¿Kanchu Diospa atiynin wañuyta chinkachinanpaq? Arí, kanmi. Manan kay pachapi imapas kanchu Tukuy atiyniyoq Diospa mana ruway atinanqa (1 Corintios 15:26; Éxodo 6:3). Diosmi prometewanchis mosoq pacha chayamuqtin wañuyta chinkachispa wañupuqkuna kawsarichinanta. * ¿Hunt’anqachu Dios chay prometesqanta? Kikin Churin Jesusmi chayta sut’inchawasun, chaytaqmi kallpachawasun chay p’unchayta suyakunapaq. (Leey Mateo 22:31, 32.)

Jesusmi wañupuqkunaq kawsarimpunanpi mana iñiq saduceo runakunata nirqan: “Wañusqakunaq kawsarimpunanmantapas, ¿manachu leerqankichis qankunaman Diospa rimaykusqanta? Diosmi nirqan: ‘Ñoqan kani Abrahampa Diosnin, Isaacpa Diosnin, Jacobpa Diosnin’, nispa. ¡Diosqa manan wañusqakunaq Diosninchu, aswanpas kawsaqkunaq Diosninmi!” nispa. Chaytaqa 1514 watapi (manaraq Jesús hamushaqtin) ch’aphraq ñawpanpi Moisesman Diospa nisqantan yuyarichisharqan (Éxodo 3:1-6). Jesuspa nisqan hina, “Ñoqan kani Abrahampa Diosnin, Isaacpa Diosnin, Jacobpa Diosnin” nispa Dios nisqanwanmi rikuchirqan wañupuqkunaq kawsarimpunanta. ¿Imaynapin chayta yachanchis?

Jehová Dios Moisesman chayta nishaqtinqa ñan Abrahampa wañupusqanmanta 329 wataña pasasqa, Isaacpa wañupusqanmanta 224 wata, Jacobpa wañupusqamantataq 197 wata. Chaywanpas Diosqa manan nirqanchu “Ñoqan karqani Diosnin” nispachu aswanmi nirqan “Ñoqan kani Diosnin” nispa. ¿Imarayku chayta nirqan?

Jesusmi nirqan: “Diosqa manan wañusqakunaq Diosninchu, aswanpas kawsaqkunaq Diosninmi”, nispa. Kaypi yuyaykuy: sichus mana kawsarimpuy kanmanchu chayqa, Abrahampas, Isaacpas, Jacobpas wañusqallan kashankuman Diostaq “wañusqakunaq Diosnin” kapunman. Sichus serviqninkunata wañuymanta mana qespichiyta atinmanchu chayqa, mana atiyniyoq hinachá qhawarisqa kanman.

Chhaynaqa, ¿ima kanqa Abrahammanta, Isaacmanta, Jacobmanta, wañupuq huk kamachinkumantapas? Chaymantan Jesús nirqan: “Paypaqqa llapankupas kawsashanmi”, nispa (Lucas 20:38). Jehová Diosqa kawsarichinqapunin paykunata chaymi kawsashaq runakunamanta hina paykunamanta rimarqan (Romanos 4:16, 17). Paypa yuyaynillanpin kashan chay runakunaqa, kawsarimpuy p’unchaypitaqmi kawsarichinpunqa.

¿Munawaqchu wañupuq familiaykikunawan yapamanta tupayta? Chhaynaqa kayta yuyariy: Diosqa tukuy atiyniyoqmi, chaymi wañuytapas chinkachinqa. Manan pipas hark’ayta atinqachu wañusqakuna kawsarichinanta. ¿Manachu astawan yachayta munawaq chay promesamanta, chay promesa ruwaq Diosmantapas? Chayta ruwanki chayqa ‘kawsaqkunaq Diosninmanmi’ astawan asuykunki.