Janet nin: “Papaypa wañupusqan qhepallamanmi qosay niwarqan huk warmiyoq kasqanta. Huk p’unchaymi mana imata niwaspanku p’achanta aparikuspa pasapurqan”, nispa. Janetqa tarirqanmi llank’anata ichaqa manan chaypi ganasqan aypaqchu. Hinaspapas ninmi: “Imaymana ruwanay kasqanta qhawarispaymi sinchita llakipakurqani. Niqmi kani: ‘¿Imatan ruwasaq huk tayta-mamakuna hina wawaykunaman tukuy necesitasqankuta qonaypaq?’, nispa. Kunankaman p’enqakuni runakuna qhawawaqtinku. Sonqonkupiqa ninkupaschá: ‘¿Manachu imatapas ruwanman karqan qosan mana ripunanpaq?’”, nispa.

¿Iman Janet-ta yanapan llakipakuyninta atipananpaq? Diosmanta mañakuy, chaysi Diosman asuykachin, paymi nin: “Tutakunan astawanqa llakikuni. Ch’in kaqtinmi astawan mana allin pensamientokuna umayman hamun. Diosmanta mañakuqtiy Bibliata leeqtiymi chayraq allinta puñuni. Filipenses 4:6, 7 anchata yanapawan, chaypin nin: ‘Ama imamantapas llakikuychischu, aswanpas tukuy ima necesitasqaykichistapas Diosmanta mañakuychis, rogakuywan mañakuspaykichistaq Diosman graciasta qoychis’, nispa. Mayninqa Diosmanta mañakuspallan illariq kani, hinan tutamantanqa sonqoy ‘thak’ niq”, nispa.

Llakikuy hap’iwaqtinchisqa orqo patapi Jesuspa yachachisqanta yuyarina, paymi nirqan: “Yayaykichisqa manaraq mañakushaqtiykichismi yachanña imakunatachus necesitasqaykichista”, nispa (Mateo 6:8). Arí, Diosqa tukuytan yachan, ichaqa munanmi mañakunanchista. Mañakusun chayqa astawanmi payman asuykusun ‘hinan paypas asuykamuwasun’ (Santiago 4:8).

Mañakuspaqa manan llakikuynillanchistachu pisiyachinchis. Diosqa uyarinpunin mañakusqanchista,  chaymi cuidan paypi confiaqkunata (Salmo 65:2). Jesuspas qatikuqninkuta yachachirqan ‘mana chiriyaspa mañakunankupaq’ (Lucas 18:1). Diosmanta mañakuspaqa mana iskayaspan yanapayninta yuyaychayninta ima mañakunanchis. Mañakushallasun chayqa, yachanqan paypi iñisqanchista paypi confiasqanchistapas (1 Tesalonicenses 5:17).

Diospi iñinapaqqa allintan payta reqsina (Juan 17:3). Chaypaqqa Bibliatan estudiana, chaypin yachasun imayna kasqanta, imayna piensasqanta, sapankanchispi interesakusqantapas. Ichaqa manan hawan-ukhullatachu yachana. Piwanpas amigontin kanapaqqa manan iskay-kinsa p’unchayllapichu reqsinakunchis, aswanpas unay tiempo. Diospa amigon kanapaqpas paypi confianapaqpas allintan reqsinanchis. Payta allinta reqsispan munasqanman hina imatapas ruwayta munasun, hinan paypas yanapawasun (2 Corintios 10:15; Juan 8:29). Chaymi Janet-tapas yanapan llakipakuyninta atipananpaq.

Janetmi nin: “Kunankamapas Diosqa manan saqewankuchu chaymi ñoqaqa astawan paypi iñini. Manan ñoqallaykumantaqa sasachakuykunapi tarikusqaykuta atipaykumanchu karqan. Sapa kutilla mañakuqtiymi imaymanapi Diospa makinta rikuq kani. Yanapawasqanta yuyarispan sapa kutilla Diosta agradecekuni. Payqa necesitasqay tiempopipunin yanapawan. Hinaspapas sumaq amigokunatan qowan, paykunaqa allin ejemplon wawaykunapaq kanku, liston kashanku yanapawanankupaqpas. *

”Diosqa ‘cheqnikunmi t’aqanakuytaqa’, chayraqmi kunan chayta entiendeni (Malaquías 2:16). Traicionasqa warmipas qharipas sinchitan llakikuyku. Unayña pasarqon qosay saqewasqanmanta chaypas, mayninqa sonqoypin sinchita llakikuni. Ichaqa chayta qonqanaypaqmi hukkunapaq allinkunata ruwani”, nispa. Chaymi Janet-ta yanapan hukkunamanta mana t’aqakunanpaq (Proverbios 18:1). *

Janetmi nin: “‘Diosqa mana tayta-mamayoqkunaq taytanmi, viudakunatapas amachanmi’, chay yachaymi anchata kallpachawan. Payqa manan hayk’aqpas qosay hinaqa saqerpariwanqakuchu”, nispa (Salmo 68:5). Janetqa allintan yachan Diosqa mana pitapas pruebaman churasqanta, aswanmi yachayta, ‘hatun atiyta’ qowanchis llakipakuykunata atipanapaq (Santiago 1:5, 13; 2 Corintios 4:7).

Ichaqa, ¿iman yanapawasunman wañuy patapi tarikusqanchismanta llakipakuqtinchis?