KAYPI yuyaykuy, munakusqayki amigoykin mana entiendenaykipaq hina imatapas ruwanman. Chay ruwasqanmanta wakinkunaqa mana allinpaq qhawarinkuman astawanqa ninkuman: “Mana chanin ruwaq”, nispa. Chhaynapi tarikuspa, ¿paykunaq partenmantachu kawaq icha amigoykiq willanasuykitachu suyawaq? Sichus pay mana chaypichu kanman sut’inchananpaq chayri, ¿pacienciawanchu suyawaq chaykuna sut’inchakunanta?

Manaraq imatapas ruwashaspaqa kaytan ñawpaqta tapukunayki: “¿Allintachu amigoyta reqsini? ¿Imaraykun allinpaq qhawarini?”, nispa. Chayta ruwayqa may allinmi kanman. Diosta mana khuyapayakuq hinata qhawarinamantaqa, ¿manachu ñawpaqta paymanta t’aqwirisunman imaynapuni kasqanta?

Yaqapaschá Diospa ruwasqanta, hinallata qhawasqanpas sasa entiendey kanman. Chaymi askha runakuna mat’ipayasunkikuman Diosta mana khuyapayakuqta hina qhawarinaykipaq. Sichus imayna Dios kasqanta yachaytapuni munanki chayqa, paymanta t’aqwirinayki, chhaynapin yachanki imayna amigo kasqanta.

Yaqapaschá sinchi sasachakuypi tarikusqaykirayku Diosta mana amigoykita hinachu qhawarirqanki. Diosqa manapunin ima sasachakuypipas churawasunmanchu, aswanpas payqa askha bendicionkunatan qowanchis. Yachasqanchis hina Satanasmi “kay pachapi kamachikuq” (Juan 12:31). Paymi kay pachapi imaymana ñak’ariykunata apamuwanchis. Hinaspapas sasachakuyninchisqa kallantaqmi huchayoq runa kasqanchisrayku otaq qonqaylla chaykunapi tarikusqanchisrayku.

¿Imakunatan Dios ruwarqan? Bibliaq nisqan hina Diosmi kay pachata hanaq pachatapas kamarqan, chaykunamanta ancha sumaq kamasqa cuerponchis, hinallataq samayninchispas kawsayninchispas makinpi kashan (Salmo 124:8; 139:14; Daniel 5:23). ¿Ima ninantaq chayri?

Chayqa ninanmi Diosrayku kawsanchis (Hechos 17:28). Kay pachapi imaymana kaqkunapas anchata admirachiwanchis. Hinaspapas Jehová Diosmi regalota hina qowanchis munakuyta, huk nisqalla kawsayta, p’osqota, misk’ita reparanapaq, makinchista, ninrita uyarinapaq, senqata muskhinapaq ima (Santiago 1:17). Chaykuna qowasqanchis, ¿manachu ancha munakuq amigota hina qhawarichiwanchis?

Chaykunata yachaspapas yaqapaschá sasachakunkiraq Diospi confianaykipaq. Otaq niwaq: “Diostaqa manan allintaraqchu reqsini”, nispa. Kay pisi willakuykunapiqa manan llapanta sut’inchayta atiykuchu imaraykus wakin runakuna Diosta mana khuyapayakuqta hina qhawarinku chayta. Chaywanpas, ¿manachu kallpachakusunman Diosta allinta reqsinapaq? * Sichus paymanta astawan t’aqwirinki chayqa, yachanki ‘Diosqa munakuq’ kasqanta (1 Juan 4:8).