakuna ukhumantan rantisqa karqanku, Diospaq corderopaqwan ñaupaq ruru jina kanankupaq”, nispa (Apocalipsis 14:4). “Ñaupaq ruru” nispaqa rimashan ajllasqa pisi t’aqa runakunallamantan. Chay pisi t’aqa runakunallan kamachikamunqaku janaq pachamanta Jesucristowan kay pachapi ancha askha runakunata (Apocalipsis 5:10).
a Robert Thomas profesormi Apocalipsis 7:4 textopi 144.000 numeromanta qelqaspa nirqan: “Chay numeroqa manan rijch’anachiychu, manan Apocalipsis 7:9 textopi nisqan jinachu. Chay número rijch’anachiylla kanman chayqa manan Apocalipsis libropi juj numerokunatapas entiendeyta atisunmanchu”, nispa (Apocalipsis 1-7: An Exegetical Commentary [Comentario exegético de Apocalipsis 1-7], 474 paginata.
Astawan yachanaykipaq
BIBLIAMANTA YACHACHIKUYKUNA
¿Iman Diospa gobiernon?
Jesús kay pachapi predicaspaqa Diospa gobiernonmantan astawanqa rimaran. Unay tiempoñan runakunaqa mañakushanku gobiernon jamunanpaq.
BIBLIAMANTA YACHACHIKUYKUNA
Imaynatachus Bibliamanta estudiota qoyku chayta yachay
Bibliamanta gratislla yachay.