Bibliaq nisqan hina, iñiyqa sut’inta imatapas yachaspa chaypi mana iskayaspa creeymi. Diospi iñiqqa manan iskayanchu Diospa prometesqanmanta, aswanmi hunt’akunanta suyakun.

Moisesqa Diospa prometesqanta hap’ikuspan chayman hina kawsarqan (Genesis 22:15-18). Payqa mana imamanta llakikuspan Egipto llaqtapi kawsanman karqan, qhapaqmi kanmanpas karqan, ichaqa “Diospa llaqtanwan kuska muchuchisqa kayta yuyaykurqan, pisi p’unchaykunalla huchaq kusichikuyninpi kawsananmantaqa” (Hebreos 11:25). ¿Mana allinta yuyaykuspachu chayta decidirqan? ¿Pesapakurqanchu qhepaman chay decidesqanmanta? Manan, Bibliaq nisqan hina, payqa “mana rikuna Diostan rikushanmanpas hina qhawaspa qaqata sayarqan” (Hebreos 11:27). Payqa manan hayk’aqpas pesapakurqanchu iñisqanman hina decidesqanmanta.

Hinaspapas Moisesqa kallpachakurqanmi paywan kaq llapa runakunata iñiyninpi yanapananpaq. Qhawarisun imaynatan israelitakunata kallpacharqan Puka lamar-qochaq qayllanpi kashaqtinku Egiptomanta ejercito muyuykuqtin. Chaypin israelitakuna sinchita mancharikuspa Jehová Diosta Moisesta ima waqyakurqanku. ¿Imatan Moisés ruwarqan?

Moisesqa manachá yuyaykullarqanpaschu Jehová Dios Puka lamar-qochata kichariqtin chayninta ch’aki pampanta hina ayqenankuta. Chaywanpas confianzawanmi suyakurqan Diospa yanapayninta, kaqllatataqmi israelitakunamanta suyarqan. Éxodo 14:13 texton nin: “Moisestaq paykunata nirqan: -Ama mancharikuychischu, allinta sayaychis, kunanmi Señor Diospa qespichiwananchispaq ruwasqanta rikunkichis”, nispa. ¿Chay nisqanwan kallpacharqanchu israelitakunaq iñiyninta? Arí, kallpacharqanmi, Biblian willan Moisespas llapa israelitakunapas ‘iñiywan’ ‘Puka Qochata ch’aki hallp’ata hina chimpasqankuta’ (Hebreos 11:29). Iñiyniyoq kasqanmi pay kikinta llapa paywan kaq runakunatapas qespichirqan.

Ñoqanchispas Moisés hinan Diospa prometesqanta hap’ikuspa chayman hina kawsananchis. Jehová Diosmi prometewanchis payta ñawpaqta servisun chayqa ima necesitasqanchistapas qowananchista (Mateo 6:33). Ñoqanchisqa kallpachakunanchismi kay pachapi qhapaq kayta mana munapayanapaq. Sichus Jehová Diosta servinanchisrayku imachus necesitasqallanchiswan kawsasun chayqa yanapawasun. Paymi nin: “Manan saqerparisqaykichu, manataqmi wikch’urparisqaykipaschu”, nispa (Hebreos 13:5).

Hinaspapas Moisés hinan kallpachakunanchis hukkunata iñiyninkupi yanapanapaq. Tayta-mamakunan wawankuta huch’uychanmantapacha yanapananku Diospi iñinankupaq. Paykunaqa huch’uymantapachan yachananku Diospa kasqanta kamachikuyninkunamantapas. Yachanankun Diosta kasukuspaqa allin kanankuta (Isaías 48:17, 18). Sichus tayta-mamakuna wawankuman yachachinqaku “Diospa kasqanta, Diosqa maskhaqninkunata saminchaq kasqantapas” chayqa allinninkupaqmi kanqa (Hebreos 11:6).