“Chay reykuna kamachikushaqtinmi, Hanaq Pacha Diosqa mana hayk’aq thunikuq suyuta sayarichinqa, manataqmi wak suyuqa chayta kamachinqachu, aswanpas llapa suyukunatan ñut’uspa tukunqa, wiñaypaqtaq kanqapas” (Daniel 2:44).

Diospa Gobiernonqa hanaq pachamanta kamachimunqa. Jesustan akllarqan chay Gobiernopi kamachikunanpaq. Paymi kay pachapi kamachikuqkunaq rantipi pachantinta kamachinqa, chhaynapi Diospa munaynin kay pachapipas ruwakunanpaq (Mateo 6:9, 10). “Señorninchis Qespichiqninchis Jesucristoq” kamachisqan Gobiernoqa wiñaypaqmi kanqa. ¿Imarayku? Manañan runakuna kamachisqankurayku. Chaymi thak kawsayqa mana tukukunqachu (2 Pedro 1:11).

“Kikin Satanaspas k’anchashaq angelmanqa tukunmi. Chayraykun Satanasta serviq runakunaq chanin ruwaqman tukusqanqa mana musphanapaqchu. Ichaqa p’uchukayninkun ruwasqankuman hina kanqa” (2 Corintios 11:14, 15).

Sut’itan reqsikunqa pantasqa religionkunaqa Saqraq paqarichisqan kasqanta. Chay religionkunan chinkachisqan kanqaku, chaymi manaña religionninkurayku wañuchinakuykuna nitaq maqanakuykunapas kanqañachu. “Kawsaq cheqaq Diosta” munakuqkunan “Diospa Espiritunpa yanapasqan, Diospa kayninman hinapuni” servinqaku (1 Tesalonicenses 1:9; Efesios 4:5; Juan 4:23).

“Diostaqmi paykunawan kashanqa [...] paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñawpaqkaqkunaqa manaña kapusqanrayku” (Apocalipsis 21:3, 4).

Chaykunatan Diosqa Wawanwan ruwanqa, paymi kawsayninta ñoqanchisrayku qorqan (Juan 3:16). Jesuspa yanapayniwanmi ch’uyaman tukupusunchis.  Diosmi ‘weqenchista pichanqa’ manañan ñak’ariykuna kanqañachu runakunawan Dios kasqanraykun. Pisi tiempollamantan chinkapunqa ñak’ariykuna pantaq kasqanchispas. “Chanin runakunaqa kay hallp’atan hap’ikapunqaku, chaypin wiñaypaq tiyanqaku” (Salmo 37:29).

“Hinan [Jesusqa] dragonta hap’ispa waranqa watapaq watarqorqan. Chay dragonmi ñawpa mach’aqwaypas, saqrapas, Satanaspas. Chinkay-chinkay ukhumantaq payta wikch’uykuspa wisq’aykurqan, hinaspa wisq’ana patapi ama kichanapaq selloykurqan, amaña astawan suyukunata q’otunanpaq” (Apocalipsis 20:2, 3).

Manañan Satanaspas supayninkunapas kanqañachu, chinkay-chinkay ukhumanmi wikch’uykusqa kanqaku, chaymi mana imatapas ruwanqakuñachu. ¡May munaymi chay tiempopi kawsay kanqa!

Tukukuy p’unchaykunapi tukuy ima rikusqanchisqa ‘manchay ñak’ariypin’ tukupunqa. Jesusmi nirqan: “Manchay ñak’ariymi kanqa, chay hinaqa manan hayk’aqpas kay pacha qallariymantapacha kunankama karqanchu, manataqmi kanqapaschu”, nispa (Mateo 24:21).

‘Manchay ñak’ariy’ tiempopin imaymana pasanqa, ‘Tukuy-atiyniyoq Diospa hatun p’unchayninpitaq’ tukukunqa, chay guerratan reqsikun “Armagedón” nispa (Apocalipsis 16:14, 16).

Chanin kawsaypi tiyayta munaqkunaqa, maytan munashanku kay pachapi mana allinkuna tukunanta. Qhawarisun ima allinkunata Diospa Gobiernon apamunqa chayta.

‘Ancha askha runakunan’ thakpi kawsanqaku: Biblian willawanchis ancha askha runakuna ‘manchay ñak’ariy’ p’unchaypi salvakunankuta, hinaspa mosoq pachapi kawsanankuta (Apocalipsis 7:9, 10, 14; 2 Pedro 3:13). Chay runakunaqa “Diospa Corderon runakunaq huchankunata pampachaq” Jesustan “gracias” ninqaku salvakusqankumanta (Juan 1:29).

Diospa yachachiyninqa allinpunin kanqa: “Kay pachaqa Señor Diosta reqsiq runakunawan hunt’a kanqa” (Isaías 11:9). Jehová Diospa yachachikuyninmi yanapawasun runamasinchiswan sumaqta kawsananchispaq. Jehová Diosmi prometewanchis: “Ñoqan Diosniyki Señor Diosqa kani, ñoqan allinniykipaq yachachiyki, ñoqan purinayki ñantapas pusayki”, nispa (Isaías 48:17).

Wañuqkunan kawsarimpunqaku: Kay Hallp’api kashaspan Jesusqa amigon Lazarota kawsarichirqan (Juan 11:1, 5, 38-44). Chay ruwasqanmi rikuchirqan Diospa Gobiernonpi kamachimuqtin wañuqkunata kawsarichinanta (Juan 5:28, 29).

Wiñaypaqmi kanqa thak kawsay chanin kawsaypas: Jesús kamachiqtinqa manan kanqañachu mana chanin ruwaykuna. Jesusqa yachanmi runaq sonqonpi imachus kasqanta, chaymi reparanqa pichus chanin otaq mana chanin kasqanta. Chanin kawsaq runakunallan mosoq pachapiqa tiyanqaku (Salmo 37:9, 10; Isaías 11:3, 4; 65:20; Mateo 9:4).

Kaykamaqa wakillantan Diospa promesankunamantaqa qhawarirqanchis. Diospa Gobiernon kay pachata kamachiqtinqa ‘thakpin’ tiyasunchis wiñay-wiñaypaqtaq (Salmo 37:11, 29). Runakunata ñak’arichiq kaqkunaqa chinkapunqan, Jehová Diosmi nirqan: “Qhawariy, ñoqan lliw imaymanata mosoqta ruwani. [...] Kay simikunaqa cheqaqmi, hap’ipakunapaq hinataqmi kanpas”, nispa (Apocalipsis 21:5).